തിരിയുമ്പോള്‍ മുതുക്
ചെരിയുമ്പോള്‍ വയറ്
കുനിയുമ്പോള്‍
ചരിച്ചു വാര്‍ത്ത ഗോപുരങ്ങള്‍
കാണാന്‍ പാടില്ലാത്ത
പലതും കാണുന്നുവെന്ന്
അറബി മാനേജര്‍ക്ക് അനിഷ്ടമായി.
വാരിച്ചുറ്റിയ ഒറ്റ നീളന്‍ വസ്ത്രം
സാവധാനം
ഓരോന്നോയി
അലമാരയിലേക്ക് മടങ്ങിപ്പോയിരുന്നു
അഞ്ചര മീറ്റര്‍ നീളത്തില്‍
വിവിധ വര്‍ണങ്ങളില്‍
കരഞ്ഞും ചിരിച്ചും കുതുഹലപ്പെട്ടും
ക്ഷീണിച്ചും ക്ഷതമേറ്റും,
അഴകാര്‍ന്നും അലുക്കിട്ടും,
ഓരോന്നും.
വെയില്‍ കായിച്ചും
കര്‍പ്പൂരം പുകച്ചും
നാഫ്തലില്‍ വിതറിയും
ഓര്‍മ്മകളെ കാക്കുന്നപോലെ
അത്രമേല്‍ ഭദ്രമാക്കി.
ആണ്ടൊരിക്കല്‍
റംസാന്‍ മാസം വിരുന്നുവരും
വസ്ത്രശേഖര സംഘം പിരിവിനെത്തും
അഞ്ചും എട്ടും വെച്ച് അടര്‍ന്നുമാറും
ബാക്കിയുള്ളവ
അനിശ്ചതത്തില്‍ ഊഴം കാത്തുകിടക്കും
വന്നുവന്ന് വിരലിലെണ്ണാന്‍ മാത്രം.
ഓരോ കഥകളിലൂടെ പായുന്നുണ്ട് ഓരോന്നും.
ഓര്‍മ്മപ്പെടുത്തലുകളിലൂടെ മേയുന്നുണ്ട്
ഭാര്യക്ക്,
അമ്മക്ക്,
മകള്‍ക്ക്
പെങ്ങള്‍ക്ക്
അമ്മായിക്ക്,
നിന‍ക്ക്.
എന്ന് ബന്ധപ്പെടുത്തുന്നുണ്ട്
ദ്രംഷ്ടകള്‍ നീട്ടി
പാലപ്പൂവിന്റെ മണമുള്ള
വെളുത്ത മംഗല്യസാരി..
തമസ്സാണു സുഖമെന്നാശ്വസിച്ച്
മുഖമുയര്‍ത്താതിരിക്കുന്ന
കറുമ്പികള്‍
ആസക്തികളവസാനിപ്പിക്കൂയെന്നു
ശാസിച്ച് കാവിസാരി
പാത്തും പതുങ്ങിയും
കള്ളകടത്തിനെയനുസ്മരിപ്പിച്ച് അവനെത്തിച്ച
ഇളം നിറങ്ങളില്‍ ചിലത് .
ജന്മം മടുത്തുവെങ്കില്‍
ഞാനുണ്ട് എന്നാശ്വസിപ്പിച്ച്
ഒരു കുടുക്കിനു തയ്യാറായി
വയലറ്റ് ഷിഫോണ്‍ സാരി.
ജീവിതത്തിന്റെ അദ്ധ്യായങ്ങളെയാ‍ണു
അലമാരയില്‍ അടുക്കിവെച്ചിരിക്കുന്നത്.
ജീവിതം തന്നെയാ‍ണു
അലമാരയില്‍ മടങ്ങിയിരിക്കുന്നത്.
-
ദേവസേന
(ചരിച്ചുവാര്‍ത്ത ഗോപുരങ്ങള്‍ എന്ന പ്രയോഗത്തിനു സുഭാഷ് ചന്ദ്രനോട് കടപ്പാട്)
Labels: devasena
8 Comments:
nannayirikkunnu....
Nice..
congrats
Nice poem,
Merry Christmas
ആശയം കൊണ്ട് പുതുമ തോന്നിയെങ്കിലും കവിതയുടെ ഏറു കൊണ്ട് തറക്കാൻ മാത്രം മുനയില്ലെന്ന് തോന്നി. എങ്കിലും ഏറിൻ റെ ശക്തിയിൽ ചില മുറുവുകളെങ്കിലും ഉണ്ടാക്കുന്നുവെന്ന് ആശ്വസിക്കാം
സ്നേഹപൂർവ്വം
ഇരിങ്ങൽ
കാണാന്‍ പാടില്ലാത്തത്‌ കാട്ടുമ്പോള്‍ കണ്ണടക്കാന്‍ മാത്രം കരുത്തില്ലാത്തതിനാല്‍ കാണിക്കാന്‍ പാടില്ലാത്തത്‌ (അങ്ങിനെയും ഒന്നുണ്ടോ ) കാണിക്കാതിരിക്കാന്‍ ശ്രമിയ്കുന്നതല്ലേ അഭികാമ്യം. കൃതിമമായുണ്ടാക്കിയ ഗോപുരങ്ങളുടെ തള്ളിച്ച കൊണ്ട് വഴിനടക്കാന്‍ കഴിയുന്നില്ലെന്ന് പോകറ്റടിക്കാര്‍ വരെ പറയുന്നു
ദേവസേനയുടെ കവിതകള്‍ കേള്ക്കാറുണ്ട്.
നന്നായിരിക്കുന്നു
ദേവസേനയുടെ കവിത വിസ്തരിക്കാനുള്ള വിവരമില്ലെങ്കിലും നല്ല കവിത എന്നു കാണാനുള്ള മനസ്സുണ്ട്.
Post a Comment
Links to this post:
Create a Link
« ആദ്യ പേജിലേക്ക്