കൂണ്‍ തോരന്‍

June 29th, 2012

koon3-epathram

കൂണ്‍ എന്ന് പറയുമ്പോള്‍ നിങ്ങള്‍ക്കൊക്കെ മനസ്സില്‍ വരിക സൂപ്പര്‍മാര്‍കെറ്റിലെ തണുത്ത സെക്ഷനില്‍ മുഷിഞ്ഞു വിറങ്ങലിച്ചു ഇരിക്കുന്ന ബട്ടണ്‍ മഷ്റൂം അല്ലേ?? എന്റെ ഈ കൂണ്‍ തോരന്‍ ആ ബട്ടണ്‍ മഷ്റൂം കൊണ്ടല്ല ഉണ്ടാക്കിയിരിക്കുന്നത്.. ഇത് എന്റെ നാട്ടില്‍ മഴക്കാലത്ത് ഉണ്ടാവുന്ന അരിക്കൂണ്‍ കൊണ്ടാണ്‌ ഉണ്ടാക്കിയിരിക്കുന്നത്. ജൂണ്‍-ജൂലൈ മാസങ്ങളിലാണ് ഈ കൂണ്‍ ഉണ്ടാവുക. പറമ്പില്‍ പലയിടങ്ങളിലായി ചെറുതും വലുതുമായ പുറ്റുകളില്‍ ഇവ പൊടി പൊടിയായി മൊട്ടിടുന്നു. ഒരു ദിവസം കൊണ്ട് മൂപ്പെത്തുകയും ചെയ്യും. അപ്പോള്‍ തന്നെ ഇത് പറിക്കണം. അല്ലെങ്കില്‍ അടുത്ത മഴയില്‍ ഇവയുടെ ആയുസ്സ്‌ തീരും. ഇനി പറിക്കുന്ന കാര്യം പറഞ്ഞാലോ.. അതൊരു വല്ലാത്ത പണി തന്നെയാണ്.

koon2-epathram

എന്റെ ചാച്ചനു കൂണ്‍ ഉണ്ടായിട്ടുണ്ടെങ്കില്‍ മണത്ത് അറിയാം എന്നാണ് പറയുന്നത്. :-) അത് കൊണ്ട് കക്ഷി മഴക്കാലത്തും പറമ്പിലൂടെയെല്ലാം റൌണ്ട്സ് അടിക്കാറുണ്ട്. വിവിധ തരം ഭക്ഷ്യയോഗ്യമായ കൂണുകള്‍ കിട്ടുകയും ചെയ്യും. അരിക്കൂണ്‍ കിട്ടിയാല്‍ ഞങ്ങള്‍ക്ക്‌ എല്ലാവര്ക്കും നല്ല പണിയാണ്. ഇത്ര ചെറിയ കൂണ്‍ പുറ്റില്‍ നിന്നും അടര്‍ത്തി, മണ്ണില്ലാതെ വൃത്തിയാക്കി എടുക്കണമെങ്കില്‍ കുറച്ചൊന്നുമല്ല മെനക്കെടേണ്ടത്.. എന്തായാലും ഒത്തു പിടിച്ചാല്‍ മലയും പോരും എന്ന് പറഞ്ഞപോലെ ഞങ്ങള്‍ കുട്ടികള്‍ എല്ലാവരും കൂടെ ചാച്ചന്റെ നേതൃത്വത്തില്‍ കൂണ്‍ പറിക്കല്‍ വിജയകരമായി പൂര്‍ത്തിയാക്കിയിരുന്നു. എത്ര പണിതാല്‍ എന്താ, ഇത്രയും രുചിയുള്ള മറ്റൊരു തോരന്‍ ഉണ്ടാവില്ല. അത്രയ്ക്ക് സ്വാദാണ്.. അരിക്കൂണിനു.. ഇനി തോരന്‍ മാത്രമല്ല, കൂണ്‍ മസാല, കട്ട്ലെറ്റ്‌ എന്നിവയൊക്കെ മമ്മി ഇത് കൊണ്ട് ട്രൈ ചെയ്തിട്ടുണ്ട്. എല്ലാം ഒന്നിനൊന്നു മെച്ചം..

koon1-epathram

ഏതായാലും നിങ്ങളുടെ ഒക്കെ വീട്ടില്‍ അരിക്കൂണ്‍ കിട്ടുമെന്നും, ഇനി കിട്ടിയാല്‍ തന്നെ അത് പറിക്കാന്‍ മെനക്കെടുമെന്നും, ഈ തോരന്‍ വെയ്ക്കുമെന്നും ഒന്നും ഉള്ള പ്രതീക്ഷയില്‍ അല്ല ഞാന്‍ ഈ റെസിപ്പി ഇടുന്നത്. നമ്മുടെ തൊടിയിലും പറമ്പിലും ഒക്കെ വളര്‍ന്നിരുന്ന ഒരുപാട് സംഗതികള്‍ കൊണ്ട് പോഷക സമൃദ്ധവും, വിഷമില്ലാത്തതും, രുചികരവും, ‘പോക്കറ്റ്‌ ഫ്രെണ്ട്ലി’യുമായ ആഹാരം തയ്യാറാക്കിയിരുന്ന ഒരു പൂര്‍വ്വകാലം നമുക്കുണ്ട്. അതിലേക്കു ചെറിയ ഒരു ഓര്‍മ്മപ്പെടുത്തല്‍. നമ്മുടെ പറമ്പുകളില്‍  രാസവളം, കീടനാശിനി എന്നിവ ഉപയോഗിക്കുന്നതും, കാലാവസ്ഥാവ്യതിയാനവും ഒക്കെ സ്വാഭാവികമായി കൂണ്‍ ഉണ്ടാവുന്നതിനെ തടസ്സപ്പെടുത്തുന്നു. എങ്കിലും ഇവയൊക്കെ ഒരു പരിധി വരെ എന്റെ നാടിനെയും വീടിനെയും ബാധിച്ചിട്ടില്ല എന്ന് പറയുമ്പോള്‍ എനിക്ക് അഭിമാനം തോന്നാറുണ്ട്. ഇവിടുത്തെ മണ്ണിനും വെള്ളത്തിനും അന്നും ഇന്നും ഒരേ ഗന്ധവും സ്വാദുമാണ്. ഇവയൊന്നും കൈമോശം വരാതിരിക്കട്ടെ…

koon4-epathram

അയ്യോ.. പറഞ്ഞു കാട് കയറി അല്ലെ? :-) നമ്മുക്ക് റെസിപ്പി നോക്കിയാലോ?? എന്റെ മമ്മിയുടെ സ്വന്തം റെസിപ്പി ആണിത്. ഇനി ഈ കൂണ്‍ ഇല്ലെങ്കിലും ഏതു കൂണ്‍ വച്ചും ഇത് ട്രൈ ചെയ്യാം കേട്ടോ…

ചേരുവകള്‍

കൂണ്‍  – അര കിലോ
തേങ്ങാ – ഒരു മുറി
മഞ്ഞള്‍പ്പൊടി – അര ടീസ്പൂണ്‍
കാന്താരി മുളക് – 12 എണ്ണം അല്ലെങ്കില്‍ പച്ചമുളക് 4-5 എണ്ണം
ചെറിയ ഉള്ളി – 6 എണ്ണം
വെളുത്തുള്ളി – 3 അല്ലി
കറിവേപ്പില – 2 തണ്ട്
ഉപ്പ് – ആവശ്യത്തിന്

തയ്യാറാക്കുന്ന വിധം

കൂണ്‍ മണ്ണ് കളഞ്ഞു നന്നായി കഴുകി പിഴിഞ്ഞ് എടുക്കുക. ഇതിലേക്ക് മഞ്ഞള്‍പ്പൊടി, ഉപ്പ്, കറിവേപ്പില എന്നിവ ചേര്‍ത്ത് ഇളക്കി ഒരു ചട്ടിയില്‍ ചെറുതീയില്‍ വേവിക്കുക. വെള്ളം ചേര്‍ക്കരുത്. തേങ്ങാ, കാന്താരി മുളക്, ചെറിയ ഉള്ളി, വെളുത്തുള്ളി എന്നിവ ഒതുക്കി എടുക്കുക. ഇത് വെന്ത കൂണിലേക്ക് ചേര്‍ത്ത് ഇളക്കി വെള്ളം വറ്റുന്നത് വരെ ചെറുതീയില്‍ വേവിച്ച്‌ എടുക്കുക. വെള്ളം വറ്റി കഴിയുമ്പോള്‍ വാങ്ങുക. കൂണ്‍ തോരന്‍ തയ്യാര്‍.

- ലിജി അരുണ്‍

വായിക്കുക: , , ,

Comments Off on കൂണ്‍ തോരന്‍

മാങ്ങാ പച്ചടി

May 10th, 2012

manga pachadi-epathram
നാട്ടില്‍ നിന്നും നല്ല കിടിലന്‍ മൂവാണ്ടന്‍ മാങ്ങകള്‍ കുറെ കിട്ടിയെന്നിരിക്കട്ടെ, നിങ്ങള്‍ എന്തൊക്കെ ഉണ്ടാക്കും അതുകൊണ്ട്?? ;-) ആദ്യത്തെ ദിവസം ചമ്മന്തി അരച്ചു, പിന്നത്തെ ദിവസം മീന്‍ മാങ്ങായിട്ട് കറി വച്ചു. ഇനി എന്താ മാങ്ങാ ഐറ്റം?? കടുമാങ്ങ എന്നൊക്കെ പറഞ്ഞാല്‍ അതൊക്കെ തല നരച്ചവര്‍ ഇട്ടാലേ ശരിയാവൂ എന്ന പക്ഷക്കാരിയാണ് ഞാന്‍. പക്ഷെ ഇതെന്റെ കഥ അല്ല കേട്ടോ.. കൊച്ചിന്‍ യുണിവേഴ്സിറ്റിയില്‍ എന്റെ സുഹൃത്തായിരുന്ന മേരി ആണ് ഇവിടുത്തെ കഥാനായിക. ബംഗ്ലൂരിലെ ലക്ഷക്കണക്കിന് വരുന്ന സോഫ്റ്റ്‌വെയര്‍ ഫാമിലീസില്‍ ഒന്നാണ് അവളുടേത്. എന്നാലും തിരക്ക് പിടിച്ച ജീവിതത്തിനിടയിലും തനി മലയാളി ഭക്ഷണം ഉണ്ടാക്കുന്ന കാര്യത്തില്‍ എക്സ്പേര്‍ട്ട് ആണ് കക്ഷി. ഈ മാങ്ങാ പച്ചടി അവള്‍ടെ സ്വന്തം റെസിപ്പി ആണ്. നല്ല കുത്തരി ചോറിന് ഒരടിപൊളി കോമ്പിനേഷന്‍ ആണ് ഇത്… ഓര്‍ക്കുമ്പോഴേ വായില്‍ വെള്ളം വരുന്നു.. അടുത്ത തവണ മാങ്ങാ കിട്ടട്ടെ ഇതൊന്നു വച്ചിട്ട് തന്നെ കാര്യം.. :-) തല്‍ക്കാലം നിങ്ങള്‍ ഒന്ന് പരീക്ഷിച്ചു നോക്കൂ..

ചേരുവകള്‍

മാങ്ങാ – ഒരെണ്ണം
ഇഞ്ചി – ഒരു ചെറിയ കഷണം
ചെറിയ ഉള്ളി – 12 അല്ലി
പച്ചമുളക് – 3 എണ്ണം
തേങ്ങാ – അര കപ്പ്‌
കടുക്‌ – കാല്‍ ടീസ്പൂണ്‍
കറിവേപ്പില – 2 തണ്ട്
വെളിച്ചെണ്ണ – 2 ടേബിള്‍സ്പൂണ്‍
ഉപ്പ് – പാകത്തിന്

തയ്യാറാക്കുന്ന വിധം

മാങ്ങ തീരെ ചെറുതായി കൊത്തി അരിഞ്ഞു ഉപ്പ് പുരട്ടി വയ്ക്കുക. ഉള്ളി, ഇഞ്ചി, പച്ചമുളക് ഇവ ചെറുതായി അരിഞ്ഞെടുക്കുക. തേങ്ങാ കടുക് ചേര്‍ത്ത് അല്‍പ്പം വെള്ളം ഒഴിച്ച് നന്നായി അരച്ചെടുക്കുക. ഒരു ചീനച്ചട്ടിയില്‍ എണ്ണ ഒഴിച്ച് ചൂടാകുമ്പോള്‍ കടുക് പൊട്ടിക്കുക. ഇതിലേക്ക് അരിഞ്ഞു വച്ചിരിക്കുന്ന ഉള്ളി, ഇഞ്ചി, പച്ചമുളക് എന്നിവ ചേര്‍ത്ത് വഴറ്റുക. തേങ്ങാ അരച്ചത്‌ ഇതിലേക്ക് ചേര്‍ത്ത് ചൂടാക്കി എടുക്കുക. അരിഞ്ഞു വച്ചിരിക്കുന്ന മാങ്ങയിലേക്ക് ഈ കൂട്ട് ചേര്‍ത്ത് നന്നായി യോജിപ്പിച്ചെടുക്കുക. കറിവേപ്പില കൊണ്ട് അലങ്കരിച്ചു വിളമ്പാം.

- ലിജി അരുണ്‍

വായിക്കുക: , , , ,

അഭിപ്രായം എഴുതുക »

ഗ്രില്ഡ് ഫിഷ്‌

February 1st, 2012

grilled-fish-epathram
നല്ല നെയ്മീന്‍ കിട്ടുമ്പോ, കുടംപുളി ഒക്കെ ഇട്ടു നല്ല ‘തറവാടി മീന്‍കറി’ വയ്ക്കുന്നതിനു പകരം എരിവും പുളിയും ഇല്ലാത്ത ഗ്രില്ഡ് ഫിഷ്‌ തന്നെ ഉണ്ടാക്കണോ?? :-) ഫിഷ്‌ ഗ്രില്‍ ചെയ്യാം എന്ന് പറയുമ്പോള്‍ വീട്ടുകാരുടെ റെസ്പോണ്‍സ് ഇങ്ങനെയാണ്.. അവരെ തെറ്റ് പറയാന്‍ പറ്റില്ല.. ഇതിനു മുന്‍പൊക്കെ ബാര്‍ബിക്ക്യു പാര്‍ട്ടികള്‍ക്ക് പോയി ഞങ്ങള്‍ ചുട്ട മല്‍സ്യം കഴിച്ചിട്ടുണ്ട്. അങ്ങ് കഴിക്കാം എന്നല്ലാതെ അതിനു പറയത്തക്ക രുചി ഉള്ളതായി തോന്നിയിരുന്നില്ല. എന്തായാലും വനിതയുടെ ഏതോ ഒരു ലക്കത്തില്‍ ഗ്രില്ഡ് ഫിഷ്‌ റെസിപ്പി കണ്ടു. പിന്നത്തെ പ്രാവശ്യം നെയ്മീന്‍ വാങ്ങിയപ്പോള്‍ വെറും 3-4 പീസ്‌ ഞാന്‍ മാറ്റി വച്ചു. ഗ്രില്ഡ് ഫിഷ്‌ ഒന്ന് ചെയ്തു നോക്കാം എന്ന് വച്ചു. റെസിപ്പി എന്റെ ഇഷ്ടത്തിനു ഞാന്‍ ഒന്ന് മോഡിഫൈ ചെയ്തിട്ടുണ്ട്. എനിക്ക് വീട്ടില്‍ ഗ്രില്‍ ചെയ്യാനുള്ള സംവിധാനം ഇല്ല. ഈ റെസിപ്പി അനുസരിച്ച് ഗ്യാസില്‍ ഉണ്ടാക്കാം. അത് കണ്ടപ്പോ എന്റെ ആഗ്രഹം കലശലായി. സാധാരണ ഗ്രില്‍ ഫിഷില്‍ എണ്ണ ചേര്‍ക്കാറില്ല. ഗ്യാസില്‍ ഉണ്ടാക്കുന്നത്‌ കാരണം അല്പം എണ്ണ ചേര്‍ക്കാതെ പറ്റില്ല.  അങ്ങനെ ആയതുകൊണ്ട് ഇനി ഇതിനെ ഗ്രില്ഡ് ഫിഷ്‌ എന്ന് വിളിക്കാന്‍ നിങ്ങള്ക്ക് വിഷമം ഉണ്ടെങ്കില്‍ വേറെ എന്തെങ്കിലും വിളിക്കാം.. :-) എന്തായാലും ഉണ്ടാക്കി കഴിഞ്ഞപ്പോള്‍ ഒട്ടുമുക്കാലും കഴിച്ചത് എന്റെ കുഞ്ഞിപ്പെണ്ണ് ഹയാ ആണ്… :-) എല്ലാവരും അവള്‍ടെ കയ്യില്‍ നിന്നും പിടിച്ചു പറിച്ചു തിന്നേണ്ടി വന്നു… വളരെ സിമ്പിള്‍ ആയ ഈ ഗ്രില്ഡ് ഫിഷ്‌ എങ്ങനെ തയ്യാറാക്കാം എന്ന് നോക്കു..

ചേരുവകള്‍

മുള്ളില്ലാത്ത മല്‍സ്യം – 250 ഗ്രാം (കിംഗ്‌ ഫിഷ്‌, ഹമ്മൂര്‍ എന്നിവയാണ് നല്ലത്)
ഇഞ്ചി വെളുത്തുള്ളി പേസ്റ്റ് – ഒന്നര ടീസ്പൂണ്‍
കുരുമുളക്പൊടി – 1 ടേബിള്‍സ്പൂണ്‍
ചെറുനാരങ്ങാ നീര് – 1 ടേബിള്‍സ്പൂണ്‍
ഉപ്പ് – ആവശ്യത്തിന്
മല്ലിയില – ചെറുതായി അരിഞ്ഞത് – അര കപ്പ്
ഒലിവ് ഓയില്‍ – 1 ടേബിള്‍സ്പൂണ്‍

തയാറാക്കുന്ന വിധം

മീന്‍ കഴുകി വൃത്തിയാക്കി 3 ഇഞ്ചു കഷണങ്ങളായി കനം കുറഞ്ഞു മുറിക്കുക. ഇതിലേക്ക് എല്ലാ ചേരുവകളും ചേര്‍ത്ത് നന്നായി യോജിപ്പിക്കുക. ഒരു മണിക്കൂര്‍ നേരത്തേക്ക് ഇത് ഫ്രിഡ്ജില്‍ വയ്ക്കുക. ഒരു നോണ്‍ സ്റ്റിക് പാന്‍ ചൂടാക്കി അതിലേക്കു അര ടേബിള്‍സ്പൂണ്‍ ഒലിവ് ഓയില്‍ ഒഴിച്ചു ചുറ്റിക്കുക. അത് ചൂടാകുമ്പോള്‍ മീന്‍ കഷ്ണങ്ങള്‍ പാനില്‍ നിരത്തുക. തീ വളരെ കുറച്ചു വച്ചു പാത്രം മൂടി വയ്ക്കുക. ഇരു വശവും മൊരിഞ്ഞ് കഴിയുമ്പോള്‍ വാങ്ങാം. പുഴുങ്ങിയ പച്ചക്കറികള്‍ (ഉരുളകിഴങ്ങ്, ബീന്‍സ്‌, കാരറ്റ്‌, ബ്രോക്കൊളി) ഫ്രഞ്ച് ഫ്രൈസ് എന്നിവയ്ക്കൊപ്പം വിളമ്പാം.

- ലിജി അരുണ്‍

വായിക്കുക: , ,

2 അഭിപ്രായങ്ങള്‍ »

മുട്ടക്കറി

January 28th, 2012

eggcurry-epathram
മുട്ട ഏതു പരുവത്തിലാക്കിയാലും എനിക്ക് ഇഷ്ടമാണ്. മുട്ട റോസ്റ്റ്‌ ഉണ്ടാക്കുന്ന വിധം നേരത്തെ ഞാന്‍ ഇവിടെ പറഞ്ഞിട്ടുണ്ട്. ഈ മുട്ടക്കറി എന്റെ റെസിപ്പി അല്ല. കുസാറ്റില്‍ എന്റെ സീനിയര്‍ ആയി പഠിച്ച ദിവ്യായുടെ റെസിപ്പി ആണ് ഇത്. കക്ഷിയുടെ സ്വന്തം കണ്ടുപിടുത്തമാണ് ഇത്. എന്തായാലും വളരെ സ്വാദിഷ്ടമായ ഒരു കറിയാണ്.

ചേരുവകള്‍

മുട്ട പുഴുങ്ങി നെടുകെ മുറിച്ചത് – 4 എണ്ണം
സവാള – 2 ഇടത്തരം നേര്‍മ്മയായി അരിഞ്ഞത്
മുളക്പൊടി – 2 ടീസ്പൂണ്‍ നികക്കെ
മഞ്ഞള്‍പ്പൊടി – അര ടീസ്പൂണ്‍
മല്ലിപ്പൊടി – 1 ടീസ്പൂണ്‍
ഗരംമസാലപ്പൊടി –  1 ടീസ്പൂണ്‍
വെളിച്ചെണ്ണ – 2 ടേബിള്‍സ്പൂണ്‍
തേങ്ങാ – 2 ടേബിള്‍സ്പൂണ്‍
ഉപ്പ് – ആവശ്യത്തിന്
കറിവേപ്പില – 2 തണ്ട്

തയ്യാറാക്കുന്ന വിധം

ഒരു പാനില്‍ എണ്ണ ചൂടാക്കി സവാള ആവശ്യത്തിന് ഉപ്പ് ചേര്‍ത്ത് വഴറ്റുക. ഇളം ബ്രൌണ്‍ നിറം ആകുമ്പോള്‍ പൊടികള്‍ എല്ലാം ചേര്‍ത്ത് ഒന്നുകൂടി വഴറ്റുക. തീ ഓഫ്‌ ആക്കുക. ഇത് തണുത്തു കഴിയുമ്പോള്‍, തേങ്ങാ ചുരണ്ടിയത് ചേര്‍ത്ത് മിക്സിയില്‍ അരച്ച് എടുക്കുക. സവാള വഴറ്റിയ അതെ പാനിലേക്ക് അരപ്പ് ചേര്‍ത്ത് കുറച്ചു നേരം വഴറ്റുക. എണ്ണ തെളിഞ്ഞു വരണം. അല്‍പ്പം വെള്ളം ചേര്‍ത്ത് ഒന്ന് കൂടെ തിളപ്പിക്കുക. ഇതിലേക്ക് മുറിച്ചു വച്ചിരിക്കുന്ന മുട്ടയും കറിവേപ്പിലയും ചേര്‍ത്ത് ഇളക്കുക. 5 മിനുറ്റ് കഴിയുമ്പോള്‍ വാങ്ങി വയ്ക്കുക.
അപ്പം, ഇടിയപ്പം, ചപ്പാത്തി എന്നിവയ്ക്കൊപ്പം കഴിക്കാം.

അയച്ചു തന്നത് – ദിവ്യാ പ്രമോദ്‌

- ലിജി അരുണ്‍

വായിക്കുക: , , ,

1 അഭിപ്രായം »

പോര്‍ക്ക്‌ റോസ്റ്റ്‌

January 24th, 2012

pork roast-epathram

പോര്‍ക്ക് എന്ന് കേള്‍ക്കുമ്പോള്‍ തന്നെ അയ്യേ എന്ന് പറയുന്ന ഒരുപാട് പേരെ എനിക്കറിയാം. എന്നാലും സത്യം പറയാമല്ലോ, ഇത്രേം സ്വാദുള്ള മറ്റൊരു മാംസാഹാരം ഉണ്ടാവില്ല. എന്റെ സ്വന്തം നാടായ വാഴക്കുളത്തു നല്ല ബീഫും പോര്‍ക്കും കിട്ടും. പണ്ടൊക്കെ വീട്ടില്‍ പോര്‍ക്ക് വയ്ക്കുമ്പോള്‍ അതിലെ നെയ്‌കഷ്ണങ്ങള്‍ കഴിക്കാനാണ് എല്ലാവര്ക്കും താല്‍പ്പര്യം.. അതിനു വല്ലാത്ത ഒരു സ്വാദ് തോന്നിയിരുന്നു. പോര്‍ക്കിന്റെ സവിശേഷതയും അത് തന്നെയാണെന്ന് തോന്നുന്നു. പോര്‍ക്ക്‌ അറബി നാടുകളില്‍ പലയിടത്തും നിഷിദ്ധമാണ്. എങ്കിലും ദുബായില്‍ നല്ല പോര്‍ക്ക് കിട്ടും.

ഓഫീസില്‍ എനിക്ക് ധാരാളം ഫിലിപ്പിനോ സുഹൃത്തുക്കള്‍ ഉണ്ട്. ഫിലിപ്പീന്സുകാര്‍ക്കാണെങ്കില്‍ പോര്‍ക്ക്‌ ദേശീയ ഭക്ഷണമാണ്. അവര്‍ തയ്യാറാക്കുന്ന പോര്‍ക്ക്‌ നമ്മള്‍ മലയാളികള്‍ക്ക് പിടിച്ചെന്നു വരില്ല. എരിവും പുളിയും ഇല്ലാ. അത് തന്നെ കാരണം. എങ്കിലും പോര്‍ക്കില്‍ തേങ്ങാപ്പാലും, നിറയെ പച്ചമുളകും, ഇഞ്ചിയും ഒക്കെ ചേര്‍ത്ത അവരുടെ ഒരു കറി ഞാന്‍ ഒരിക്കല്‍ കഴിക്കുകയുണ്ടായി. ബീക്കോള്‍ എക്സ്പ്രെസ്സ് എന്നാണു അതിന്റെ പേര്. പേര് കേട്ടാല്‍ ഇന്റര്‍ സ്റ്റേറ്റ് ഓടിക്കൊണ്ടിരിക്കുന്ന പോര്‍ക്ക്‌ ആണെന്ന് തോന്നും അല്ലെ? :-) എന്നാല്‍ ഫിലിപ്പിന്‍സിലെ ഒരു പ്രവിശ്യയാണ് ബീക്കോള്‍. അവിടുത്തെ സ്പെഷ്യല്‍ ഐറ്റം ആണ് ഇത്..

ഓക്കേ.. ഓക്കേ.. അതൊക്കെ അവിടെ നില്‍ക്കട്ടെ.. ഏതായാലും ഞാന്‍ വല്യ പോര്‍ക്ക്‌ എക്സ്പേര്‍ട്ട് അല്ല.(നല്ല ചാന്‍സ് കിട്ടിയില്ല, അല്ലെങ്കില്‍ ഞാന്‍ കാണിച്ചു തന്നേനെ.. :-)) ഈ റെസിപ്പി നമ്മുടെ എഡിറ്റര്‍ സാറിന്റെ സുഹൃത്ത്‌ മൂര്‍ത്തിയുടെതാണ്. മൂര്‍ത്തി എന്ന പേര് കേള്‍ക്കുമ്പോള്‍, പട്ടര്‍ക്ക് പോര്‍ക്ക് വഴങ്ങുമോ എന്ന് നിങ്ങളില്‍ പലരും ചിന്തിക്കാം. എന്നാല്‍ അത്ഭുതപ്പെടേണ്ട.. കക്ഷി ഒന്നാന്തരം ഒരു നോണ്‍ വെജ് കുക്കാണ്. ഈ പോര്‍ക്ക്‌ റോസ്റ്റ്‌ കഴിക്കുമ്പോള്‍ അത് പിടികിട്ടും. :-)

പോര്‍ക്ക്‌ – കിലോ
വെളുത്തുള്ളി ചതച്ചത് – 2 ടേബിള്‍സ്പൂണ്‍
ഇഞ്ചി ചതച്ചത് – 2 ടേബിള്‍സ്പൂണ്‍
പച്ചമുളക് ചതച്ചത് – 15 എണ്ണം
മഞ്ഞള്‍പ്പൊടി – 3 ടീസ്പൂണ്‍
മുളക്പൊടി – 2 ടേബിള്‍സ്പൂണ്‍
മല്ലിപ്പൊടി – 2 ടേബിള്‍സ്പൂണ്‍
കുരുമുളക്പൊടി – 2 ടേബിള്‍സ്പൂണ്‍
ചെറിയ ഉള്ളി നെടുകെ അരിഞ്ഞത് – 3 കപ്പ്‌
തേങ്ങാക്കൊത്ത് – ഒരു പിടി
കറിവേപ്പില – ഒരു പിടി
വെളിച്ചെണ്ണ – 2 ടേബിള്‍സ്പൂണ്‍

തയ്യാറാക്കുന്ന വിധം

പോര്‍ക്ക് കഴുകി വൃത്തിയാക്കി, ഒരിഞ്ചു കഷ്ണങ്ങള്‍ ആയി മുറിയ്ക്കുക. എല്ലാ കഷണങ്ങളിലും തോലും ഇറച്ചിയും ഉണ്ടാവണം. വെളുത്തുള്ളി, ഇഞ്ചി, പച്ചമുളക് എന്നിവ ചതച്ചതും, രണ്ടു ടീസ്പൂണ്‍ മഞ്ഞള്‍പ്പൊടിയും ആവശ്യത്തിന് ഉപ്പും ഒരു ഗ്ലാസ്‌ വെള്ളവും ചേര്‍ത്ത് ഇളക്കി 45 മിനിറ്റ് അടച്ചു വച്ച് വേവിക്കുക.

മുളക്പൊടി, മല്ലിപ്പൊടി, കുരുമുളക്പൊടി എന്നിവയും ബാക്കിയുള്ള ഒരു ടീസ്പൂണ്‍ മഞ്ഞള്‍പ്പൊടിയും ഒരു പാന്‍ ചൂടാക്കി അതില്‍ ഒന്ന് വറുത്തെടുക്കുക. പോര്‍ക്ക് വെന്തു കഴിയുമ്പോള്‍ ഈ മസാലയും, തേങ്ങാക്കൊത്തും, കറിവേപ്പിലയും ചേര്‍ത്ത് ഇളക്കി ചെറുതീയില്‍ പത്തു മിനുറ്റ് വേവിക്കുക.

മറ്റൊരു പാത്രത്തില്‍ എണ്ണ ചൂടാക്കി ചുവന്നുള്ളി നന്നായി വഴറ്റി എടുക്കുക. ഇത് പോര്‍ക്കിലേക്ക് ചേര്‍ത്ത് ഇളക്കുക. പോര്‍ക്ക്‌ റോസ്റ്റ്‌ റെഡി ചോറ്, ചപ്പാത്തി, നെയ്ചോര്‍ എന്നിവയുടെ കൂടെ കഴിക്കാം.

അയച്ചു തന്നത് – അനന്തശയനം തിരു മൂര്‍ത്തി
ഫോട്ടോ – ജിഷി സാമുവേല്‍

- ലിജി അരുണ്‍

വായിക്കുക: , ,

അഭിപ്രായം എഴുതുക »

Page 1 of 41234

« Previous « മത്തങ്ങാ മെഴുക്കുപുരട്ടി
Next Page » മുട്ടക്കറി »



പ്രഷര്‍കുക്കര്‍ ബിരിയാണി...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine