കൊച്ചി: സ്വര്‍ണ്ണവില വീണ്ടും ഉയര്‍ന്നു പുതിയ റെക്കോഡിലേക്ക്‌. പവന് 280 രൂപയും ഗ്രാമിന് 35 രൂപയുമാണ് ഇന്ന് വര്‍ധിച്ചത്. ഇതോടെ പവന്‍ വില 21280 രൂപയിലെത്തി പുതിയ റെക്കോഡിട്ടു. ഗ്രാമിന് 2660 രൂപയാണ് ഇന്നത്തെ വില. ആഗോള വിപണിയിലെ വില വര്‍ധനവാണ് ആഭ്യന്തര വിപണിയിലും വില ഉയര്‍ത്തിയത്. സ്വര്‍ണത്തിന്‌ സമീപ കാലത്ത്‌ ഉയര്‍ന്ന ഏറ്റവും കൂടുതല്‍ തുകയാണിത്‌.

അമേരിക്കന്‍ തൊഴില്‍ മേഖല മാന്ദ്യത്തില്‍ തുടരുകയാണെന്ന റിപ്പോര്‍ട്ടുകളാണ്‌ ആഗോള വിപണിയില്‍ വില കുറയാന്‍ കാരണം. ഇതോടെ സുരക്ഷിത നിക്ഷേപമെന്ന നിലയില്‍ സ്വര്‍ണത്തിന് വീണ്ടും ഡിമാന്‍ഡ് വര്‍ധിച്ചു. അടുത്ത ദിവസങ്ങളിലായി സ്വര്‍ണ വില ഉയരാന്‍ ഇനിയും തന്നെയാണ്‌ സാധ്യതയെന്ന്‌ നിരീക്ഷകര്‍ വിലയിരുത്തുന്നു.

കൊച്ചി: രാജ്യാന്തര വിപണിയില്‍ നിക്ഷേപകര്‍ കരുതല്‍ ശേഖരത്തിലേക്കായി സ്വര്‍ണം വാങ്ങാന്‍ തുടങ്ങിയതോടെ സ്വര്‍ണ്ണ വില വീണ്ടും ഉയര്‍ന്നു. ആഭ്യന്തര വിപണിയില്‍ സ്വര്‍ണം പവന്‌ 360 രൂപ കൂടി 21,080 രൂപ ആയി. ഒരു ഗ്രാമിന്  2,635 രൂപയാണ് ഇന്നത്തെ വില.

അതിനിടെ, കേരളത്തില്‍ ഡിമാന്‍ഡ് ശക്തമായിട്ടുണ്ട്. സംസ്ഥാനത്ത് ഏറ്റവുമധികം വിവാഹ നടക്കുന്നതു ചിങ്ങമാസത്തിലാണ്. ഇതാണ് ഡിമാന്‍ഡ് ഉയരാന്‍ കാരണം. റംസാന്‍ കഴിഞ്ഞതോടെ മുസ്ലീം വിവാഹസീസണും തുടങ്ങിയിട്ടുണ്ട്.

അതേസമയം, അത്യാവശ്യക്കാര്‍ അല്ലാത്തവര്‍ വിപണിയില്‍ നിന്ന് മാറിനില്‍ക്കുകയാണെന്ന് വ്യാപാരികള്‍ പറയുന്നു. വില കുറയുമെന്ന പ്രതീക്ഷിയിലാണ് ഇത്. എന്നാല്‍ സ്വര്‍ണ്ണം ആണ് ഏറ്റവും സുരക്ഷിതമായ നിക്ഷേപമെന്ന വിശ്വാസം ശക്തമായതിനാല്‍ വില തല്ക്കാലം താഴേക്കു പോകാന്‍ സാധ്യത ഇല്ലെന്നു വിദഗ്ധര്‍ അഭിപ്രായപ്പെടുന്നു.

കൊച്ചി: സ്വര്‍ണ്ണ വില ചരിത്രത്തിലാദ്യമായി 20,000 ഭേദിച്ചു. ആഗോള വിപണിയില്‍ സ്വര്‍ണവില പുതിയ റെക്കോഡിലെത്തുകയും ഓഹരിവിപണികള്‍ ഇടിയുകയും രൂപയുടെ മൂല്യം കുറയുകയും ചെയ്ത പശ്ചാത്തലത്തില്‍ വെള്ളിയാഴ്ച സ്വര്‍ണവില കേരളത്തില്‍ രണ്ടുതവണ കയറി. ഇതോടെ പവന് 20,520 രൂപയായി, ഗ്രാമിന് 2565 രൂപ.

വെള്ളിയാഴ്ച രാവിലെ വില 480 രൂപ വര്‍ധിച്ചതോടെ 20,320 രൂപയിലെത്തിയിരുന്നു.  ഉച്ചയ്ക്ക് 12 മണിയോടെ 200 രൂപകൂടി ഉയര്‍ന്നതോടെ വില 20,520-ലെത്തി. തങ്കവിലയില്‍ ഗ്രാമിന് 80 രൂപയുടെ വര്‍ധനയുണ്ടായതോടെ വില 2815 രൂപയായി. ഇന്ത്യയില്‍ പുതിയ വിവാഹസീസണിന് തുടക്കമായതും സ്വര്‍ണത്തിന് ഉണര്‍വായി.

അമേരിക്ക വീണ്ടും സാമ്പത്തിക മാന്ദ്യത്തിലേക്ക് വഴുതിവീഴുമോ എന്ന ആശങ്കയും യൂറോപ്പിലെ കടക്കെണിയും മൂലം നിക്ഷേപകര്‍ ഓഹരിയും ബോണ്ടുകളും വിറ്റഴിക്കല്‍ തുടരുകയാണ്. ഒപ്പം ഉത്പന്നങ്ങളായ ചെമ്പ്, നിക്കല്‍, ക്രൂഡോയില്‍, കാരീയം, സിങ്ക്, അലൂമിനിയം എന്നിവയും വിറ്റഴിച്ച് സ്വര്‍ണം വാങ്ങിക്കൂട്ടുകയാണ്. ഒരു പരിധിവരെ വെള്ളിയിലും വില്പന നടക്കുന്നുണ്ട്. ഈ സാഹചര്യത്തിലാണ് പ്രതിസന്ധിയിലെ ആസ്തിയായ സ്വര്‍ണം ദിവസേനയെന്നോണം പുതിയ റെക്കോഡ് സൃഷ്ടിക്കുന്നത്.