വോഡാഫോണ്‍ ഖത്തര്‍ അന്താരാഷ്ട്ര കോള്‍ നിരക്കില്‍ പുതിയ ഇളവുകള്‍ പ്രഖ്യാപിച്ചു. പുതിയ പദ്ധതി അനുസരിച്ച് സ്വന്തം രാജ്യത്തേക്കോ മറ്റ് ഇടങ്ങളിലേക്കോ കൂടുതല്‍ അന്താരാഷ്ട്ര വിളികള്‍ നടത്തുന്നവര്‍ക്ക് നിരക്കില്‍ വന്‍ ഇളവുകള്‍ ലഭിക്കുമെന്ന് വോഡാഫോണ്‍ ഖത്തര്‍ സി.ഇ.ഒ ഗ്രഹാം മീര്‍ അറിയിച്ചു. ഈ പദ്ധതിയില്‍ ഉള്‍പ്പെടുത്താത്ത മറ്റ് അന്താരാഷ്ട്ര കോള്‍ നിരക്കുകള്‍ മിനിറ്റിന് 2.50 ഖത്തര്‍ റിയാല്‍ ആയിരുന്നത് 1.95 ആയി കുറച്ചിട്ടുണ്ടെന്നും ഇദ്ദേഹം വ്യക്തമാക്കി.

റിയല്‍ എസ്റ്റേറ്റ് കമ്പനിയായ ആര്‍.എം.സി.ഒ പ്രോപ്പര്‍ട്ടീസ് പ്രവാസികള്‍ക്കായി കമ്യൂണിറ്റി ലിവിംഗ് കോളനി എന്ന പേരില്‍ ഹൗസിംഗ് കോളനി പദ്ധതി പ്രഖ്യാപിച്ചു. തൃശൂരിലാണ് പദ്ധതി നിലവില്‍ വരുകയെന്ന് കമ്പനി ദോഹയില്‍ ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ന്യായമായ വില ഈടാക്കി താമസക്കാര്‍ക്ക് നവീന സൗകര്യങ്ങള്‍ നല്‍കുന്ന പദ്ധതിയാണ് തങ്ങളുടേതെന്നും കമ്പനി ഭാരവാഹികള്‍ അറിയിച്ചു.