മുസ്ലീം ലീഗ്- രാഷ്ട്ര സേവനത്തിന്‍റെ 60 വര്‍ഷങ്ങള്‍ എന്ന പേരില്‍ നടത്തുന്ന പരിപാടിയുടെ കൂപ്പണ്‍ വിതരണം കുവൈറ്റില്‍ സംഘടിപ്പിച്ച ചടങ്ങില്‍ നടന്നു. യു.എ.ഇ എക്സ് ചേ‍ഞ്ച് ജനറല്‍ മാനേജര്‍ കെ.എന്‍.എസ് ദാസ് ഉദ്ഘാടനം ചെയ്തു. ഷറഫുദ്ദീന്‍ കണ്ണോത്ത്, കുഞ്ഞഹമ്മദ് പേരാമ്പ്ര, റഫീഖ് കോട്ടപ്പുറം എന്നിവര്‍ ചടങ്ങില്‍ പങ്കെടുത്തു.

കെ.എം.സി.സി കോഴിക്കോട് ജില്ലാ കമ്മിറ്റിയുടെ ആഭിമുഖ്യത്തില്‍ ഖത്തര്‍ മലയാളി സമാജത്തില്‍ വെള്ളിയാഴ്ച രക്തദാന ക്യാമ്പ് സംഘടിപ്പിക്കുന്നു. ഉച്ചയ്ക്ക് രണ്ടിന് നടക്കുന്ന ക്യമ്പില്‍ സൗജന്യ പ്രമേഹ രക്ത സമ്മര്‍ദ്ദ പരിശോധനകളും ഉണ്ടാകും. വിദഗ്ധ ഡോക്ടര്‍മാര്‍ പങ്കെടുക്കുന്ന ആരോഗ്യ സെമിനാറും സംഘടിപ്പിച്ചിട്ടുണ്ട്. പങ്കെടുക്കാന്‍ ആഗ്രഹിക്കുന്നവര്‍ പേര് മുന്‍കൂട്ടി രജിസ്റ്റര്‍ ചെയ്യണമെന്ന് സംഘാടകര്‍ അറിയിച്ചു.

സാരഥി കുവൈറ്റ് കുടുംബ സംഗമം നടത്തി. ഫഹാഹീല്‍ പാര്‍ക്കിലായിരുന്നു ആഘോഷ പരിപാടികള്‍. സൗജന്യ വൈദ്യ പരിശോധന, ചിത്ര രചനാ മത്സരം തുടങ്ങിയവയെല്ലാം കുടുംബ സംഗമത്തോട് അനുബന്ധിച്ച് സംഘടിപ്പിച്ചിരുന്നു.

സൗദി ഭരണാധികാരി അബ്ദുല്ല രാജാവിന്‍റെ രക്ഷാ കര്‍തൃത്വത്തിലുള്ള റിയാദ് അന്താരാഷ്ട്ര പുസ്തക മേള നാളെ ആരംഭിക്കും. 32 രാജ്യങ്ങളില്‍ നിന്നായി 550 പ്രസാധകരാണ് മേളയില്‍ പങ്കെടുക്കുക. ഇതില്‍ 90 പ്രസാധകര്‍ സൗദിയില്‍ നിന്നുള്ളവരാണ്. മേള പത്ത് ദിവസം നീണ്ടു നില്‍ക്കും. പ്രസാധന രംഗത്തും സാഹിത്യ രംഗത്തും മികച്ച സംഭാവന നല്‍കിയവരെ മേളയില്‍ ആദരിക്കും.

Q.M.Y.S ന്‍റെ ആഭിമുഖ്യത്തില്‍ ദോഹയില്‍ മ്യൂസിക് ഫിയസ്റ്റ നടന്നു. ദോഹ കോളേജ് ഓഡിറ്റോറിയത്തില്‍ നടന്ന പരിപാടിയില്‍ ഡ്രീം മ്യൂസിക് ബാന്‍ഡ്, ഡെസേര്‍ട്ട് ഹാര്‍മണിയിലേയും കലാകാരന്മാര്‍ പങ്കെടുത്തു. ഖത്തര്‍ മാര്‍ത്തോമാ ക്വയര്‍, യുവജനസഖ്യം ക്വയര്‍ എന്നിവയിലെ കലാകാരന്മാരും പരിപാടിയില്‍ ഗാനങ്ങള്‍ ആലപിച്ചു.