27 വര്ഷത്തോളം നീണ്ട പ്രവാസ ജീവിതം മതിയാക്കി നാട്ടിലേക്ക് മടങ്ങുന്ന പ്രശസ്ത സിത്താര് വാദകന് അഹമ്മദ് ഇബ്രാഹിമിനും വയലിനിസ്റ്റ് അബി വാഴപ്പള്ളിക്കും അബുദാബി മുസഫയിലുള്ള ജാസ് സംഗീത വിദ്യാലയം യാത്രയയപ്പ് നല്കി. അഹമ്മദ് ഇബ്രാഹിമിന്റെയും അബി വാഴപ്പള്ളിയുടെയും പ്രിന്സിപ്പാള് കൂടിയായ തബല വാദകന് മുജീബ് റഹ്മാന്റെയും നേതൃത്വത്തില് നടന്ന മെഹ്ഫില്, സദസ്സിനെ സംഗീതത്തിന്റെ മാസ്മരിക ലോകത്തേക്ക് ആനയിച്ചു. ഇതോടൊപ്പം തന്നെ ഹാര്മോണിയത്തില് ശ്രുതി മീട്ടി സലാം കൊച്ചിയുടെ ഗസല് ആലാപനവും ചടങ്ങിന് കൊഴുപ്പേകി. തുടര്ന്ന് വിദ്യാലയത്തിന്റെ സാരഥികളായ അസ്ലം, ഗായകന് ഷെരീഫ് നീലേശ്വരം, സലീല് (കീബോര്ഡ്), കഥകളി അധ്യാപകനായ സദനം റഷീദ്, ഗിറ്റാര് – വയലിന് അധ്യാപകന് പൌലോസ്, മിമിക്രി അധ്യാപകന് നിസാം കോഴിക്കോട് എന്നിവരും സംസാരിച്ചു.
വിദ്യാലയത്തിലെ വിദ്യാര്ത്ഥികളും അധ്യാപകരും സ്നേഹത്തിന്റെ ഭാഷയില് തീര്ത്ത ഉപഹാരങ്ങള് നല്കി രണ്ടു പ്രതിഭകളെയും യാത്രയാക്കി.
– സൈഫ് പയ്യൂര്
ടെലിഫോണ് നയത്തില് മാറ്റം വരുത്തിയതോടെ ഇനി യു.എ.ഇ. യിലെ പ്രവാസികള്ക്ക് നാട്ടിലേക്ക് ഇന്റര്നെറ്റ് വഴി ഫോണ് ചെയ്യാന് അവസരം ഒരുങ്ങുന്നു എന്ന പ്രതീക്ഷ പൂര്ണ്ണമായി നടപ്പിലാവാന് വഴിയില്ല. ഇന്റര്നെറ്റ് വഴി നാട്ടിലേക്ക് വിളിക്കാന് ഉപയോഗിക്കുന്ന വോയ്പ് (VOIP – Voice Over Internet Protocol) പ്രോഗ്രാമുകളില് ഒന്നും തന്നെ ഇനിയും യു.എ.ഇ. യില് നിയമ വിധേയമായി ഉപയോഗിക്കാന് ആവില്ല. ഇത്തരം പ്രോഗ്രാമുകളില് ഏറ്റവും ജനപ്രിയമായ സ്കൈപ്പ് ഉള്പ്പെടെ ഒരു കമ്പനിക്കും യു.എ.ഇ. യില് തങ്ങളുടെ സേവനം ലഭ്യമാക്കാന് ഉള്ള ലൈസന്സ് അധികൃതര് നല്കിയിട്ടില്ല. 
