ദുബായ് എയര്‍ പോര്‍ട്ട് റോഡിലുണ്ടായ വാഹനാപകടത്തില്‍ മലയാളി മരിച്ചു. നാദാപുരം ഇരിങ്ങണ്ണൂര്‍ സ്വദേശി മുണ്ടാടം പോയില്‍ മൂസ ഹാജിയാണ് മരിച്ചത്. 50 വയസായിരുന്നു.

25 വര്‍ഷമായി യു.എ.ഇയിലുള്ള മൂസ ഹാജി അബുദാബിയില്‍ ഡ്രൈവറായി ജോലി ചെയ്യുകയായിരുന്നു. ജോലി ആവശ്യാര്‍ത്ഥം ദുബായിലേക്ക് വരുമ്പോള്‍ ഇദ്ദേഹം ഓടിച്ചിരുന്ന കാര്‍ ട്രെയ് ലറുമായി കൂട്ടിയിടിച്ചാണ് അപകടം.

തൃശൂര്‍ പൈനൂര്‍ കന്നത്ത്പടിക്കല്‍ മുഹമ്മദ് ഇബ്രാഹിമിന്‍റെ മകന്‍ കാശിഫ് മുഹമ്മദ് ഷാര്‍ജയില്‍ നിര്യാതനായി. 28 വയസായിരുന്നു. ടര്‍ണര്‍ എന്ന കമ്പനിയില്‍ സിവില്‍ എഞ്ചിനീയറായിരുന്നു. മൃതദേഹം നാട്ടിലേക്ക് കൊണ്ടുപോകും.

ദമാമില്‍ താമസ സ്ഥലത്ത് മലയാളിയെ മരിച്ച നിലയില്‍ കണ്ടെത്തി. കൊല്ലം കാട്ടുപുതുശേരി പള്ളിക്കല്‍ മുസ്തഫകുഞ്ഞിന്‍റെ മകന്‍ മുഹമ്മദ് ഇഖ്ബാല്‍ ആണ് മരിച്ചത്. നിസ്റത്ത് ആണ് ഭാര്യ. രണ്ട് മക്കളുണ്ട്. 16 വര്‍ഷമായി സൗദിയില്‍ ജോലി ചെയ്തു വരികയാണ്.

ദുബായിലുണ്ടായ വാഹനാപകടത്തില്‍ മലയാളി മരിച്ചു. താമരശേരി കൊട്ടക്കോത്ത് കിളയില്‍ പരേതനായ സി.എച്ച് ഹംസയുടെ മകന്‍ അബ്ദുല്‍ സലീമാണ് മരിച്ചത്. 24 വയസായിരുന്നു. ദുബായിലെ ഒരു റസ്റ്റോറന്‍റില്‍ ഡെലിവറി ബോയ് ആയിരുന്നു. മോട്ടോര്‍ ബൈക്കില്‍ സഞ്ചരിക്കുമ്പോള്‍ ഫോര്‍വീലര്‍ ഇടിച്ചായിരുന്നു അപകടം. മൃതദേഹം നാട്ടിലേക്ക് കൊണ്ടുപോകുമെന്ന് ബന്ധുക്കള്‍ അറിയിച്ചു.

അജ്മാന്‍ കരാമയിലെ ഒരു വില്ലയിലുണ്ടായ തീപിടുത്തത്തില്‍ പൊള്ളലേറ്റ് ചികിത്സയില്‍ കഴിഞ്ഞിരുന്ന മലയാളി മരിച്ചു. കൊല്ലം ചിതറ സ്വദേശി സിദ്ധീഖ് എന്ന് വിളിക്കുന്ന സക്കീര്‍കുട്ടിയാണ് മരിച്ചത്.

27 വയസായിരുന്നു. ഇതോടെ ഈ തീപിടുത്തത്തില്‍ മരിച്ചവരുടെ എണ്ണം നാലായി. എടപ്പാള്‍ സ്വദേശി തലമുണ്ട ആശാരിപുരക്കല്‍ മാധവന്‍ (58) പരപ്പനങ്ങാടി സ്വദേശികളായ കളംപറമ്പത്ത് പ്രമോദ് (26), തറയില്‍ സജീഷ് (27) എന്നിവര്‍ സംഭവ ദിവസം തന്നെ മരിച്ചിരുന്നു.

കഴിഞ്ഞ ഞായറാഴ്ച പുലര്‍ച്ചെയാണ് ഇവര്‍ താമസിക്കുന്ന വില്ലയ്ക്ക് തീപിടിച്ചത്. പൊള്ളലേറ്റ പരപ്പനങ്ങാടി സ്വദേശികളായ തത്തറക്കല്‍ മനോജ് കുമാര്‍, കോട്ടയില്‍ വീട്ടില്‍ നിഷാന്ത് എന്നിവര്‍ ആശുപത്രി വിട്ടു. അജ്മാനില്‍ ട്രേഡിംഗ് ബിസിനസ് നടത്തുകയായിരുന്നു സക്കീര്‍ കുട്ടി.