അബുദാബി : മലയാളി സമാജം, യു. എ. ഇ. യുടെ നാല്പതാം ദേശീയ ദിനത്തോട് അനുബന്ധിച്ച് സംഘടിപ്പിച്ചിട്ടുള്ള ‘ഗ്ലോറിയസ് 40, സമാജം സല്യൂട്ട്‌സ് യു. എ. ഇ. ‘ എന്ന 40 ദിവസം നീണ്ടു നില്‍ക്കുന്ന പരിപാടി കളുടെ ഉദ്ഘാടനം കേരള സാമൂഹ്യക്ഷേമ -പഞ്ചായത്ത് മന്ത്രി ഡോ. എം. കെ. മുനീര്‍ ഉദ്ഘാടനം ചെയ്തു.
ഇതിനായി പ്രത്യേകം രൂപ കല്പന ചെയ്ത ലോഗോ ഉള്‍ക്കൊള്ളുന്ന കുറിപ്പ് പ്രൊജക്ടറിലൂടെ സ്‌ക്രീനില്‍ തെളിയിച്ചു കൊണ്ടാണ് മന്ത്രി ഉദ്ഘാടനം നിര്‍വ്വഹിച്ചത്. ഉദ്ഘാടന സമയം കത്തിച്ച മെഴുകുതിരിയും യു. എ. ഇ. യുടെ ദേശീയ പതാക യുമായി വേദിക്ക് മുന്നിലെത്തി ദേശീയ ഗാനമാലപിച്ച 40 കുട്ടികള്‍ സദസ്സിന് വേറിട്ടൊരു അനുഭവമായി. ചടങ്ങിന് മുന്‍പായി, നടന്ന ഫ്യൂഷന്‍ നൃത്തം ഇന്ത്യന്‍ അറബ് സാംസ്‌കാരിക വിനിമയത്തിന്റെ നേര്‍ക്കാഴ്ചയായിരുന്നു.
ഇന്ത്യന്‍ ഇസ്‌ലാമിക് സെന്‍റര്‍ ഹാളില്‍ നടന്ന വര്‍ണാഭമായ ചടങ്ങില്‍ സമാജം പ്രസിഡന്‍റ് മനോജ് പുഷ്‌കര്‍ നേതൃത്വം നല്‍കി. ബി. യേശുശീലന്‍ ആമുഖ പ്രസംഗം നടത്തി. ജനറല്‍ സെക്രട്ടറി കെ. എച്ച്. താഹിര്‍ സ്വാഗതവും ട്രഷറര്‍ അമര്‍സിംഗ് നന്ദിയും പറഞ്ഞു.
എം. എ. യൂസഫ് അലി, വൈ. സുധീര്‍കുമാര്‍ ഷെട്ടി, അക്ഷയ പുസ്തക നിധി പ്രസിഡന്‍റ് പായിപ്ര രാധാകൃഷ്ണന്‍, രമേശ് പണിക്കര്‍, ബാവ ഹാജി, കെ. ബി. മുരളി, മൊയ്തു ഹാജി എന്നിവര്‍ പ്രസംഗിച്ചു.
ഡിസംബര്‍ ഒന്നു മുതല്‍ ജനവരി 13 വരെ നീണ്ടുനില്‍ക്കുന്ന ആഘോഷ പരിപാടികള്‍ അബുദാബി യുടെ വിവിധ ഭാഗങ്ങളി ലായാണ് നടക്കുന്നത്. കഥയരങ്ങ്, മാധ്യമ സെമിനാര്‍, ഇന്തോ അറബ് സാംസ്‌കാരിക സമ്മേളനം, ഫോട്ടോഗ്രാഫി മത്സരം, സീനിയര്‍ കുട്ടികളുടെ പ്രസംഗ മത്സരം, ആര്‍ട്ടിസ്സാ ആര്‍ട്ടിസ്റ്റ് ഗ്രൂപ്പിലെ 40 കലാകാരന്മാരുടെ നിറച്ചാര്‍ത്ത് എന്നിവ 40 ദിന പരിപാടികളില്‍ ചിലത് മാത്രമാണ്.
അബുദാബി : കല അബുദാബിയും ബ്ലാക്ക് & വൈറ്റ് കല്ലൂരാവി ക്ലബ്ബും സംയുക്ത മായി മലയാളി സമാജ ത്തില്‍ ഇന്‍റര്‍ യു. എ. ഇ. കബഡി ടൂര്‍ണമെന്‍റ് സംഘടിപ്പിക്കുന്നു. യു. എ. ഇ. യിലെ വിവിധ നഗര ങ്ങളില്‍ നിന്നുള്ള ഇരുപതോളം ടീമുകള്‍ ഏറ്റുമുട്ടും. നവംബര്‍ 18 വെള്ളിയാഴ്ച ഉച്ചയ്ക്ക് 2 മണി മുതലാണ് ടൂര്‍ണമെന്‍റ് ആരംഭിക്കുക. നോക്കൗട്ട് അടിസ്ഥാന ത്തില്‍ നടക്കുന്ന ടൂര്‍ണമെന്‍റ് രാത്രി 9 ന് സമാപിക്കും. 
