പത്മശ്രീ എം.എ. യൂസഫലി ക്ക് അബുദാബിയില്‍ വിവിധ സംഘടനകളുടെ ആഭിമുഖ്യത്തില്‍ വന്‍ സ്വീകരണം ന്ല‍കി. അബുദാബി നാഷണല്‍ തീയറ്ററിലായിരുന്നു സ്വീകരണ പരിപാടി. അബുദാബി ചേംബര്‍ ഓഫ് കൊമേഴ്സ് ആന്‍ഡ് ഇന്‍ഡസ്ട്രി ഡയറക്ടറും എം. കേ. ഗ്രൂപ്പ് മാനേജിംഗ് ഡയറക്ടറുമായ പത്മശ്രീ എം. എ. യൂസഫലിക്ക് അബുദാബിയില്‍ വന്‍ സ്വീകരണമാണ് നല്‍കിയത്.
അബുദാബി ഇന്ത്യന്‍ ഇസ്ലാമിക് സെന്‍റര്‍, ഇന്ത്യാ സോഷ്യല്‍ ആന്‍ഡ് കള്‍ച്ചറല്‍ സെന്‍റര്‍, കേരള സോഷ്യല്‍ സെന്‍റര്‍, മലയാളി സമാജം എന്നീ സംഘടനകളുടെ ആഭിമുഖ്യത്തിലായിരുന്നു സ്വീകരണം. നാഷണല്‍ തീയറ്ററില്‍ നടന്ന ചടങ്ങിലേക്ക് വൈവിധ്യമാര്‍ന്ന കലാ പരിപാടികളുടേയും മുത്തുക്കുടകളുടേയും അകമ്പടിയോടെയാണ് യൂസഫലിയെ സ്വീകരിച്ചാനയിച്ചത്.
സ്വീകരണ പരിപാടിയില്‍ യു.എ.ഇ. ഉന്നത വിദ്യാഭ്യാസ മന്ത്രി ശൈഖ് നഹ്യാന്‍ ബിന്‍ മുബാറക്ക് അല്‍ നഹ്യാന്‍, യു.എ.ഇ. പ്രസിഡന്‍റിന്‍റെ മത കാര്യ ഉപദേഷ്ടാവ് ശൈഖ് അലി അല്‍ ഹാഷ്മി, യു.എ.ഇ. ഔഖാഫ് ചെയര്‍മാന്‍ ഡോ. ഹംദാന്‍ ബിന്‍ മുസല്ലം അല്‍ മസ്റോയി, ഡോ. ബി.ആര്‍. ഷെട്ടി, സണ്ണി വര്‍ക്കി, അക്ബര്‍ ഖാന്‍ തുടങ്ങിയവരും വിവിധ സംഘടനാ നേതാക്കളും പങ്കെടുത്തു.
നൂറോളം വരുന്ന സാമൂഹിക-സാംസ്കാരിക സംഘടനകള്‍ ചടങ്ങില്‍ യൂസഫലിക്ക് ഉപഹാരങ്ങള്‍ നല്‍കി. വിവിധ കലാപരിപാടികളും സ്വീകരണ ചടങ്ങിനോട് അനുബന്ധിച്ച് അരങ്ങേറി.
മറ്റൊരു ഇന്ത്യക്കാരനും ലഭിക്കാത്ത അത്യപൂര്‍വ്വമായ ഒരു സ്വീകരണ ചടങ്ങായി മാറി അബുദാബി നാഷണല്‍ തീയറ്ററിലേത്.
-
