ഡെങ്കിപ്പനിക്കെതിരെ ജനിതക കൊതുക്

October 12th, 2010

aedes-aegypti-mosquitoകൊലാലമ്പൂര്‍ : നിയന്ത്രണാതീതമായി പെരുകുന്ന ഡെങ്കിപ്പനിയെ നേരിടാന്‍ ഒരു നവീന തന്ത്രം പയറ്റാന്‍ ഒരുങ്ങുകയാണ് മലേഷ്യ. ഈഡിസ്‌ ഈജിപ്റ്റി വര്‍ഗ്ഗത്തിലെ പെണ്‍ കൊതുകുകളാണ് ഡെങ്കിപ്പനി പരത്തുന്നത്. ഇവയെ നേരിടാന്‍ ജനിതകമായി പരിവര്‍ത്തനം ചെയ്യപ്പെട്ട ഈഡിസ്‌ ഈജിപ്റ്റി വര്‍ഗ്ഗത്തിലെ ആണ്‍ കൊതുകുകളെ ഉപയോഗിക്കുവാനാണ് പുതിയ പദ്ധതി. ഈ ആണ്‍ കൊതുകുകള്‍ക്ക് ജനിക്കുന്ന കുഞ്ഞുങ്ങള്‍ക്ക്‌ ആയുസ് വളരെ കുറവാണ് എന്നതാണ് ഇവയുടെ പ്രത്യേകത. അങ്ങനെ അല്‍പ നാളുകള്‍ കൊണ്ട് കൊതുകുകളുടെ പുതിയ തലമുറ നശിക്കും എന്നാണ് കണക്ക് കൂട്ടല്‍.

ഈ വര്‍ഷം ഡെങ്കിപ്പനി മൂലമുള്ള മരണത്തില്‍ 53 ശതമാനം വര്‍ദ്ധനവാണ് മലേഷ്യയില്‍ രേഖപ്പെടുത്തിയത്‌.

ആദ്യ ഘട്ടത്തില്‍, ജനിതകമായി പരിവര്‍ത്തനം ചെയ്യപ്പെട്ട മൂവായിരം ആണ്‍ കൊതുകുകളെയാണ് പുറത്തിറക്കുവാന്‍ ഉദ്ദേശിക്കുന്നത് എന്ന് മലേഷ്യന്‍ ആരോഗ്യ മന്ത്രി അറിയിച്ചു.

എന്നാല്‍ ജനിതക പരിവര്‍ത്തനം ചെയ്യപ്പെട്ട കൊതുകുകള്‍ ഉണ്ടാക്കിയേക്കാവുന്ന വിപത്തുകളെ പറ്റി പരിസ്ഥിതി പ്രവര്‍ത്തകര്‍ക്ക് ആശങ്കകള്‍ ഉണ്ട്. ഇനിയും പൂര്‍ണ്ണമായി മനസ്സിലാക്കാന്‍ കഴിഞ്ഞിട്ടില്ലാത്തതും അറിയപ്പെടാത്ത അപകടങ്ങള്‍ പതിയിരിക്കുന്നതുമായ ഒരു സാങ്കേതിക വിദ്യയാണ് ജനിതക പരിവര്‍ത്തനം എന്നിരിക്കെ അനേക വര്‍ഷങ്ങളുടെ നിരീക്ഷണവും പഠനവും ഇല്ലാതെ ഇത്തരം കൊതുകുകളെ തുറന്നു വിടുന്നത് അത്യന്തം ആപല്‍ക്കരം ആയിരിക്കും എന്ന് ഇവര്‍ വെളിപ്പെടുത്തി. മാത്രമല്ല ഈ കൊതുകുകളുടെ ലാര്‍വകള്‍ “ടെട്രാസൈക്ലിന്‍” എന്ന ആന്റിബയോട്ടിക്കിന്റെ സാന്നിധ്യത്തില്‍ നശിക്കുകയില്ല എന്നതും ഇവര്‍ ചൂണ്ടിക്കാണിക്കുന്നു. മൃഗങ്ങളിലും മനുഷ്യരിലും സര്‍വ സാധാരണമായി ഉപയോഗിക്കപ്പെടുന്ന ഒരു ആന്റിബയോട്ടിക് ആണ് “ടെട്രാസൈക്ലിന്‍” എന്നത് ഈ സാദ്ധ്യത വര്‍ദ്ധിപ്പിക്കുകയും ചെയ്യുന്നു.

- ജെ.എസ്.

വായിക്കുക: , ,

അഭിപ്രായം എഴുതുക »

മന്ത്രി ബിനോയ്‌ വിശ്വത്തിന് പിന്തുണ

October 2nd, 2010

binoy-viswamദുബായ്‌ : അതിരപ്പിള്ളി പദ്ധതി വന്നാല്‍ ഉണ്ടാകുന്ന പാരിസ്ഥിതിക നഷ്ടത്തെ ചെറുതായി കാണേണ്ടതില്ല എന്നും ഇതിന്റെ പ്രത്യാഘാതം വരും കാലങ്ങളില്‍ നാം മനസിലാക്കേണ്ടി വരും എന്ന മന്ത്രി ബിനോയ്‌ വിശ്വത്തിന്റെ പ്രസ്താവനയെ കേരള പ്രവാസി പരിസ്ഥിതി കൂട്ടായ്മ സ്വാഗതം ചെയ്തു. പാരിസ്ഥിതിക വിഷയങ്ങളില്‍ യാഥാര്‍ത്ഥ്യത്തോടൊപ്പം നിന്ന് സംസാരിക്കാനും ഇത്തരം വിഷയങ്ങളില്‍ തന്റെ അഭിപ്രായം തുറന്നു പറയുവാനുമുള്ള അദ്ദേഹത്തിന്റെ നിലപാടിനെ പ്രശംസിക്കുകയും അദ്ദേഹത്തിന് കേരള പ്രവാസി പരിസ്ഥിതി കൂട്ടായ്മയുടെ പിന്തുണ അറിയിക്കുകയും ചെയ്തു.

“അതിരപ്പിള്ളി പദ്ധതിയും പരിസ്ഥിതിയും” എന്ന വിഷയത്തെ ആസ്പദമാക്കി കേരള പ്രവാസി പരിസ്ഥിതി കൂട്ടായ്മ നടത്തിയ ചര്‍ച്ചയില്‍ e പത്രം പത്രാധിപര്‍ ജിഷി സാമുവല്‍, കോളമിസ്റ്റും പരിസ്ഥിതി പ്രവര്‍ത്തകനുമായ ഫൈസല്‍ ബാവ, സേതു എന്നിവര്‍ സംസാരിച്ചു.

- ഡെസ്ക്

വായിക്കുക: , , ,

അഭിപ്രായം എഴുതുക »

കണ്ടല്‍ക്കാട്

September 11th, 2010

mangrove-epathram

വെള്ളത്തിലും
കരയിലുമല്ലാതെ,
ഇടയ്ക്കുള്ള നില്‍പ്പ്
അപകടം തന്നെ.

എവിടെ നിന്നും
പിന്തുണയില്ലാതെ,
ഉണങ്ങാതെ ഉണക്കിയും,
മുക്കാതെ മുക്കിയും കൊല്ലും.

ചെയ്തു വെച്ച ഉപകാരങ്ങള്‍
ആരും ഓര്‍ത്തെന്നു വരില്ല.

അല്ലെങ്കിലും
ചേതമില്ലാത്ത
ഉപകാരങ്ങള്‍
ഇന്നാര്‍ക്കു വേണം.

വെള്ളത്തിനും
കരയ്ക്കുമിടയിലെ
ഇത്തിരി ഇടം
കണ്ടാലും
കണ്ടില്ലെന്നു നടിച്ചു
വെറുതെ കിടന്നോട്ടെ.

വയസ്സന്‍
പൊക്കുട* സ്വപ്നമെങ്കിലും
തകരാതെ കിടക്കട്ടെ.

(*കേരളത്തില്‍ കണ്ടല്‍ക്കാടുകള്‍ സംരക്ഷിക്കുകയും അവ നശിച്ചാലുള്ള ഭവിഷ്യത്തിനെ കുറിച്ച് ബോധവല്‍ക്കരണം നടത്തുകയും ചെയ്ത പരിസ്ഥിതി പ്രവര്‍ത്തകനാണ് കല്ലേന്‍ പൊക്കുടന്‍)

- ഫൈസല്‍ ബാവ

വായിക്കുക: ,

2 അഭിപ്രായങ്ങള്‍ »

ട്രോളിംഗ് നിരോധനം അവസാനിച്ചു

July 31st, 2010

vypeen-fishing-trawlers-epathramകൊച്ചി : 45 ദിവസം നീണ്ടു നിന്ന ട്രോളിംഗ് നിരോധനം ഇന്ന് അവസാനിക്കും. കേരളത്തിന്റെ തീരങ്ങളില്‍ യന്ത്രവല്‍കൃത മല്‍സ്യ ബന്ധനത്തിന് വര്‍ഷാവര്‍ഷം ഏര്‍പ്പെടുത്തുന്ന ഈ ഒന്നര മാസത്തെ മല്‍സ്യ ബന്ധന നിരോധനം മല്‍സ്യ സമ്പത്തിനെ നില നിര്‍ത്താന്‍ വഹിച്ച പങ്ക് ആഗോള തലത്തില്‍ തന്നെ ശ്രദ്ധിക്കപ്പെട്ടതും പ്രശംസ നേടിയതുമാണ്.

കേരളത്തിന്റെ സമ്പദ് ഘടനയില്‍ മല്‍സ്യ ബന്ധനത്തിന് ഒരു വലിയ പങ്കാണ് ഉള്ളത്. ഭക്ഷ്യ ഉല്‍പ്പന്നം എന്ന നിലയിലും മല്‍സ്യ ബന്ധനവുമായി ബന്ധപ്പെട്ട തൊഴില്‍ സാധ്യത മൂലവും മല്‍സ്യ ബന്ധനം കേരളത്തിന്റെ സമ്പദ്‌ വ്യവസ്ഥ യുമായി ബന്ധപ്പെട്ടു നില്‍ക്കുന്നു. അത് കൊണ്ട് തന്നെ മല്‍സ്യ സമ്പത്തിന്റെ നിരുത്തരവാദ പരമായ അമിത ഉപയോഗം നിയന്ത്രിച്ചില്ലെങ്കില്‍ അത് ദൂര വ്യാപകമായ പരിസ്ഥിതി വിപത്തുകള്‍ മാത്രമല്ല ഉണ്ടാക്കുക, തൊഴിലില്ലായ്മ പോലുള്ള ഹ്രസ്വ കാല സാമൂഹിക പ്രശ്നങ്ങള്‍ തന്നെ സൃഷ്ടിക്കും.

1957ല്‍ ഇന്തോ – നോര്‍വീജിയന്‍ സംയുക്ത സംരംഭത്തിന്റെ ഭാഗമായാണ് നവീന മല്‍സ്യ ബന്ധന രീതികള്‍ കേരളത്തിലെ മല്‍സ്യ ബന്ധന രംഗത്ത്‌ പ്രചരിച്ചത്. ഇതിന്റെ ഭാഗമായി സംസ്ഥാന ഫിഷറീസ്‌ വകുപ്പ്‌ തന്നെ വയര്‍ലെസ്‌ ടെലിഫോണ്‍, യന്ത്ര വല്‍കൃത വിഞ്ചുകള്‍, എക്കോ സൌണ്ടറുകള്‍, എന്നിങ്ങനെയുള്ള ആധുനിക സൌകര്യങ്ങളുള്ള യന്ത്ര വല്‍കൃത ബോട്ടുകള്‍ ലഭ്യമാക്കി. യന്ത്ര വല്‍കൃത മല്‍സ്യ ബന്ധന രീതികളില്‍ ഏറ്റവും പ്രമുഖമായ “ബോട്ടം ട്രോളിംഗ്” നയലോണ്‍ വലകള്‍ ഉപയോഗിച്ച് സമുദ്രത്തിന്റെ അടിത്തട്ട് തൂത്തു വാരി എടുക്കാന്‍ തുടങ്ങി അധിക നാളുകള്‍ വേണ്ടി വന്നില്ല, സമുദ്ര പാരിസ്ഥിതിക വ്യവസ്ഥയ്ക്ക് ഏറ്റവും വലിയ വെല്ലുവിളി ആയി ഈ സമ്പ്രദായം മാറുവാന്‍.

മല്‍സ്യ കുഞ്ഞുങ്ങളെയും മുട്ടകളെയും അടക്കം ഈ ബോട്ടുകളിലെ നൈലോണ്‍ വലകള്‍ വാരി എടുത്തതോടെ പ്രജനനത്തിനുള്ള സാധ്യതകള്‍ ഇല്ലാതായ മല്‍സ്യ സമ്പത്തില്‍  ക്രമാതീതമായ കുറവ് കാണപ്പെട്ടു തുടങ്ങി. ബോട്ടുകളിലെ യന്ത്രങ്ങളില്‍ നിന്നും ചോര്‍ന്നു വെള്ളത്തില്‍ കലരുന്ന ഇന്ധനം മല്‍സ്യ മുട്ടകളെ  നശിപ്പിക്കുകയും ചെയ്തു. യന്ത്ര വല്‍കൃത മല്‍സ്യ ബന്ധനം പുറം കടലില്‍ മാത്രമായി പരിമിതപ്പെടു ത്തിയിട്ടുണ്ടെങ്കിലും പലപ്പോഴും ഇവര്‍ തീരത്തിനടുത്തേയ്ക്ക് അതിക്രമിച്ചു കയറി പരമ്പരാഗത മല്‍സ്യ തൊഴിലാളികള്‍ക്ക്‌ പ്രശ്നങ്ങള്‍ സൃഷ്ടിക്കുകയും ചെയ്യുന്നു. പലപ്പോഴും പരമ്പരാഗത ചെറുകിട മല്‍സ്യ ബന്ധന തൊഴിലാളികളുടെ വലകള്‍ക്ക് യന്ത്ര വല്‍കൃത ബോട്ടുകള്‍ മൂലം നാശം സംഭവിക്കുന്നു.

മല്‍സ്യ ലഭ്യതയില്‍ വന്ന വ്യതിയാനങ്ങള്‍ പഠിച്ച സര്‍ക്കാര്‍ 1980ല്‍ പഴ്സീന്‍ വല, റിംഗ് സീന്‍ വല, പെലാജിക്‌ ട്രോളിംഗ്, മിഡ് വാട്ടര്‍ ട്രോളിംഗ് എന്നിങ്ങനെ ഒട്ടേറെ വിനാശകരമായ മല്‍സ്യ ബന്ധന രീതികള്‍ കേരളത്തില്‍ നിരോധിച്ചു. അടിത്തട്ട് ട്രോളിംഗ് മണ്‍സൂണ്‍ കാലത്ത് നിരോധിക്കണം എന്ന പരമ്പരാഗത തൊഴിലാളികളുടെ ആവശ്യവും സര്‍ക്കാര്‍ 1981ല്‍ നടപ്പിലാക്കി. എന്നാല്‍ യന്ത്ര വല്‍കൃത ബോട്ട് ഉടമകള്‍ കോടതി വഴി ഈ നിരോധനം ഒഴിവാക്കി. ഈ മേഖലയില്‍ കൂടുതല്‍ പഠനം നടത്തുവാന്‍ ആയിരുന്നു കോടതി സര്‍ക്കാരിനോട് ആവശ്യപ്പെട്ടത്.

1981ല്‍ ബാബു പോള്‍ ചെയര്‍മാനായുള്ള 13 അംഗ കമ്മിറ്റി മുതല്‍ കാലവര്‍ കമ്മിറ്റി, ബാലകൃഷ്ണന്‍ കമ്മിറ്റി എന്നിങ്ങനെ നിരവധി കമ്മിറ്റികള്‍ ഈ വിഷയത്തില്‍ പഠനം നടത്തുകയുണ്ടായി. ഒടുവില്‍ 1988 മുതല്‍ സ്ഥിരമായി മണ്‍സൂണ്‍ മാസങ്ങളില്‍ 45 ദിവസത്തെ ട്രോളിംഗ് നിരോധനം സര്‍ക്കാര്‍ നടപ്പിലാക്കി തുടങ്ങി. ഈ നീക്കം മല്‍സ്യ സമ്പത്തിനെ ഏറെ സഹായകരമായി എന്ന് പിന്നീടുള്ള നിരീക്ഷണങ്ങളില്‍ നിന്നും വ്യക്തമായി. ഇതിനെ തുടര്‍ന്ന് മറ്റു തീര ദേശ സംസ്ഥാനങ്ങളും സമാനമായ നിരോധനങ്ങള്‍ ഏര്‍പ്പെടുത്തി. മാത്രമല്ല, സംസ്ഥാന ട്രോളിംഗ് നിരോധനത്തോട്‌ അനുബന്ധിച്ച് ആഴക്കടലിലും ഈ സമയത്ത് കേന്ദ്ര സര്‍ക്കാര്‍ മല്‍സ്യ ബന്ധനത്തിന് നിരോധനം ഏര്‍പ്പെടുത്തുവാനും ഇത് പ്രചോദനമായി എന്നതില്‍ കേരളത്തിന്‌ അഭിമാനിക്കാം.

- ജെ.എസ്.

വായിക്കുക:

അഭിപ്രായം എഴുതുക »

8 of 8« First...678

« Previous Page « ഇന്ത്യയുടെ പക്ഷി മനുഷ്യന് ആദരാഞ്ജലികള്‍
Next » ആണവ പുനര്‍ സംസ്കരണ കരാറില്‍ ഇന്ത്യ ഒപ്പ് വെച്ചു »

  • കല്ലേൻ പൊക്കുടൻ അന്തരിച്ചു
  • ആറന്മുളയിലെ വിമാനത്താവളത്തിന്‌ അനുമതി റദ്ദാക്കി
  • നിങ്ങളുടെ പൂന്തോട്ടത്തിൽ കണ്ണും നട്ട് നാസ
  • കൂടംകുളം ഇന്നു മുതൽ
  • പൊള്ളുന്ന ഭൂമി, മാറുന്ന കാലാവസ്ഥ
  • അമേരിക്കൻ ചെർണോബിൽ ചോരുന്നു
  • ദേശീയ സൌര ദൌത്യത്തിനെതിരെ അമേരിക്ക
  • ഗാഡ്ഗില്‍ റിപ്പോര്‍ട്ടിനെതിരെ സര്‍വ കക്ഷികളും
  • ജനിതക കൃഷിക്കെതിരെ ജൈവ വൈവിദ്ധ്യ കോൺഗ്രസ്
  • ജോണ്‍ സി ജേക്കബ് പ്രകൃതിയുടെ ഉപാസകന്‍
  • നെല്‍വയൽ ‍- നീര്‍ത്തട സംരക്ഷണം
  • വരള്‍ച്ചാ ഭീഷണി നേരിടാന്‍ യു. എൻ. മുന്നൊരുക്കം തുടങ്ങി
  • ഫുക്കുഷിമയിലെ മൽസ്യത്തിൽ വൻ ആണവ മലിനീകരണം
  • പ്രകൃതിയിലേക്ക് നമ്മെ തിരിച്ചയച്ച മസനൊബു ഫുകുവോക്ക
  • ഭോപ്പാൽ മാലിന്യം നിർമ്മാർജ്ജനം ചെയ്യാൻ സുപ്രീം കോടതി വിധി
  • പച്ചയുടെ ഹരിതാഭമായ നാല് വര്‍ഷങ്ങള്‍
  • എന്‍ഡോസള്‍ഫാന്‍ പീഡിതരുടെ അമ്മമാരെ മുഖ്യമന്ത്രി അവഗണിച്ചു
  • എന്‍ഡോസള്‍ഫാനു വേണ്ടി കേന്ദ്രം വീണ്ടും
  • തണ്ണീര്‍ത്തടം നികത്തൽ :‍ പ്രതിവര്‍ഷം 1.22 ലക്ഷം കോടി രൂപ നഷ്ടം
  • ദോ കെമിക്കൽസ് ദുഷ്പേരുണ്ടാക്കി : ലണ്ടൻ അസംബ്ലി

  • © e പത്രം 2010