മഞ്ജുവാര്യര്‍ മുഖ്യ വേഷത്തിലെത്തിയ തമിഴ് ചിത്രം ‘അസുരൻ’ തീയേറ്ററുകളിൽ വിജയകരമായി പ്രദര്‍ശനം തുടരുകയാണ്. അതിനിടെയാണ് തെന്നിന്ത്യൻ സ്റ്റൈൽ മന്നൻ രജനികാന്തിൻ്റെ പുതിയ ചിത്രത്തിനായി മഞ്ജു വാര്യരെ സമീപിച്ചതായുള്ള പുതിയ വാര്‍ത്തകൾ പുറത്ത് വരുന്നത്.തല അജിത്തിനെ വെച്ച് നിരവധി ചിത്രങ്ങൾ സംവിധാനം ചെയ്ത ശിവ ഒരുക്കുന്ന ചിത്രത്തിലേക്കാണ് മഞ്ജുവിന് ക്ഷണം ലഭിച്ചതെന്നാണ് സിനിമ വൃത്തങ്ങളിൽ നിന്നുള്ള റിപ്പോർട്ട്. ചിത്രത്തിന് ഇത് വരെ പേരിട്ടിട്ടില്ല.
രജനിയുടെ 168ാം ചിത്രത്തിലേക്കാണ് മഞ്ജുവിനെ നായികയായിപരിഗണിക്കുന്നത്. അസുരനിലെ മഞ്ജു വാര്യരുടെ അഭിനയം രജനികാന്തിനും സംവിധായകൻ ശിവയ്ക്കും അത്രയേറെ ഇഷ്ടമായിട്ടുണ്ടെന്നും അതിനാലാണ് മഞ്ജുവിനെ അടുത്ത ചിത്രത്തിലേക്ക് തെരഞ്ഞെടുക്കാൻ കാരണമെന്നും റിപ്പോര്‍ട്ടുകളിൽ പറയുന്നു.
