ഗൂഗിള്‍ ഉപയോഗിക്കുന്നവര്‍ക്ക്‌ അടുത്ത ദിവസങ്ങളിലായി ലഭിച്ച ഒരു മുന്നറിയിപ്പ്‌ പതിവ് പോലെ “ഒക്കെ” എന്ന് പറഞ്ഞ് തള്ളിക്കളയാവുന്നതല്ല. ഇന്ത്യ അടക്കം പല രാജ്യങ്ങളില്‍ നിന്നും നിരന്തരമായി ഇന്റര്നെറ്റ് സെന്‍സര്‍ ഷിപ്പിന് വിധേയമാക്കണം എന്ന ആവശ്യം ഉന്നയിച്ചതിനെ തുടര്‍ന്നാണ് ഇപ്പോഴത്തെ ഈ പുതിയ നയമാറ്റം. സുരക്ഷാ കാരണങ്ങള്‍ ചൂണ്ടിക്കാട്ടിയാണ് സര്‍ക്കാരുകള്‍ ഗൂഗിള്‍ അടക്കം പല സോഷ്യല്‍ നെറ്റ്വര്ക്കിംഗ് സൈറ്റുകളെയും സ്വകാര്യ പ്രസാധന സേവനങ്ങളെയും നിയന്ത്രണ വിധേയമാക്കണം എന്ന് ആവശ്യപ്പെട്ടു വന്നത്. ഈ ആവശ്യത്തെ ഭാഗികമായി അംഗീകരിക്കുന്നതാണ് ഗൂഗിളിന്റെ ഈ പുതിയ പ്രഖ്യാപനം.
ഓരോ രാജ്യത്തെയും ഉപയോക്താക്കള്‍ക്ക് അതാത് രാജ്യത്തെ സെര്‍വറുകള്‍ വഴി സേവനം വഴി തിരിച്ചു വിടാനാണ് പുതിയ തീരുമാനം. അതായത് ഇന്ത്യയില്‍ നിന്നും ഗൂഗിളിന്റെ ഏറ്റവും ജനപ്രിയ ബ്ലോഗിംഗ് വെബ് സൈറ്റായ ബ്ലോഗ്സ്പോട്ട് ഡോട്ട് കോമില്‍ (blogspot.com) ഉള്ള ഒരു ബ്ലോഗ്‌ ഇന്ത്യയില്‍ നിന്നും ഒരാള്‍ സന്ദര്‍ശിക്കാന്‍ ശ്രമിച്ചാല്‍ ഇയാളെ ഗൂഗിള്‍ നടപ്പിലാക്കുന്ന പുതിയ വഴി തിരിച്ചു വിടല്‍ (redirection) സംവിധാനം ബ്ലോഗ്സ്പോട്ട് ഡോട്ട് ഇന്‍ (blogspot.in) എന്ന സെര്‍വറിലേക്ക് കൊണ്ടുപോകും. അതായത് ഇന്ത്യന്‍ സര്‍ക്കാരിന് ഒരു ബ്ലോഗ്‌ നിരോധിക്കണം എന്നുണ്ടെങ്കില്‍ ഗൂഗിളിനോട് ആവശ്യപ്പെടുന്ന പക്ഷം ബ്ലോഗ്സ്പോട്ട് ഡോട്ട് ഇന്‍ നിരോധിച്ചാല്‍ മതിയാവും. അതിനാല്‍ മറ്റു രാജ്യങ്ങളിലെ സന്ദര്‍ശകരെ ഈ നിരോധനം ബാധിക്കുകയുമില്ല. ഇനി ബ്ലോഗ്സ്പോട്ട് ഡോട്ട് കോം നേരിട്ട് സന്ദര്‍ശിച്ചു കളയാം എന്ന് ഇന്ത്യയില്‍ നിന്ന് ആരെങ്കിലും കരുതിയാലും ഗൂഗിള്‍ നടപ്പിലാക്കുന്ന വഴി തിരിച്ചു വിടല്‍ കാരണം അത് നടക്കില്ല.
എന്നാല്‍ ഇതിന് ചില പരിമിതികളുണ്ട്. ബ്ലോഗ്സ്പോട്ട് പേര് ഉപയോഗിക്കാതെ സ്വന്തം ഡൊമൈന്‍ നാമം ഉപയോഗിക്കുന്നവരെ ഇത് ബാധിക്കില്ല. ഇത് കൂടാതെ ഈ വഴി തിരിച്ചു വിടല്‍ സംവിധാനത്തെ പരാജയപ്പെടുത്താന്‍ ഗൂഗിള്‍ തന്നെ ഒരു കുറുക്കുവഴി പറയുന്നുമുണ്ട്. ബ്ലോഗ്‌ വിലാസത്തിന്റെ കൂടെ /ncr എന്ന് ചേര്‍ത്താല്‍ വഴി തിരിച്ചു വിടല്‍ സംവിധാനത്തെ മാറി കടന്ന് ബ്ലോഗ്സ്പോട്ട് ഡോട്ട് കോമില്‍ തന്നെ സന്ദര്‍ശകര്‍ എത്തും. ncr എന്നാല്‍ No Country Redirect എന്നാണ്. ഉദാഹരണത്തിന് corruptsonia.blogspot.com എന്ന വെബ്സൈറ്റ് ഗൂഗിള്‍ corruptsonia.blogspot.in എന്ന വിലാസത്തിലേക്ക് തിരിച്ചു വിടും. ഈ ബ്ലോഗ്‌ ഇന്ത്യന്‍ സര്‍ക്കാര്‍ നിരോധിക്കണം എന്ന് ആവശ്യപ്പെട്ടാല്‍ ഗൂഗിള്‍ corruptsonia.blogspot.in നിരോധിക്കും. അതോടെ ഇന്ത്യയില്‍ നിന്നും ഈ ബ്ലോഗ്‌ സന്ദര്‍ശിക്കാന്‍ ആവില്ല. എന്നാല്‍ ഇന്ത്യയില്‍ നിന്ന് corruptsonia.blogspot.com/ncr എന്ന് ടൈപ്പ് ചെയ്‌താല്‍ ഈ ബ്ലോഗ്‌ തുടര്‍ന്നും ഇന്ത്യയില്‍ നിന്നും ലഭ്യമാകും.
ഇത്തരം കുറുക്കു വഴികള്‍ ഒരുക്കുന്നതിനോട് സര്‍ക്കാരുകള്‍ എങ്ങനെ പ്രതികരിക്കും എന്ന് കാത്തിരുന്നു കാണേണ്ടിയിരിക്കുന്നു. ഗൂഗിള്‍ പോലെയുള്ള ജനങ്ങള്‍ക്ക് ഏറെ ഉപകാരപ്രദമായ സൈറ്റുകള്‍ നിയന്ത്രിക്കരുത് എന്ന് പാക്കിസ്ഥാന്‍ കോടതി അഭിപ്രായപ്പെട്ടത് ഏറെ ശ്രദ്ധേയമായ സാഹചര്യത്തിലും ഇന്ത്യയില്‍ ഗൂഗിള്‍ അടക്കം ഒട്ടേറെ സോഷ്യല്‍ നെറ്റ്വര്ക്കിംഗ് സൈറ്റുകളെ നിയന്ത്രണ വിധേയമാക്കാനുള്ള നടപടികള്‍ പുരോഗമിക്കുകയാണ്.
ഗൂഗ്‌ള്‍ ചൈനയില്‍ നിന്നും പടി ഇറങ്ങാന്‍ തയ്യാറാവുന്നു. ലോകത്തിലെ ഏറ്റവും വലിയ വിപണിയായ ചൈനയെ പിണക്കി ചൈനയില്‍ നിന്നും പിന്മാറാന്‍ തയ്യാറായതോടെ ഗൂഗ്‌ള്‍ തങ്ങളുടെ ലക്ഷക്കണക്കിന് ആരാധകരുടെ കയ്യടി വീണ്ടും നേടിയിരിക്കുന്നു. ഡിസംബര്‍ മധ്യത്തില്‍ തങ്ങളുടെ സെര്‍വറുകളില്‍ അതിക്രമിച്ചു കയറിയ ചൈന പ്രധാനമായും തിരഞ്ഞത് ചൈനയിലെ മനുഷ്യാവകാശ പ്രവര്‍ത്തകരുടെ ഈമെയില്‍ ഉള്ളടക്കങ്ങളാണ് എന്ന് ഗൂഗ്‌ള്‍ കണ്ടെത്തി. എന്നാല്‍ കേവലം രണ്ട് ഈമെയില്‍ അക്കൌണ്ടുകള്‍ മാത്രമേ ചൈനക്ക് അതിക്രമിച്ചു കയറാന്‍ കഴിഞ്ഞുള്ളൂ. അതില്‍ തന്നെ ഈമെയില്‍ വിലാസങ്ങളും അവയിലെ സബ്ജക്ട് ലൈനുകളുമല്ലാതെ ഉള്ളടക്കമൊന്നും വായിച്ചെടുക്കാന്‍ ചൈനക്ക് കഴിഞ്ഞതുമില്ല. വിവരങ്ങളുടെ സുരക്ഷയില്‍ അത്രയേറെ ശ്രദ്ധ ഗൂഗ്‌ള്‍ പുലര്‍ത്തിയിരുന്നു. എന്നാലും ചൈനയില്‍ നിന്നും ഇത്തരം ഒരു ആക്രമണം ഉണ്ടായത് ഗൂഗ്‌ളിനെ കുറച്ചൊന്നുമല്ല ചൊടിപ്പിച്ചത്. ഗൂഗ്‌ള്‍ തുടര്‍ന്നു നടത്തിയ വിശദമായ അന്വേഷണത്തില്‍ തങ്ങളുടെ സെര്‍വറിനു പുറമെ വേറെയും 20ഓളം കമ്പനികള്‍ ചൈനയുടെ ആക്രമണത്തിന് ഇരയായിട്ടുണ്ടെന്ന് കണ്ടെത്തി. 
വ്യക്തിഗത വെബ് സൈറ്റുകള്‍ക്ക് അനുമതി നിഷേധിച്ചു കൊണ്ട് ചൈന ഇന്റര്നെറ്റ് നിയന്ത്രണം കര്‍ക്കശമാക്കി. ഇനി മുതല്‍ പുതിയ ഒരു വെബ് സൈറ്റിന്റെ പേര് റെജിസ്റ്റര്‍ ചെയ്യണമെങ്കില്‍ ഒരു വ്യാപാര സ്ഥാപനത്തിന്റെ രേഖകള്‍ ഹാജരാക്കി സ്ഥാപനത്തിന്റെ പേരില്‍ മാത്രമേ വെബ് സൈറ്റ് റെജിസ്റ്റര്‍ ചെയ്യാനാവൂ എന്നതാണ് പുതുതായി ചൈന ഇറക്കിയ കരിനിയമം. 
