ഇഡ്ഡലിയും തേങ്ങാ ചമ്മന്തിയും

November 9th, 2011

idli-chutney-epathram

അടുത്തിടെ ആണ് അറിഞ്ഞത് തമിഴ്നാട്ടില്‍ നടി ഖുശ്ബുവിന്റെ പേരില്‍ ഇഡ്ഡലി ഉണ്ടത്രേ.. ഖുശ്ബു ഇഡ്ഡലി. :-) ആരാണാവോ ഇങ്ങനെയൊരു ഇഡ്ഡലി കണ്ടുപിടിച്ച ആ വിരുതന്‍.. ഏതായാലും നല്ല വെളുത്ത് ഉരുണ്ടു പൂ പോലെ മൃദുലമായ ഇഡ്ഡലിക്ക് ഖുശ്ബുവിനെക്കാള്‍ നല്ല ഒരു പേര് കൊടുക്കാനില്ല. അല്ലേ?? ഇത് കേട്ട് എന്റെ ഇഡ്ഡലിയുടെ പടം കണ്ടു, ഇത് വായിക്കുന്ന ഖുശ്ബൂ ഫാന്‍സ്‌ രോഷാകുലരാകരുത്. ഇത് ഖുശ്ബു ഇഡ്ഡലി അല്ല. വെറും ഇഡ്ഡലി. :-) വേണമെങ്കില്‍ ഖുശ്ബുവിന്റെ ഡ്യുപ്പ് ഇഡ്ഡലി എന്ന് വിളിക്കാം .. ;-)

ആഴ്ചയില്‍ ഒരു ദിവസമെങ്കിലും ഞങ്ങള്‍ക്ക് ബ്രേക്ക്‌ഫാസ്റ്റ്‌ ഇഡ്ഡലി ആയിരിക്കും. നല്ല പതുപതുത്ത ഇഡ്ഡലി ചൂടു സാമ്പാറും ചട്ണിയും കൂട്ടി കഴിക്കുമ്പോള്‍ ഉള്ള സുഖം മറ്റെന്തു കഴിച്ചാലും കിട്ടില്ല. ഇഡ്ഡലി ഉണ്ടാക്കുന്നതിന്റെ പിറ്റേ ദിവസം ദോശ ആയിരിക്കും. ഇഡ്ഡലി മാവില്‍ എന്തൊക്കെയോ മോഡിഫിക്കേഷന്‍സ് വരുത്തിയാണ് ദോശ ആക്കുന്നത് എന്നാണ് ഞാന്‍ ചെറുപ്പത്തില്‍ വിചാരിച്ചിരുന്നത്. ഏതായാലും ഒരു ബ്രതര്‍ സിസ്റ്റര്‍ റിലേഷന്‍ഷിപ്‌ ഉണ്ട് ഇവര്‍ തമ്മില്‍. ഏതായാലും താഴെ പറയുന്ന റെസിപ്പി അനുസരിച്ച് ഇഡ്ഡലിയും ദോശയും ഉണ്ടാക്കാം. 2 ഇന്‍ 1.:-)

ഞാന്‍ ഒരു ഇഡ്ഡലി എക്സ്പേര്‍ട്ട് അല്ല. തനിയെ അരച്ച് ഉണ്ടാക്കുന്ന ഇഡ്ഡലി പോയിട്ട്, മാവ് മേടിച്ചു ഉണ്ടാക്കുന്ന ഇഡ്ഡലി പോലും കുളം ആക്കിയ ചരിത്രം എനിക്കുണ്ട്. :-( മമ്മിയാണ് ഇഡ്ഡലി – ദോശ ഒക്കെ അരച്ച് വയ്ക്കുന്നത്. നല്ല ഇഡ്ഡലി ഗാരന്ടീ ആണ്. :-) തേങ്ങാ ചമ്മന്തി എന്റെ വക. അതിനു വല്യ റിസ്ക്‌ ഇല്ലല്ലോ .. അപ്പൊ റെഡി ആയിക്കോളൂ. ഇഡ്ഡലി ഉണ്ടാക്കാം.

ചേരുവകള്‍

പച്ചരി – 1 ഗ്ലാസ്‌
പുഴുക്കലരി (ചോറ് വയ്ക്കുന്ന അരി) – 1 ഗ്ലാസ്‌
ഉഴുന്ന് – 3/4 ഗ്ലാസ്‌
ഉലുവ  – 1 ടേബിള്‍സ്പൂണ്‍
ചോറ് – 1 ഗ്ലാസ്‌

തയ്യാറാക്കുന്ന വിധം:

പച്ചരി, പുഴുക്കലരി, ഉഴുന്ന്, ഉലുവ എന്നിവ എട്ടു മണിക്കൂര്‍ എങ്കിലും വെള്ളത്തില്‍ വെവ്വേറെ കുതിര്‍ത്തു എടുക്കുക. അരികള്‍ നികക്കെ വെള്ളം ഒഴിച്ച് ഒരുമിച്ചു അരയ്ക്കുക. ഉഴുന്നും ഉലുവയും കൂടി ഒരുമിച്ചു വേറെ അരയ്‌ക്കുക. ചോറും വേറെയായി അരച്ച് വെയ്ക്കുക. എല്ലാം കൂടി യോജിപ്പിച്ചു ഉപ്പും ആവശ്യത്തിന് വെള്ളവും ചേര്‍ത്ത് ഇഡ്ഡലി മാവിന്റെ അയവില്‍ കലക്കി 8 മണിക്കൂര്‍ വയ്ക്കുക. ഇതില്‍ അല്പം കൂടി വെള്ളം ചേര്‍ത്ത് നീട്ടിയാല്‍ ദോശയ്ക്കുള്ള മാവായി. ഇഡ്ഡലി ഉണ്ടാക്കാന്‍ നേരം ഇഡ്ഡലി തട്ടില്‍ അല്‍പ്പം എണ്ണ തടവി, മാവ് കോരി ഒഴിച്ച് ആവിയില്‍ നന്നായി വേവിക്കുക. വെന്തു കഴിഞ്ഞ് ഇറക്കിവെച്ച് ഒരോന്നായി ഇളക്കിയെടുക്കുക.

തേങ്ങാ ചമ്മന്തി

ചേരുവകള്‍

തേങ്ങാ ചുരണ്ടിയത് – 1 കപ്പ്
പച്ചമുളക് – 1 വലുത്
ഇഞ്ചി – ചെറിയ ഒരു കഷണം
ചുവന്നുള്ളി – രണ്ട് എണ്ണം
വെളിച്ചെണ്ണ – രണ്ടു വലിയ സ്പൂണ്‍
കടുക് – ഒരു ചെറിയ സ്​പൂണ്‍
ചുവന്നുള്ളി അരിഞ്ഞത് – ഒരു ചെറിയ സ്പൂണ്‍
വറ്റല്‍ മുളക് – രണ്ട് എണ്ണം
കറിവേപ്പില – ഒരു തണ്ട്

തയ്യാറാക്കുന്ന വിധം:

പച്ചമുളക്, ഇഞ്ചി, ചുവന്നുള്ളി ഇവ മിക്സിയില്‍ നന്നായി അരയ്ക്കുക. അതിനു ശേഷം തേങ്ങാ ചുരണ്ടിയതും ചേര്‍ത്ത് അരച്ചെടുക്കുക. ചീനച്ചട്ടിയില്‍ വെളിച്ചെണ്ണ ഒഴിച്ച് ചൂടാകുമ്പോള്‍, കടുക് പൊട്ടിക്കുക. അതിനുശേഷം, ചുവന്നുള്ളി അരിഞ്ഞത്, വറ്റല്‍ മുളക്, കറിവേപ്പില ഇവ ഇട്ട് മൂപ്പിക്കുക. അരച്ച തേങ്ങാകൂട്ട് ഇതിലേക്ക് ചേര്‍ത്ത് പാകത്തിന് ഉപ്പും വെള്ളവും ചേര്‍ത്ത് ചൂടാകുമ്പോള്‍ വാങ്ങി വയ്ക്കുക.

- ലിജി അരുണ്‍

വായിക്കുക: ,

അഭിപ്രായം എഴുതുക »

സേമിയാ പായസം

November 1st, 2011

semiya payasam-epathram

ഇന്നലെ എന്റെ പിറന്നാള്‍ ആയിരുന്നു. എന്നോട് വൈകിട്ട് അടുക്കളയില്‍ കയറണ്ട, ഞാന്‍ നേരത്തേ വരും, ഡിന്നര്‍ ഉണ്ടാക്കി തരാം എന്നൊക്കെ പറഞ്ഞാണ് എന്റെ ഭര്‍ത്താവ് രാവിലെ ഓഫീസില്‍ പോയത്. അതോര്‍ത്തു രണ്ടു സുഹൃത്തുക്കളെയും ഞാന്‍ ഭക്ഷണത്തിന് വിളിച്ചു. വൈകുന്നേരം ആയപ്പോള്‍ പതിവ് പോലെ വിളിച്ചു പറയുന്നു, ”മോളെ, ഞാന്‍ ലേറ്റ് ആകും, ഡിന്നര്‍ പുറത്തു നിന്നും ആകാം.” :-( ഞാന്‍ ആണെങ്കില്‍ ഹോട്ടല്‍ ഭക്ഷണത്തോട് വല്യ താല്പര്യം ഇല്ലാത്ത ആളാണ്‌. ”വേണ്ട, വേണ്ട ഞാന്‍ ഉണ്ടാക്കികൊള്ളാം” എന്ന് പറഞ്ഞു ഞാന്‍ ഓഫീസില്‍ നിന്നും വീടെത്തി.

ലിഫ്റ്റില്‍ നിന്നും ഇറങ്ങിയപ്പോള്‍ തന്നെ നല്ല ബിരിയാണി മണം. ഹോ, നല്ല ചിക്കന്‍ ബിരിയാണി കഴിച്ചിട്ട് എത്ര ദിവസമായി. ഏതു ഫ്ലാറ്റില്‍ ആണോ ബിരിയാണി ഉണ്ടാക്കിയിരിക്കുന്നത്. ചെന്നിട്ട് ഞാനും ബിരിയാണി ഉണ്ടാക്കിയാലോ? വേണ്ടാ..ആകെ മടുത്താണ് ഓഫീസില്‍ നിന്നും വരുന്നത് . പോരാത്തതിന് ആറു കഴിഞ്ഞു സമയം. ഇനി ബിരിയാണിയും മറ്റും ഉണ്ടാക്കി വരുമ്പോള്‍ പാതിരാത്രി ആവും.. മാത്രവുമല്ല എന്റെ ഹയ  മോള്‍ ഞാന്‍ വരാന്‍ കാത്തിരിക്കുകയാണ്. മമ്മ വന്നുകഴിഞ്ഞാല്‍ ഉടനെ തന്നെ അടുക്കളയില്‍ കയറുന്നത് അവള്‍ക്കു സഹിക്കില്ല. അപ്പൊ ബിരിയാണി മോഹത്തിനെ മുളയിലെ നുള്ളി കളഞ്ഞു. എന്തെങ്കിലും തട്ടിക്കൂട്ട് പരിപാടി നടത്താം.. അതേ രക്ഷയുള്ളൂ. അങ്ങനെ ആലോചിച്ചു നടന്നു ചെന്ന് വാതില്‍ തുറന്നപ്പോള്‍, അതാ ബിരിയാണി മണം എന്റെ അടുക്കളയില്‍ നിന്നും തന്നെയാ. :-) എന്റെ കുഞ്ഞിപ്പെണ്ണിന്റെ കയ്യില്‍ ഒരു കൊച്ചു പാത്രത്തില്‍ പായസവും.. :-) മമ്മി (അമ്മായിയമ്മ )എനിക്ക് വേണ്ടി തലശ്ശേരി ബിരിയാണിയും സേമിയാപായസവും വെച്ചിരിക്കുന്നു. :-) എന്തൊരു സന്തോഷം. ഈ അടുത്ത കാലത്തെങ്ങും ഇത്രെയും ഞാന്‍ സന്തോഷിച്ചിട്ടില്ല..:-) മമ്മിയ്ക്ക് നന്ദി പറഞ്ഞു, പായസം കുടിച്ചപ്പോള്‍ എന്തൊരു സുഖം. പായസത്തിനു നല്ല സ്വാദ്. പിറന്നാളിനു മധുരം കൂടിയ പോലെ :-)ഏതായാലും പായസത്തിന്റെ ചിത്രവും മമ്മിയുടെ അടുത്ത് നിന്നും റെസിപ്പിയും എടുത്തു. ഇത് മമ്മിക്ക് ‘ഡെഡിക്കേറ്റ് ‘ ചെയ്തിരിക്കുന്നു. :-) തലശ്ശേരി ബിരിയാണി റെസിപ്പി ഞാന്‍ നേരത്തെ പോസ്റ്റ്‌ ചെയ്തിട്ടുണ്ട്.

സേമിയാ പായസം എന്ന് പറയുമ്പോള്‍, മടിയന്മാരുടെ പായസം എന്നാണ് എന്റെ ചാച്ചന്‍ കളിയാക്കുക. കാരണം പായസം ഉണ്ടാക്കുകയും വേണം എന്നാല്‍ അധികം കഷ്ട്ടപെടാന്‍ പറ്റുകയും ഇല്ല എന്നുള്ളവരുടെ പായസമാണത്രേ സേമിയ പായസം. വീട്ടില്‍ എപ്പോഴും ചെറുപയര്‍ പരിപ്പ് പായസം ആയിരുന്നു സ്റ്റാര്‍. സേമിയാ പായസം വല്ലപ്പോഴുമേ ഉണ്ടാക്കൂ. എന്നാല്‍ എനിക്ക് ഇഷ്ടപ്പെട്ട പായസങ്ങളില്‍ ഒന്നാണ് ഇത്. എളുപ്പമാണ് ഉണ്ടാക്കാന്‍ എന്ന പ്രാധാന കാരണം കൊണ്ട് തന്നെ. ഉണ്ടാക്കി നോക്കുമ്പോള്‍ മനസിലാകും. ട്രൈ ചെയ്യാം??? :-)

ചേരുവകള്‍

സേമിയ – നൂറു ഗ്രാം
പാല്‍ – അര ലിറ്റര്‍
വെള്ളം – അര കപ്പ്
പഞ്ചസാര – 4 ടേബിള്‍സ്പൂണ്‍ (മില്‍ക്ക് മെയ്ഡ് ഉണ്ടെങ്കില്‍ ഇത്രയും പഞ്ചസാര ചേര്‍ക്കണ്ടതില്ല)
നെയ്യ്‌ – രണ്ടു ടേബിള്‍സ്പൂണ്‍
കശു വണ്ടി – രണ്ടു ടേബിള്‍സ്പൂണ്‍
കിസ് മിസ്‌ – രണ്ടു ടേബിള്‍സ്പൂണ്‍
ഏലയ്ക്ക പൊടിച്ചത് – മൂന്നെണ്ണം

തയാറാക്കുന്ന വിധം

നെയ്യ്‌ ചൂടാക്കി കശുവണ്ടിയും കിസ്സ്‌ മിസ്സും വറുത്തു എടുക്കുക. സേമിയ ഇതേ നെയ്യില്‍ ചെറുതായി വറുത്തെടുക്കുക. അടിയില്‍ പിടിച്ചു കരിയാതിരിക്കാന്‍ പ്രത്യേകം ശ്രദ്ധിക്കുക. ഇതിലേക്ക് വെള്ളം തിളപ്പിച്ച്‌ ഒഴിക്കുക. സെമിയ പകുതി വേവാകുമ്പോള്‍ പാല്‍ ചേര്‍ക്കുക. ഇതിലേക്ക് ആവശ്യത്തിനു പഞ്ചസാരയും ഏലയ്ക്ക പൊടിച്ചതും ചേര്‍ത്ത്‌ ഇളക്കുക. മില്‍ക്ക് മെയ്ഡ് ഉപയോഗിക്കുകയാണെങ്കില്‍ ഈ സമയത്ത് അതും ചേര്‍ക്കാം. പാല്‍ തിളക്കുമ്പോള്‍ തീ കുറച്ചു വയ്ക്കുക. കുറുകി വരുമ്പോള്‍ തീ അണയ്ക്കുക. തണുക്കുമ്പോള്‍ പായസം അല്പം കൂടി കുറുകിയിരിക്കും. അത് കണക്കാക്കി വേണം അടുപ്പില്‍ നിന്നും വാങ്ങാന്‍. വാങ്ങിയ ശേഷം കിസ്മിസും കശുവണ്ടിയും ചേര്‍ത്ത്‌ ഇളക്കിയ ശേഷം ചെറു ചൂടോടെ വിളമ്പാം.

- ലിജി അരുണ്‍

വായിക്കുക: , , ,

1 അഭിപ്രായം »

കടലക്കറി

November 1st, 2011

kadala curry-epathram

പുട്ടും കടലക്കറിയുമാണ് സാധാരണ ‘കോമ്പിനേഷന്‍’. ഇന്ന് ഞങ്ങള്‍ക്ക് അപ്പവും കടല കറിയും ആയിരുന്നു. പല തരത്തില്‍ കടല കറി വെയ്ക്കാം. തെങ്ങ അരച്ചും, തക്കാളി ചേര്‍ത്തും ഒക്കെ .. ഇതാ മറ്റൊരു കടലക്കറി റെസിപി മമ്മിയുടെ വക. :-)

ചേരുവകള്‍

കടല – ഒരു കപ്പ്‌  കുറഞ്ഞത് 8 മണിക്കൂര്‍ വെള്ളത്തില്‍ കുതിര്‍ത്തതു
സവാള  – ഒരു വലുത് കനം കുറച്ച് അരിഞ്ഞത്
വെളുത്തുള്ളി – 6 അല്ലി (ചതച്ചത് )
ഇഞ്ചി – ഒരിഞ്ചു കഷ്ണം  (ചതച്ചത് )
മുളകുപൊടി – അര റ്റീസ്പൂണ്‍
മല്ലിപൊടി – അര റ്റീസ്പൂണ്‍
മഞ്ഞള്‍പ്പൊടി – അര റ്റിസ്പൂണ്‍
ഗരംമസാലപ്പൊടി – അര റ്റിസ്പൂണ്‍
പച്ചമുളക് – 2 എണ്ണം
വറ്റല്‍മുളക് – 2 എണ്ണം
കടുക് – ആവശ്യത്തിന്
എണ്ണ – ആവശ്യത്തിനു
കറിവേപ്പില – 2 തണ്ട്

തയ്യാറാക്കുന്ന വിധം

കുക്കറില്‍  കഴുകി വൃത്തിയാക്കി വെച്ചിരിക്കുന്ന കടലയും ആ‍വശ്യത്തിന് വെള്ളവും മഞ്ഞള്‍പ്പൊടിയും ചേര്‍ത്ത് 15 മിനിട്ട് വേവിക്കുക. ഒരു ചീനച്ചട്ടി ചൂടാക്കി  ആവശ്യത്തിനു എണ്ണ ഒഴിക്കുക. ഇതിലേക്ക് സവാളയും ഇഞ്ചിയും വെളുത്തുള്ളിയും ചേര്‍ത്ത് വഴറ്റുക. ബ്രൌണ്‍ നിറം ആകുമ്പോള്‍ മുളകുപൊടി, മല്ലിപൊടി, ഗരംമസാലപ്പൊടി എന്നിവ ചേര്‍ത്ത് പൊടികള്‍ മൂക്കുന്നത് വരെ വഴറ്റുക. തീ ഓഫ്‌ ചെയ്യുക. ഇത് തണുത്തു കഴിയുമ്പോള്‍ മിക്സിയില്‍ നന്നായി അരക്കുക. വേവിച്ചു വച്ചിരുക്കുന്ന കടല ഒരു ടേബിള്‍സ്പൂണ്‍ ഇതിലേക്ക് ചേര്‍ത്ത് ഒന്ന് കൂടി അരക്കുക.

പാനില്‍ ഒരു ടേബിള്‍സ്പൂണ്‍ എണ്ണ ചൂടാക്കി കടുക് പൊട്ടിക്കുക. ഇതിലേക്ക് 2 വറ്റല്‍മുളക്, പച്ചമുളക്‌, കറിവേപ്പില എന്നിവ ചേര്‍ത്ത് വഴറ്റുക. വേവിച്ചു വച്ചിരിക്കുന്ന കടലയും അരച്ചു വച്ച മസാലയും ഇതിലേക്ക് ചേര്‍ത്ത് നന്നായി ഇളക്കുക. ആവശ്യത്തിന് വെള്ളം ഒഴിച്ച് 2-3 മിനുറ്റ് തിളപ്പിക്കുക. കടലക്കറി റെഡി.

- ലിജി അരുണ്‍

വായിക്കുക: , ,

അഭിപ്രായം എഴുതുക »

പാലപ്പം

November 1st, 2011

palappam-epathram

കേരളീയരുടെ സ്വന്തം വിഭവമെന്നു അഭിമാനിക്കാവുന്ന ഒന്നാണ് പാലപ്പം. ഒരു ക്രിസ്ത്യന്‍ വിഭവമാണ് എന്ന് പറയാം. പാലപ്പവും മട്ടണ്‍ സ്ട്യുവും ക്രിസ്ത്യന്‍ കല്യാണ വിരുന്നുകളുടെ ഒരു അഭിഭാജ്യ ഘടകമാണ്. ഇനി മട്ടണ്‍ സ്ട്യു ഇല്ലെങ്കിലും മുട്ട കറി, കടലക്കറി, പീസ്‌ കറി ഇവയൊക്കെ ഉണ്ടെങ്കില്‍ നമ്മുക്ക് വീട്ടില്‍ ബ്രേക്ക്‌ഫാസ്റ്റ്‌ നു പറ്റിയ ഒരു ഐറ്റം ആണ് ഇത്.

നോക്കുമ്പോള്‍ വളരെ എളുപ്പമാണ് പാലപ്പം ഉണ്ടാക്കാന്‍. വളരെ കുറച്ചു ചേരുവകളെ ഒള്ളു. എന്നാല്‍ ഒരു ‘പെര്‍ഫെക്റ്റ്‌ ‘ പാലപ്പം ഉണ്ടാക്കാന്‍ എനിക്ക് ഇത് വരെ സാധിച്ചിട്ടില്ല. :-( എന്റെ അമ്മായിയമ്മയുടെ പാലപ്പ റെസിപ്പി ആണിത്. വളരെ സ്വാദിഷ്ടമായ പാലപ്പം ആണ് മമ്മി ഉണ്ടാക്കുന്നത്‌. മമ്മി ഉണ്ടാക്കുന്ന പാലപ്പം മൂക്കുമുട്ടെ കഴിക്കുക എന്നല്ലാതെ പാലപ്പം ഉണ്ടാക്കുന്ന കാര്യം ഓര്‍ത്താല്‍ ഞാന്‍ വിറയ്ക്കും. കാരണം എന്റെ ചില മുന്‍കാല പാചക അനുഭവങ്ങള്‍ ഓര്‍ക്കുമ്പോള്‍ പാലപ്പം എനിക്ക് അത്ര നല്ല ഓര്‍മ്മകള്‍ അല്ല തന്നിരിക്കുന്നത്. എന്നാല്‍ മമ്മി വന്നപ്പോള്‍ കഥ ആകെ മാറി. ഒരു എളുപ്പ റെസിപി കിട്ടി. ഇനി എനിക്കും ഈ റെസിപ്പി അനുസരിച്ച് അപ്പം ഉണ്ടാക്കി പഠിക്കണം. :-) ഒരുമിച്ചു തുടങ്ങാം നമ്മുക്ക് .. ഒന്ന് പരീക്ഷിക്കാം.

ചേരുവകള്‍

പച്ചരി- രണ്ടു കപ്പ്‌
യീസ്റ്റ്- കാല്‍ ടീസ്പൂണ്‍
പഞ്ചസാര- നാല് ടീസ്പൂണ്‍
ചോര്‍ – 5 ടേബിള്‍സ്പൂണ്‍
തേങ്ങ ചുരണ്ടിയത്- 4 ടേബിള്‍സ്പൂണ്‍
ഉപ്പ് – പാകത്തിന്

തയാറാക്കുന്ന വിധം

പച്ചരി കഴുകി 6 മണിക്കൂര്‍ എങ്കിലും വെള്ളത്തിലിട്ടു നന്നായി കുതിര്‍ക്കുക.
അരി പാകത്തിന് വെള്ളം ഒഴിച്ച് അരച്ചെടുക്കുക.(മിക്സിയില്‍ അരിക്ക് ഒപ്പത്തിനു വെള്ളം നില്‍ക്കണം) .അരി അരച്ചെടുത്ത് മാറ്റി വയ്ക്കുക. വെണ്ണ പോലെ അരയണം. തരിതരിപ്പ്‌ ഉണ്ടാവരുത്. തേങ്ങ അര ഗ്ലാസ്‌ വെള്ളം ചേര്‍ത്ത് അരക്കുക. ഇതിലേക്ക് ചോറും യീസ്റ്റും ചേര്‍ത്ത് വീണ്ടും അരച്ചെടുക്കുക. ഇത് പച്ചരി അരച്ചതിന്റെ കൂടെ ചേര്‍ത്ത് ഇളക്കി പാകത്തിന് ഉപ്പും പഞ്ചസാരയും ചേര്‍ത്ത് പുളിക്കാന്‍ വയ്ക്കുക. രാത്രിയില്‍ അരച്ചാല്‍ രാവിലെ ബ്രേക്ക്ഫാസ്റ്റിനു സമയം ആകുമ്പോള്‍ പുളിച്ചു കിട്ടും. ഏകദേശം 8-10 മണിക്കൂര്‍ എന്ന് കണക്കാക്കാം.

അപ്പം ചുടുന്നതിനു മുന്‍പ്‌ മാവ് ഒന്ന് ഇളക്കുക. അപ്പച്ചട്ടി ചൂടാകുമ്പോള്‍ ഒരു വലിയ സ്പൂണ്‍ മാവ് ഒഴിച്ച് ഒന്നു ചുറ്റിച്ചു മൂടി വെക്കുക. അപ്പത്തിന്റെ അരികു വശം മൂത്ത് നടുവ് വെന്തു വരുമ്പോള്‍ ചട്ടിയില്‍ നിന്നും എടുക്കുക. ഇനി അപ്പച്ചട്ടി ഇല്ലെങ്കില്‍ മാവ് ദോശക്കല്ലില്‍ പരത്തി ഒഴിച്ച് മൂടി വച്ച് വേവിച്ചു ദാ താഴെ കാണുന്ന പോലെ അപ്പം ഉണ്ടാക്കാം.

appam-epathram

മേല്‍പ്പറഞ്ഞ അളവ് അനുസരിച്ച് ഏകദേശം 20 അപ്പം ഉണ്ടാക്കാം.

കടപ്പാട് : ആനിസ്‌ തോമസ്‌

- ലിജി അരുണ്‍

വായിക്കുക: ,

അഭിപ്രായം എഴുതുക »


« കുമ്പളങ്ങാ മോര് കറി
കടലക്കറി »



പ്രഷര്‍കുക്കര്‍ ബിരിയാണി...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine