മാങ്ങയിട്ട മീന്‍കറി

November 14th, 2011

meencurry-with-mangoes-epathram

മീനും മാങ്ങയും എന്ന് പറയുമ്പോള്‍ എനിക്ക് എന്റെ അമ്മവീട് ആണ് ഓര്‍മ്മ വരിക. ആലപ്പുഴ ജില്ലയിലെ പുളിങ്കുന്നില്‍ ആണ് എന്റെ മമ്മിയുടെ വീട്. അവിടെ മീന്‍ ഇല്ലാത്ത ഒരൊറ്റ ഉച്ചയൂണ് പോലും എനിക്ക് ഓര്‍മ്മയില്ല. വേനലവധി എന്ന് പറഞ്ഞാല്‍ പുളിങ്കുന്നില്‍ പോവാമല്ലോ എന്ന ഒറ്റ ചിന്തയാണ് അന്നൊക്കെ. വീടിനു ചുറ്റും ആറും, തോടും, വയല്‍ പരപ്പുകളുമാണ്. മീന്‍ സുലഭമായി ലഭിക്കും. കരിമീന്‍, വാള, ചേറു മീന്‍ എന്നിങ്ങനെ മീനുകളുടെ ലിസ്റ്റ് നീളും. ഇതൊന്നും പോരാഞ്ഞിട്ട് ഞങ്ങള്‍ കുട്ടികളുടെ വക ചൂണ്ടയിട്ടു പിടിച്ച ചെറു മീനുകളും കാണും. കസിന്‍സ്‌ ഒക്കെ അവധിക്കു എത്തും. എല്ലാവരും കൂടി ചൂണ്ടയുമെടുത്തു രാവിലെ ഇറങ്ങുകയായി. പാടവക്കത്തും, തോടരുകിലും ഒക്കെ കൂട്ടം കൂടി ഇരുന്നു മീന്‍ പിടുത്തം തന്നെ വിനോദം.  പള്ളത്തി, പരല്‍, ചെമ്പല്ലി.. ഇവരൊക്കെയാണ് ഞങ്ങളുടെ ചൂണ്ടയില്‍ പെടുന്നവര്‍. മീന്‍ പിടിച്ചു ഉടനെ തന്നെ ഓടി കൊണ്ട് പോയി അമ്മച്ചിയുടെ (മമ്മിയുടെ അമ്മ) കയ്യില്‍ കൊടുക്കും. അതിനെ അപ്പോള്‍ തന്നെ വെട്ടി വൃത്തിയാക്കി കറി വച്ച് ഉച്ചക്ക് ഊണ് മേശയില്‍ എത്തിച്ചിരുന്നു അമ്മച്ചി. മീന്‍ വറുത്തത്, പീര വച്ചത്, പുളിയിട്ടു വറ്റിച്ചത്, ഇനി ഇതൊന്നുമല്ലെങ്കില്‍ മുറ്റത്തെ മാവില്‍ നിന്നും ഒരു മാങ്ങാ പറിച്ചു മീന്‍ അങ്ങ് മാങ്ങാ ഇട്ടു വയ്ക്കും. ഇനി മാങ്ങയുടെ കാര്യം പറഞ്ഞാലോ, എന്തൊക്കെ വിധം മാങ്ങകള്‍ ആയിരുന്നു.. കിളിച്ചുണ്ടന്‍, നീലം, മൂവാണ്ടന്‍.. അപ്പൊ മീനും മാങ്ങയും എന്ന് പറഞ്ഞാല്‍ അന്ന് അത് സ്പെഷ്യല്‍ ആയിരുന്നില്ല. നമ്മുടെ ചുറ്റുവട്ടത്തു സുലഭമായി ലഭിക്കുന്ന സംഗതികള്‍ കൊണ്ടുള്ള ഒരു കറി. സുഖമുള്ള ഓര്‍മ്മകള്‍.

ഇവിടെ ദുബായില്‍ വന്നപ്പോ മീനും മാങ്ങയും ഒക്കെ വല്ലപ്പോഴും വയ്ക്കുന്ന സ്പെഷ്യല്‍ ഐറ്റംസ് ആയി. ഏതായാലും നല്ല നാടന്‍ രുചിയുള്ള ഒരു മീന്‍ കറി ആണ് ഇത്. ഇനി മീന്‍ മേടിക്കുമ്പോള്‍ ഇത് ഒന്ന് ട്രൈ ചെയ്യൂ. ഞാന്‍ ഇതില്‍ നെയ്മീന്‍ ആണ് ഉപയോഗിച്ചിരിക്കുന്നത്.

ചേരുവകള്‍

മീന്‍ – 1 കിലോ (കഷ്ണം മീനുകള്‍ കൂടുതല്‍ നന്നായിരിക്കും)
മാങ്ങ (നല്ല പുളിയുള്ളത്) – 1 വലുത്  വലിയ നീളന്‍ കഷ്ണങ്ങള്‍ ആയി അരിയുക.
ഇഞ്ചി – 1 ഇഞ്ചു കഷ്ണം ചെറുതായി അരിഞ്ഞത്
പച്ചമുളക് – 3 എണ്ണം നെടുകെ കീറിയത്
ചെറിയ ഉള്ളി – 10 എണ്ണം ചെറുതായി അരിഞ്ഞത്
കറിവേപ്പില – 2 തണ്ട്
മഞ്ഞള്‍പ്പൊടി – 1 ടീസ്പൂണ്‍
മുളകുപൊടി – 11/2 ടേബിള്‍സ്പൂണ്‍
മല്ലിപ്പൊടി – 1 ടീസ്പൂണ്‍
തേങ്ങാ – ഒരു മുറി
വെളിച്ചെണ്ണ – 1ടേബിള്‍സ്പൂണ്‍
കടുക് – 1 ടീസ്പൂണ്‍
ഉലുവ – 1/2 ടീസ്പൂണ്‍
ഉപ്പ് – ആവശ്യത്തിന്

പാകം ചെയ്യുന്ന വിധം

തേങ്ങാ അരച്ച് ഒന്നും രണ്ടും പാല്‍ ഓരോ വലിയ ഗ്ലാസ്‌ വീതം എടുക്കുക. മാങ്ങാ, ഇഞ്ചി, പച്ചമുളക്, മഞ്ഞള്‍പ്പൊടി, മുളകുപൊടി, മല്ലിപ്പൊടി, കറിവേപ്പില, ഉപ്പ് എന്നിവ ഒരു മണ്‍ചട്ടിയില്‍ നന്നായി ഇളക്കി യോജിപ്പിക്കുക. ഇതിലേക്ക് രണ്ടാം പാല്‍ ചേര്‍ത്ത് ഇളക്കി,  മീന്‍ കഷ്ണങ്ങള്‍ ഇട്ടു അടുപ്പത്തു വയ്ക്കുക. മീന്‍ വെന്തു കഴിയുമ്പോള്‍ ഒന്നാം പാല്‍ ഒഴിച്ച് തിളയ്ക്കുമ്പോള്‍ വാങ്ങി വയ്ക്കുക. ഉലുവയും കടുകും കറിവേപ്പിലയും അല്പം ചെറിയ ഉള്ളിയും വെളിച്ചെണ്ണയില്‍ മൂപ്പിച്ച് മുകളില്‍ ഒഴിക്കുക.

- ലിജി അരുണ്‍

വായിക്കുക: ,

അഭിപ്രായം എഴുതുക »

പുട്ട്

November 13th, 2011

puttu-epathram

പുട്ടില്ലാതെ മലയാളിക്ക്‌ എന്ത് ബ്രേക്ക്‌ഫാസ്റ്റ്‌?? അല്ലേ?? കേരളത്തിന്റെ സ്വന്തം പലഹാരം അല്ലേ ഇത്.. പുട്ട് മാഹാത്മ്യം പറഞ്ഞാല്‍ ഒത്തിരി ഉണ്ട്. നായകന്‍റെ പുട്ടു പ്രേമം കാരണം ‘പുട്ട്’ എന്ന് അങ്ങേരെ വിളിക്കുന്ന ഒരു സിനിമ ഉണ്ട്, പുട്ടു ഫാന്‍സ്‌ അസോസിയേഷന്‍ ഉണ്ട്‌ പോരാത്തതിന് വികിപീഡിയയിലും ഇപ്പൊ പുട്ട് ഉണ്ടാക്കുന്ന വിധം പറയുന്നുണ്ട്. പുട്ടും പഴവുമാണ് ലോകം അംഗീകരിച്ചിരിക്കുന്ന ‘സെലിബ്രിറ്റി പെയര്‍’.. പക്ഷേ കേള്‍ക്കുമ്പോഴേ ഞാന്‍ അയ്യേ എന്ന് പറയും. ഇത്രേം സ്വാദുള്ള നമ്മുടെ പുട്ടിനെ പഴം കുഴച്ചു വേസ്റ്റ് ആക്കാമോ?? പാടില്ല!! അത്ര തന്നെ. പുട്ടു പഴം ചേര്‍ത്ത് കഴിക്കണം എന്ന് കണ്ടു പിടിച്ചവനെ കണ്ടാല്‍ എനിക്ക് രണ്ടു ചോദിക്കണം. :-) പുട്ടിനോട് എന്തിനീ ക്രൂരത എന്ന്. പണ്ട് എന്റെ വീട്ടില്‍ പഴം ഒത്തിരി ഉണ്ടാകുമായിരുന്നു. കുല മുഴുവന്‍ പഴുക്കുമ്പോള്‍ എന്റെ മമ്മിയുടെ മുന്‍പില്‍ ഒറ്റ വഴിയെ ഒള്ളു അത് തീര്‍ക്കാന്‍. ദിവസവും ബ്രേക്ക്‌ഫാസ്റ്റ്‌ പുട്ട് തന്നെ. ഉണങ്ങിയ പുട്ട് താഴേയ്ക്ക് ഇറങ്ങണമെങ്കില്‍ പഴത്തിന്റെ സഹായം ഇല്ലാതെ പറ്റില്ലല്ലോ. അങ്ങനെ പുട്ടും പഴവും തിന്ന ഞാന്‍ ഹോസ്റ്റലില്‍ എത്തിയപ്പോള്‍ അവിടെ അതാ കുല പഴുത്താലും ഇല്ലെങ്കിലും പുട്ടും പഴവും തന്നെ. മാത്രവുമല്ല വെള്ളം കണ്ടിട്ടില്ലാത്ത പുട്ട്. ഇതിപ്പോ പട പേടിച്ചു പന്തളത്ത് ചെന്നപ്പോ അവിടെ പാതിരാത്രിയിലും പട എന്ന് പറഞ്ഞപോലെ ആയി.. ഏതായാലും ഞാന്‍ ഒരു ശബഥം എടുത്തു. പുട്ട് നല്ല കറി കൂട്ടിയേ ഞാന്‍ കഴിക്കൂ. കടലക്കറി, പീസ്‌ കറി, മുട്ട കറി, പയര്‍ കറി ഇനി ഇതൊന്നും ഇല്ലെങ്കിലും അല്പം ചിക്കന്‍കറി കൂട്ടിയാണെങ്കിലും ഞാന്‍ പുട്ട് തിന്നോളാമേ.. :-)

ഓണത്തിനിടയ്ക്കാ പുട്ട് കച്ചോടം. :-) പുട്ട് പുരാണം അവിടെ നില്‍ക്കട്ടെ. പുട്ട് ഉണ്ടാക്കുന്നതെങ്ങിനെ എന്ന് നോക്കാം. പുട്ട് നന്നായി നനയണം എന്നതാണ് എന്റെ നിയമം. അരിപ്പുട്ടിനെക്കാള്‍ എനിക്ക് ഇഷ്ടം ഗോതമ്പ് പുട്ടാണ്. താഴെ പറയുന്ന റെസിപ്പിയില്‍ അരിപ്പൊടിയാണ് ഉപയോഗിച്ചിരിക്കുന്നത്. ഇതേ പോലെ തന്നെ ഗോതമ്പ് പുട്ടും ഉണ്ടാക്കാം.

ചേരുവകള്‍

അരിപൊടി – 1 ഗ്ലാസ്,
തേങ്ങ – അര മുറി ചിരകിയത്
ഉപ്പു – പാകത്തിന്
വെള്ളം –  പാകത്തിന്

തയ്യാറാക്കുന്ന വിധം

ഗോതമ്പുപൊടിയില്‍ ഉപ്പു ചേര്‍ത്ത് ഇളക്കുക. വെള്ളം കുടഞ്ഞ് പുട്ടിന്റെ പാകത്തില്‍ നനക്കുക. പാകത്തില്‍ എന്ന് പറയുമ്പോള്‍ മാവ് കയ്യില്‍ ഒട്ടരുത്, എന്നാല്‍ അല്പം ഉരുട്ടി നോക്കിയാല്‍ ഉരുളയായി ഇരിക്കണം. തേങ്ങ ചിരകിയത് പകുതി പൊടിയില്‍ ചേര്‍ത്ത് ഇളക്കുക. പുട്ടുകുറ്റിയില്‍ പൊടിയിട്ട് ഇടക്കിടെ തേങ്ങയും ചേര്‍ത്ത് ആവിയില്‍ വേവിക്കുക. പുട്ട് കുറ്റിക്ക് പകരം ഞാന്‍ ചിരട്ടയുടെ ആകൃതിയില്‍ കിട്ടുന്ന പാത്രം ആണ് ഉപയോഗിച്ചിരിക്കുന്നത്. ഇതില്‍ പൊടി ഇടുന്നതിനു മുന്പേ അടിയില്‍ തേങ്ങാ ചേര്‍ക്കാം. ഏകദേശം 3-4 മിനിറ്റ്‌ കൊണ്ട് പുട്ട് വെന്തു കിട്ടും.

- ലിജി അരുണ്‍

വായിക്കുക: ,

അഭിപ്രായം എഴുതുക »

തക്കാളി ചമ്മന്തി

November 12th, 2011

dosa-tomato-chutney-epathram

തക്കാളി ചമ്മന്തീന്നു പറയുമ്പോള്‍ അത് പല രീതിയില്‍ ഉണ്ടാക്കാം. ഇത് ഞാന്‍ സ്വയം കണ്ടു പിടിച്ച ഒരു റെസിപ്പി ആണ് . :-) കേട്ടറിഞ്ഞ തക്കാളി ചമ്മന്തി റെസിപികളില്‍ അല്പം മിനുക്കുപണികള്‍ നടത്തി അത്ര തന്നെ. ഇത് ദോശക്കും ഇഡ്ഡലിക്കും നല്ലതാണ്.

നമ്മള്‍ ഗള്‍ഫ്‌ കാര്‍ വളരെ സൂക്ഷിച്ചല്ലേ തേങ്ങാ ചെലവാക്കൂ. 2 ദിര്‍ഹം കൊടുത്താല്‍ കിട്ടുന്ന തേങ്ങയുടെ അളവ് കണ്ടു പച്ചമലയാളിയായ ഞാന്‍ നെഞ്ചത്ത് കൈ വച്ച് പോകും. അപ്പൊ ദോശക്കു തേങ്ങാ ചമ്മന്തിക്ക് പകരം മറ്റു ചമ്മന്തികള്‍ കണ്ടു പിടിക്കേണ്ടത് ദോശയുടെയും നമ്മളുടെയും നിലനില്‍പ്പിന് അത്യന്താപേക്ഷിതമാണ് :-) എന്തായാലും എന്റെ ഈ റെസിപ്പിയില്‍ അല്പം തേങ്ങാ ചേര്‍ക്കുന്നുണ്ട്. കൂടുതല്‍ സ്വാദ് അതാണല്ലോ പ്രധാനം. :-) ഇനി തേങ്ങാ ചേര്‍ക്കാതെയും ഇത് ഉണ്ടാക്കാം. എങ്ങനെ ഉണ്ടാക്കിയാലും നല്ല സ്വാദ് ഉണ്ടെന്നാണ് എന്റെ അഭിപ്രായം.

ചേരുവകള്‍

തക്കാളി -ഒരു വലുത്
സവാള-1ഇടത്തരം
വെളുത്തുള്ളി – 1 അല്ലി പൊടിയായി അരിഞ്ഞത്
ഇഞ്ചി – 1/2 ടീസ്പൂണ്‍ പൊടിയായി അരിഞ്ഞത്
തേങ്ങാ – 2 ടേബിള്‍സ്പൂണ്‍
മുളക് പൊടി-1 ടീസ്പൂണ്‍
ഉപ്പ്-പാകത്തിന്
വെളിച്ചെണ്ണ -3 ടീസ്പൂണ്‍

പാകം ചെയ്യുന്ന വിധം:

എണ്ണ ചൂടാക്കി സവാള, വെളുത്തുള്ളി, ഇഞ്ചി എന്നിവ ചേര്‍ത്ത് വഴറ്റുക. ഇതിലേക്ക് മുളക് പൊടിയും ഉപ്പും ചേര്‍ക്കുക. മുളക്പൊടി മൂത്തു കഴിയുമ്പോള്‍ തക്കാളിയും ചേര്‍ത്ത് നന്നായി വഴറ്റുക. തേങ്ങാ ചേര്‍ത്ത് ഇളക്കി ഉടനെ തന്നെ തീ ഓഫ്‌ ചെയ്യുക. ഇത് തണുത്തതിനു ശേഷം മിക്സിയില്‍ നന്നായി അരച്ചെടുക്കുക. ദോശയ്ക്കും ഇഡ്ഡലിയ്ക്കും നല്ലതാണ്.

- ലിജി അരുണ്‍

വായിക്കുക: , , ,

അഭിപ്രായം എഴുതുക »

ഇഡ്ഡലിയും തേങ്ങാ ചമ്മന്തിയും

November 9th, 2011

idli-chutney-epathram

അടുത്തിടെ ആണ് അറിഞ്ഞത് തമിഴ്നാട്ടില്‍ നടി ഖുശ്ബുവിന്റെ പേരില്‍ ഇഡ്ഡലി ഉണ്ടത്രേ.. ഖുശ്ബു ഇഡ്ഡലി. :-) ആരാണാവോ ഇങ്ങനെയൊരു ഇഡ്ഡലി കണ്ടുപിടിച്ച ആ വിരുതന്‍.. ഏതായാലും നല്ല വെളുത്ത് ഉരുണ്ടു പൂ പോലെ മൃദുലമായ ഇഡ്ഡലിക്ക് ഖുശ്ബുവിനെക്കാള്‍ നല്ല ഒരു പേര് കൊടുക്കാനില്ല. അല്ലേ?? ഇത് കേട്ട് എന്റെ ഇഡ്ഡലിയുടെ പടം കണ്ടു, ഇത് വായിക്കുന്ന ഖുശ്ബൂ ഫാന്‍സ്‌ രോഷാകുലരാകരുത്. ഇത് ഖുശ്ബു ഇഡ്ഡലി അല്ല. വെറും ഇഡ്ഡലി. :-) വേണമെങ്കില്‍ ഖുശ്ബുവിന്റെ ഡ്യുപ്പ് ഇഡ്ഡലി എന്ന് വിളിക്കാം .. ;-)

ആഴ്ചയില്‍ ഒരു ദിവസമെങ്കിലും ഞങ്ങള്‍ക്ക് ബ്രേക്ക്‌ഫാസ്റ്റ്‌ ഇഡ്ഡലി ആയിരിക്കും. നല്ല പതുപതുത്ത ഇഡ്ഡലി ചൂടു സാമ്പാറും ചട്ണിയും കൂട്ടി കഴിക്കുമ്പോള്‍ ഉള്ള സുഖം മറ്റെന്തു കഴിച്ചാലും കിട്ടില്ല. ഇഡ്ഡലി ഉണ്ടാക്കുന്നതിന്റെ പിറ്റേ ദിവസം ദോശ ആയിരിക്കും. ഇഡ്ഡലി മാവില്‍ എന്തൊക്കെയോ മോഡിഫിക്കേഷന്‍സ് വരുത്തിയാണ് ദോശ ആക്കുന്നത് എന്നാണ് ഞാന്‍ ചെറുപ്പത്തില്‍ വിചാരിച്ചിരുന്നത്. ഏതായാലും ഒരു ബ്രതര്‍ സിസ്റ്റര്‍ റിലേഷന്‍ഷിപ്‌ ഉണ്ട് ഇവര്‍ തമ്മില്‍. ഏതായാലും താഴെ പറയുന്ന റെസിപ്പി അനുസരിച്ച് ഇഡ്ഡലിയും ദോശയും ഉണ്ടാക്കാം. 2 ഇന്‍ 1.:-)

ഞാന്‍ ഒരു ഇഡ്ഡലി എക്സ്പേര്‍ട്ട് അല്ല. തനിയെ അരച്ച് ഉണ്ടാക്കുന്ന ഇഡ്ഡലി പോയിട്ട്, മാവ് മേടിച്ചു ഉണ്ടാക്കുന്ന ഇഡ്ഡലി പോലും കുളം ആക്കിയ ചരിത്രം എനിക്കുണ്ട്. :-( മമ്മിയാണ് ഇഡ്ഡലി – ദോശ ഒക്കെ അരച്ച് വയ്ക്കുന്നത്. നല്ല ഇഡ്ഡലി ഗാരന്ടീ ആണ്. :-) തേങ്ങാ ചമ്മന്തി എന്റെ വക. അതിനു വല്യ റിസ്ക്‌ ഇല്ലല്ലോ .. അപ്പൊ റെഡി ആയിക്കോളൂ. ഇഡ്ഡലി ഉണ്ടാക്കാം.

ചേരുവകള്‍

പച്ചരി – 1 ഗ്ലാസ്‌
പുഴുക്കലരി (ചോറ് വയ്ക്കുന്ന അരി) – 1 ഗ്ലാസ്‌
ഉഴുന്ന് – 3/4 ഗ്ലാസ്‌
ഉലുവ  – 1 ടേബിള്‍സ്പൂണ്‍
ചോറ് – 1 ഗ്ലാസ്‌

തയ്യാറാക്കുന്ന വിധം:

പച്ചരി, പുഴുക്കലരി, ഉഴുന്ന്, ഉലുവ എന്നിവ എട്ടു മണിക്കൂര്‍ എങ്കിലും വെള്ളത്തില്‍ വെവ്വേറെ കുതിര്‍ത്തു എടുക്കുക. അരികള്‍ നികക്കെ വെള്ളം ഒഴിച്ച് ഒരുമിച്ചു അരയ്ക്കുക. ഉഴുന്നും ഉലുവയും കൂടി ഒരുമിച്ചു വേറെ അരയ്‌ക്കുക. ചോറും വേറെയായി അരച്ച് വെയ്ക്കുക. എല്ലാം കൂടി യോജിപ്പിച്ചു ഉപ്പും ആവശ്യത്തിന് വെള്ളവും ചേര്‍ത്ത് ഇഡ്ഡലി മാവിന്റെ അയവില്‍ കലക്കി 8 മണിക്കൂര്‍ വയ്ക്കുക. ഇതില്‍ അല്പം കൂടി വെള്ളം ചേര്‍ത്ത് നീട്ടിയാല്‍ ദോശയ്ക്കുള്ള മാവായി. ഇഡ്ഡലി ഉണ്ടാക്കാന്‍ നേരം ഇഡ്ഡലി തട്ടില്‍ അല്‍പ്പം എണ്ണ തടവി, മാവ് കോരി ഒഴിച്ച് ആവിയില്‍ നന്നായി വേവിക്കുക. വെന്തു കഴിഞ്ഞ് ഇറക്കിവെച്ച് ഒരോന്നായി ഇളക്കിയെടുക്കുക.

തേങ്ങാ ചമ്മന്തി

ചേരുവകള്‍

തേങ്ങാ ചുരണ്ടിയത് – 1 കപ്പ്
പച്ചമുളക് – 1 വലുത്
ഇഞ്ചി – ചെറിയ ഒരു കഷണം
ചുവന്നുള്ളി – രണ്ട് എണ്ണം
വെളിച്ചെണ്ണ – രണ്ടു വലിയ സ്പൂണ്‍
കടുക് – ഒരു ചെറിയ സ്​പൂണ്‍
ചുവന്നുള്ളി അരിഞ്ഞത് – ഒരു ചെറിയ സ്പൂണ്‍
വറ്റല്‍ മുളക് – രണ്ട് എണ്ണം
കറിവേപ്പില – ഒരു തണ്ട്

തയ്യാറാക്കുന്ന വിധം:

പച്ചമുളക്, ഇഞ്ചി, ചുവന്നുള്ളി ഇവ മിക്സിയില്‍ നന്നായി അരയ്ക്കുക. അതിനു ശേഷം തേങ്ങാ ചുരണ്ടിയതും ചേര്‍ത്ത് അരച്ചെടുക്കുക. ചീനച്ചട്ടിയില്‍ വെളിച്ചെണ്ണ ഒഴിച്ച് ചൂടാകുമ്പോള്‍, കടുക് പൊട്ടിക്കുക. അതിനുശേഷം, ചുവന്നുള്ളി അരിഞ്ഞത്, വറ്റല്‍ മുളക്, കറിവേപ്പില ഇവ ഇട്ട് മൂപ്പിക്കുക. അരച്ച തേങ്ങാകൂട്ട് ഇതിലേക്ക് ചേര്‍ത്ത് പാകത്തിന് ഉപ്പും വെള്ളവും ചേര്‍ത്ത് ചൂടാകുമ്പോള്‍ വാങ്ങി വയ്ക്കുക.

- ലിജി അരുണ്‍

വായിക്കുക: ,

അഭിപ്രായം എഴുതുക »

സേമിയാ പായസം

November 1st, 2011

semiya payasam-epathram

ഇന്നലെ എന്റെ പിറന്നാള്‍ ആയിരുന്നു. എന്നോട് വൈകിട്ട് അടുക്കളയില്‍ കയറണ്ട, ഞാന്‍ നേരത്തേ വരും, ഡിന്നര്‍ ഉണ്ടാക്കി തരാം എന്നൊക്കെ പറഞ്ഞാണ് എന്റെ ഭര്‍ത്താവ് രാവിലെ ഓഫീസില്‍ പോയത്. അതോര്‍ത്തു രണ്ടു സുഹൃത്തുക്കളെയും ഞാന്‍ ഭക്ഷണത്തിന് വിളിച്ചു. വൈകുന്നേരം ആയപ്പോള്‍ പതിവ് പോലെ വിളിച്ചു പറയുന്നു, ”മോളെ, ഞാന്‍ ലേറ്റ് ആകും, ഡിന്നര്‍ പുറത്തു നിന്നും ആകാം.” :-( ഞാന്‍ ആണെങ്കില്‍ ഹോട്ടല്‍ ഭക്ഷണത്തോട് വല്യ താല്പര്യം ഇല്ലാത്ത ആളാണ്‌. ”വേണ്ട, വേണ്ട ഞാന്‍ ഉണ്ടാക്കികൊള്ളാം” എന്ന് പറഞ്ഞു ഞാന്‍ ഓഫീസില്‍ നിന്നും വീടെത്തി.

ലിഫ്റ്റില്‍ നിന്നും ഇറങ്ങിയപ്പോള്‍ തന്നെ നല്ല ബിരിയാണി മണം. ഹോ, നല്ല ചിക്കന്‍ ബിരിയാണി കഴിച്ചിട്ട് എത്ര ദിവസമായി. ഏതു ഫ്ലാറ്റില്‍ ആണോ ബിരിയാണി ഉണ്ടാക്കിയിരിക്കുന്നത്. ചെന്നിട്ട് ഞാനും ബിരിയാണി ഉണ്ടാക്കിയാലോ? വേണ്ടാ..ആകെ മടുത്താണ് ഓഫീസില്‍ നിന്നും വരുന്നത് . പോരാത്തതിന് ആറു കഴിഞ്ഞു സമയം. ഇനി ബിരിയാണിയും മറ്റും ഉണ്ടാക്കി വരുമ്പോള്‍ പാതിരാത്രി ആവും.. മാത്രവുമല്ല എന്റെ ഹയ  മോള്‍ ഞാന്‍ വരാന്‍ കാത്തിരിക്കുകയാണ്. മമ്മ വന്നുകഴിഞ്ഞാല്‍ ഉടനെ തന്നെ അടുക്കളയില്‍ കയറുന്നത് അവള്‍ക്കു സഹിക്കില്ല. അപ്പൊ ബിരിയാണി മോഹത്തിനെ മുളയിലെ നുള്ളി കളഞ്ഞു. എന്തെങ്കിലും തട്ടിക്കൂട്ട് പരിപാടി നടത്താം.. അതേ രക്ഷയുള്ളൂ. അങ്ങനെ ആലോചിച്ചു നടന്നു ചെന്ന് വാതില്‍ തുറന്നപ്പോള്‍, അതാ ബിരിയാണി മണം എന്റെ അടുക്കളയില്‍ നിന്നും തന്നെയാ. :-) എന്റെ കുഞ്ഞിപ്പെണ്ണിന്റെ കയ്യില്‍ ഒരു കൊച്ചു പാത്രത്തില്‍ പായസവും.. :-) മമ്മി (അമ്മായിയമ്മ )എനിക്ക് വേണ്ടി തലശ്ശേരി ബിരിയാണിയും സേമിയാപായസവും വെച്ചിരിക്കുന്നു. :-) എന്തൊരു സന്തോഷം. ഈ അടുത്ത കാലത്തെങ്ങും ഇത്രെയും ഞാന്‍ സന്തോഷിച്ചിട്ടില്ല..:-) മമ്മിയ്ക്ക് നന്ദി പറഞ്ഞു, പായസം കുടിച്ചപ്പോള്‍ എന്തൊരു സുഖം. പായസത്തിനു നല്ല സ്വാദ്. പിറന്നാളിനു മധുരം കൂടിയ പോലെ :-)ഏതായാലും പായസത്തിന്റെ ചിത്രവും മമ്മിയുടെ അടുത്ത് നിന്നും റെസിപ്പിയും എടുത്തു. ഇത് മമ്മിക്ക് ‘ഡെഡിക്കേറ്റ് ‘ ചെയ്തിരിക്കുന്നു. :-) തലശ്ശേരി ബിരിയാണി റെസിപ്പി ഞാന്‍ നേരത്തെ പോസ്റ്റ്‌ ചെയ്തിട്ടുണ്ട്.

സേമിയാ പായസം എന്ന് പറയുമ്പോള്‍, മടിയന്മാരുടെ പായസം എന്നാണ് എന്റെ ചാച്ചന്‍ കളിയാക്കുക. കാരണം പായസം ഉണ്ടാക്കുകയും വേണം എന്നാല്‍ അധികം കഷ്ട്ടപെടാന്‍ പറ്റുകയും ഇല്ല എന്നുള്ളവരുടെ പായസമാണത്രേ സേമിയ പായസം. വീട്ടില്‍ എപ്പോഴും ചെറുപയര്‍ പരിപ്പ് പായസം ആയിരുന്നു സ്റ്റാര്‍. സേമിയാ പായസം വല്ലപ്പോഴുമേ ഉണ്ടാക്കൂ. എന്നാല്‍ എനിക്ക് ഇഷ്ടപ്പെട്ട പായസങ്ങളില്‍ ഒന്നാണ് ഇത്. എളുപ്പമാണ് ഉണ്ടാക്കാന്‍ എന്ന പ്രാധാന കാരണം കൊണ്ട് തന്നെ. ഉണ്ടാക്കി നോക്കുമ്പോള്‍ മനസിലാകും. ട്രൈ ചെയ്യാം??? :-)

ചേരുവകള്‍

സേമിയ – നൂറു ഗ്രാം
പാല്‍ – അര ലിറ്റര്‍
വെള്ളം – അര കപ്പ്
പഞ്ചസാര – 4 ടേബിള്‍സ്പൂണ്‍ (മില്‍ക്ക് മെയ്ഡ് ഉണ്ടെങ്കില്‍ ഇത്രയും പഞ്ചസാര ചേര്‍ക്കണ്ടതില്ല)
നെയ്യ്‌ – രണ്ടു ടേബിള്‍സ്പൂണ്‍
കശു വണ്ടി – രണ്ടു ടേബിള്‍സ്പൂണ്‍
കിസ് മിസ്‌ – രണ്ടു ടേബിള്‍സ്പൂണ്‍
ഏലയ്ക്ക പൊടിച്ചത് – മൂന്നെണ്ണം

തയാറാക്കുന്ന വിധം

നെയ്യ്‌ ചൂടാക്കി കശുവണ്ടിയും കിസ്സ്‌ മിസ്സും വറുത്തു എടുക്കുക. സേമിയ ഇതേ നെയ്യില്‍ ചെറുതായി വറുത്തെടുക്കുക. അടിയില്‍ പിടിച്ചു കരിയാതിരിക്കാന്‍ പ്രത്യേകം ശ്രദ്ധിക്കുക. ഇതിലേക്ക് വെള്ളം തിളപ്പിച്ച്‌ ഒഴിക്കുക. സെമിയ പകുതി വേവാകുമ്പോള്‍ പാല്‍ ചേര്‍ക്കുക. ഇതിലേക്ക് ആവശ്യത്തിനു പഞ്ചസാരയും ഏലയ്ക്ക പൊടിച്ചതും ചേര്‍ത്ത്‌ ഇളക്കുക. മില്‍ക്ക് മെയ്ഡ് ഉപയോഗിക്കുകയാണെങ്കില്‍ ഈ സമയത്ത് അതും ചേര്‍ക്കാം. പാല്‍ തിളക്കുമ്പോള്‍ തീ കുറച്ചു വയ്ക്കുക. കുറുകി വരുമ്പോള്‍ തീ അണയ്ക്കുക. തണുക്കുമ്പോള്‍ പായസം അല്പം കൂടി കുറുകിയിരിക്കും. അത് കണക്കാക്കി വേണം അടുപ്പില്‍ നിന്നും വാങ്ങാന്‍. വാങ്ങിയ ശേഷം കിസ്മിസും കശുവണ്ടിയും ചേര്‍ത്ത്‌ ഇളക്കിയ ശേഷം ചെറു ചൂടോടെ വിളമ്പാം.

- ലിജി അരുണ്‍

വായിക്കുക: , , ,

1 അഭിപ്രായം »

Page 9 of 12« First...7891011...Last »

« Previous Page« Previous « കടലക്കറി
Next »Next Page » ഇഡ്ഡലിയും തേങ്ങാ ചമ്മന്തിയും »



പ്രഷര്‍കുക്കര്‍ ബിരിയാണി...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine