കൊച്ചി: ഇന്ദ്രജിത്തുമായുള്ള വിവാഹശേഷം സിനിമയില്‍ നിന്നും മാറി നിന്ന പൂര്‍ണിമ ഫാഷന്‍ ഡിസൈനിംഗ് മേഖലയിൽ ഏറെ തിളങ്ങിയ ആളാണ്. പ്രാണ എന്ന തന്റെ ഫാഷൻ ബ്രാൻഡ് തന്നെ പൂര്‍ണിമ അവതരിപ്പിച്ചിട്ടുണ്ട്. ഇപ്പോഴിതാ സിനിമയിലേക്ക് പൂര്‍ണിമ തിരിച്ചെത്തിയിരിക്കുകയാണെന്നാണ് പുതിയ വിശേഷം. ആഷിക് അബുവിന്റെ സംവിധാനത്തിലെത്തുന്ന വൈറസിൽ അഭിനയിക്കുന്നുണ്ടെന്ന വാര്‍ത്ത വന്നതിന് പിന്നാലെ മറ്റൊരു ചിത്രത്തിൽ കൂടി താരം കരാറായിരിക്കുകയാണ്.
അന്നയും റസൂലും, ഞാൻ സ്റ്റീവ് ലോപ്പസ്, കമ്മട്ടിപ്പാടം എന്നീ ചിത്രങ്ങള്‍ക്ക് ശേഷം സംവിധായകൻ രാജീവ് രവി സംവിധാനം ചെയ്യുന്ന സിനിമയായ തുറമുഖത്തിലാണ് പൂര്‍ണിമ വീണ്ടും അഭിനയിക്കുന്നത്. നിവിന്‍ പോളി നായകനായെത്തുന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ കഴിഞ്ഞ ദിവസം പുറത്ത് വന്നത് വൈറലായിരുന്നു.
തുറമുഖത്തില്‍ നിവിന്‍ പോളിയുടെ അമ്മയുടെ വേഷത്തിലാണ് താരം അഭിനയിക്കുന്നതെന്നാണ് സൂചന. വൈറസിലും തുറമുഖത്തിലും ഭര്‍ത്താവും നടനുമായ ഇന്ദ്രജിത്ത് ഉണ്ടെന്നുള്ളതാണ് മറ്റൊരു പ്രത്യേകത.
