ലിസ്ബണ്‍: ആറുവര്‍ഷത്തെ ജോസ്‌ സോക്രട്ടിന്റെ ഭരണത്തിനെതിരെ പോര്‍ച്ചുഗീസ് ജനത വിധിയെഴുതി. അന്താരാഷ്ട്ര നാണയ നിധിയില്‍ നിന്നും യൂറോപ്യന്‍ യൂണിയനില്‍ നിന്നും  വന്‍തുക കടമെടുത്തിനെതിരെ ശക്തമായ പ്രതിഷേധം നിലനില്‍ക്കെയാണ് തെരഞ്ഞെടുപ്പില്‍ സോക്രട്ടിനു തിരിച്ചടി നേരിട്ടത്. പ്രതിപക്ഷത്തുള്ള  വലതുപക്ഷ പാര്‍ട്ടിയായ പോര്‍ച്ചുഗീസ് സോഷ്യല്‍ ഡെമോക്രാറ്റ്‌ (പി.എസ്.ഡി) കക്ഷിക്ക് 39 ശതമാനം വോട്ടു ലഭിച്ചപ്പോള്‍ പ്രധാനമന്ത്രി ജോസ്‌ സോക്രട്ടു  നേതൃത്വം നല്‍കുന്ന സോഷ്യലിസ്റ്റുകള്‍ക്ക് 28 ശതമാനം വോട്ട് നേടാനേ കഴിഞ്ഞുള്ളൂ. 12 ശതമാനം വോട്ടു നേടിയ യാഥാസ്ഥിതിക പാര്‍ട്ടിയായ സി.ഡി.എസ്-പി.പിയുമായി ചേര്‍ന്ന് മന്ത്രിസഭ രൂപീകരിക്കുമെന്ന് പി.എസ്.ഡി നേതാവും പ്രധാനിമന്ത്രി സ്ഥാനത്തേക്ക്‌ പരിഗണിക്കാന്‍ സാധ്യതയുമുള്ള പെഡ്രോ പാസ്സോസ് കുയിലു പറഞ്ഞു. പരാജയത്തിന്റെ ഉത്തരവാദിത്വം ഏറ്റെടുത്ത്‌ പാര്‍ട്ടി നേതൃത്വ സ്ഥാനത്ത് നിന്നും ജോസ്‌ സോക്രട്ടു രാജിവെച്ചു.

ബെയ്ജിങ്/ടോക്യോ: ജപ്പാനെ മറികടന്ന് ചൈന ലോകത്തെ രണ്ടാമത്തെ വലിയ സാമ്പത്തികശക്തിയായി. 2010 അവസാനിക്കുമ്പോഴുള്ള കണക്കനുസരിച്ച് 5.474 ലക്ഷംകോടി ഡോളറാണ് ജപ്പാന്റെ സാമ്പത്തിക മൂല്യം. എന്നാല്‍ 5.8 ലക്ഷം കോടി ഡോളറാണ് ചൈനയുടെ ഇതേ കാലയളവിലെ സാമ്പത്തിക മൂല്യം. കയറ്റുമതിയും ഉപഭോക്തൃചോദനവും കുറഞ്ഞതാണ് ജപ്പാന് തിരിച്ചടിയായത്. ഉത്പാദന മേഖലയിലെ കുതിപ്പ് ചൈനയ്ക്ക് തുണയായി.

നിലവിലെ വളര്‍ച്ചാ നിരക്കനുസരിച്ച് മുന്നേറിയാല്‍ ചൈന അടുത്ത പത്തു വര്‍ഷത്തിനുള്ളില്‍ അമേരിക്കയെ പിന്തള്ളി ലോകത്തെ ഏറ്റവും വലിയ സാമ്പത്തിക ശക്തിയാകുമെന്ന് വിദഗ്ധര്‍ അഭിപ്രായപ്പെടുന്നു. നിലവിലെ കണക്കനുസരിച്ച് ബ്രിട്ടന്‍ ആറാമത്തെ സാമ്പത്തിക ശക്തിയാണ്. നാലുപതിറ്റാണ്ടിനിടെ ആദ്യമായാണ് ലോകത്തെ രണ്ടാമത്തെ സാമ്പത്തിക ശക്തിയെന്ന പദവി ജപ്പാന് നഷ്ടപ്പെടുന്നത്. സാമ്പത്തിക ശക്തി എന്ന പദവിയേക്കാള്‍ രാജ്യത്തെ ജനങ്ങളുടെ ജീവിതനിലവാരം ഉയര്‍ത്താനാണ് ഊന്ന ല്‍നല്‍കിയതെന്ന് ജപ്പാന്‍ ധനകാര്യ മന്ത്രി കൗറു യൊസാനോ പറഞ്ഞു. അയല്‍രാജ്യമായ ചൈനയുടെ സാമ്പത്തിക മുന്നേറ്റത്തെ സ്വാഗതം ചെയ്യുന്നതായും അദ്ദേഹം വ്യക്തമാക്കി.

മറ്റു രാജ്യങ്ങളിലെ കറന്‍സിയുമായി താരതമ്യം ചെയ്യുമ്പോള്‍ ജപ്പാനീസ് യെന്നിന്റെ മൂല്യം ഉയര്‍ന്നത് ജപ്പാന്റെ ഉത്പന്നങ്ങള്‍ക്ക് വിദേശത്ത് ആവശ്യം കുറയാന്‍ ഇടയാക്കി. ഇതേസമയം വിലകുറഞ്ഞ ചൈനീസ് ഉത്പന്നങ്ങള്‍ക്ക് ആവശ്യക്കാരേറിയതും ജപ്പാനെ പ്രതികൂലമായി ബാധിച്ചു. ആഭ്യന്തരമായും വിദേശത്തും തങ്ങളുടെ ഉത്പന്നങ്ങള്‍ക്ക് ആവശ്യം കുറഞ്ഞത് ജപ്പാന് തിരിച്ചടിയായി. രാജ്യത്ത് പ്രായമായവരുടെ ജനസംഖ്യ ഉയര്‍ന്നതും ഉത്പന്നങ്ങള്‍ക്ക് ആവശ്യക്കാര്‍ കുറയുന്നതിന് കാരണമായി ചൂണ്ടിക്കാണിക്കപ്പെടുന്നു.

അതേസമയം, ആഭ്യന്തര വ്യവസായത്തിലെയും അടിസ്ഥാന സൗകര്യ വികസന രംഗത്തെയും കുതിച്ചുചാട്ടം ചൈനയ്ക്ക് തുണയായി. ഏറെ മധ്യവര്‍ഗക്കാര്‍ ധനാഢ്യരായി. എന്നാല്‍, ഒട്ടേറെ ജനങ്ങള്‍ ഇപ്പോഴും പാവപ്പെട്ടവരായി തുടരുന്നുണ്ടെന്ന് കണക്കുകള്‍ ചൂണ്ടിക്കാട്ടുന്നു. അന്താരാഷ്ട്ര നാണയ നിധിയുടെ (ഐ.എം.എഫ്) കണക്കനുസരിച്ച് ജപ്പാനിലെ ആളോഹരി വരുമാനം 34,000 ഡോളറാണ്. ചൈനയില്‍ ഇത് 7500 ഡോളര്‍മാത്രം.

വാഷിംഗ്ടണ്‍ : ജൂണ്‍ 26ന് ടോറോന്‍റോയില്‍ ആരംഭിക്കുന്ന ജി-20 ഉച്ചകോടി ആഗോള സാമ്പത്തിക പ്രതിസന്ധി പരിഹരിക്കുന്നതിനുള്ള മാര്‍ഗ്ഗങ്ങള്‍ ചര്‍ച്ച ചെയ്യുന്നതിന് മുന്‍ഗണന നല്‍കണമെന്ന് അമേരിക്കന്‍ പ്രസിഡണ്ട് ബരാക്‌ ഒബാമ ആവശ്യപ്പെട്ടു. ലോകത്തിലെ ഏറ്റവും സമ്പന്നമായ 20 രാഷ്ട്രങ്ങള്‍ പങ്കെടുക്കുന്ന ഉച്ചകോടി അന്താരാഷ്‌ട്ര സാമ്പത്തിക സഹകരണം ലക്ഷ്യമിട്ട് രൂപം നല്‍കിയതാണ്. പുതിയ വെല്ലുവിളികളെ കൂട്ടായി നേരിടുവാനുള്ള ആര്‍ജവം ജി-20 രാഷ്ട്രങ്ങള്‍ പ്രകടിപ്പിക്കണം എന്നും ഒബാമ ഉച്ചകോടിക്ക് മുന്‍പായി ലോക നേതാക്കളെ അഭിസംബോധന ചെയ്തെഴുതിയ എഴുത്തില്‍ ആഹ്വാനം ചെയ്തു.