മലയാളിയെ റാസല്‍ ഖൈമയിലെ ജോലി സ്ഥലത്ത് കൊല്ലപ്പെട്ട നിലയില്‍ കണ്ടെത്തി. കണ്ണൂര്‍ വളപട്ടണം കച്ചായി പുരയില്‍ കെ.പി മഹ് മൂദ് ആണ് മരിച്ചത്. 34 വയസായിരുന്നു. റാസല്‍ ഖൈമയിലെ അറേബ്യന്‍ മോട്ടോഴ്സിലെ വാച്ച്മാനായിരുന്നു. കബീനയാണ് ഭാര്യ. മുഹമ്മദ് ഷസീല്‍, മുഹമ്മദ് മാസിന്‍ എന്നിവരാണ് മക്കള്‍.

ദുബായ് മംസാര്‍ ബീച്ചില്‍ കുളിക്കാനിറങ്ങിയ മലയാളി മുങ്ങി മരിച്ചു. എറണാകുളം മാമംഗലം സ്വദേശി നിജോ ജോണ്‍ ആണ് മരിച്ചത്. 31 വയസായിരുന്നു. പെരുന്നാള്‍ അവധി ദിനത്തില്‍ സുഹൃത്തുക്കളോടൊപ്പം കടലില്‍ കുളിക്കാന്‍ ഇറങ്ങിയപ്പോള്‍ തിരയില്‍ പ്പെട്ട് മുങ്ങിപ്പോവുകയായിരുന്നു. ദുബായിലെ ഡോളര്‍ റെന്‍റ് എ കാര്‍ ജീവനക്കാരനാണ്.

ഷാര്‍ജയില്‍ മൂന്ന് വയസുകാരി കെട്ടിടത്തിന്‍റെ മൂന്നാം നിലയില്‍ നിന്ന് വീണു മരിച്ചു. കന്യാകുമാരി വില്ലുകുനി സ്വദേശി കൃഷ്ണപിള്ള- അനിത ദമ്പതികളുടെ മകള്‍ കീര്‍ത്തി രാജ് ആണ് മരിച്ചത്. ഷാര്‍ജ റോളയില്‍ ഇവര്‍ താമസിക്കുന്ന ഫ്ലാറ്റി കിടപ്പുമുറിയുടെ ജനാല വഴിയാണ് കുട്ടി അബദ്ധത്തില്‍ താഴെ വീണത്.

ഫുജൈറയ്ക്ക് സമീപം മസാഫിയുലാണ്ടായ വാഹനാപകടത്തില്‍ മൂന്ന് മലയാളികള്‍ മരിച്ചു. തിരുവല്ല സ്വദേശികളായ അജീഷ്, എബ്രഹാം കുരുവിള, കാസര്‍ക്കോട് സ്വദേശി കുമാരന്‍ എന്നിവരാണ് മരിച്ചത്. അപകടത്തില്‍ രണ്ട് പേര്‍ക്ക് പരിക്കേറ്റു.

ഒമാനിലെ സലാലയില്‍ നിയന്ത്രണം വിട്ട വാഹനമിടിച്ച് മലയാളി മരിച്ചു. വടകര ഇരിങ്ങല്‍ കോട്ടക്കല്‍ മുഴച്ചേരി ചന്ദ്രന്‍ ആണ് മരിച്ചത്. 55 വയസായിരുന്നു. ഇദ്ദേഹം നടത്തുന്ന കരിക്ക് കടയിലേക്ക് സ്വദേശി പൗരന്‍ ഓടിച്ചിരുന്ന വാഹനം ഇടിച്ച് കയറുകയായിരുന്നു. ശാന്തയാണ് ഭാര്യ. നിഷാന്ത്, നിഷീദ എന്നിവരാണ് മക്കള്‍.