അബുദാബി ബാലുശ്ശേരി മണ്ഡലം കെ.എം.സി.സി പുതിയ പ്രസിഡന്‍റായി അഷ്രഫ് അണ്ടിക്കോടിനേയും ജനറല്‍ സെക്രട്ടറിയായി സിറാജ് നടുവണ്ണൂരിനേയും തെരഞ്ഞെടുത്തു. പുതിയ ഭാരവാഹികളെ തെരഞ്ഞെടുക്കാന്‍ ചേര്‍ന്ന യോഗത്തില്‍ ബാലുശ്ശേരി മണ്ഡലത്തിലെ പ്രവാസികളുടെ ക്ഷേമ പ്രവര്‍ത്തനങ്ങള്‍ക്ക് രൂപം നല്‍കുകയും ചെയ്തു.

ഇന്ത്യന്‍ ഇസ്ലാഹി സെന്‍റര്‍ ബര്‍ദുബായ് കമ്മിറ്റിയുടെ ആഭിമുഖ്യത്തില്‍ നാളെ ബുര്‍ദുബായ് ബസ് സ്റ്റാന്‍റിനടുത്തുള്ള മസ്ജിദില്‍ സുബൈര്‍ പീടിയേക്കലിന്‍റെ പ്രഭാഷണം ഉണ്ടായിരിക്കും. ഇശാ നമസ്കാരത്തിനു ശേഷമാണ് പ്രഭാഷണം.

എസ്. കെ. എസ്. എസ്. എഫ് ഷാര്‍ജ കമ്മിറ്റിയുടേയും ഇന്ത്യന്‍ ഇസ്ലാമിക് ദ അ്വാ സെന്‍ററിന്‍റേയും സംയുക്ത ആഭിമുഖ്യത്തില്‍ നടന്നു വരുന്ന ഖുര്‍ ആന്‍ ക്ലാസ് നാളെ നടക്കും. പണ്ഡിതന്‍ ത്വാഹാ സുബൈര്‍ ഹുദവി എടുക്കുന്ന ക്ലാസ് ഷാര്‍ജ ദ അവാ സെന്‍ററില്‍ രാത്രി 10 മണിക്കു തുടങ്ങും.

ദുബായ്: മതനിരാസം പ്രചരിപ്പിക്കാന്‍ വിദ്യാര്‍ഥികളെ പാകപ്പെടുത്തുന്ന കേരള സര്‍ക്കാറിന്റെ നീക്കം മതേതര മൂല്യങ്ങള്‍ക്ക് നിരക്കാത്തതാണെന്ന് ഇസ്‌ലാഹി സെന്റര്‍ യു.എ.ഇ. കേന്ദ്ര കൗണ്‍സില്‍ അഭിപ്രായപ്പെട്ടു. ദുബായ് അല്‍ അവീര്‍ ഇസ്‌ലാഹി സെന്റര്‍ ഓഡിറ്റോറിയത്തില്‍ നടന്ന ഇസ്‌ലാഹി സെന്റര്‍ യു.എ.ഇ. കേന്ദ്ര കൗണ്‍സില്‍ മീറ്റീല്‍ പി.എ. ഹുസൈന്‍ അധ്യക്ഷത വഹിച്ചു. റിപ്പോര്‍ട്ടും വരവു ചെലവു കണക്കുകളും വരുന്ന ആറു മാസ ക്കാലത്തേക്കുള്ള പ്രവര്‍ത്തന രൂപരേഖയും കൗണ്‍സില്‍ യോഗത്തില്‍ ചര്‍ച്ച ചെയ്തു. വി.പി. അഹമ്മദ്കുട്ടി മദനി, പി.കെ. സലാഹുദ്ദീന്‍, കെ.എ. ജമാല്‍, മുജീബ് പി.ഐ., ജാബിര്‍ കൊല്ലം എന്നിവര്‍ സംസാരിച്ചു.

-റസാഖ് പെരിങ്ങോട്

• മത സൌഹാര്‍ദ്ദം ഔട്ട് ഓഫ് ഫാഷന്‍ ആയോ?
• വിവാദ പാഠ ഭാഗങ്ങള്‍

യു.എ.ഇ. യിലെ സ്‌കൂള്‍ വിദ്യാര്‍ഥികള്‍ക്കായി “കല” അബുദാബി നടത്തുന്ന “നിറക്കൂട്ട്” എന്ന ചിത്രകലാ ഉത്സവം ജൂലായ് 11ന് അബുദാബി മലയാളി സമാജത്തില്‍ നടക്കും. ഉത്സവത്തിന്റെ ഭാഗമായി നടക്കുന്ന ചിത്രകലാ മത്സരത്തില്‍ സീനിയര്‍, ജൂനിയര്‍, സബ് ജൂനിയര്‍ വിഭാഗങ്ങളിലാണ് മത്സരം നടത്തുന്നത്.

6 മുതല്‍ 9 വയസ്സ് വരെ സബ് ജൂനിയര്‍ വിഭാഗവും 9 മുതല്‍ 12 വയസ്സു വരെ ജൂനിയര്‍ വിഭാഗവും 12 മുതല്‍ 17 വയസ്സ് വരെ സീനിയര്‍ വിഭാഗവും ആയിട്ടാണ് മത്സരം ക്രമീകരിച്ചിട്ടുള്ളത്. സബ് ജൂനിയര്‍, ജൂനിയര്‍ വിഭാഗങ്ങള്‍ക്ക് വാട്ടര്‍ കളറിലും, സീനിയര്‍ വിഭാഗത്തില്‍ പെന്‍സില്‍ സ്കെച്ചിലുമാണ് ചിത്രങ്ങള്‍ വരയ്ക്കേണ്ടത്. ജൂലായ് 11ന് വെള്ളിയാഴ്ച രാവിലെ പത്തു മുതല്‍ അബുദാബി മലയാളി സമാജത്തിലാണ് മത്സരം നടക്കുക. ഒന്നര മണിക്കൂറാണ് മത്സര സമയം. ചിത്ര രചനയ്ക്കുള്ള വിഷയം മത്സര സമയത്ത് നല്‍കും.

ഓരോ വിഭാഗത്തിലെയും ഒന്നാം സ്ഥാനത്തിന് സ്വര്‍ണ മെഡലും സര്‍ട്ടിഫിക്കറ്റും രണ്ടാം സ്ഥാനത്തിന് വെള്ളി മെഡലും സര്‍ട്ടിഫിക്കറ്റും മൂന്നാം സ്ഥാനത്തിന് വെങ്കല മെഡലും സര്‍ട്ടിഫിക്കറ്റുമാണ് സമ്മാനം. അപേക്ഷാ ഫോറങ്ങള്‍ക്കും കൂടുതല്‍ വിവരങ്ങള്‍ക്കും 050-2986326, 050-5415472, 050-6154020 എന്നീ നമ്പറുകളില്‍ ബന്ധപ്പെടണം. പൂരിപ്പിച്ച അപേക്ഷാ ഫോറം ജൂലായ് 8നു മുമ്പായി അബുദാബി മലയാളി സമാജത്തിലോ kalauae@gmail.com എന്ന ഇമെയില്‍ വിലാസത്തിലോ അയയ്ക്കണമെന്ന് “കല” ജനറല്‍ സെക്രട്ടറി പി.പി. ദാമോദരന്‍ അറിയിച്ചു.