തിരിയുമ്പോള്‍ മുതുക്
ചെരിയുമ്പോള്‍ വയറ്
കുനിയുമ്പോള്‍
ചരിച്ചു വാര്‍ത്ത ഗോപുരങ്ങള്‍
കാണാന്‍ പാടില്ലാത്ത
പലതും കാണുന്നുവെന്ന്
അറബി മാനേജര്‍ക്ക് അനിഷ്ടമായി.




വാരിച്ചുറ്റിയ ഒറ്റ നീളന്‍ വസ്ത്രം
സാവധാനം
ഓരോന്നോയി
അലമാരയിലേക്ക് മടങ്ങിപ്പോയിരുന്നു




അഞ്ചര മീറ്റര്‍ നീളത്തില്‍
വിവിധ വര്‍ണങ്ങളില്‍
കരഞ്ഞും ചിരിച്ചും കുതുഹലപ്പെട്ടും
ക്ഷീണിച്ചും ക്ഷതമേറ്റും,
അഴകാര്‍ന്നും അലുക്കിട്ടും,
ഓരോന്നും.




വെയില്‍ കായിച്ചും
കര്‍പ്പൂരം പുകച്ചും
നാഫ്തലില്‍ വിതറിയും
ഓര്‍മ്മകളെ കാക്കുന്നപോലെ
അത്രമേല്‍ ഭദ്രമാക്കി.




ആണ്ടൊരിക്കല്‍
റംസാന്‍ മാസം വിരുന്നുവരും
വസ്ത്രശേഖര സംഘം പിരിവിനെത്തും
അഞ്ചും എട്ടും വെച്ച് അടര്‍ന്നുമാറും
ബാക്കിയുള്ളവ
അനിശ്ചതത്തില്‍ ഊഴം കാത്തുകിടക്കും
വന്നുവന്ന് വിരലിലെണ്ണാന്‍ മാത്രം.
ഓരോ കഥകളിലൂടെ പായുന്നുണ്ട് ഓരോന്നും.
ഓര്‍മ്മപ്പെടുത്തലുകളിലൂടെ മേയുന്നുണ്ട്
ഭാര്യക്ക്,
അമ്മക്ക്,
മകള്‍ക്ക്
പെങ്ങള്‍ക്ക്
അമ്മായിക്ക്,
നിന‍ക്ക്.
എന്ന് ബന്ധപ്പെടുത്തുന്നുണ്ട്




ദ്രംഷ്ടകള്‍ നീട്ടി
പാലപ്പൂവിന്റെ മണമുള്ള
വെളുത്ത മംഗല്യസാരി..
തമസ്സാണു സുഖമെന്നാശ്വസിച്ച്
മുഖമുയര്‍ത്താതിരിക്കുന്ന
കറുമ്പികള്‍
ആസക്തികളവസാനിപ്പിക്കൂയെന്നു
ശാസിച്ച് കാവിസാരി
പാത്തും പതുങ്ങിയും
കള്ളകടത്തിനെയനുസ്മരിപ്പിച്ച് അവനെത്തിച്ച
ഇളം നിറങ്ങളില്‍ ചിലത് .
ജന്മം മടുത്തുവെങ്കില്‍
ഞാനുണ്ട് എന്നാശ്വസിപ്പിച്ച്
ഒരു കുടുക്കിനു തയ്യാറായി
വയലറ്റ് ഷിഫോണ്‍ സാരി.




ജീവിതത്തിന്റെ അദ്ധ്യായങ്ങളെയാ‍ണു
അലമാരയില്‍ അടുക്കിവെച്ചിരിക്കുന്നത്.
ജീവിതം തന്നെയാ‍ണു
അലമാരയില്‍ മടങ്ങിയിരിക്കുന്നത്.




- ദേവസേന

---

(ചരിച്ചുവാര്‍ത്ത ഗോപുരങ്ങള്‍ എന്ന പ്രയോഗത്തിനു സുഭാഷ് ചന്ദ്രനോട് കടപ്പാട്)

Labels: devasena

വയലോരത്തൊരു ഷാപ്പുണ്ട്

പാളങ്ങള്‍ക്കരികില്‍

തൊങ്ങോലത്തുണിയുരിഞ്ഞ് തലേക്കെട്ടി

കാലുമടക്കി തെങ്ങിലൊറ്റയടിതരുമെന്ന മട്ടില്‍

പടിഞ്ഞാറന്‍ കാറ്റത്ത് ആടിയാടി നില്‍പ്പാണ്

മുഴുക്കുടിയന്മാരായ ഞാനും ചങ്ങാതിയും

ഒരു മാറ്റത്തിന്‍ അവിടെപ്പോയി

തലയ്ക്ക്മീതെ ശൂന്യാകാശമെന്നപാട്ട് പാടുന്നവരുണ്ടവിടെ

ആ പാട്ടില്‍ത്തന്നെ വീണ്ടും വീണ്ടും

കരിമീനും കപ്പയും പനങ്കള്ളും ചേര്‍ക്കുന്നു ഞങ്ങള്‍

നീര്‍ക്കാക്കകളും കൊക്കുകളും ഉള്ള കണ്ടങ്ങള്‍ക്കിടയിലെ

പാളങ്ങളിലൂടെ മടങ്ങുന്നു

ചെന്നൈ സൂപ്പര്‍ഫാസ്റ്റ് പാഞ്ഞുപോകുന്നു

ദുഖം വന്നാലും സന്തോഷം വന്നാലും കുടിച്ച്നടന്ന് ഞങ്ങള്‍

കുടിച്ച് കുടിച്ച് ചങ്ങാതി മരിച്ചു

അവനു വേണ്ടിയും ഞാന്‍ കുടിച്ചു

ഇനി കുടിച്ചാല്‍ ചത്ത് പോകുമെന്നറിഞ്ഞു

പതിമുഖമിട്ട വെള്ളം കുടിച്ച് തുടങ്ങി

പോയകാലം ഓര്‍ക്കാതായി

ഏറെ രസകരമായിരുന്നു അതെങ്കിലും

തീവണ്ടിയില്‍ കടന്ന് പോകുമ്പോഴൊക്കെ

ഒരു മിന്നായം പോലെ ആ ഷാപ്പ് കാണാറുണ്ട്

അവിടെ പാട്ടുകള്‍ പാടുന്നുണ്ടാവാം



* അടുത്തിടെ വായിച്ച ടൂട്ടുവോളയുടെ കള്ളു കുടിയന്‍ എന്ന ആഫ്രിക്കന്‍ നോവല്‍ ഈ കവിതയ്ക്ക് ഒരു പ്രേരണയായിട്ടുണ്ട്

Labels: s-joseph