ജെ.ആര്‍.ജി കമോഡിറ്റീസ് സമ്മിറ്റ് ഇന്ന് ദുബായില്‍ നടക്കും. ബര്‍ദുബായിലെ മൂവന്‍പിക്ക് ഹോട്ടലിലാണ് സമ്മേളനം നടക്കുക. യു.എ.ഇയിലെ വിവിധ എമിറേറ്റുകളില്‍ നിന്ന് അഞ്ഞൂറോളം പേര്‍ സമ്മേളനത്തില്‍ പങ്കെടുക്കുമെന്ന് ജെ.ആര്‍.ജി സെക്യൂരിറ്റീസ് മാനേജിംഗ് ഡയറക്ടര്‍ റജി ജേക്കബ് ദുബായില്‍ വാര്‍ത്താ സമ്മേളനത്തില്‍ അറിയിച്ചു. നാസര്‍ സെയ്ഫ് അല്‍ റിയാമി ഉദ്ഘാടനം ചെയ്യുന്ന സമ്മേളനം വൈകീട്ട് ആറരയ്ക്ക് ആരംഭിക്കും. വാര്‍ത്താ സമ്മേളനത്തില്‍ ജെആര്‍ജി മെറ്റല്‍സ് ആന്‍ഡ് കമ്മോഡിറ്റീസ് ഡയറക്ടര്‍മാരായ ബാബു കെ. ലോനപ്പന്‍, ഹസ്സാ ബിന്‍ മുഹമ്മദ്, വൈസ് ചെയര്‍മാന്‍ പി.കെ സജിത് കുമാര്‍ എന്നിവരും പങ്കെടുത്തു.

യുഎഇയിലെ പ്രഥമ ഔട്ട്‍‍ലെറ്റ് മാളായ ഫാക്ടറി മാര്‍ട്ട് നാലാം വാര്‍ഷികം വിപുലമായി ആഘോഷിക്കുന്നു. ഇതോടനുബന്ധിച്ച് ആകര്‍ഷകമായ സമ്മാന പദ്ധതികളാണ് പ്രഖ്യാപിച്ചിട്ടുള്ളത്. അജ്മാനില്‍ സ്ഥിതിചെയ്യുന്ന ഫാക്ടറി മാര്‍ട്ടില്‍ നിന്നും ഉല്‍പ്പന്നങ്ങള്‍ വാങ്ങുന്നവര്‍ക്ക് വിവിധ സമ്മാനങ്ങള്‍ നല്‍കും. വിവിധ മത്സരങ്ങളും സംഘടിപ്പിച്ചിട്ടുണ്ടെന്ന് സംഘാടകര്‍ ദുബായില്‍ വാര്‍ത്താസമ്മേളനത്തില്‍ അറിയിച്ചു.

ഒമ്പതാമത് അറബ് അന്താരാഷ്ട്ര പ്ലാസ്റ്റിക്ക് റബര്‍ ഉല്‍പ്പന്ന പ്രദര്‍ശനമായ അറബ്പ്ലാസ്റ്റ് ശനിയാഴ്ച്ച ആരംഭിക്കും. ദുബായ് അന്താരാഷ്ട്ര കണ്‍‍‍വെന്‍ഷന്‍ സെന്‍ററിലാണ് പരിപാടി. പത്തിനാരംഭിക്കുന്ന പ്രദര്‍ശനം 13 വരെ നീളും. രാവിലെ പതിനൊന്ന് മണി മുതല്‍ വൈകീട്ട് ഏഴുമണി വരെയാണ് പ്രദര്‍ശനം. ഇന്ത്യയുള്‍പ്പടെ നിരവധി രാജ്യങ്ങള്‍ മേളയില്‍ പങ്കെടുക്കുന്നുണ്ട്. ആഗോള സാമ്പത്തിക പ്രതിസന്ധി പ്ലാസ്റ്റിക്ക്, റബ്ബര്‍ ഉല്‍പ്പന്ന മേഖലയെ ബാധിച്ചിട്ടില്ലെന്നാണ് സംഘാടകര്‍ അവകാശപ്പെടുന്നത്.

സ് കൈ ജ്വല്ലറിയുടെ ബൈ ഗോള്‍ഡ് വിന്‍ ഗോള്‍ഡ് എന്ന പ്രമോഷന്‍ പദ്ധതിയുടെ ആദ്യ വിജയി രാമചന്ദ്ര നായിക്കിന് ഒരു കിലോ സ്വര്‍ണം ദുബായില്‍ സമ്മാനിച്ചു. വേള്‍ഡ് ഗോള്‍ഡ് കൗണ്‍സില്‍ മാര്‍ക്കറ്റിംഗ് മാനേജര്‍ യോഗാനി ഭാട്ടിയ സമ്മാനദാനം നിര്‍വഹിച്ചു. സ്കൈ ജ്വല്ലറി മാനേജിംഗ് ഡയറക്ടര്‍ ബാബു ജോണ്‍, ഡയറക്ടര്‍ അമിത് വര്‍ഗീസ് ജോണ്‍, ജനറല്‍ മാനേജര്‍ സിറിയക് വര്‍ഗീസ് എന്നിവര്‍ പരിപാടിയില്‍ പങ്കെടുത്തു. പ്രമോഷനിലൂടെ പത്ത് കിലോ സ്വര്‍ണമാണ് സമ്മാനമായി നല്‍കുന്നത്. ഇതിന്‍റെ അടുത്ത വിജയികളെ തുടര്‍ന്നുള്ള നറുക്കെടുപ്പുകളില്‍ പ്രഖ്യാപിക്കും.

ഹര്‍മാന്‍ ഹൗസ് ദുബായിലെ പ്രശസ്തമായ ദുബായ് മാളില്‍ തങ്ങളുടെ ഓഡിയോ വിഷ്വല്‍ ഷോറൂം ആരംഭിച്ചു. മിഡില്‍ ഈസ്റ്റിലെ തന്നെ ഏറ്റവും വലിയ ഓഡിയോ വിഷ്വല്‍ ഷോറൂമുകളില്‍ ഒന്നാണിത്. ലോകത്തിലെ പ്രമുഖ ബ്രാന്‍ഡുകളുടെയെല്ലാം ഉത്പന്നങ്ങള്‍ ഇവിടെ ലഭിക്കും. ഉദ്ഘാടനത്തോട് അനുബന്ധിച്ച് 12 പേര്‍ക്ക് ഇരിക്കാവുന്ന പ്രത്യേക ഹോം തീയറ്ററിന്‍റെ പ്രദര്‍ശനവും നടന്നു. അഞ്ച് ലക്ഷം ദിര്‍ഹമാണ് ഇതിന്‍റെ വില. ഒരു ലക്ഷം ദിര്‍ഹം വിലയുള്ള ജെബില്‍ എവറസ്റ്റ് എന്ന സൗണ്ട് സിസ്റ്റവും പ്രദര്‍ശിപ്പിച്ചിരുന്നു. കാറുകളിലും കോണ്‍ഫ്രന്‍സ് മുറികളിലും പൂന്തോട്ടങ്ങളിലും അടുക്കളയിലും ഘടിപ്പിക്കാവുന്ന വിവിധ ഉത്പന്നങ്ങളാണ് ഷോറൂമിലുള്ളത്.