പ്രവാസി കേരളാ കോണ്‍ഗ്രസ് (എം)ന്‍റെ മേഖലാ സമ്മേളനങ്ങള്‍ 28,29 തീയതികളില്‍ ഷാര്‍ജ, അബുദാബി എന്നിവിടങ്ങളില്‍ നടക്കും. സമ്മേളനങ്ങള്‍ പാര്‍ട്ടി ലീഡര്‍ കെ.എം മാണി ഉദ്ഘാടനം ചെയ്യുമെന്ന് കേരള കോണ്‍ഗ്രസ് (എം) ജനറല്‍ സെക്രട്ടറി തോമസ് കുതിരവട്ടം വാര്‍ത്താ സമ്മേളനത്തില്‍ അറിയിച്ചു. 28 ന് വെള്ളിയാഴ്ച വൈകീട്ട് 5.30ന് ഷാര്‍ജ ഇന്ത്യന്‍ അസോസിയേഷന്‍ ഹാളിലും 29 ന് വൈകീട്ട് അഞ്ചിന് അബുദാബി ഫുഡ് ലാന്‍ഡ് ഓഡിറ്റോറിയത്തിലുമാണ് സമ്മേളനങ്ങള്‍. അദ്ധ്വാന വര്‍ഗ സിദ്ധാന്തവും മാര്‍ക്സിസവും ഒരു താരതമ്യ പഠനം എന്ന വിഷയത്തില്‍ ഷാര്‍ജ ഇന്ത്യന്‍ അസോസിയേഷന്‍ ഹാളില്‍ സിമ്പോസിയവും സംഘടിപ്പിച്ചിട്ടുണ്ട്. 28 ന് വൈകുന്നേരം മൂന്നരയ്ക്കാണ് പരിപാടി. കെ.എം മാണി, ഐസക് പട്ടാണിപ്പറമ്പില്‍, കെ.എല്‍ ഗോപി, നിസാര്‍ സെയ്ദ് എന്നിവര്‍ പങ്കെടുക്കും.

കുവൈറ്റ് ലുലു ഹൈപ്പര്‍ മാര്‍ക്കറ്റില്‍ ഫുഡ് ഫെസ്റ്റിവല്‍ ആരംഭിച്ചു. 12 ദിവസം നീണ്ടു നില്‍ക്കും. റീജണല്‍ ഡയറക്ടര്‍ മുഹമ്മദ് മുസ്തഫ ഉദ്ഘാടനം ചെയ്തു. എല്ലാ ദിവസവും തീറ്റമത്സരവും സംഘടിപ്പിക്കുന്നുണ്ട്. ഫുഡ് ഫെസ്റ്റിവലിനോട് അനുബന്ധിച്ച് ആകര്‍ഷകമായ സമ്മാനങ്ങള്‍ നല്‍കുമെന്ന് സംഘാടകര്‍ അറിയിച്ചു.

ഫ്രണ്ട്സ് ഓഫ് കണ്ണൂര്‍ കുവൈറ്റ് ചാപ്റ്ററിന്‍റെ പ്രഥമ ഗോള്‍ഡന്‍ ഫോക്ക് അവാര്‍ഡ് കലാമണ്ഡലം വനജയ്ക്ക് ലഭിച്ചു. പ്രശസ്ത നൃത്ത അധ്യാപികയും കണ്ണൂരിലെ നടന കലാക്ഷേത്രം സ്ഥാപകയുമാണ് കലാമണ്ഡലം വനജ. ഇവര്‍ തയ്യാറാക്കിയ കടത്തനാട്ട് മാക്കം ബാലെ ആയിരത്തിലധികം സ്റ്റേജുകളില്‍ അവതരിപ്പിച്ചിട്ടുണ്ട്. ഏപ്രീല്‍ നാലിന് കുവൈറ്റില്‍ നടക്കുന്ന ചടങ്ങില്‍ അവാര്‍ഡ് സമ്മാനിക്കും.

ദുബായ് സുന്നി സെന്‍ററിന്‍റെ ആഭിമുഖ്യത്തിലുള്ള മീലാദ് ഫെസ്റ്റ് വെള്ളിയാഴ്ച നടക്കും. കരാമ ഇറാനി ഗേള്‍സ് ഹൈസ്ക്കൂള്‍ ഗ്രൗണ്ടില്‍ വൈകുന്നേരം അഞ്ച് മുതലാണ് പരിപാടി. ഇതിനോടനുബന്ധിച്ച് ബുര്‍ദ മജ് ലിസ്, മദ്ഹ് പ്രഭാഷണം, മൗലീദ് പാരായണം, വിദ്യാര്‍ത്ഥികളുടെ കലാപരിപാടികള്‍ എന്നിവ നടക്കും.

അലൈന്‍ സുന്നി യൂത്ത് സെന്‍ററിന്‍റെ ആഭിമുഖ്യത്തില്‍ നബി ദിന ആഘോഷം സംഘടിപ്പിച്ചു. ദാറൂല്‍ ഹുദാ ഇസ്ലാമിക് സ്കൂളില്‍ നടന്ന പരിപാടി സാലിഹ് റാഷിദ് അല്‍ ദാഹിരി ഉദ്ഘാടനം ചെയ്തു. പൂക്കോയ തങ്ങള്‍ അധ്യക്ഷത വഹിച്ചു. സിംസാറുല്‍ ഹഖ് ഹുദവി മുഖ്യ പ്രഭാഷണം നടത്തി. മദ്രസാ വിദ്യാര്‍ത്ഥികളുടെ കലാപരിപാടികളും ഇതിനോടനുബന്ധിച്ച് സംഘടിപ്പിച്ചിരുന്നു.