കപ്പ, പുഴുക്ക്‌, പഴങ്കഞ്ഞി മുതല്‍ പോത്തിറച്ചി, പന്നി ഇറച്ചി, തവളക്കാല്‍ വരെ സസ്യവും, സസ്യേതരവുമായ സകല രുചികളേയും പിറകേ നടന്ന് പ്രണയം കൊണ്ട്‌ പൊറുതി മുട്ടിച്ചപ്പൊഴാണ്‌ കൊഴുപ്പിന്റെ പടകളെ ഇളക്കി വിട്ട്‌ അവരെന്റെ ചങ്കിന്റെ വാതിലുകള്‍ അടച്ച്‌ പ്രാണനെ ഘെരാവോ ചെയ്തത്‌.




ചാര്‍മിനാര്‍, സിസറ്‌, വില്‍സു തൊട്ട്‌, ദിനേശ്‌, കാജാ, തെറുപ്പങ്ങനെ സാക്ഷാല്‍ നീല ചടയന്‍ വരെ ഓട്ടു കമ്പനിയിലെ കുഴലു പോലെ പുക കൊണ്ട്‌ സദാ കൊടി പിടിച്ചതു കൊണ്ടാണ്‌ ശ്വാസം കിട്ടാതവര്‍ നിക്കോട്ടിനും, ടാറും, കാര്‍ബണുമായി പിരിഞ്ഞ്‌ എന്റെ ശ്വാസ കോശങ്ങളില്‍ കുത്തിയിരിപ്പ്‌ സമരം തുടങ്ങിയത്‌.




തട്ടിന്‍ പുറത്തു നിന്ന് തേങ്ങാ മോഷ്ടിച്ചു വിറ്റ കാശിന്‌ ആദ്യമായ്‌ മോന്തിയ വാറ്റു ചാരായം തൊട്ട്‌ നാടനായ്‌, വിദേശിയായ്‌ തിരുക്കി പൊട്ടിച്ച കുപ്പികളുടെ കന്യാ ചര്‍മ്മങ്ങ ളാവണം കണ്ണകിമാരായ്‌ എന്റെ കരള്‍ ദഹിപ്പിച്ചത്‌.




വലിച്ചതും, കുടിച്ചതും, തിന്നതുമായുള്ള സകല പ്രിയങ്ങളും അങ്ങനെ കൈ കഴുകിയിട്ടും ഇനിയും സ്നേഹിച്ച്‌ തീര്‍ന്നിട്ടില്ലെന്ന് ഒട്ടി നില്‍ക്കുന്നു ണ്ടൊരുത്തി മാത്രം; എറ്റിവിട്ടാലും വിട്ടു പോകാത്തൊരു പട്ടിയെ പോലെ, ഉടലിലെ വിടെയോ...




ഇനിയിപ്പൊ അവള്‍ക്ക്‌ വേണ്ടിയും ഒന്നു ജീവിച്ച്‌ നോക്കണം.

Labels: vishakh-shanker

ഒന്ന്




ഏഴരമണിയുടെ പവര്‍ കട്ട് സമയം
ഒരൊറ്റ മെഴുകുതിരി വെളിച്ചത്തില്‍
ഒരു കുട്ടി മിഠായി ആവശ്യപ്പെട്ടപ്പോള്‍
ഉടുവസ്ത്രങ്ങളില്‍ ചെളിപുരളാതിരിക്കുവാന്‍
ലൈംഗിക ഉദ്ദീപനങ്ങളല്ലാത്ത കാലുകള്‍
വെളിവാക്കിയ ഒരു കൂട്ടം സ്ത്രീകളേയും
നോക്കിക്കൊണ്ടാണ് ദൈവം പറഞ്ഞതു
"നിന്നെ കാണാന്‍ പെണ്ണിനെ പോലെ എന്നു!"




രണ്ട്




രണ്ടാം ലോകമഹായുദ്ധകാലത്ത്
ഒരു മുല നഷ്ട്ടപ്പെട്ട ഒരു മൂന്നുമുലച്ചി പയ്യ്
നമ്മള്‍ നിശ്ചലമായ് അവശേഷിപ്പിച്ച വിപ്ലവങ്ങളില്‍ മേഞ്ഞ സമയത്ത്
എന്റെ ചോദ്യത്തിനും നിന്റെ ഉത്തരം റ്റൈപ്പു ചെയ്യുന്നതിനും
ഇടയിലുള്ള സമയം കൊണ്ടാണ്
ദൈവം എന്നെ തൊട്ടത്!
ഒരു വിടന്റെ സ്പര്‍ശനത്തോടു സാദൃശ്യം തോന്നിയത്,
"തകര്‍ന്ന കടല്‍പ്പാലം കണക്കെ നിന്റെ ആ പല്ല്" എന്നു.




മൂന്ന്




ചുവന്ന ട്രാഫിക് സിഗ്നലിനു മുന്‍പില്‍ വച്ചു
2 രൂപക്കു നിനക്ക് ഒരിക്കല്‍ മാത്രം ഉപയോഗിക്കാവുന്ന
പൊതുകക്കൂസിനു മുന്‍പില്‍ വച്ചാണു
ഞാന്‍ പ്രണയിച്ചതു!
ഓരോ നിമിഷവും മരണത്തെ
ഓരൊ നിമിഷവും പ്രണയം
അടുത്തിടപഴകി
യഥാക്രമം മേല് വിലാസം നല്‍കി
പരിചയപ്പെട്ട്
മറ്റാരേക്കാളും ശ്രദ്ധകൊടുത്ത്
ഉപേക്ഷിക്കാനാകാത്ത വിധം എന്നൊക്കെ പറഞ്ഞ്
തികവൊത്ത ഒരു പ്രണയത്തിനു
ദൈവത്തെ തന്നെ ആവശ്യമുണ്ടായിരുന്നു
അതിനുശേഷം സംഭവിക്കുന്ന തികവൊത്ത ആ ഇടവേളക്കും.




നാല്




ഒന്നരചാണ്‍ വീതിയുള്ള ഒരഴുക്കു നദിക്കു
മുകളിലെ ആകാശം പൊട്ടിതകര്‍ത്തിട്ട്
ഫ്ലാഷ്ബാക്കുകളില്ലാത്ത പ്രേതങ്ങളെ ബക്കറ്റുകളടക്കം
വിരല്‍തൊട്ടാല്‍ മുറിഞ്ഞു പോയേക്കാവുന്ന
മഴയിലൂടെ അവന്‍ കൊണ്ടു പോയി




അഞ്ച്




ഒരു ഫാബ്രിക് ശാലക്കുമുന്നിലൂടെ
ഞാന്‍ ദൈവത്തെ കടന്നുപോയപ്പോള്‍
സ്ക്രീനില്‍ മിനറല്‍ വാട്ടര്‍ പിടിച്ച വിദേശ വനിതയെ
തെളിഞ്ഞതു എന്തു കൊണ്ടാണെന്നു ചിന്തിച്ചാണു
കണ്ണാടിയില്‍ നെഞ്ചു പരിശോധിച്ചതു
ദൈവമേ!അതു വളര്‍ന്നു തുടങ്ങിയിരിക്കുന്നു!




- അരുണ്‍ പ്രസാദ്
http://abandonedby.blogspot.com/

Labels: arunprasad