മാങ്ങാ പച്ചടി

May 10th, 2012

manga pachadi-epathram
നാട്ടില്‍ നിന്നും നല്ല കിടിലന്‍ മൂവാണ്ടന്‍ മാങ്ങകള്‍ കുറെ കിട്ടിയെന്നിരിക്കട്ടെ, നിങ്ങള്‍ എന്തൊക്കെ ഉണ്ടാക്കും അതുകൊണ്ട്?? ;-) ആദ്യത്തെ ദിവസം ചമ്മന്തി അരച്ചു, പിന്നത്തെ ദിവസം മീന്‍ മാങ്ങായിട്ട് കറി വച്ചു. ഇനി എന്താ മാങ്ങാ ഐറ്റം?? കടുമാങ്ങ എന്നൊക്കെ പറഞ്ഞാല്‍ അതൊക്കെ തല നരച്ചവര്‍ ഇട്ടാലേ ശരിയാവൂ എന്ന പക്ഷക്കാരിയാണ് ഞാന്‍. പക്ഷെ ഇതെന്റെ കഥ അല്ല കേട്ടോ.. കൊച്ചിന്‍ യുണിവേഴ്സിറ്റിയില്‍ എന്റെ സുഹൃത്തായിരുന്ന മേരി ആണ് ഇവിടുത്തെ കഥാനായിക. ബംഗ്ലൂരിലെ ലക്ഷക്കണക്കിന് വരുന്ന സോഫ്റ്റ്‌വെയര്‍ ഫാമിലീസില്‍ ഒന്നാണ് അവളുടേത്. എന്നാലും തിരക്ക് പിടിച്ച ജീവിതത്തിനിടയിലും തനി മലയാളി ഭക്ഷണം ഉണ്ടാക്കുന്ന കാര്യത്തില്‍ എക്സ്പേര്‍ട്ട് ആണ് കക്ഷി. ഈ മാങ്ങാ പച്ചടി അവള്‍ടെ സ്വന്തം റെസിപ്പി ആണ്. നല്ല കുത്തരി ചോറിന് ഒരടിപൊളി കോമ്പിനേഷന്‍ ആണ് ഇത്… ഓര്‍ക്കുമ്പോഴേ വായില്‍ വെള്ളം വരുന്നു.. അടുത്ത തവണ മാങ്ങാ കിട്ടട്ടെ ഇതൊന്നു വച്ചിട്ട് തന്നെ കാര്യം.. :-) തല്‍ക്കാലം നിങ്ങള്‍ ഒന്ന് പരീക്ഷിച്ചു നോക്കൂ..

ചേരുവകള്‍

മാങ്ങാ – ഒരെണ്ണം
ഇഞ്ചി – ഒരു ചെറിയ കഷണം
ചെറിയ ഉള്ളി – 12 അല്ലി
പച്ചമുളക് – 3 എണ്ണം
തേങ്ങാ – അര കപ്പ്‌
കടുക്‌ – കാല്‍ ടീസ്പൂണ്‍
കറിവേപ്പില – 2 തണ്ട്
വെളിച്ചെണ്ണ – 2 ടേബിള്‍സ്പൂണ്‍
ഉപ്പ് – പാകത്തിന്

തയ്യാറാക്കുന്ന വിധം

മാങ്ങ തീരെ ചെറുതായി കൊത്തി അരിഞ്ഞു ഉപ്പ് പുരട്ടി വയ്ക്കുക. ഉള്ളി, ഇഞ്ചി, പച്ചമുളക് ഇവ ചെറുതായി അരിഞ്ഞെടുക്കുക. തേങ്ങാ കടുക് ചേര്‍ത്ത് അല്‍പ്പം വെള്ളം ഒഴിച്ച് നന്നായി അരച്ചെടുക്കുക. ഒരു ചീനച്ചട്ടിയില്‍ എണ്ണ ഒഴിച്ച് ചൂടാകുമ്പോള്‍ കടുക് പൊട്ടിക്കുക. ഇതിലേക്ക് അരിഞ്ഞു വച്ചിരിക്കുന്ന ഉള്ളി, ഇഞ്ചി, പച്ചമുളക് എന്നിവ ചേര്‍ത്ത് വഴറ്റുക. തേങ്ങാ അരച്ചത്‌ ഇതിലേക്ക് ചേര്‍ത്ത് ചൂടാക്കി എടുക്കുക. അരിഞ്ഞു വച്ചിരിക്കുന്ന മാങ്ങയിലേക്ക് ഈ കൂട്ട് ചേര്‍ത്ത് നന്നായി യോജിപ്പിച്ചെടുക്കുക. കറിവേപ്പില കൊണ്ട് അലങ്കരിച്ചു വിളമ്പാം.

- ലിജി അരുണ്‍

വായിക്കുക: , , , ,

അഭിപ്രായം എഴുതുക »

വെണ്ടയ്ക്കാ മസാല

May 6th, 2012

bhindi masala-epathram

എപ്പോ നോക്കിയാലും ഒരു വെണ്ടയ്ക്കാ മെഴുക്കുപുരട്ടി, അതാണെങ്കില്‍ ആകെ കുഴഞ്ഞു കുഴ കുഴാന്ന് ഇരിക്കും..എന്റെ ഒരു ഇഷ്ട്ടക്കാരിയായ വേണ്ടയ്ക്കയെ കുറിച്ചാണ് അരുണ്‍ന്റെ ഈ അപവാദം..:-( എങ്ങനെ പറയാതിരിക്കും എന്റെ വെണ്ടയ്ക്കാ മെഴുക്കുപുരട്ടി കഴിക്കുമ്പോള്‍ എനിക്ക് തന്നെ വേണ്ടയ്ക്കയോട് സഹതാപം തോന്നും. അത്രയ്ക്ക് ‘ഹോപ്പ് ലെസ്സ്’ ആണ് സംഗതി. പക്ഷെ കുക്കിംഗില്‍ എന്റെ ഗുരുക്കന്മാരായ അമ്മയ്ക്കും അമ്മായിയമ്മയ്ക്കും ഒക്കെ നല്ല വെണ്ടയ്ക്കാ മെഴുക്കുപുരട്ടി വയ്ക്കാന്‍ അറിയാം കേട്ടോ.. പിന്നെ ഞാന്‍ എന്റെ മമ്മിയില്‍ നിന്നും ഒരു സംഗതി മനസ്സിലാക്കി നല്ല പോലെ എണ്ണ ഒഴിച്ച് ചെറുതീയില്‍ കുറച്ചു അധികം നേരം വരട്ടി എടുത്താല്‍ വേണ്ടയ്ക്കയ്ക്ക് നല്ല സ്വാദാണ്, അല്പം തൈര് ചേര്‍ത്താല്‍ കുഴയുകയുമില്ല. വേണ്ട, വേണ്ട അങ്ങനെ അധികം എണ്ണ ഉപയോഗിച്ചുള്ള സ്വാദ് വേണ്ട.. അത് കൊണ്ട് ഞാന്‍ തന്നെ ഒരു പുതിയ കറി അങ്ങ് പരീക്ഷിച്ചു. വെണ്ടയ്ക്കാ മസാല. എന്റെ പാചക പണിപ്പുരയില്‍ രൂപം കൊണ്ട ‘ലേറ്റസ്റ്റ് ഐറ്റം’ ആണ്. എന്തായാലും എല്ലാര്‍ക്കും ഇഷ്ടമായി. ഇനി വെണ്ടയ്ക്കാ അടിക്കടി വാങ്ങാന്‍ ഒരു കാരണമായല്ലോ. ചപ്പാത്തിക്കും ഇത് ഒരടിപൊളി കറിയാണ്.. :-)

ചേരുവകള്‍
വെണ്ടയ്ക്ക ഒരിഞ്ചു നീളത്തില്‍ നുറുക്കിയത് – അര കിലോ
സവാള – ഒരു വലുത് നീളത്തില്‍ അരിഞ്ഞത്
തക്കാളി – ഒരു വലുത് നീളത്തില്‍ അരിഞ്ഞത്
ഇഞ്ചി – ഒരിഞ്ചു കഷ്ണം ചെറുതായി അരിഞ്ഞത്
വെളുത്തുള്ളി – 5-6 അല്ലി ചെറുതായി അരിഞ്ഞത്
പച്ചമുളക് – 2 എണ്ണം നെടുകെ പിളര്‍ന്നത്
മുളകു പൊടി – 2 ടീസ്പൂണ്‍
മല്ലിപ്പൊടി – 1 ടീസ്പൂണ്‍
മഞ്ഞള്‍പ്പൊടി – അര ടീസ്പൂണ്‍
വെജിടബില്‍/എഗ്ഗ്/മീറ്റ്‌ മസാല – ഒരു ടീസ്പൂണ്‍ (ഉണ്ടെങ്കില്‍ / വേണമെങ്കില്‍ മാത്രം)
വെളിച്ചെണ്ണ – 2 ടേബിള്‍സ്പൂണ്‍
കറിവേപ്പില – 2 തണ്ട്
ഉപ്പ് – ആവശ്യത്തിന്

തയ്യാറാക്കുന്ന വിധം

ഒരു നോണ്‍ സ്റ്റിക് പാനില്‍ എണ്ണ ഒഴിച്ച് ചൂടാക്കുക. ഇതിലേക്ക് അരിഞ്ഞു വച്ചിരിക്കുന്ന സവാള, ഇഞ്ചി, വെളുത്തുള്ളി, പച്ചമുളക്, കറിവേപ്പില എന്നിവ ചേര്‍ത്ത് ഇളം ബ്രൌണ്‍ നിറമാകുന്നതു വരെ വഴറ്റുക. ഇതിലേക്ക് തക്കാളി ചേര്‍ത്ത് വഴന്നു കഴിയുമ്പോള്‍ പൊടികളും മസാലയും ചേര്‍ത്ത് പച്ചമണം മാറുന്ന വരെ വഴറ്റുക. മുറിച്ചു വച്ചിരിക്കുന്ന വെണ്ടയ്ക്കാ ഇതിലേക്ക് ചേര്‍ത്ത് നന്നായി ഇളക്കി, (കുഴയരുത്) മൂടി വച്ച് വേവിക്കുക. ഇടയ്ക്ക് ഇളക്കി കൊടുക്കണം. വെന്തു കഴിയുമ്പോള്‍ മൂടി മാറ്റി തുറന്നു വച്ച്, ചെറുതീയില്‍ 5 മിനുറ്റ് കൂടി വഴറ്റി എടുക്കുക. ചപ്പാത്തിക്കും ചോറിനും നല്ലതാണ്.

- ലിജി അരുണ്‍

വായിക്കുക: , , ,

അഭിപ്രായം എഴുതുക »

തക്കാളിക്കറി

April 4th, 2012

thakkaali curry-epathram
നാടന്‍ കറികള്‍ക്ക് എന്തൊരു സ്വാദാ!! പ്രത്യേകിച്ചും തേങ്ങയും ജീരകവും അരയ്ക്കുന്നവയ്ക്ക്. തക്കാളി കറി എന്റെ വീട്ടില്‍ വെയ്ക്കാറേയില്ലായിരുന്നു. എന്നാല്‍ ചെറുപ്പത്തില്‍ എന്റെ മമ്മിയുടെ അനുജത്തി മറിയമ്മ ആന്റിയുടെ വീട്ടില്‍ ചെല്ലുമ്പോള്‍ അവിടുത്തെ സ്ഥിരം കറിയാണ് ഇത്. എനിക്ക് വലിയ ഇഷ്ടമായിരുന്നു അത്. ഇതാണോ ആ റെസിപ്പി എന്ന് എനിക്കറിയില്ല. കുട്ടി ആയിരിക്കുമ്പോള്‍ റെസിപ്പി അന്വേഷിക്കാന്‍ എവിടെ നേരം..? :-) ഏതായാലും ഇയ്യിടെ ഒരു വനിതയില്‍ ഒരു പച്ചതക്കാളി കറി റെസിപ്പി കണ്ടു. വളരെ നാളുകള്‍ക്കു ശേഷം തക്കാളി കറിയെ കുറിച്ച് ഓര്‍ത്തു. പോരാത്തതിന് അരുണ്‍ന്റെ കണ്‍സ്ട്രക്ഷന്‍ സൈറ്റില്‍ അവിടുത്തെ ജോലിക്കാര്‍ കൃഷി ചെയ്തു ഉണ്ടാക്കിയ ഏതാനും പച്ചക്കറികള്‍ വീട്ടിലേക്കു തന്നു വിട്ട കൂട്ടത്തില്‍ 2 പച്ചത്തക്കാളി ഉണ്ടായിരുന്നു. അപ്പൊ അത് വച്ചായിക്കോട്ടെ പരീക്ഷണം.. :) തക്കാളി കറി ഒത്തു വന്നു. നല്ല കുത്തരി ചോറും പപ്പടവും തക്കാളി കറിയും മീന്‍ വറുത്തതും. ലഞ്ച് കുശാല്‍.. :-)

ചേരുവകള്‍

തക്കാളി (പച്ചയോ പഴുത്തതോ) – 1 വലുത്
സവാള – 1 ഇടത്തരം
പച്ചമുളക് – 3 എണ്ണം
ഇഞ്ചി – ഒരു ചെറിയ കഷ്ണം
മഞ്ഞള്‍പ്പൊടി – കാല്‍ ടീസ്പൂണ്‍
തെങ്ങ – അര മുറി
വെളുത്തുള്ളി – ഒരല്ലി
ചെറിയ ഉള്ളി – 4-5 എണ്ണം
ജീരകം – കാല്‍ ടീസ്പൂണ്‍
വെളിച്ചെണ്ണ – 2 ടേബിള്‍സ്പൂണ്‍
കറിവേപ്പില – ഒരു തണ്ട്
വറ്റല്‍ മുളക് – 2 എണ്ണം
കടുക് – ഒരു ടീസ്പൂണ്‍

തയ്യാറാക്കുന്ന വിധം

തക്കാളിയും സവാളയും നേര്‍മ്മയായി നീളത്തില്‍ അരിഞ്ഞു എടുക്കുക. ഇതും 2 പച്ചമുളക് കീറിയത്, ഇഞ്ചി പൊടിയായി അരിഞ്ഞത്, മഞ്ഞള്‍പ്പൊടി ഉപ്പ്, അര ഗ്ലാസ്‌ വെള്ളം എന്നിവ ചേര്‍ത്ത് ഒരു ചട്ടിയില്‍ വേവിച്ചു എടുക്കുക. തേങ്ങാ ജീരകം, വെളുത്തുള്ളി, ഒരു പച്ചമുളക്, 3 ചെറിയ ഉള്ളി എന്നിവ ചേര്‍ത്ത് നന്നായി അരച്ചെടുക്കുക. ഇത് വെന്ത തക്കാളിയിലേക്ക് ചേര്‍ക്കുക. പാകത്തിന് വെള്ളം ചേര്‍ത്ത് നന്നായി ഇളക്കി ചെറിയ തിള വരുമ്പോള്‍ വാങ്ങുക. കടുക്, ചെറിയ ഉള്ളി, വറ്റല്‍ മുളക്, കറിവേപ്പില എന്നിവ വെളിച്ചെണ്ണയില്‍ താളിച്ച് കറിയില്‍ ഒഴിക്കുക. തക്കാളിക്കറി റെഡി.

- ലിജി അരുണ്‍

വായിക്കുക: , ,

അഭിപ്രായം എഴുതുക »

പാസ്താ ഉപ്പുമാവ്

March 25th, 2012

pasta-upma-epathram

ഉപ്പുമാവിനോടുള്ള എന്റെ വിരോധം ഇതിനു മുന്‍പുള്ള ഉപ്പുമാവ്‌ പോസ്റ്റില്‍ ഞാന്‍ സൂചിപ്പിച്ചിട്ടുണ്ട്. അത് സാധാ റവ ഉപ്പുമാവിന്റെ കാര്യം. അത് പഴം കൂട്ടി കുഴച്ചു തിന്നുക എന്ന് പറഞ്ഞാല്‍, ഛെ ഛെ.. വെറും ‘കണ്ട്രി’ ആയി പോവും. അപ്പോഴാണ്‌ ഞാന്‍ മറ്റൊരു ഉപ്പുമാവിനെ കുറിച്ചുള്ള സാധ്യത ആലോചിച്ചത്. ഇത് അങ്ങനേം ഇങ്ങനേം ഉള്ള വെറും ഉപ്പുമാവ് അല്ലാ.. ഇറ്റാലിയന്‍ ഉപ്പുമാവ്.. :-) ഇറ്റലിക്കാര്‍ കേള്‍ക്കണ്ടാ.. ഹി ഹി.. ഇപ്പോള്‍ എവിടേം സുലഭമായ, പല ഷേയ്പ്പ്പുകളിലും വലുപ്പത്തിലും ലഭിക്കുന്ന പാസ്ത എന്ന ഇറ്റാലിയന്‍ സംഭവത്തെ അല്പം ഒന്ന് മലയാളീകരിച്ച ഒരു വേര്‍ഷന്‍ ആണ് ഇത്. ഇഷ്ടമാകും എന്നത് തീര്‍ച്ച.. :-)

ചേരുവകള്‍

വേര്‍മിസെല്ലി പാസ്താ – 1 കപ്പ്‌
സവാള – 1 വലുത് ചെറുതായി അരിഞ്ഞത്
ഇഞ്ചി – ഒരിഞ്ചു കഷ്ണം പൊടിയായി അരിഞ്ഞത്
പച്ചമുളക് – 2 എണ്ണം നെടുകെ പിളര്‍ന്നത്
കറിവേപ്പില – ഒരു തണ്ട്
കടുക്‌ – ഒരു ടീസ്പൂണ്‍
ഉപ്പ് – ആവശ്യത്തിന്
എണ്ണ – 2 ടേബിള്‍സ്പൂണ്‍

തയ്യാറാക്കുന്ന വിധം

ഒരു പാത്രത്തില്‍ വെള്ളം തിളപ്പിച്ച്‌ പാസ്ത അതില്‍ ഇട്ടു വേവിച്ചു ഉപ്പിട്ട് ഊറ്റി എടുക്കുക. അല്പം എണ്ണ ഒഴിച്ചാല്‍ കട്ട കൂടാതെ കിട്ടും. വെള്ളം നന്നായി വാര്‍ന്നു പോണം. ഒരു പാന്‍ ചൂടാക്കി, എണ്ണ ഒഴിച്ച് കടുക് വറക്കുക. ഇതിലേക്ക് സവാള, ഇഞ്ചി, പച്ചമുളക്, കറിവേപ്പില എന്നിവ ചേര്‍ത്ത് വഴറ്റുക. ഇളം നിറമാകുമ്പോള്‍ വേവിച്ചു വച്ചരിക്കുന്ന പാസ്ത അതിലേക്കു ചേര്‍ത്ത് നന്നായി യോജിപ്പിക്കുക. 5 മിനുറ്റ് ചെറുതീയില്‍ അടച്ചു വച്ച് വേവിക്കുക. പാസ്താ ഉപ്പുമാവ് റെഡി. ടൊമാറ്റോ സോസ് കൂട്ടി കഴിക്കാം. ചിക്കെന്‍ കറി ആണെങ്കിലും നല്ലതാ :-)

കുറിപ്പ്‌  : പാസ്തയ്ക്ക് പകരം നാട്ടില്‍ ലഭിക്കുന്ന വേര്‍മിസെല്ലി ഉപയോഗിച്ചും ഇത് തയ്യാറാക്കാം.

- ലിജി അരുണ്‍

വായിക്കുക: , ,

Comments Off on പാസ്താ ഉപ്പുമാവ്

പാലക് മട്ടണ്‍

March 23rd, 2012

palak-mutton-epathram
എന്തിന്റെ കൂടെ ആണെങ്കിലും അല്‍പ്പം ഇറച്ചിയോ മീനോ ഉണ്ടെങ്കില്‍ അത് അകത്താക്കാന്‍ വിഷമമില്ല എന്നാണു അരുണിന്റെ അഭിപ്രായം. പാലക് മാര്‍കെറ്റില്‍ നിന്നും വാങ്ങുമ്പോള്‍ തന്നെ ആള്‍ക്ക് പേടിയാണ്.. :-) സാധാരണ പാലക് ദാല്‍ ആണ് വയ്ക്കാറുള്ളത്. എന്നാല്‍ ഇത്തവണ ഒരു ചെയ്ഞ്ചിന് അല്പം മട്ടണ്‍ കൂടി എടുത്തു. പാലക് മട്ടണ്‍ എന്ന ഒരു ആശയം തലയില്‍ കയറിയിട്ടുണ്ട്. എന്റെ ഓഫീസിലെ ഒരു ഹൈദരാബാദുകാരന്‍ ഇയ്യിടെ കല്യാണം കഴിച്ചു. ഭര്‍ത്താവിനു പോഷകസമൃദ്ധവും രുചികരവുമായ ഭക്ഷണം ഉണ്ടാക്കുക എന്നതാണ് കക്ഷിയുടെ ഭാര്യയുടെ പ്രാധാന പരിപാടി. പുള്ളിയുടെ ലഞ്ച് ബോക്സില്‍ ആണ് ഈ ഐറ്റം ആദ്യമായി കണ്ടത്. അന്നേ ഉറപ്പിച്ചു, അടുത്ത തവണ പാലക് എടുക്കുമ്പോള്‍ ഇത് തന്നെ ഉണ്ടാക്കണം. ഏതായാലും നന്നായിരുന്നു. രുചികരവും അതില്‍ കൂടുതല്‍ പാലക് ഉള്ളില്‍ ചെന്നല്ലോ എന്ന സമാധാനവും കിട്ടി. :-)

ചേരുവകള്‍

പാലക് – ഒരു കെട്ട്
മട്ടണ്‍ – അര കിലോ ചെറിയ കഷ്ണങ്ങള്‍ ആക്കിയത്
സവാള – 2 ഇടത്തരം നേര്‍മ്മയായി അരിഞ്ഞത്
തക്കാളി – 2 ഇടത്തരം ചെറുതായി അരിഞ്ഞത്
ഇഞ്ചി ചതച്ചത് – ഒരു റ്റീ സ്പൂണ്‍
വെളുത്തുള്ളി ചതച്ചത് -ഒരു റ്റീ സ്പൂണ്‍
പച്ചമുളക് – 2 എണ്ണം
മല്ലിപ്പൊടി – ഒരു റ്റീ സ്പൂണ്‍
മുളക് പൊടി – ഒരു റ്റീ സ്പൂണ്‍
മഞ്ഞള്‍പ്പൊടി – 1/2 റ്റീ സ്പൂണ്‍
ഗരം മസാല – ഒരു റ്റീ സ്പൂണ്‍
ഉപ്പ് – ആവശ്യത്തിന്
എണ്ണ- 2 റ്റേബിള്‍ സ്പൂണ്‍
മല്ലിയില – ഒരു പിടി

പാചകരീതി

മട്ടണ്‍ കഴുകി വൃത്തിയാക്കി വെള്ളം വാര്‍ന്നു കളയുക. ഇത് ഒരു സവാളയും ഒരു തക്കാളിയും അരിഞ്ഞതും, 1/2 റ്റീ സ്പൂണ്‍ വീതം ഇഞ്ചി ചതച്ചത്, വെളുത്തുള്ളി ചതച്ചത്, മല്ലിപ്പൊടി, മുളക് പൊടി, ഗരം മസാല പൊടി, പാകത്തിന് ഉപ്പ് എന്നിവയും ചേര്‍ത്ത് ഏകദേശം 10 മിനിറ്റ് കുക്കറില്‍ വേവിക്കുക. കുക്കര്‍ തുറക്കുമ്പോള്‍ നന്നായി ഇളക്കി യോജിപ്പിക്കുക.

പാലക് കഴുകി വൃത്തിയാക്കി ചെറുതായി അരിയുക. ഒരു പാനില്‍ എണ്ണ ചൂടാക്കി ഒരു സവാള അരിഞ്ഞത്, 1/2 റ്റീ സ്പൂണ്‍ വീതം ഇഞ്ചി ചതച്ചത്, വെളുത്തുള്ളി ചതച്ചത്, നെടുകെ പിളര്‍ന്ന പച്ചമുളക് എന്നിവ വഴറ്റുക. നന്നായി വഴന്നു കഴിയുമ്പോള്‍ തക്കാളി ചെറുതായി അരിഞ്ഞത് ചേര്‍ക്കുക. തക്കാളി ഉടഞ്ഞു കഴിയുമ്പോള്‍ ബാക്കിയുള്ള പൊടികള്‍ എല്ലാം ചേര്‍ത്ത് മൂപ്പിക്കുക. അരിഞ്ഞു വച്ചിരിക്കുന്ന പാലക് ഇതിലേക്ക് ചേര്‍ത്ത് നന്നായി ഇളക്കി അടച്ചു വച്ച് 5 മിനുറ്റ് വേവിക്കുക. ഇതിലേക്ക് വേവിച്ചു വച്ചിരിക്കുന്ന മട്ടണ്‍ ഗ്രേവിയോടു കൂടെ ചേര്‍ക്കുക. നന്നായി ഇളക്കി 5 മിനിറ്റ് കൂടി ചെറുതീയില്‍ വയ്ക്കുക. വാങ്ങി വച്ച് മല്ലിയില ചേര്‍ത്ത് ഇളക്കുക. ചപ്പാത്തിക്കും ചോറിനും നല്ലതാണ്.

- ലിജി അരുണ്‍

വായിക്കുക: , , ,

Comments Off on പാലക് മട്ടണ്‍

Page 2 of 1212345...10...Last »

« Previous Page« Previous « പീസ്‌ പുലാവ്
Next »Next Page » പാസ്താ ഉപ്പുമാവ് »



Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine