കണ്ണൂര്‍: ഗായകനും നടനും സംവിധായകനുമായ വിനീത് ശ്രീനിവാസന്‍ വിവാഹിതനായി. ചെന്നൈയില്‍ സ്ഥിര താമസമാക്കിയ പയ്യന്നൂര്‍ സ്വദേശി നാരായണന്റേയും ഉഷയുടേയും മകള്‍ ദിവ്യയാണ് വധു. കണ്ണൂര്‍ ദിനേശ് ഓഡിറ്റോറിയത്തില്‍ രാവിലെ 10.30 നായിരുന്നു താലി കെട്ട്. കോളേജ് പഠന കാലത്ത് ആരംഭിച്ച പ്രണയമാണ് ഇവരുടേത്. ചെന്നൈ കെ. സി. ജി. കോളേജ് ഓഫ് ടെക്നോളജിയില്‍ വിദ്യാര്‍ത്ഥികളായിരുന്നു ഇരുവരും.
നടന്മാരായ നിവിന്‍ പോളി, ജഗദീഷ്, സുധീഷ്, നടി സംവൃത സുനില്‍, സംവിധായകരായ ഹരിഹരൻ, ലാല്‍ ജോസ്, പ്രതിപക്ഷ ഉപനേതാവും സി. പി. എം. പോളിറ്റ് ബ്യൂറോ അംഗവുമായ കോടിയേരി ബാലകൃഷ്ണൻ, ഇ. പി. ജയരാജൻ, പി. ജയരാജൻ, സിനിമാ നിര്‍മ്മാതാവും പ്രമുഖ വ്യവസായിയുമായ പി. വി. ഗംഗാധരൻ, ഗോകുലം ഗോപാലന്‍ തുടങ്ങി നിരവധി പ്രമുഖര്‍ പങ്കെടുത്തു.
നടനും തിരക്കഥാകൃത്തും സംവിധായകനുമായ ശ്രീനിവാസന്റെ മൂത്ത മകനായ വിനീത് മലര്‍‌വാടി ആര്‍ട്സ് ക്ലബ് എന്ന ചിത്രമായിരുന്നു ആദ്യമായി സംവിധാനം ചെയ്തത്. അടുത്തയിടെ റിലീസ് ചെയ്ത രണ്ടാമത്തെ ചിത്രമായ തട്ടത്തിന്‍ മറയത്ത് എന്ന സിനിമ വന്‍ വിജയമായി. നിരവധി ചിത്രങ്ങളില്‍ അഭിനയിച്ചിട്ടുള്ള വിനീത് അറിയപ്പെടുന്ന ഗായകന്‍ കൂടെയാണ്.
- എസ്. കുമാര്‍
അനുബന്ധ വാര്‍ത്തകള്‍
വായിക്കുക: filmmakers, wedding
