ഈന്തപ്പഴം പായസം

September 11th, 2012

dates payasam-epathram

ഇന്നലെ ഞങ്ങളുടെ അടുത്ത ഫ്ലാറ്റിലെ സാബിറ ആന്റി ഒരു പെട്ടി ഈന്തപ്പഴം കൊണ്ടുവന്നു തന്നു. ഞാനും ഹയകുട്ടിയും കൂടി കയറി ഇറങ്ങി തിന്ന് അത് പകുതിയാക്കി. ഇന്ന് രാവിലെ മുതല്‍ അല്‍പ്പം പായസം കുടിക്കാന്‍ ഒരു മോഹം. ആപ്പ ഊപ്പ പായസം ഒന്നുമല്ല.. ചെറുപയര്‍ പരിപ്പ് പായസം. :-) വൈകുന്നേരം ഉണ്ടാക്കാം എന്ന് വച്ചു. ഉച്ചമയക്കം ഒക്കെ കഴിഞ്ഞ്‌ എണീറ്റ്‌ വന്നപ്പോള്‍ ഭയങ്കര മടി. എന്നാല്‍ പായസം കഴിക്കാനുള്ള കൊതിയ്ക്ക് ഒരു കുറവുമില്ല. അപ്പോഴതാ നമ്മുടെ ഈന്തപ്പഴം ബാക്കി ഇരിക്കുന്നു. മോനെ… മനസ്സില്‍ ലഡ്ഡു പൊട്ടി. :-) ഇന്നത്തെ പായസത്തിലെ ഹീറോ ഇവന്‍ തന്നെ. ഈന്തപ്പഴം പായസം :-) ഇതിനു മുന്‍പ്‌ ഉണ്ടാക്കിയിട്ടില്ല. എങ്കിലും ഏകദേശം ഒരു ഐഡിയ വച്ചു അങ്ങ് ഉണ്ടാക്കി.. വളരെ എളുപ്പത്തില്‍ നല്ല സ്വാദുള്ള പായസം റെഡി.. :-)

ചേരുവകള്‍
ഈന്തപ്പഴം – 20 എണ്ണം
പാല്‍ – അര ലിറ്റര്‍
പഞ്ചസാര – 4 ടേബിള്‍സ്പൂണ്‍
റവ – ഒരു ടേബിള്‍സ്പൂണ്‍
ഏലയ്ക്കാ പൊടിച്ചത് – ഒരു ടീസ്പൂണ്‍
വെള്ളം – ഒരു ഗ്ലാസ്‌
കശുവണ്ടി – ഒരു ടേബിള്‍സ്പൂണ്‍
കിസ്മിസ്‌ – ഒരു ടേബിള്‍സ്പൂണ്‍
നെയ്യ് – രണ്ടു ടേബിള്‍സ്പൂണ്‍
തയ്യാറാക്കുന്ന വിധം
ഈന്തപ്പഴം കുരു കളഞ്ഞ് ചെറിയ കഷണങ്ങള്‍ ആയി നുറുക്കുക. ഒരു ഗ്ലാസ്‌ വെള്ളം തിളപ്പിച്ചത് ഇതിലേക്ക് ഒഴിക്കുക. ഇത് അടുപ്പില്‍ വച്ചു നന്നായി അലിയിപ്പിക്കുക. നല്ല കുറുകിവരുമ്പോള്‍ തീ കുറയ്ക്കുക. പാല്‍ ചേര്‍ത്ത് നന്നായി ഇളക്കുക. തിള വരുമ്പോള്‍ പഞ്ചസാരയും റവയും ചേര്‍ക്കുക. കുറുകുന്നത് വരെ ഇളക്കി കൊടുക്കുക. മധുരം ആവശ്യാനുസരണം കൂട്ടാം. വാങ്ങുന്നതിന് മുന്‍പ് ഏലയ്ക്കാപ്പൊടി ചേര്‍ത്ത് ഇളക്കുക. കശുവണ്ടിയും കിസ്മിസും നെയ്യില്‍ വറുത്ത് ചേര്‍ക്കുക. പായസം തയ്യാര്‍…

- ലിജി അരുണ്‍

വായിക്കുക:

2 അഭിപ്രായങ്ങള്‍ »

മസാല ദോശയ്ക്ക് ആഗോള അംഗീകാരം

July 13th, 2012

masaladosa-epathram

ന്യൂയോർക്ക് : മരിക്കുന്നതിന് മുൻപ് ഒരിക്കലെങ്കിലും സ്വാദ് അറിഞ്ഞിരിക്കേണ്ട പത്ത് വിഭവങ്ങളുടെ പട്ടികയിൽ ദക്ഷിണേന്ത്യൻ വിഭവമായ മസാല ദോശയും ഇടം പിടിച്ചു. ഹഫിംഗ്ടൺ പോസ്റ്റിന്റെ യാത്രാ ബ്ലോഗിലാണ് ഈ പട്ടിക പ്രസിദ്ധീകരിച്ചത്. പട്ടികയിൽ നാലാം സ്ഥാനമാണ് മസാല ദോശയ്ക്ക്. ഒരു മാംസഭുക്ക് ഹോട്ടലിൽ കയറി ഒരു സസ്യാഹാരം ആവശ്യപ്പെടുകയാണെങ്കിൽ അത് മിക്കവാറും മസാല ദോശയായിരിക്കും എന്നാണ് മസാല ദോശയെ പറ്റി ഈ പട്ടികയിൽ വിവരിക്കുന്നത്. ചൈനയിൽ നിന്നുമുള്ള പൊരിച്ച താറാവ് വിഭവമായ പെക്കിങ്ങ് ഡക്ക്, ഒച്ചിനെ പാകം ചെയ്ത് ഉണ്ടാക്കുന്ന ഫ്രെഞ്ച് വിഭവമായ എസ്കർഗോ, മാംസവും വഴുതനങ്ങയും പാളികളായി ചീസും മറ്റ് മസാലകളുമിട്ട് നിർമ്മിക്കുന്ന ഗ്രീക്ക് വിഭവമായ മൂസാക്ക, സുക്കിനി പൂക്കൾ വറുത്തെടുത്ത ഇറ്റാലിയൻ വിഭവം, ചുട്ട മാംസം കൊണ്ടുണ്ടാക്കുന്ന ജപ്പാൻകാരുടെ ടെപ്പന്യാകി, മലേഷ്യാക്കാരുടെ സീഫുഡ് വിഭവമായ ലക്സ കറി, പച്ച പപ്പായ കൊണ്ട് തായ്ലൻഡുകാർ തയ്യാറാക്കുന്ന സോം താം, ഓസ്ട്രേലിയാക്കാരും ന്യൂസീലാൻഡുകാരും തങ്ങളുടേതാണെന്ന് അവകാശപ്പെടുന്ന മധുരമൂറുന്ന പാവ്ലോവ, പോർക്കിന്റെ വാരിയെല്ലുകൾ കനലിൽ ചുട്ട് തയ്യാറാക്കുന്ന അമേരിക്കക്കാരുടെ ബാർബെക്യു റിബ്സ് എന്നിവയാണ് പട്ടികയിൽ സ്ഥാനം പിടിച്ച മറ്റു വിഭവങ്ങൾ.

- ജെ.എസ്.

വായിക്കുക: , , , ,

അഭിപ്രായം എഴുതുക »

കൂണ്‍ തോരന്‍

June 29th, 2012

koon3-epathram

കൂണ്‍ എന്ന് പറയുമ്പോള്‍ നിങ്ങള്‍ക്കൊക്കെ മനസ്സില്‍ വരിക സൂപ്പര്‍മാര്‍കെറ്റിലെ തണുത്ത സെക്ഷനില്‍ മുഷിഞ്ഞു വിറങ്ങലിച്ചു ഇരിക്കുന്ന ബട്ടണ്‍ മഷ്റൂം അല്ലേ?? എന്റെ ഈ കൂണ്‍ തോരന്‍ ആ ബട്ടണ്‍ മഷ്റൂം കൊണ്ടല്ല ഉണ്ടാക്കിയിരിക്കുന്നത്.. ഇത് എന്റെ നാട്ടില്‍ മഴക്കാലത്ത് ഉണ്ടാവുന്ന അരിക്കൂണ്‍ കൊണ്ടാണ്‌ ഉണ്ടാക്കിയിരിക്കുന്നത്. ജൂണ്‍-ജൂലൈ മാസങ്ങളിലാണ് ഈ കൂണ്‍ ഉണ്ടാവുക. പറമ്പില്‍ പലയിടങ്ങളിലായി ചെറുതും വലുതുമായ പുറ്റുകളില്‍ ഇവ പൊടി പൊടിയായി മൊട്ടിടുന്നു. ഒരു ദിവസം കൊണ്ട് മൂപ്പെത്തുകയും ചെയ്യും. അപ്പോള്‍ തന്നെ ഇത് പറിക്കണം. അല്ലെങ്കില്‍ അടുത്ത മഴയില്‍ ഇവയുടെ ആയുസ്സ്‌ തീരും. ഇനി പറിക്കുന്ന കാര്യം പറഞ്ഞാലോ.. അതൊരു വല്ലാത്ത പണി തന്നെയാണ്.

koon2-epathram

എന്റെ ചാച്ചനു കൂണ്‍ ഉണ്ടായിട്ടുണ്ടെങ്കില്‍ മണത്ത് അറിയാം എന്നാണ് പറയുന്നത്. :-) അത് കൊണ്ട് കക്ഷി മഴക്കാലത്തും പറമ്പിലൂടെയെല്ലാം റൌണ്ട്സ് അടിക്കാറുണ്ട്. വിവിധ തരം ഭക്ഷ്യയോഗ്യമായ കൂണുകള്‍ കിട്ടുകയും ചെയ്യും. അരിക്കൂണ്‍ കിട്ടിയാല്‍ ഞങ്ങള്‍ക്ക്‌ എല്ലാവര്ക്കും നല്ല പണിയാണ്. ഇത്ര ചെറിയ കൂണ്‍ പുറ്റില്‍ നിന്നും അടര്‍ത്തി, മണ്ണില്ലാതെ വൃത്തിയാക്കി എടുക്കണമെങ്കില്‍ കുറച്ചൊന്നുമല്ല മെനക്കെടേണ്ടത്.. എന്തായാലും ഒത്തു പിടിച്ചാല്‍ മലയും പോരും എന്ന് പറഞ്ഞപോലെ ഞങ്ങള്‍ കുട്ടികള്‍ എല്ലാവരും കൂടെ ചാച്ചന്റെ നേതൃത്വത്തില്‍ കൂണ്‍ പറിക്കല്‍ വിജയകരമായി പൂര്‍ത്തിയാക്കിയിരുന്നു. എത്ര പണിതാല്‍ എന്താ, ഇത്രയും രുചിയുള്ള മറ്റൊരു തോരന്‍ ഉണ്ടാവില്ല. അത്രയ്ക്ക് സ്വാദാണ്.. അരിക്കൂണിനു.. ഇനി തോരന്‍ മാത്രമല്ല, കൂണ്‍ മസാല, കട്ട്ലെറ്റ്‌ എന്നിവയൊക്കെ മമ്മി ഇത് കൊണ്ട് ട്രൈ ചെയ്തിട്ടുണ്ട്. എല്ലാം ഒന്നിനൊന്നു മെച്ചം..

koon1-epathram

ഏതായാലും നിങ്ങളുടെ ഒക്കെ വീട്ടില്‍ അരിക്കൂണ്‍ കിട്ടുമെന്നും, ഇനി കിട്ടിയാല്‍ തന്നെ അത് പറിക്കാന്‍ മെനക്കെടുമെന്നും, ഈ തോരന്‍ വെയ്ക്കുമെന്നും ഒന്നും ഉള്ള പ്രതീക്ഷയില്‍ അല്ല ഞാന്‍ ഈ റെസിപ്പി ഇടുന്നത്. നമ്മുടെ തൊടിയിലും പറമ്പിലും ഒക്കെ വളര്‍ന്നിരുന്ന ഒരുപാട് സംഗതികള്‍ കൊണ്ട് പോഷക സമൃദ്ധവും, വിഷമില്ലാത്തതും, രുചികരവും, ‘പോക്കറ്റ്‌ ഫ്രെണ്ട്ലി’യുമായ ആഹാരം തയ്യാറാക്കിയിരുന്ന ഒരു പൂര്‍വ്വകാലം നമുക്കുണ്ട്. അതിലേക്കു ചെറിയ ഒരു ഓര്‍മ്മപ്പെടുത്തല്‍. നമ്മുടെ പറമ്പുകളില്‍  രാസവളം, കീടനാശിനി എന്നിവ ഉപയോഗിക്കുന്നതും, കാലാവസ്ഥാവ്യതിയാനവും ഒക്കെ സ്വാഭാവികമായി കൂണ്‍ ഉണ്ടാവുന്നതിനെ തടസ്സപ്പെടുത്തുന്നു. എങ്കിലും ഇവയൊക്കെ ഒരു പരിധി വരെ എന്റെ നാടിനെയും വീടിനെയും ബാധിച്ചിട്ടില്ല എന്ന് പറയുമ്പോള്‍ എനിക്ക് അഭിമാനം തോന്നാറുണ്ട്. ഇവിടുത്തെ മണ്ണിനും വെള്ളത്തിനും അന്നും ഇന്നും ഒരേ ഗന്ധവും സ്വാദുമാണ്. ഇവയൊന്നും കൈമോശം വരാതിരിക്കട്ടെ…

koon4-epathram

അയ്യോ.. പറഞ്ഞു കാട് കയറി അല്ലെ? :-) നമ്മുക്ക് റെസിപ്പി നോക്കിയാലോ?? എന്റെ മമ്മിയുടെ സ്വന്തം റെസിപ്പി ആണിത്. ഇനി ഈ കൂണ്‍ ഇല്ലെങ്കിലും ഏതു കൂണ്‍ വച്ചും ഇത് ട്രൈ ചെയ്യാം കേട്ടോ…

ചേരുവകള്‍

കൂണ്‍  – അര കിലോ
തേങ്ങാ – ഒരു മുറി
മഞ്ഞള്‍പ്പൊടി – അര ടീസ്പൂണ്‍
കാന്താരി മുളക് – 12 എണ്ണം അല്ലെങ്കില്‍ പച്ചമുളക് 4-5 എണ്ണം
ചെറിയ ഉള്ളി – 6 എണ്ണം
വെളുത്തുള്ളി – 3 അല്ലി
കറിവേപ്പില – 2 തണ്ട്
ഉപ്പ് – ആവശ്യത്തിന്

തയ്യാറാക്കുന്ന വിധം

കൂണ്‍ മണ്ണ് കളഞ്ഞു നന്നായി കഴുകി പിഴിഞ്ഞ് എടുക്കുക. ഇതിലേക്ക് മഞ്ഞള്‍പ്പൊടി, ഉപ്പ്, കറിവേപ്പില എന്നിവ ചേര്‍ത്ത് ഇളക്കി ഒരു ചട്ടിയില്‍ ചെറുതീയില്‍ വേവിക്കുക. വെള്ളം ചേര്‍ക്കരുത്. തേങ്ങാ, കാന്താരി മുളക്, ചെറിയ ഉള്ളി, വെളുത്തുള്ളി എന്നിവ ഒതുക്കി എടുക്കുക. ഇത് വെന്ത കൂണിലേക്ക് ചേര്‍ത്ത് ഇളക്കി വെള്ളം വറ്റുന്നത് വരെ ചെറുതീയില്‍ വേവിച്ച്‌ എടുക്കുക. വെള്ളം വറ്റി കഴിയുമ്പോള്‍ വാങ്ങുക. കൂണ്‍ തോരന്‍ തയ്യാര്‍.

- ലിജി അരുണ്‍

വായിക്കുക: , , ,

Comments Off on കൂണ്‍ തോരന്‍

ഓലന്‍

June 5th, 2012

olan-epathram

പണ്ടേ എനിക്ക് മടിയുള്ള ഒരു പണിയാണ് തേങ്ങാ പാല്‍ പിഴിയുക. വലിയ ബുദ്ധിമുട്ടുള്ള കാര്യം ഒന്നും അല്ല. എന്നാലും ഒരു മടി. എന്നാല്‍ തേങ്ങാ പാല്‍ ചേര്‍ത്ത നാടന്‍ കറികള്‍ വലിയ ഇഷ്ട്ടമാണ് താനും. അതില്‍ പ്രധാനപ്പെട്ട ഒന്നാണ് ഓലന്‍. വീട്ടില്‍ സാധാരണ ഓണസദ്യയ്ക്ക് മാത്രമേ ഓലന്‍ ഉണ്ടാക്കാറുള്ളൂ.. അന്നാണെങ്കിലോ ഒരുപാട് കറികള്‍ ഉള്ളത് കാരണം ഓലനെ ആസ്വദിച്ചു കഴിക്കാനും പറ്റാറില്ല. കുറച്ചു ദിവസമായി നല്ല കുത്തരി ചോറും ഓലനും പപ്പടവും കഴിക്കാന്‍ വല്ലാത്ത മോഹം. ആഡംബരമായി തേങ്ങാ പാല്‍ ഒന്നും പിഴിയാന്‍ എനിക്ക് വയ്യ. ഏതായാലും ഞാന്‍ ഒരു പരീക്ഷണം നടത്താന്‍ തീരുമാനിച്ചു. കൊക്കനട്ട് മില്‍ക്ക് പൌഡര്‍ ഉണ്ടല്ലോ.. :-) അവനെ വച്ച് ഒരു ഒപ്പിക്കല്സ് നടത്താം. ഏതായാലും മോശം ആയില്ല. നല്ല കട്ടിക്ക് തേങ്ങാ പാല്‍ ഉണ്ടാക്കി ചേര്‍ത്തു. വെളിച്ചെണ്ണയും കറിവേപ്പിലയും ചേര്‍ത്തപ്പോള്‍ എന്താ ഒരു സുഗന്ധം!!! അപ്പൊ ശരി വേഗം തയ്യാറായിക്കോ, ഇന്ന് ഉച്ചയ്ക്ക് ഓലന്‍ ആവട്ടെ കറി.

ചേരുവകള്‍

വന്‍പയര്‍ – അര കപ്പ്‌
വെള്ളം – അര കപ്പ്‌
കുമ്പളങ്ങ കഷണങ്ങളാക്കിയത്‌ – ഒരു കപ്പ്‌
പച്ചമുളക്‌ കുറുകെ പിളര്‍ന്നത്‌ – 3 എണ്ണം
ചെറിയ ഉള്ളി നീളത്തില്‍ അരിഞ്ഞത് – 3-4 എണ്ണം
ഉപ്പ്‌ – പാകത്തിന്‌
തേങ്ങാപ്പാല്‍ – ഒരു കപ്പ്‌ (കൊക്കനട്ട് മില്‍ക്ക് പൌഡര്‍ ആണ് എങ്കില്‍ ഒരു കപ്പു ചൂട് വെള്ളത്തില്‍ 2 ടേബിള്‍സ്പൂണ്‍ പൌഡര്‍ ചേര്‍ത്ത് ഇളക്കുക.)
കറിവേപ്പില – 2 തണ്ട്
വെളിച്ചെണ്ണ – 11/2 ടേബിള്‍ സ്പൂണ്‍

പാകം ചെയ്യേണ്ട വിധം

വന്‍പയര്‍ ആറു മണിക്കൂര്‍ എങ്കിലും വെള്ളത്തില്‍ കുതിര്‍ത്ത്‌ എടുക്കുക. ഇത് നികക്കെ വെള്ളം ഒഴിച്ച് ഉപ്പും ചേര്‍ത്ത് കുക്കറില്‍ 5 മിനിറ്റ് വേവിക്കുക. ആവി പോയി കഴിയുമ്പോള്‍ തുറന്നു ഇതിലേക്ക് കുമ്പളങ്ങ, പച്ചമുളക്‌, ചെറിയ ഉള്ളി, അര കപ്പ്‌ വെള്ളം ആവശ്യമെങ്കില്‍ ഉപ്പ് എന്നിവ ചേര്‍ത്ത്‌ 2 വിസില്‍ വരുന്നത് വരെ വേവിക്കുക. ആവി പോയി കഴിയുമ്പോള്‍ വീണ്ടും തുറന്നു തേങ്ങാപ്പാല്‍ ഒഴിച്ച്‌ ചെറുതീയില്‍ ചൂടാക്കുക. അതിനുശേഷം വെളിച്ചെണ്ണയും കറിവേപ്പിലയും ചേര്‍ത്ത്‌ വാങ്ങിവയ്ക്കുക. ഓലന്‍ റെഡി. :-) ചോറിനും ചപ്പാത്തിക്കും നല്ലതാണ്.

- ലിജി അരുണ്‍

വായിക്കുക: ,

അഭിപ്രായം എഴുതുക »

പ്രഷര്‍കുക്കര്‍ ബിരിയാണി

May 24th, 2012

cooker biriyani-epathram
ബിരിയാണി ഒരു താരം തന്നെയാണ്. എപ്പോ തന്നാലും കഴിക്കാന്‍ തോന്നും. ഞാന്‍ ഇതിനു മുന്‍പും പറഞ്ഞിട്ടുണ്ട് എന്റെ ബിരിയാണി കൊതിയെ കുറിച്ചും എന്നാല്‍ ഉണ്ടാക്കാനുള്ള മടിയെ കുറിച്ചും. മടി മറ്റൊന്നും കൊണ്ടല്ല. സവാള കുന്നു പോലെ അരിയുക, ചിക്കന്‍ ഉണ്ടാക്കുക, അരി വേവിക്കുക, ഇനി ലയെര്‍ ചെയ്യുക, ഒക്കെ കഴിഞ്ഞു സിങ്കില്‍ ഉള്ള ഒരു കുന്നു പാത്രവും കഴുകുക. അങ്ങനെ ബിരിയാണി എന്ന് ഓര്‍ക്കുമ്പോ തന്നെ ‘നിന്റെ വിയര്‍പ്പ് കൊണ്ട് ഭക്ഷിക്കുക’ എന്ന ദൈവ വചനം ഓര്‍മ്മ വരും. ദൈവം തമ്പുരാന്‍ മുന്നേ കണ്ട് അറിഞ്ഞു ഉണ്ടാക്കിയ വചനമാണ് ഇതെന്നു തോന്നും. ബിരിയാണി മൂക്ക് മുട്ടെ തിന്നണമെങ്കില്‍ നന്നായി വിയര്‍പ്പോഴുക്കണം.

പക്ഷെ ഇയ്യിടെ ഞാന്‍ ഒരു ഇന്‍സ്റ്റന്റ് ബിരിയാണി പരീക്ഷിച്ചു. ആയിരം പാത്രവും പതിനായിരം ‘പ്രോസീജ്യേഴ്സും’ ഇല്ല. ഒരു പ്രഷര്‍കുക്കറില്‍ എല്ലാം കൂടെ ‘ഡിം’. :-) ഉള്ളി അരിഞ്ഞു തരാന്‍ എനിക്ക് അരുണ്‍ ഉണ്ടല്ലോ പിന്നെ എന്താ!! സംഗതികള്‍ എല്ലാം കൂടെ കുക്കറില്‍ ആക്കി, എല്ലാ പാചക ദൈവങ്ങളെയും മനസ്സില്‍ ധ്യാനിച്ച്‌ കുക്കര്‍ അടച്ചു. പ്രാര്‍ത്ഥന തുടങ്ങി. ആ അഞ്ചു മിനുറ്റ് അഞ്ചു കൊല്ലം പോലെ തോന്നി. അവസാനം കുക്കറിന്റെ പ്രഷര്‍ പോയപ്പോഴേക്കും എന്റെ പ്രഷര്‍ കുറഞ്ഞത് 200 എങ്കിലും ആയിട്ടുണ്ടാവും.. :-) തുറക്കുന്ന സമയത്ത് ഉറപ്പിച്ചു, മോളെ, ഇത് ചിക്കന്‍ ഖിച്ടി എന്ന് പറഞ്ഞു അരുണ്‍നു വിളമ്പാം. അതാണ്‌ ഈ ബിരിയാണി, കഞ്ഞിപ്പരുവം ആയാലുള്ള അറ്റകൈപ്രയോഗം. ഏതായാലും തുറന്നപ്പോള്‍ ഗംഭീര മണം. നോക്കുമ്പോ ഉണ്ട് വെള്ളം അല്‍പ്പം പോലും കൂടിയിട്ടില്ല. ചോറിനും ചിക്കനും പാകം വേവ്.. :-) അടിപൊളി സ്വാദും. ഞാന്‍ ഒരു പുലി തന്നെ!! സ്വയം പ്രഖ്യാപിച്ചു… :-) അപ്പൊ ഇനി ”നിന്റെ വിയര്‍പ്പ് കൊണ്ട് ബിരിയാണി ഭക്ഷിക്കുക” എന്ന ദൈവ വചനം മാറ്റാം.. ;-)

ചേരുവകള്‍

ബിരിയാണി അരി : 2 ഗ്ലാസ്‌ (ജീരകശാലയാണ് ബെസ്റ്റ്‌)
ചിക്കന്‍ : അര കിലോ
ഗരം മസാല : ഒരു ടീസ്പൂണ്‍
മഞ്ഞള്‍ പൊടി : ഒരു ടീസ്പൂണ്‍.
മുളക്പൊടി : ഒരു ടേബിള്‍സ്പൂണ്‍
കുരുമുളക് പൊടി : അര ടീസ്പൂണ്‍
സവാള : 2 എണ്ണം (വലുത്)
തക്കാളി : വലുത് ഒരെണ്ണം
പച്ചമുളക് : 2 എണ്ണം നെടുകെ പിളര്‍ന്ന്
ഇഞ്ചി : ചെറിയ കഷ്ണം.
വെളുത്തുള്ളി : 4 അല്ലി.
മല്ലിയില : ചെറുതായി അരിഞ്ഞത് അര കപ്പ്.
ഏലയ്ക്ക:നാല്
ഗ്രാമ്പൂ ;നാല്
കറുവാപട്ട.: ചെറിയ കഷ്ണം
നെയ്യ്‌ : 2 ടേബിള്‍സ്പൂണ്‍
എണ്ണ : 2 ടേബിള്‍സ്പൂണ്‍
അണ്ടിപ്പരിപ്പ് : 5-6 എണ്ണം
ഉപ്പ് :പാകത്തിന്
വെള്ളം :3 ഗ്ലാസ്‌ തിളപ്പിച്ചത്

തയ്യാറാക്കുന്ന വിധം

അരി കഴുകി വാലാന്‍ വയ്ക്കുക. ചിക്കന്‍ വൃത്തിയാക്കി മഞ്ഞള്‍ പൊടി, മുളക്പൊടി, കുരുമുളക് പൊടി എന്നിവ അര ടീസ്പൂണ്‍ വീതവും, മുളക് പോടി ഒരു ടേബിള്‍സ്പൂണും ഉപ്പും ചേര്‍ത്ത് നന്നായി യോജിപ്പിച്ചു വെയ്ക്കുക. ഇത് ഏകദേശം ഒരു മണിക്കൂര്‍ ഇരിക്കട്ടെ.

സവാള, തക്കാളി എന്നിവ നേര്‍മ്മയായി അരിഞ്ഞു എടുക്കുക. ഇഞ്ചി വെളുത്തുള്ളി ചതച്ചു എടുക്കുക. കുറഞ്ഞത് 3.5 ലിറ്റര്‍ ഉള്ള പ്രഷര്‍ കുക്കര്‍ ഗ്യാസില്‍ വച്ച് ചൂടാക്കുക. ഇതിലേക്ക് എണ്ണയും നെയ്യും ഒഴിക്കുക. ഏലയ്ക്ക, ഗ്രാമ്പു, കറുവാപ്പട്ട, എന്നിവ പൊട്ടിക്കുക. ഇതിലേക്ക് സവാളയും പച്ചമുളകും ചേര്‍ത്ത് വഴറ്റുക. അല്‍പ്പം ബ്രൌണ്‍ നിറം ആകുമ്പോള്‍ ഇഞ്ചിയും വെളുത്തുള്ളിയും ചേര്‍ത്ത് വഴറ്റുക. നല്ല ബ്രൌണ്‍ നിറം ആകുമ്പോള്‍ തക്കാളി ചേര്‍ത്ത് ഉടയ്ക്കുക. ഇതിലേക്ക് ബാക്കിയുള്ള മുളക് പൊടി, മഞ്ഞള്‍പ്പൊടി,ഗരംമസാലപ്പൊടി എന്നിവ ചേര്‍ത്ത് നന്നായി വഴറ്റുക. മസാല പുരട്ടി വച്ചിരിക്കുന്ന ചിക്കന്‍ ഇതിലേക്ക് ചേര്‍ത്ത് നന്നായി യോജിപ്പിക്കുക. 5-6 മിനുറ്റ് നന്നായി ഇളക്കി കൊണ്ടിരിക്കുക. ചിക്കന്‍ ഉടയരുത്. ചെറുതായി ഒന്ന് ഫ്രൈ ആയി കിട്ടിയാല്‍ മതി. അടിയില്‍ പിടിക്കാതെ സൂക്ഷിക്കുക. എന്നാല്‍ വെള്ളം ചേര്‍ക്കുകയും അരുത്.

കഴുകി വാരി വച്ചിരിക്കുന്ന അരി ഇതിലേക്ക് ചേര്‍ത്ത് ഇളക്കുക. ആവശ്യത്തിന് ഉപ്പും മല്ലിയിലയും ചേര്‍ത്ത് യോജിപ്പിക്കുക. 3 ഗ്ലാസ്‌ വെള്ളം തിളപ്പിച്ച്‌ നല്ല ചൂടോടു കൂടി ഇതിലേക്ക് ചേര്‍ക്കുക. കുക്കര്‍ അടയ്ക്കുക. ആവി വരുമ്പോള്‍ വിസില്‍ ഇടുക. വെയിറ്റ് ഇട്ടതിനു ശേഷം കൃത്യം 5 മിനുറ്റ് ഇടത്തരം തീയില്‍ പാകം ചെയ്യുക. വിസില്‍ ശ്രദ്ധിക്കേണ്ടതില്ല.  5 മിനുറ്റ് കഴിയുമ്പോള്‍ തീ ഓഫാക്കുക. ആവി പോകുന്നത് വരെ വെയിറ്റ് ചെയ്യുക. അതിനു ശേഷം മാത്രം കുക്കര്‍ തുറക്കുക. തുറക്കുമ്പോള്‍ തന്നെ ഒരു പരന്ന പാത്രത്തിലേക്ക് മാറ്റുക. ഒരു ഫോര്‍ക്ക് കൊണ്ട് ഇളക്കുക. വേണമെങ്കില്‍ സവാള വറുത്തതും കശുവണ്ടിയും കിസ്മിസും ഉപയോഗിച്ച് അലങ്കരിക്കാം. സാലഡ്‌, അച്ചാര്‍, പപ്പടം എന്നിവ ചേര്‍ത്ത് കഴിക്കാം.

- ലിജി അരുണ്‍

വായിക്കുക: , ,

3 അഭിപ്രായങ്ങള്‍ »

Page 1 of 1212345...10...Last »

« Previous « മാങ്ങാ പച്ചടി
Next Page » ഓലന്‍ »



Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine