ആദ്യ ഹജ്ജ് സംഘം മക്കയിലെത്തി. ഇന്നലെ വൈകുന്നേരത്തോടെയാണ് രണ്ടായിരത്തോളം വരുന്ന തീര്‍ത്ഥാടകര്‍ മദീനയില്‍ നിന്ന് മക്കയിലേക്ക് തിരിച്ചത്. അതേ സമയം രാത്രി വൈകി മദീനയില്‍ നിന്ന് പുറപ്പെട്ട മലയാളി തീര്‍ത്ഥാടകരെ വഴിയില്‍ വച്ച് പോലീസ് മദീനയിലേക്ക് തന്നെ തിരിച്ചയച്ചു. മദീനാ-മക്കാ റോഡിലൂടെ രാത്രിയില്‍ തീര്‍ത്ഥാടകരേയും വഹിച്ചകൊണ്ടുള്ള ബസുകള്‍ യാത്ര ചെയ്യാന്‍ പാടില്ലെന്ന് ഹജ്ജ് മന്ത്രാലയത്തിന്‍റെ നിര്‍ദേശം അവഗണിച്ചതാണ് കാരണം. ഹാജിമാരുടെ സുരക്ഷ പരിഗണിച്ചാണ് രാത്രിയില്‍ ഹൈവൈയിലൂടെ യാത്ര നിരോധിച്ചത്. മടങ്ങിപ്പോയ തീര്‍ത്ഥാടകര്‍ ഇന്ന് ഉച്ചതിരിച്ചാണ് മക്കയിലെത്തിയത്. മക്കയിലെ ഹജ്ജ് മിഷന്‍ ഉദ്യോഗസ്ഥരും കെ.എം.സി.സി ഹജ്ജ് സെല്ലും ചേര്‍ന്ന് ഹാജിമാരെ സ്വീകരിച്ചു.

കാലാവസ്ഥാ വ്യതിയാനം, ജനസംഖ്യാ വര്‍ധനവ് തുടങ്ങിയ ഒട്ടേറെ ഘടകങ്ങള്‍ കാരണം ഖത്തറിന്‍റെ പരിസ്ഥിതിയില്‍ മാറ്റങ്ങള്‍ ഉണ്ടകുമെന്ന് മുന്നറിയിപ്പ്. അറബ് ഫോറത്തിന്‍റെ പരിസ്ഥിതി പ്രത്യാഘാതത്തെക്കുറിച്ചുള്ള വാര്‍ഷിക റിപ്പോര്‍ട്ടിലാണ് ഈ മുന്നറിയിപ്പുള്ളത്. ലോകമെമ്പാടുമായി കാലാവസ്ഥയില്‍ ഉണ്ടാകുന്ന വ്യതിയാനം മൂലം കടല്‍ ജല നിരപ്പ് ഉയരുമെന്നും ഖത്തര്‍ ഉള്‍പ്പടെയുള്ള ഗള്‍ഫ് രാജ്യങ്ങളുടെ രണ്ട് ശതമാനത്തോളം കര ഇല്ലാതാകുമെന്നും റിപ്പോര്‍ട്ടില്‍ പറയുന്നു. ഈ നൂറ്റാണ്ടിന്‍രെ അവസാനത്തോടു കൂടി ഗള്‍ഫ് മേഖലയില്‍ താപനിലയില്‍ രണ്ട് മുതല്‍ അഞ്ച് ഡിഗ്രി സെല്‍ഷ്യസ് വരെ വ്യതിയാനം ഉണ്ടാകുമെന്നും റിപ്പോര്‍ട്ട് സൂചിപ്പിക്കുന്നു.

ജി.സി.സി രാജ്യങ്ങളില്‍ വ്യവസായത്തിന് ഏറ്റവും അനുകൂലമായ സാഹചര്യമുള്ള രാജ്യമായി ഖത്തറിനെ തെരഞ്ഞെടുത്തു. ജി.സി.സി രാജ്യങ്ങളിലെ വ്യാപാര സമൂഹമാണ് ഖത്തറിന് ഈ പുരസ്ക്കാരം നല്‍കിയത്. കുവൈറ്റ്, ഒമാന്‍, ലെബനോന്‍ തുടങ്ങിയ രാജ്യങ്ങളാണ് ഖത്തറിന് തൊട്ടുപിന്നില്‍.

ഖത്തറില്‍ നിലനില്‍ക്കുന്ന നികുതികള്‍, വ്യാപാരം സുഗമമായി നടത്തുന്നതിനുള്ള നിയമങ്ങള്‍ എന്നിവയെല്ലാം പരിഗണിച്ചാണ് തെരഞ്ഞെടുപ്പ് നടത്തിയത്. ഒമാനിലെ ഇന്‍റര്‍നാഷണല്‍ റിസര്‍ച്ച് ഫൗണ്ടേഷന്‍, കാനഡയിലെ ഫ്രേസര്‍ ഇന്‍സ്റ്റിറ്റ്യൂട്ട് എന്നിവയുടെ സഹകരണത്തോടെയാണ് മികച്ച രാജ്യങ്ങളെ തെരഞ്ഞെടുത്തത്.