കേരളത്തിലെ തെരഞ്ഞെടുപ്പ് ഫലം യു.എ.ഇയിലെ യു.ഡി.എഫ് അനുഭാവികള്‍ ആഘോഷമാക്കി മാറ്റി. ഷോപ്പിംഗ് മാളുകളിലും വിവിധ സൂക്കുകളിലും പച്ച ലഡു വിതരണം ചെയ്താണ് കെ.എം.സി.സി പ്രവര്‍ത്തകര്‍ സന്തോഷം പങ്കുവച്ചത്.
കേരളത്തില്‍ യു.ഡി.എഫ് വിജയം പ്രത്യേകിച്ച് മുസ്ലീം ലീഗീന്‍റെ വിജയം യു.എ.ഇയിലെ വിവിധ ഭാഗങ്ങളില്‍ ആഘോഷമാക്കി മാറ്റുകയായിരുന്നു. കെ.എം.സി.സി പ്രവര്‍ത്തകരാണ് വിവിധ ഭാഗങ്ങളില്‍ ആഘോഷങ്ങള്‍ക്ക് നേതൃത്വം നല്‍കിയത്.
കൊല്‍ക്കളിയും മുദ്രാവാക്യം വിളികളും വിജയാരവങ്ങളുമെല്ലാമായി ആഘോഷം നന്നായി കൊഴുത്തു.
മലപ്പുറത്തെ ഇടത് സ്ഥാനാര്‍ത്ഥി ടി.കെ ഹംസയുടെ പോസ്റ്റര്‍ കത്തിക്കലും ഹുസൈന്‍ രണ്ടത്താണിക്കും മഅദനിക്കും എതിരേയുള്ള മുദ്രാവാക്യം വിളികളും ഇവിടെ ഉയര്‍ന്നു.
വിവിധ ഷോപ്പിംഗ് മോളുകളിലും സൂഖുകളിലും പായസ വിതരണം നടത്തിയാണ് യു.ഡി.എഫ് പ്രവര്‍ത്തകര്‍ ആഘോഷം പങ്കുവച്ചത്.
ലീഗിന്‍റെ വിജയം ആഘോഷിക്കാന്‍ പലയിടത്തും പച്ച ലഡുവിതരണവും നടന്നു. സ്വദേശികള്‍ ഉള്‍പ്പടെയുള്ളവര്‍ക്ക് ഈ പച്ച ലഡു വിതരണം ചെയ്യാന്‍ ഇവര്‍ മറന്നില്ല.
പച്ച നിറത്തിലുള്ള വസ്ത്രങ്ങള്‍ തങ്ങളുടെ കടയ്ക്ക് മുന്നില്‍ തൂക്കിയാണ് ദുബായിലെ ചില തുണിക്കടകള്‍ ലീഗിന്‍റെ രണ്ട് മണ്ഡലങ്ങളിലെ വിജയാഘോഷത്തില്‍ പങ്കു ചേര്‍ന്നത്.
-
