പ്രഷര്‍കുക്കര്‍ ബിരിയാണി

May 24th, 2012

cooker biriyani-epathram
ബിരിയാണി ഒരു താരം തന്നെയാണ്. എപ്പോ തന്നാലും കഴിക്കാന്‍ തോന്നും. ഞാന്‍ ഇതിനു മുന്‍പും പറഞ്ഞിട്ടുണ്ട് എന്റെ ബിരിയാണി കൊതിയെ കുറിച്ചും എന്നാല്‍ ഉണ്ടാക്കാനുള്ള മടിയെ കുറിച്ചും. മടി മറ്റൊന്നും കൊണ്ടല്ല. സവാള കുന്നു പോലെ അരിയുക, ചിക്കന്‍ ഉണ്ടാക്കുക, അരി വേവിക്കുക, ഇനി ലയെര്‍ ചെയ്യുക, ഒക്കെ കഴിഞ്ഞു സിങ്കില്‍ ഉള്ള ഒരു കുന്നു പാത്രവും കഴുകുക. അങ്ങനെ ബിരിയാണി എന്ന് ഓര്‍ക്കുമ്പോ തന്നെ ‘നിന്റെ വിയര്‍പ്പ് കൊണ്ട് ഭക്ഷിക്കുക’ എന്ന ദൈവ വചനം ഓര്‍മ്മ വരും. ദൈവം തമ്പുരാന്‍ മുന്നേ കണ്ട് അറിഞ്ഞു ഉണ്ടാക്കിയ വചനമാണ് ഇതെന്നു തോന്നും. ബിരിയാണി മൂക്ക് മുട്ടെ തിന്നണമെങ്കില്‍ നന്നായി വിയര്‍പ്പോഴുക്കണം.

പക്ഷെ ഇയ്യിടെ ഞാന്‍ ഒരു ഇന്‍സ്റ്റന്റ് ബിരിയാണി പരീക്ഷിച്ചു. ആയിരം പാത്രവും പതിനായിരം ‘പ്രോസീജ്യേഴ്സും’ ഇല്ല. ഒരു പ്രഷര്‍കുക്കറില്‍ എല്ലാം കൂടെ ‘ഡിം’. :-) ഉള്ളി അരിഞ്ഞു തരാന്‍ എനിക്ക് അരുണ്‍ ഉണ്ടല്ലോ പിന്നെ എന്താ!! സംഗതികള്‍ എല്ലാം കൂടെ കുക്കറില്‍ ആക്കി, എല്ലാ പാചക ദൈവങ്ങളെയും മനസ്സില്‍ ധ്യാനിച്ച്‌ കുക്കര്‍ അടച്ചു. പ്രാര്‍ത്ഥന തുടങ്ങി. ആ അഞ്ചു മിനുറ്റ് അഞ്ചു കൊല്ലം പോലെ തോന്നി. അവസാനം കുക്കറിന്റെ പ്രഷര്‍ പോയപ്പോഴേക്കും എന്റെ പ്രഷര്‍ കുറഞ്ഞത് 200 എങ്കിലും ആയിട്ടുണ്ടാവും.. :-) തുറക്കുന്ന സമയത്ത് ഉറപ്പിച്ചു, മോളെ, ഇത് ചിക്കന്‍ ഖിച്ടി എന്ന് പറഞ്ഞു അരുണ്‍നു വിളമ്പാം. അതാണ്‌ ഈ ബിരിയാണി, കഞ്ഞിപ്പരുവം ആയാലുള്ള അറ്റകൈപ്രയോഗം. ഏതായാലും തുറന്നപ്പോള്‍ ഗംഭീര മണം. നോക്കുമ്പോ ഉണ്ട് വെള്ളം അല്‍പ്പം പോലും കൂടിയിട്ടില്ല. ചോറിനും ചിക്കനും പാകം വേവ്.. :-) അടിപൊളി സ്വാദും. ഞാന്‍ ഒരു പുലി തന്നെ!! സ്വയം പ്രഖ്യാപിച്ചു… :-) അപ്പൊ ഇനി ”നിന്റെ വിയര്‍പ്പ് കൊണ്ട് ബിരിയാണി ഭക്ഷിക്കുക” എന്ന ദൈവ വചനം മാറ്റാം.. ;-)

ചേരുവകള്‍

ബിരിയാണി അരി : 2 ഗ്ലാസ്‌ (ജീരകശാലയാണ് ബെസ്റ്റ്‌)
ചിക്കന്‍ : അര കിലോ
ഗരം മസാല : ഒരു ടീസ്പൂണ്‍
മഞ്ഞള്‍ പൊടി : ഒരു ടീസ്പൂണ്‍.
മുളക്പൊടി : ഒരു ടേബിള്‍സ്പൂണ്‍
കുരുമുളക് പൊടി : അര ടീസ്പൂണ്‍
സവാള : 2 എണ്ണം (വലുത്)
തക്കാളി : വലുത് ഒരെണ്ണം
പച്ചമുളക് : 2 എണ്ണം നെടുകെ പിളര്‍ന്ന്
ഇഞ്ചി : ചെറിയ കഷ്ണം.
വെളുത്തുള്ളി : 4 അല്ലി.
മല്ലിയില : ചെറുതായി അരിഞ്ഞത് അര കപ്പ്.
ഏലയ്ക്ക:നാല്
ഗ്രാമ്പൂ ;നാല്
കറുവാപട്ട.: ചെറിയ കഷ്ണം
നെയ്യ്‌ : 2 ടേബിള്‍സ്പൂണ്‍
എണ്ണ : 2 ടേബിള്‍സ്പൂണ്‍
അണ്ടിപ്പരിപ്പ് : 5-6 എണ്ണം
ഉപ്പ് :പാകത്തിന്
വെള്ളം :3 ഗ്ലാസ്‌ തിളപ്പിച്ചത്

തയ്യാറാക്കുന്ന വിധം

അരി കഴുകി വാലാന്‍ വയ്ക്കുക. ചിക്കന്‍ വൃത്തിയാക്കി മഞ്ഞള്‍ പൊടി, മുളക്പൊടി, കുരുമുളക് പൊടി എന്നിവ അര ടീസ്പൂണ്‍ വീതവും, മുളക് പോടി ഒരു ടേബിള്‍സ്പൂണും ഉപ്പും ചേര്‍ത്ത് നന്നായി യോജിപ്പിച്ചു വെയ്ക്കുക. ഇത് ഏകദേശം ഒരു മണിക്കൂര്‍ ഇരിക്കട്ടെ.

സവാള, തക്കാളി എന്നിവ നേര്‍മ്മയായി അരിഞ്ഞു എടുക്കുക. ഇഞ്ചി വെളുത്തുള്ളി ചതച്ചു എടുക്കുക. കുറഞ്ഞത് 3.5 ലിറ്റര്‍ ഉള്ള പ്രഷര്‍ കുക്കര്‍ ഗ്യാസില്‍ വച്ച് ചൂടാക്കുക. ഇതിലേക്ക് എണ്ണയും നെയ്യും ഒഴിക്കുക. ഏലയ്ക്ക, ഗ്രാമ്പു, കറുവാപ്പട്ട, എന്നിവ പൊട്ടിക്കുക. ഇതിലേക്ക് സവാളയും പച്ചമുളകും ചേര്‍ത്ത് വഴറ്റുക. അല്‍പ്പം ബ്രൌണ്‍ നിറം ആകുമ്പോള്‍ ഇഞ്ചിയും വെളുത്തുള്ളിയും ചേര്‍ത്ത് വഴറ്റുക. നല്ല ബ്രൌണ്‍ നിറം ആകുമ്പോള്‍ തക്കാളി ചേര്‍ത്ത് ഉടയ്ക്കുക. ഇതിലേക്ക് ബാക്കിയുള്ള മുളക് പൊടി, മഞ്ഞള്‍പ്പൊടി,ഗരംമസാലപ്പൊടി എന്നിവ ചേര്‍ത്ത് നന്നായി വഴറ്റുക. മസാല പുരട്ടി വച്ചിരിക്കുന്ന ചിക്കന്‍ ഇതിലേക്ക് ചേര്‍ത്ത് നന്നായി യോജിപ്പിക്കുക. 5-6 മിനുറ്റ് നന്നായി ഇളക്കി കൊണ്ടിരിക്കുക. ചിക്കന്‍ ഉടയരുത്. ചെറുതായി ഒന്ന് ഫ്രൈ ആയി കിട്ടിയാല്‍ മതി. അടിയില്‍ പിടിക്കാതെ സൂക്ഷിക്കുക. എന്നാല്‍ വെള്ളം ചേര്‍ക്കുകയും അരുത്.

കഴുകി വാരി വച്ചിരിക്കുന്ന അരി ഇതിലേക്ക് ചേര്‍ത്ത് ഇളക്കുക. ആവശ്യത്തിന് ഉപ്പും മല്ലിയിലയും ചേര്‍ത്ത് യോജിപ്പിക്കുക. 3 ഗ്ലാസ്‌ വെള്ളം തിളപ്പിച്ച്‌ നല്ല ചൂടോടു കൂടി ഇതിലേക്ക് ചേര്‍ക്കുക. കുക്കര്‍ അടയ്ക്കുക. ആവി വരുമ്പോള്‍ വിസില്‍ ഇടുക. വെയിറ്റ് ഇട്ടതിനു ശേഷം കൃത്യം 5 മിനുറ്റ് ഇടത്തരം തീയില്‍ പാകം ചെയ്യുക. വിസില്‍ ശ്രദ്ധിക്കേണ്ടതില്ല.  5 മിനുറ്റ് കഴിയുമ്പോള്‍ തീ ഓഫാക്കുക. ആവി പോകുന്നത് വരെ വെയിറ്റ് ചെയ്യുക. അതിനു ശേഷം മാത്രം കുക്കര്‍ തുറക്കുക. തുറക്കുമ്പോള്‍ തന്നെ ഒരു പരന്ന പാത്രത്തിലേക്ക് മാറ്റുക. ഒരു ഫോര്‍ക്ക് കൊണ്ട് ഇളക്കുക. വേണമെങ്കില്‍ സവാള വറുത്തതും കശുവണ്ടിയും കിസ്മിസും ഉപയോഗിച്ച് അലങ്കരിക്കാം. സാലഡ്‌, അച്ചാര്‍, പപ്പടം എന്നിവ ചേര്‍ത്ത് കഴിക്കാം.

- ലിജി അരുണ്‍

വായിക്കുക: , ,

3 അഭിപ്രായങ്ങള്‍ »

പീസ്‌ പുലാവ്

March 20th, 2012

peas pulao- epathram

എന്തൊക്കെ പറഞ്ഞാലും ശരി, സംഗതി നോണ്‍ വെജ് ആണെങ്കില്‍ മാത്രമേ വീട്ടുകാര്‍ക്ക് ഒരു ത്രില്‍ ഒള്ളു. ഓഫീസില്‍ നിന്ന് വന്നപ്പോഴേ ഞാന്‍ അനൌണ്‍സ് ചെയ്തു. ഇന്ന് ഡിന്നറിനു ഒരു ഗസ്റ്റ് ഉണ്ട്. ഞാന്‍ വ്യത്യസ്തമായി എന്തെങ്കിലും ഉണ്ടാക്കാന്‍ പോകുന്നു എന്ന്. :-) എല്ലാര്‍ക്കും സന്തോഷം. എന്നാല്‍ അടുത്ത നിമിഷം അത് തീര്‍ന്നു. ഐറ്റം കേട്ടപ്പോഴേ, അയ്യേ.. പീസ്‌ പുലാവോ?? മറ്റൊന്നും കണ്ടില്ലേ..!!! അരുണിന്റെ പ്രതികരണം. :-) തെറ്റ് പറയാന്‍ പറ്റില്ല. നോണ്‍ വെജ് ഇല്ലെങ്കില്‍ സംഗതി ഉഷാറാവില്ല എന്ന പക്ഷക്കാരനാണ് കക്ഷി. ഓക്കേ.. അങ്ങനെയെങ്കില്‍ കഴിഞ്ഞ ദിവസത്തെ ചിക്കന്‍ കറി ഇരിപ്പുണ്ട്. അത് കൂട്ടി അഡ്ജസ്റ്റ് ചെയ്യാം.. എന്നായി ഞാന്‍. മനസില്ലാമനസ്സോടെ അരുണ്‍ സമ്മതിച്ചു. അങ്ങനെ പീസ്‌ പുലാവ് റെഡി. അതും വളരെ എളുപ്പം പണി കഴിഞ്ഞു. ഡിന്നര്‍ കഴിഞ്ഞപ്പോള്‍ ഉണ്ട് അതാ അരുണ്‍ പറയുന്നു, നല്ല പുലാവ് ആയിരുന്നു. ഒരുപാട് കഴിച്ചു.. എഴുന്നേല്‍ക്കാന്‍ വയ്യ:-) ഇതില്‍ പരം ഒരു സന്തോഷം ഉണ്ടോ?

ബസ്മതി -2 കപ്പ്
സവാള – 1 എണ്ണം നേര്‍മ്മയായി അരിഞ്ഞത്
ഇഞ്ചി വെളുത്തുള്ളി പേസ്റ്റ് -1 ടീസ്പൂണ്‍
പച്ചമുളക് – 1 എണ്ണം നെടുകെ പിളര്ന്നത്
ഗ്രീന്‍പീസ് -അര കപ്പ് (ഫ്രോസണ്‍ അല്ലെങ്കില്‍ ഫ്രഷ്‌)
നെയ്യ് – 2 ടേബിള്‍സ്പൂണ്‍
ഗ്രാമ്പു -3
കറുവാപ്പട്ട -3 കഷണം
ഏലക്ക -2
ഉപ്പ് -പാകത്തിന്
മല്ലിയില അരിഞ്ഞത് -കാല്‍ കപ്പ്

പാകം ചെയ്യുന്ന വിധം

അരി കഴുകി ഊറ്റി എടുക്കുക. ഒരു പാത്രത്തില്‍ നെയ്യൊഴിച്ച് ചൂടാകുമ്പോള്‍ പട്ട,ഗ്രാമ്പു,ഏലക്ക എന്നിവയിട്ട് മൂപ്പിക്കുക. ഇതിലേയ്ക്ക് സവാള ഇഞ്ചി വെളുത്തുള്ളി പേസ്റ്റ് എന്നിവ ചേര്‍ത്ത് ബ്രൌണ്‍ നിറമാകുന്നതുവരെ വഴറ്റുക. ഇതിന്റെ കൂടെ അരിയിട്ട് വറുക്കുക. ഇതിലേക്ക് ഗ്രീന്‍ പീസ്‌ ചേര്‍ക്കുക. 4 കപ്പ് തിളച്ച വെള്ളവും ഉപ്പും ചേര്‍ത്ത് അരി വേവിക്കുക. പാത്രം അടച്ചു വെച്ച് വേവിക്കണം. ഇടയ്ക്ക് ഇളക്കി കൊടുക്കണം. വെള്ളം വറ്റിക്കഴിയുമ്പോള്‍ മല്ലിയില ചേര്‍ത്തിളക്കി വാങ്ങുക. ചിക്കന്‍ കറി, മട്ടണ്‍ റോസ്റ്റ്‌ എന്നിവയ്ക്കൊപ്പം വിളമ്പാം.

- ലിജി അരുണ്‍

വായിക്കുക: , , ,

അഭിപ്രായം എഴുതുക »

തൈര് സാദം

February 21st, 2012

curd-rice-epathram
ചില ദിവസം ഭയങ്കര മടിയാണ് എന്തെങ്കിലും ഉണ്ടാക്കാന്‍… എന്തെങ്കിലും കള്ള പണികള്‍ കാണിച്ചു ഡിന്നര്‍ തട്ടിക്കൂട്ടും. അങ്ങനെ ഉള്ള ദിവസങ്ങളില്‍ ഉണ്ടാക്കാന്‍ പറ്റിയ ഒരു ഐറ്റം ആണ് തൈര് സാദം… അച്ചാറും പപ്പടവും ഉണ്ടെങ്കില്‍ അടിപൊളി.. വയറിനും മനസ്സിനും സുഖം. മാത്രവുമല്ല നിങ്ങള്‍ ഹെവി ആയി ലഞ്ച് കഴിച്ചതിന്റെ കുറ്റബോധം ഉള്ള ദിവസങ്ങളില്‍ തൈര് സാദം ട്രൈ ചെയ്തു നോക്കൂ.. മനസമാധാനത്തോടെ കിടന്നുറങ്ങാം..:-)

ഇത് എന്റെ കസിന്‍ കുന്ഷിയുടെ റെസിപി ആണ്. റോസ് മേരി എന്നാണ് കക്ഷിയുടെ പേര്. അത് പിന്നീട് കുഞ്ഞു മേരിയും, കുഞ്ഞു മേരി കുന്ഷിയുമായി.. :-) ആളു നല്ലൊരു കുക്ക് ആണ്. ഫേസ്ബുക്കില്‍ തൈര് സാദത്തിന്റെ പടം കണ്ടപ്പോഴേ എനിക്ക് കൊതി പിടിച്ചു. ഉടനെ തന്നെ റെസിപ്പി കൈക്കലാക്കി..

ചേരുവകള്‍

ബസ്മതി അരി – ഒരു കപ്പ്‌
അധികം പുളി ഇല്ലാത്ത തൈര് – ഒരു കപ്പ്‌ (ആവശ്യാനുസരണം)
ഇഞ്ചി – അര ടീസ്പൂണ്‍ ചെറുതായി അരിഞ്ഞത്
പച്ചമുളക് – 1എണ്ണം നെടുകെ പിളര്‍ന്നത്
ചെറിയ ഉള്ളി – 4 എണ്ണം
കടുക് – ഒരു ടീസ്പൂണ്‍
കറിവേപ്പില – 2 തണ്ട്
വറ്റല്‍മുളക് – 2 എണ്ണം
വെളിച്ചെണ്ണ – ഒരു ടേബിള്‍സ്പൂണ്‍
ഉപ്പ് – ആവശ്യത്തിന്

തയ്യാറാക്കുന്ന വിധം

അരി നന്നായി കഴുകി. ഉപ്പ് ചേര്‍ത്ത് വേവിച്ചു വാര്‍ത്തെടുക്കുക. അല്പം അധികം വേവ് ആകുന്നതു നന്ന്. ചോറ് അല്‍പ്പം തണുത്തു കഴിയുമ്പോള്‍ എടുത്തു വച്ചിരിക്കുന്ന തൈര് ചേര്‍ത്ത് നന്നായി ഇളക്കുക. ഒരു പാത്രത്തില്‍ എണ്ണ ഒഴിച്ച് ചൂടാക്കി, കടുക് പൊട്ടിക്കുക. ഇതിലേക്ക് ചെറിയ ഉള്ളി, പച്ചമുളക്, വറ്റല്‍മുളക്, കറിവേപ്പില, ഇഞ്ചി എന്നിവ ചേര്‍ത്ത് വഴറ്റുക. ഇത് ചോറിലെയ്ക്ക് ചേര്‍ത്ത് ഇളക്കുക. ചെറുചൂടോടെ കറികള്‍ കൂട്ടിയോ, അല്ലെങ്കില്‍ അച്ചാര്‍, പപ്പടം എന്നിവ കൂട്ടിയോ കഴിക്കാം.

- ലിജി അരുണ്‍

വായിക്കുക: ,

3 അഭിപ്രായങ്ങള്‍ »

നെയ്ച്ചോറ്

December 27th, 2011

ghee-rice-epathram
വീട്ടില്‍ പെട്ടന്നൊരു ഗസ്റ്റ് വന്നുവെന്ന് ഇരിക്കട്ടെ, എനിക്ക് ഏറ്റവും എളുപ്പത്തില്‍ തയ്യാറാക്കാന്‍ പറ്റിയ ഒരു ഐറ്റം ആണ് നെയ്ച്ചോറും ചിക്കന്‍ കറിയും. നൊടിയിടയില്‍ കാര്യം നടക്കും. :-) ഒരു പരിധി വിട്ടു മോശം ആകുകയും ഇല്ലാ. ഇനി ചിക്കന്‍ കറി ഇല്ലെങ്കില്‍ തന്നെ, പപ്പടം, സാലഡ്, അച്ചാര്‍ കൂട്ടി കഴിക്കുകയും ചെയ്യാം.. അധികം മെനക്കെടാതെ കാര്യം നടക്കും. നിങ്ങള്‍ ഉണ്ടാക്കുന്ന നെയ്‌ചോറില്‍ താഴെ പറയുന്ന ചില ചേരുവകളില്‍ ചിലത് ഉണ്ടാവില്ല. ഞാനും അങ്ങനെയാണ് ഉണ്ടാക്കിയിരുന്നത്. എന്നാല്‍ അല്പം ഇഞ്ചി വെളുത്തുള്ളി ചേര്‍ത്തപ്പോള്‍, നെയ്ച്ചോറ് ആകെ ഒന്ന് ഉഷാറായി. :-) സ്വാദ് കൂടിയിട്ടുണ്ട്. അടുത്ത തവണ നെയ്ച്ചോറ് ഉണ്ടാക്കുമ്പോള്‍ ഇതൊന്നു പരീക്ഷിച്ചു നോക്ക്.

ചേരുവകള്‍

ബസ്മതി അരി- 2 കപ്പ്‌
സവാള- 3 വലുത് നേര്‍മ്മയായി അരിഞ്ഞത്‌
ഇഞ്ചി പൊടിയായി അരിഞ്ഞത്‌ – ഒരു ടീസ്പൂണ്‍
വെളുത്തുള്ളി പൊടിയായി അരിഞ്ഞത്‌ – ഒരു ടീസ്പൂണ്‍
നെയ്‌ – 6 ടേബിള്‍സ്പൂണ്‍
ഗ്രാമ്പു-4 എണ്ണം
കറുവ പട്ട- 4 കഷ്ണം
ഏലയ്ക്ക- 4 എണ്ണം
കശുവണ്ടി – 2 ടേബിള്‍സ്പൂണ്‍
കിസ്മിസ്‌- ഒരു ടേബിള്‍സ്പൂണ്‍
ഉപ്പ്‌- ആവശ്യത്തിനു
വെള്ളം – 4 കപ്പ്‌

പാചകം ചെയുന്ന വിധം

അരി കഴുകി വെള്ളം വാര്‍ന്നു പോകാന്‍ വെക്കുക. ഒരു പാനില്‍ നെയ്‌ ഒഴിച്ച് ചൂടാകുമ്പോള്‍ കറുവാപട്ട, ഗ്രാമ്പു. ഏലയ്ക്ക ഇവ ഇട്ടു മൂപ്പിക്കുക. ഇതിലേക്ക് സവാള, വെളുത്തുള്ളി, ഇഞ്ചി എന്നിവ ഇട്ടു വഴറ്റുക. വഴന്നു കഴിയുമ്പോള്‍ അരി ഇട്ടു ഇളക്കുക. അരി ചെറുതായി ചെറുതീയില്‍ വറക്കുക. ഇതിലേക്ക് വെള്ളവും ഉപ്പും ചേര്‍ത്ത് അടച്ചു വെച്ച് ചെറു തീയില്‍ വേവിക്കുക. വെള്ളം വറ്റി കഴിഞ്ഞാല്‍ നെയ്ച്ചോര്‍ റെഡി. നെയ്യില്‍ വറുത്ത സവാള, കശുവണ്ടി, കിസ്മിസ്‌ എന്നിവ ചേര്‍ത്ത് അലങ്കരിക്കുക.

ചിക്കന്‍ കറി, മട്ടണ്‍ റോസ്റ്റ്‌, ബീഫ്‌ റോസ്റ്റ്‌ എന്നിവയ്ക്കൊപ്പം വിളമ്പാം.

- ലിജി അരുണ്‍

വായിക്കുക: , ,

അഭിപ്രായം എഴുതുക »

ചേന ചെറുപയര്‍ മെഴുക്കുപുരട്ടി

December 24th, 2011

payar-chena-mezhukupuratti-epathram
ഇന്ന് എന്താ കറി വയ്ക്കുക എന്ന് ഓര്‍ത്ത്‌ ഫ്രിഡ്ജ്‌ തുറന്നു നോക്കിയപ്പോള്‍ അത് കാലിയായി ഇരിക്കുന്നു. മാര്‍ക്കറ്റില്‍ പോവാനുള്ള മടി കാരണം പച്ചക്കറികള്‍ ഒന്നും ഇല്ല വീട്ടില്‍ ..:-( നോക്കുമ്പോ അതാ ഒരു കഷ്ണം ചേന ആരും കാണാതെ പാത്തു പതുങ്ങി ഇരിക്കുന്നു. ഹോ രക്ഷപ്പെട്ടു. ഇന്ന് ഇവനെ വച്ച് കാര്യം സാധിക്കാം..:-) പക്ഷെ പുറത്തെടുത്തു നോക്കിയപ്പോള്‍ ചേനയുടെ ഒരു വശം ചീഞ്ഞു തുടങ്ങിയിരിക്കുന്നു. കഴിഞ്ഞ ആഴ്ച അവിയല്‍ വയ്ക്കാന്‍ മേടിച്ചതിന്റെ ബാക്കി ഇരുന്നതാ.. പാവം.. ഇനി എന്ത് ചെയ്യും? ഈ ചെറിയ ഒരു കഷ്ണം ചേന കൊണ്ട് കാര്യം നടക്കില്ല.. ഒരു കറിക്ക് തികയില്ല. എന്റെ കണ്ണുകള്‍ അടുക്കളയിലെ അലമാരികള്‍ പരതി. വളരെ കാലത്തിനു ശേഷം ബുദ്ധി വര്‍ക്ക്‌ ചെയ്യിപ്പിച്ചു. ചേനയുടെ കൂടെ പറ്റിയ പല പല കോമ്പിനേഷന്‍സ് ആലോചിച്ചു. സാധാരണ എന്റെ വീട്ടില്‍ ചേനയും വന്‍പയറും ഇട്ടു എരിശ്ശേരി ഉണ്ടാക്കാറുണ്ട്. അതേ ഞാന്‍ കഴിച്ചിട്ടുള്ളു. ഏതായാലും ചുവന്ന പയര്‍ ഇനി ഇട്ടു കുതിര്‍ത്തു എടുക്കുമ്പോഴേക്കും ചേന മൊത്തം ചീയും..:-) അപ്പൊ ചെറുപയര്‍ ആയാലോ.. യുറേക്കാ.. :-) ചേന ചെറുപയര്‍ മെഴുക്കുപുരട്ടി!!! ഇന്ന് അങ്ങനെയൊരു സംഗതി ആവട്ടെ. വച്ച് നോക്കി. കൊള്ളാം.. കഞ്ഞിക്ക് പറ്റിയ കറിയാണ്. :-) അപ്പൊ ഇന്ന് ചോറും കാച്ചിയ മോരും, മെഴുക്കുപുരട്ടിയും.. ..:-)

ചേരുവകള്‍

ചെറുപയര്‍ – ഒരു കപ്പ്‌ 3-4 മണിക്കൂര്‍ വെള്ളത്തില്‍ കുതിര്‍ത്തത്
ചേന – ഒരു കപ്പ്‌ – ചെറുതായി നുറുക്കിയത്
ചുവന്നുള്ളി – 15 എണ്ണം
വെളുത്തുള്ളി – 7-8 അല്ലി
വറ്റല്‍മുളക് – 5 എണ്ണം
കറിവേപ്പില – 2 തണ്ട്
കുരുമുളക്പൊടി – ഒരു ടീസ്പൂണ്‍
ഉപ്പ് – ആവശ്യത്തിന്
എണ്ണ – 2 ടേബിള്‍സ്പൂണ്‍

തയ്യാറാക്കുന്ന വിധം

ചെറുപയറും ചേനയും ഉപ്പിട്ട് നികക്കെ വെള്ളമൊഴിച്ചു പ്രഷര്‍കുക്കറില്‍ രണ്ടു വിസില്‍ വരുന്നത് വരെ വേവിക്കുക. ചുവന്നുള്ളി, വെളുത്തുള്ളി, വറ്റല്‍മുളക് എന്നിവ നന്നായി ചതച്ച്‌ എടുക്കുക. ഒരു പാനില്‍ എണ്ണ ചൂടാക്കി ചതച്ച ചേരുവയും കറിവേപ്പിലയും ചേര്‍ത്ത് വഴറ്റുക. ഇതിലേക്ക് കുരുമുളക്പൊടി ചേര്‍ത്ത് ഇളക്കുക. വേവിച്ചു വച്ചിരിക്കുന്ന ചേന പയര്‍ കൂട്ട് ഇതിലേക്ക് ചേര്‍ത്ത് നന്നായി ഇളക്കുക. 3-4 മിനുട്ടിന് ശേഷം തീ ഓഫു ചെയ്യുക.

- ലിജി അരുണ്‍

വായിക്കുക: , , , ,

അഭിപ്രായം എഴുതുക »

Page 1 of 212

« Previous « രാജ്മ മസാല
Next Page » നെയ്ച്ചോറ് »



പ്രഷര്‍കുക്കര്‍ ബിരിയാണി...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine