പാവയ്ക്കാ മെഴുക്കുപുരട്ടി

December 14th, 2011

bittergourd-stir-fry-epathram

പാവയ്ക്കാ എന്ന് പറയുമ്പോള്‍ അയ്യേ എന്ന് പറയുന്ന ഒത്തിരി പേരെ എനിക്കറിയാം. അക്കൂട്ടത്തില്‍ ഒരാളായിരുന്നു എന്റെ ഭര്‍ത്താവും. അരുണ്‍ കല്യാണത്തിന് മുന്‍പ്‌ പാവയ്ക്ക കഴിക്കുകയെ ഇല്ലായിരുന്നു. എന്നാല്‍ ആശാന് ഇപ്പോള്‍ പാവയ്ക്കാ വലിയ ഇഷ്ടമാണ്.. :-) ഞാന്‍ സാധാരണ പാവയ്ക്ക തോരന്‍ ആണ് വയ്ക്കാറ്. നെറയെ തേങ്ങയും, കാരറ്റ് അരിഞ്ഞതും, സവാളയും ഒക്കെ ചേര്‍ക്കുമ്പോള്‍ പാവയ്ക്കയുടെ കയ്പ്പ്‌ അറിയുകയേ ഇല്ലാ. അതും നമ്മുടെ നാട്ടില്‍ കിട്ടുന്ന വെള്ള പാവയ്ക്കയാണ് സാധാരണ വയ്ക്കുക. കടും പച്ച നിറത്തിലുള്ള ഈ പാവയ്ക്ക ആദ്യമായാണ് മേടിച്ചത്. ഇത് എങ്ങനെ വയ്ക്കും എന്ന് ആലോചിച്ചു ഇരുന്നപ്പോഴാണ് എന്റെ സുഹൃത്ത്‌ പ്രീത ഒരു കിടിലന്‍ പാവയ്ക്കാ മെഴുക്കുപുരട്ടി റെസിപ്പി പറഞ്ഞു തന്നത്.  :-) ഇതിന്റെ ചേരുവകള്‍ കേട്ടപ്പോള്‍ അല്പം അത്ഭുതം തോന്നിയെങ്കിലും, വച്ചു കഴിഞ്ഞപ്പോള്‍ എല്ലാവര്ക്കും പെരുത്തിഷ്ടായി.. :-) ആ റെസിപ്പി അങ്ങനെ തന്നെ ആണോ ഞാന്‍ ഉണ്ടാക്കിയിരിക്കുന്നത് എന്ന് എനിക്ക് ഉറപ്പില്ല.. എന്നാലും വച്ച് കഴിഞ്ഞപ്പോള്‍ ഉഗ്രനായി.. :-) പ്രീതക്ക് നന്ദി. അരുണ്‍ ഇപ്പൊ പാവയ്ക്കാ ഫാന്‍ ആണ്. :-) ഇത് കഴിച്ചു കഴിഞ്ഞാല്‍ നിങ്ങളും അങ്ങനെ തന്നെ ആകും. :-)

ചേരുവകള്‍

പാവയ്ക്ക – 3 എണ്ണം, അര്‍ദ്ധ വൃത്താകൃതിയില്‍ നേര്‍മ്മയായി അരിഞ്ഞത്
സവാള – 3 വലുത്
പച്ചമുളക് – 2 എണ്ണം നെടുകെ പിളര്‍ന്നത്
ഇഞ്ചി – ഒരു ചെറിയ കഷ്ണം
വെളുത്തുള്ളി – 2 അല്ലി
മുളകുപൊടി – ഒന്നര ടേബിള്‍സ്പൂണ്‍ (എരിവ് അനുസരിച്ച്)
മഞ്ഞള്‍പ്പൊടി – ഒരു ടീസ്പൂണ്‍
മല്ലിപ്പൊടി – ഒരു ടേബിള്‍സ്പൂണ്‍
വാളന്‍പുളി – ഒരു നെല്ലിക്കാ വലിപ്പം
ശര്‍ക്കര – അര ടീസ്പൂണ്‍
വെളിച്ചെണ്ണ – അര കപ്പ്‌
കറിവേപ്പില – 2 തണ്ട്
ഉപ്പ് – ആവശ്യത്തിന്

പാകം ചെയ്യുന്ന വിധം

ഒരു നോണ്‍സ്റ്റിക്ക്‌ പാനില്‍ എണ്ണ ചൂടാക്കി സവാള, പച്ചമുളക്, ഇഞ്ചി, വെളുത്തുള്ളി, കറിവേപ്പില എന്നിവ വഴറ്റുക. നിറം മാറി വരുമ്പോള്‍ അരിഞ്ഞു വച്ചിരിക്കുന്ന പാവക്കായും ഉപ്പും ചേര്‍ത്ത് ഇളക്കി മൂടി വച്ചു, പകുതി വേവാകുന്നത് വരെ വേവിക്കുക. ഇതിലേക്ക് മുളകുപൊടി, മഞ്ഞള്‍പ്പൊടി, മല്ലിപ്പൊടി എന്നിവ ചേര്‍ത്ത് ഇളക്കി 5 മിനുറ്റ് മൂടി വച്ചു വേവിക്കുക. പിന്നീട് വാളന്‍പുളി അല്പം കട്ടിയായി വെള്ളത്തില്‍ പിഴിഞ്ഞ് എടുത്തത്‌ ഇതിലേക്ക് ചേര്‍ത്ത് ഇളക്കുക. പാത്രം തുറന്നു വച്ച് ഇടയ്ക്ക് ഇളക്കി കൊടുത്തു 5-6 മിനുറ്റ് വരട്ടി എടുക്കുക. വാങ്ങുന്നതിന് മുമ്പ്‌, ശര്‍ക്കര ചുരണ്ടിയത് ചേര്‍ത്ത് നന്നായി യോജിപ്പിക്കുക. ചോറിനൊപ്പം വിളമ്പാം..

- ലിജി അരുണ്‍

വായിക്കുക: , , ,

1 അഭിപ്രായം »

അയല വറുത്തത്

December 12th, 2011

Mackerel-fry-epathram

മീന്‍ വറുത്തതിനു എന്താ ടേസ്റ്റ്.. :-) സാധാരണ എന്റെ വീട്ടില്‍ മീന്‍ കറിയുടെ പരിപാടി മാത്രമേയുള്ളൂ.. നമ്മള്‍ ആരോഗ്യത്തിനു ആണല്ലോ പ്രാധാന്യം കൊടുത്തിരിക്കുന്നത്‌.. :-) എന്നാല്‍ കഴിഞ്ഞ ആഴ്ച വല്ലാത്ത പ്രലോഭനം, ഒരു ഫിഷ്‌ ഫ്രൈ അടിക്കാന്‍.. ജീവിതം ഒന്നല്ലെയുള്ളൂ?? ആഗ്രഹം തോന്നുന്നത് അങ്ങ് സാധിക്കുക അത്ര തന്നെ. പിന്നെ ഒന്നും ആലോചിച്ചില്ല ഫ്രിഡ്ജ്‌ തുറന്നു ഫ്രീസറില്‍ നിന്നും നല്ല കുഞ്ഞു അയല മീനുകളെ പുറത്തെടുത്തു. പത്തു മിനുട്ടിനുള്ളില്‍ കഴുകി വൃത്തിയാക്കി, അരപ്പ് പുരട്ടി വച്ചു. ഇടയ്ക്കു ആരോഗ്യ ചിന്തയെങ്ങാനും വന്നു പദ്ധതി പാളിപ്പോയാലോ.. :-) ഏതായാലും ഊണ് കുശാലായി. നല്ല കുത്തരി ചോറ്, മീന്‍ വറുത്തത്, പാവയ്ക്കാ മെഴുക്കുപുരട്ടി (ആരോഗ്യത്തെ അങ്ങനെ കൈവിട്ടു എന്ന് വേണ്ടാ.. :-) ) പിന്നെ സാമ്പാറും.

fishfry-lunch-epathram

ചേരുവകള്‍

അയല : 10 എണ്ണം
മുളക് പൊടി : ഒരു ടേബിള്‍സ്പൂണ്‍
മഞ്ഞള്‍ പൊടി : അര ടീസ്പൂണ്‍
കുരുമുളക് പൊടി : ഒരു ടീസ്പൂണ്‍
ഇഞ്ചി,വെളുത്തുള്ളി പേസ്റ്റ് :അര ടീസ്പൂണ്‍
ഉപ്പ് : പാകത്തിന്

fish-fry-marinated-epathram

പാചകരീതി:

മീന്‍ വെട്ടി കഴുകി വൃത്തിയാക്കി, വരഞ്ഞു വയ്ക്കുക. ബാക്കിയുള്ള എല്ലാ ചേരുവകളും അല്പം വെള്ളം ഒഴിച്ച് നന്നായി യോചിപ്പിച്ചതിനു ശേഷം മീനില്‍ പുരട്ടി ഒരു മണിക്കൂര്‍ വച്ചതിന്‌ ശേഷം പാനില്‍ എണ്ണ ചൂടാക്കി, ഇരു വശവും മൊരിച്ച് വറുത്തെടുക്കുക.

- ലിജി അരുണ്‍

വായിക്കുക: , ,

1 അഭിപ്രായം »

പാലക് പയര്‍ കറി

November 21st, 2011

palak lobia curry-epathram

കേരളത്തിലെ ചീരയുമായി വളരെ സാദൃശ്യമുള്ള ഈ സസ്യം ഉത്തരേന്ത്യന്‍ ഭക്ഷണത്തിലെ ഒരു പ്രധാന ഇനമാണ്. പാലക് ദാലും പാലക്‌ പനീറും പാലക് മട്ടറുമെല്ലാം ഉത്തരേന്ത്യക്കാരുടെ പ്രിയവിഭവങ്ങളാണ്. എന്നാല്‍ നമ്മള്‍ മലയാളികള്‍ ഈ ഇലക്കറിയില്‍ അധികം കൈ വയ്ക്കാറില്ല എന്ന് തോന്നുന്നു. കാരണം നമ്മുടെ നാട്ടിലെ ചീരയെ അപേക്ഷിച്ചു നോക്കുമ്പോള്‍ ഇതിനു അത്രയും സ്വാദ് പോര. മാത്രവുമല്ല ജലാംശം കൂടുതല്‍ ഉള്ളത് കൊണ്ട് തോരന്‍ വച്ചാല്‍ കുഴഞ്ഞു ഇരിക്കും.

palak-epathram

പോഷക സമൃദ്ധമായ പാലക് നൂറ് ഗ്രാമില്‍ 2 ഗ്രാം മാംസ്യം, 0.7 ഗ്രാം കൊഴുപ്പ്, 73 മി. ഗ്രാം കാല്‍സ്യം, 21 മി.ഗ്രാം ഫോസ്ഫറസ്, 1.14 മി. ഗ്രാം അയണ്‍, 2.7 മി. ഗ്രാം വിറ്റാമിന്‍, 0.26 മി. ഗ്രാം റൈബോഫ്ലേവിന്‍, 0.03 നയാമിന്‍ എന്നിവ അടങ്ങിയിട്ടുണ്ട്. വിറ്റാമിന്‍ എ, ബി, സി എന്നിവയുടെ കലവറയായ പാലക് തുടര്‍ച്ചയായി ഉപയോഗിക്കുന്നത് കണ്ണിന്റെ ആരോഗ്യത്തിന് നല്ലതാണെന്ന് തെളിയിക്കപ്പെട്ടിട്ടുണ്ട്. ഗര്‍ഭിണികളുടെ പോഷകാഹാരത്തിനും പാലക് ഉള്‍പ്പെടുത്താവുന്നതാണ്.

blackeyedpeas-epathram

ഓക്കേ ഓക്കേ .. പാലക് പുരാണം അവിടെ നില്‍ക്കട്ടെ. ഇത്രയും സവിശേഷതകള്‍ ഉള്ള ഈ പച്ചക്കറിയെ നാവിന് രുചികരമായ രീതിയില്‍ എങ്ങനെ തയ്യാറാക്കാം എന്ന് പലവിധ ഗവേഷണങ്ങള്‍ നടത്തി വരികയാണ് ഞാന്‍. :-) പാലക് ദാല്‍, പാലക് ആലൂ, പാലക് പനീര്‍ ഇവയൊക്കെ ഉണ്ടാക്കി നോക്കി. എന്നാല്‍ എനിക്കും വീട്ടില്‍ എല്ലാവര്ക്കും ഇഷ്ടമായത് പാലകിന്റെ കൂടെ കാബൂളി ചന അല്ലെങ്കില്‍ ഉണങ്ങിയ വെള്ളപയര്‍ (ഹിന്ദിയില്‍ ഇതിനെ ലോബിയ എന്നും ഇംഗ്ലീഷില്‍ ബ്ലാക്ക്‌ എയ്ഡ്‌ പീ എന്നുമാണ് പറയുക) ചേര്‍ത്ത് ഉണ്ടാക്കിയ കറിയാണ്. ഇതൊന്നു വച്ച് നോക്കു. നിങ്ങളും പാലക് ഫാന്‍ ആകും. :-)

ചേരുവകള്‍

പാലക് – ഒരു കെട്ട്
വെള്ളപ്പയര്‍ അല്ലെങ്കില്‍ കാബുളി ചന – 2 ഗ്ലാസ്‌ ( കുറഞ്ഞത് എട്ടു മണിക്കൂര്‍ വെള്ളത്തില്‍ കുതിര്‍ത്തതു)
സവാള – 2 ഇടത്തരം നേര്‍മ്മയായി അരിഞ്ഞത്
തക്കാളി – 2 ഇടത്തരം ചെറുതായി അരിഞ്ഞത്
ഇഞ്ചി ചതച്ചത് – ഒരു റ്റീ സ്പൂണ്‍
വെളുത്തുള്ളി ചതച്ചത് -ഒരു റ്റീ സ്പൂണ്‍
പച്ചമുളക് – 2 എണ്ണം
മല്ലിപ്പൊടി – ഒരു റ്റീ സ്പൂണ്‍
മുളക് പൊടി – ഒരു റ്റീ സ്പൂണ്‍
മഞ്ഞള്‍പ്പൊടി – 1/2 റ്റീ സ്പൂണ്‍
ജീരകപ്പൊടി – 1/4 റ്റീ സ്പൂണ്‍
ഗരം മസാല – ഒരു റ്റീ സ്പൂണ്‍
ഉപ്പ് – ആവശ്യത്തിന്
എണ്ണ- 2 റ്റേബിള്‍ സ്പൂണ്‍
ജീരകം – 1 റ്റീ സ്പൂണ്‍
മല്ലിയില – ഒരു പിടി

പാചകരീതി

കുതിര്‍ന്ന പയര്‍ വേകുവാന്‍ ആവശ്യമുള്ള വെള്ളവും ഒരു സവാളയും ഒരു തക്കാളിയും അരിഞ്ഞതും, 1/2 റ്റീ സ്പൂണ്‍ വീതം ഇഞ്ചി ചതച്ചത്, വെളുത്തുള്ളി ചതച്ചത്, മല്ലിപ്പൊടി, മുളക് പൊടി, ഗരം മസാല പൊടി, പാകത്തിന് ഉപ്പ് എന്നിവയും ചേര്‍ത്ത് ഏകദേശം 20 മിനിറ്റ് കുക്കറില്‍ വേവിക്കുക. കുക്കര്‍ തുറക്കുമ്പോള്‍ നന്നായി ഇളക്കി യോജിപ്പിക്കുക.

പാലക് കഴുകി വൃത്തിയാക്കി ചെറുതായി അരിയുക. ഒരു പാനില്‍ എണ്ണ ചൂടാക്കി ജീരകം വഴറ്റുക. ഇതിലേക്ക് ഒരു സവാള അരിഞ്ഞത്, 1/2 റ്റീ സ്പൂണ്‍ വീതം ഇഞ്ചി ചതച്ചത്, വെളുത്തുള്ളി ചതച്ചത്, നെടുകെ പിളര്‍ന്ന പച്ചമുളക് എന്നിവ വഴറ്റുക. നന്നായി വഴന്നു കഴിയുമ്പോള്‍ തക്കാളി ചെറുതായി അരിഞ്ഞത് ചേര്‍ക്കുക. തക്കാളി ഉടഞ്ഞു കഴിയുമ്പോള്‍ ബാക്കിയുള്ള പൊടികള്‍ എല്ലാം ചേര്‍ത്ത് മൂപ്പിക്കുക. അരിഞ്ഞു വച്ചിരിക്കുന്ന പാലക് ഇതിലേക്ക് ചേര്‍ത്ത് നന്നായി ഇളക്കി അടച്ചു വച്ച് 5 മിനുറ്റ് വേവിക്കുക. ഇതിലേക്ക് വേവിച്ചു വച്ചിരിക്കുന്ന പയര്‍ ഗ്രേവിയോടു കൂടെ ചേര്‍ക്കുക. നന്നായി ഇളക്കി 5 മിനിറ്റ് കൂടി ചെറുതീയില്‍ വയ്ക്കുക. വാങ്ങി വച്ച് മല്ലിയില ചേര്‍ത്ത് ഇളക്കുക. ചപ്പാത്തിക്കും ചോറിനും നല്ല ഒരു കറിയാണ്.

ഇതേ രീതിയില്‍ തന്നെ പയര്‍, ചന എന്നിവയ്ക്ക് പകരം വിവിധയിനം പരിപ്പുകള്‍ ഉപയോഗിച്ചും ഈ കറി തയ്യാറാക്കാം.

- ലിജി അരുണ്‍

വായിക്കുക: , , ,

അഭിപ്രായം എഴുതുക »

അവിയല്‍

November 16th, 2011

aviyal-epathram

നമ്മുടെ നാടന്‍ കുത്തരി ചോറിന്റെ കൂടെ കഴിക്കാന്‍ ഏറ്റവും ഇഷ്ടപ്പെട്ട വിഭവം എന്താണെന്ന് എന്നോട് ചോദിച്ചാല്‍ ഒന്നും ആലോചിക്കാതെ പറയാന്‍ പറ്റിയ ഒരേയൊരു കറിയാണ് അവിയല്‍. എന്റെ ഈ അവിയല്‍ പ്രേമം എന്നെ അടുത്തറിയാവുന്ന എല്ലാവര്‍ക്കും അറിയാവുന്നതാണ്. :-) അവിയലിന് വെളിച്ചെണ്ണ ഒഴിക്കുമ്പോള്‍ ഉള്ള ആ സുഗന്ധം ഒന്ന് വേറെ തന്നെയാണ്. ഞാന്‍ ഹോസ്റ്റലില്‍ നിന്നും വീട്ടില്‍ വരുമ്പോള്‍ ഒക്കെ എന്റെ മമ്മി അവിയല്‍ ഉണ്ടാക്കിയിരുന്നു. അല്പം നീണ്ട, കഷ്ണങ്ങള്‍ ഒക്കെ നന്നായി ഉടഞ്ഞ അവിയല്‍ ആണ് മമ്മി ഉണ്ടാക്കിയിരുന്നത്. ചെറുപ്പം മുതലേ അങ്ങനെ കഴിച്ചത് കൊണ്ടാണോ ആവോ എനിക്ക് അങ്ങനെയുള്ള അവിയല്‍ ആണ് ഇഷ്ടം.

അവിയല്‍ ഇഷ്ടം ഇല്ലാത്തവര്‍ ഉണ്ടാവുമോ ആവോ. എങ്ങനെ വച്ചാലും നല്ല സ്വാദ് അല്ലെ? പലതരത്തിലുള്ള അവിയലുകള്‍ ഉണ്ട്. ഏതു പച്ചക്കറിയും അവിയലില്‍ ചേര്‍ക്കാം എങ്കിലും വെണ്ടക്കാ, പാവയ്ക്ക തുടങ്ങിയവ ഉപയോഗിക്കുന്നത് ഞാന്‍ കണ്ടിട്ടില്ല. പുളിക്ക് വേണ്ടി തൈര്, മാങ്ങാ, വാളന്‍പുളി എന്നിവയൊക്കെ ചേര്‍ക്കാം. ഏതായാലും കൃത്യമായ നിയമങ്ങള്‍ ഒന്നും ഇല്ലാത്ത സ്ഥിതിക്ക്, ഇത് എന്റെ അവിയല്‍ എന്ന് പറയാം. ;-)

ചേരുവകള്‍

ഉരുള കിഴങ്ങ്, പയര്‍, ക്യാരറ്റ്‌, ബീന്‍സ്‌, ചേന,വെള്ളരിക്ക, മുരിങ്ങക്കായ, ഏത്തയ്ക്കാ, കോവയ്ക്ക, എന്നീ പച്ചക്കറികള്‍  – എല്ലാം അരക്കപ്പ് വീതം
മാങ്ങ – 1 എണ്ണം
തേങ്ങ – 1/2 മുറി
ജീരകം – 1 ടേബിള്‍സ്പൂണ്‍
മഞ്ഞപ്പൊടി – അര ടേബിള്‍സ്പൂണ്‍
സവാള – 1 എണ്ണം
ചെറിയ ഉള്ളി – 4-5 എണ്ണം
പച്ചമുളക് – 5 എണ്ണം
ഉപ്പ് – ആവശ്യത്തിന്.
വെളിച്ചെണ്ണ – 2 ടേബിള്‍സ്പൂണ്‍
വെള്ളം – 1/2 ഗ്ലാസ്‌
കറിവേപ്പില – 2 തണ്ട്

തയ്യാറാക്കുന്ന വിധം

നീളത്തില്‍ നുറുക്കിയ പച്ചക്കറികള്‍, സവാള, 3 പച്ചമുളക് കീറിയത് എന്നിവ ഉപ്പും മഞ്ഞള്‍പ്പൊടിയും വെള്ളവും ചേര്‍ത്ത് വേവിക്കുക. ഞാന്‍ കുക്കറില്‍ ഒരു വിസില്‍ അടിക്കുന്നത് വരെ വേവിച്ചു. ജീരകം, ചെറിയ ഉള്ളി, 2 പച്ചമുളക് എന്നിവ മിക്സിയില്‍ നന്നായി അരയ്ക്കുക. ഇതിലേക്ക് തേങ്ങാ ചിരകിയത് ചേര്‍ത്ത് ഒന്ന് കറക്കി എടുക്കുക. തേങ്ങാ ഒന്ന് ചതഞ്ഞാല്‍ മതി. അരയരുത്. കഷ്ണങ്ങള്‍ വെന്തതിലേക്ക് മാങ്ങ നുറുക്കിയതു കൂടി ചേര്‍ത്ത് ഒന്ന് കൂടി വേവിക്കുക, ഇതിലേക്ക് തേങ്ങാ കൂട്ട് ചേര്‍ത്ത് നന്നായി ഇളക്കുക. ഒന്നു ചൂടാകുമ്പോള്‍ വെളിച്ചെണ്ണയും കറിവേപ്പിലയും ചേര്‍ത്ത് ഇളക്കി അവിയല്‍ അടുപ്പില്‍ നിന്ന് വാങ്ങി വയ്ക്കാം.

- ലിജി അരുണ്‍

വായിക്കുക: , ,

അഭിപ്രായം എഴുതുക »

മുട്ട റോസ്റ്റ്‌

November 15th, 2011

egg roast-epathram

മുട്ട എങ്ങനെ വച്ചാലും എനിക്ക് ഇഷ്ടമാണ്. വീട്ടില്‍ ഒരുപാട് കോഴികള്‍ ഉണ്ടായിരുന്നു. അപ്പൊ മുട്ട എന്നും ബ്രേക്ക്‌ഫാസ്റ്റ്‌നു ഏതെങ്കിലുമൊരു രൂപത്തില്‍ എത്തും. രാവിലെ മുട്ട കറിയാണെങ്കില്‍ വൈകുന്നേരം ഓംലെറ്റ്‌ ആയിട്ടായിരിക്കും. എന്നാല്‍ എനിക്ക് ഏറ്റവും ഇഷ്ടം മുട്ട റോസ്റ്റ്‌ ആണ്. ഇടിയപ്പവും മുട്ട റോസ്റ്റും ഒരു അസാധ്യ കോമ്പിനേഷന്‍ തന്നെയാണ് :-) എന്നാലും അപ്പത്തിനും, ചപ്പാത്തിക്കും, പത്തിരിക്കും, പുട്ടിനും ഒക്കെ നല്ലതാണ് കേട്ടോ. ചാറു കുറവാണെങ്കില്‍ എന്താ, അടിപൊളി സ്വാദ്‌ അല്ലെ? താറാവ് മുട്ട ആണെങ്കില്‍ കൂടുതല്‍ നല്ലത്. ഇനി കാട മുട്ട ഉപയോഗിച്ചും ഇത് തയാറാക്കാം. :-)

ചേരുവകള്‍

മുട്ട പുഴുങ്ങി തോട് കളഞ്ഞത് – 4
തക്കാളി – 1 വലുത്‌
സവാള – 2 ഇടത്തരം
ഇഞ്ചി ചതച്ചത് – 1 1/2 ടീസ്പൂണ്‍
വെളുത്തുള്ളി ചതച്ചത് – 1 1/2 ടീസ്പൂണ്‍
പച്ചമുളക്‌ – 2 നെറുകെ പിളര്‍ന്നത്
മുളക്പൊടി – 1 ടേബിള്‍സ്പൂണ്‍
മഞ്ഞള്‍പ്പൊടി -1/2 ടീസ്പൂണ്‍
മല്ലിപ്പൊടി – 1 ടീസ്പൂണ്‍
ഗരം മസാല – 1/2 ടീസ്പൂണ്‍
വെള്ളം – 1/4 ഗ്ലാസ്സ്‌
വേപ്പില – 1 തണ്ട്‌
എണ്ണ – ആവശ്യത്തിന്‍
ഉപ്പ്‌ – ആവശ്യത്തിന്‍

പാകം ചെയ്യുന്ന വിധം

ചീന ചട്ടി അടുപ്പത്തു വെച്ച് ചൂടാവുമ്പോള്‍ എണ്ണ ഒഴിച്ച്  സവാള, പച്ചമുളക്, കറിവേപ്പില, ഇഞ്ചി വെളുത്തുള്ളി എന്നിവ ചേര്‍ത്തു വഴറ്റുക. ബ്രൌണ്‍ നിറമാകുമ്പോള്‍ പൊടികള്‍ ചേര്‍ത്ത് ഒന്ന് കൂടെ വഴറ്റുക. പൊടികള്‍ മൂത്തു കഴിയുമ്പോള്‍ തക്കാളി ചേര്‍ത്ത് ഇളക്കുക. അതിലേയ്ക്ക് 1/4ഗ്ലാസ്സ്‌ വെള്ളം ചേര്‍ത്തു തിളപ്പിക്കുക. പുഴുങ്ങിയ മുട്ട ചെറുതായി ഒന്ന് വരഞ്ഞു കറിയിലേക്ക് ചേര്‍ത്തു ഒന്ന് കു‌ടി വഴറ്റുക, കുറച്ചു കറിവേപ്പിലയും ചേര്‍ത്തു അടച്ചു വെയ്ക്കുക .മുട്ട റോസ്റ്റ് റെഡി.

- ലിജി അരുണ്‍

വായിക്കുക: , , ,

1 അഭിപ്രായം »

Page 3 of 41234

« Previous Page« Previous « മാങ്ങയിട്ട മീന്‍കറി
Next »Next Page » അവിയല്‍ »



Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine