പ്രഷര്‍കുക്കര്‍ ബിരിയാണി

May 24th, 2012

cooker biriyani-epathram
ബിരിയാണി ഒരു താരം തന്നെയാണ്. എപ്പോ തന്നാലും കഴിക്കാന്‍ തോന്നും. ഞാന്‍ ഇതിനു മുന്‍പും പറഞ്ഞിട്ടുണ്ട് എന്റെ ബിരിയാണി കൊതിയെ കുറിച്ചും എന്നാല്‍ ഉണ്ടാക്കാനുള്ള മടിയെ കുറിച്ചും. മടി മറ്റൊന്നും കൊണ്ടല്ല. സവാള കുന്നു പോലെ അരിയുക, ചിക്കന്‍ ഉണ്ടാക്കുക, അരി വേവിക്കുക, ഇനി ലയെര്‍ ചെയ്യുക, ഒക്കെ കഴിഞ്ഞു സിങ്കില്‍ ഉള്ള ഒരു കുന്നു പാത്രവും കഴുകുക. അങ്ങനെ ബിരിയാണി എന്ന് ഓര്‍ക്കുമ്പോ തന്നെ ‘നിന്റെ വിയര്‍പ്പ് കൊണ്ട് ഭക്ഷിക്കുക’ എന്ന ദൈവ വചനം ഓര്‍മ്മ വരും. ദൈവം തമ്പുരാന്‍ മുന്നേ കണ്ട് അറിഞ്ഞു ഉണ്ടാക്കിയ വചനമാണ് ഇതെന്നു തോന്നും. ബിരിയാണി മൂക്ക് മുട്ടെ തിന്നണമെങ്കില്‍ നന്നായി വിയര്‍പ്പോഴുക്കണം.

പക്ഷെ ഇയ്യിടെ ഞാന്‍ ഒരു ഇന്‍സ്റ്റന്റ് ബിരിയാണി പരീക്ഷിച്ചു. ആയിരം പാത്രവും പതിനായിരം ‘പ്രോസീജ്യേഴ്സും’ ഇല്ല. ഒരു പ്രഷര്‍കുക്കറില്‍ എല്ലാം കൂടെ ‘ഡിം’. :-) ഉള്ളി അരിഞ്ഞു തരാന്‍ എനിക്ക് അരുണ്‍ ഉണ്ടല്ലോ പിന്നെ എന്താ!! സംഗതികള്‍ എല്ലാം കൂടെ കുക്കറില്‍ ആക്കി, എല്ലാ പാചക ദൈവങ്ങളെയും മനസ്സില്‍ ധ്യാനിച്ച്‌ കുക്കര്‍ അടച്ചു. പ്രാര്‍ത്ഥന തുടങ്ങി. ആ അഞ്ചു മിനുറ്റ് അഞ്ചു കൊല്ലം പോലെ തോന്നി. അവസാനം കുക്കറിന്റെ പ്രഷര്‍ പോയപ്പോഴേക്കും എന്റെ പ്രഷര്‍ കുറഞ്ഞത് 200 എങ്കിലും ആയിട്ടുണ്ടാവും.. :-) തുറക്കുന്ന സമയത്ത് ഉറപ്പിച്ചു, മോളെ, ഇത് ചിക്കന്‍ ഖിച്ടി എന്ന് പറഞ്ഞു അരുണ്‍നു വിളമ്പാം. അതാണ്‌ ഈ ബിരിയാണി, കഞ്ഞിപ്പരുവം ആയാലുള്ള അറ്റകൈപ്രയോഗം. ഏതായാലും തുറന്നപ്പോള്‍ ഗംഭീര മണം. നോക്കുമ്പോ ഉണ്ട് വെള്ളം അല്‍പ്പം പോലും കൂടിയിട്ടില്ല. ചോറിനും ചിക്കനും പാകം വേവ്.. :-) അടിപൊളി സ്വാദും. ഞാന്‍ ഒരു പുലി തന്നെ!! സ്വയം പ്രഖ്യാപിച്ചു… :-) അപ്പൊ ഇനി ”നിന്റെ വിയര്‍പ്പ് കൊണ്ട് ബിരിയാണി ഭക്ഷിക്കുക” എന്ന ദൈവ വചനം മാറ്റാം.. ;-)

ചേരുവകള്‍

ബിരിയാണി അരി : 2 ഗ്ലാസ്‌ (ജീരകശാലയാണ് ബെസ്റ്റ്‌)
ചിക്കന്‍ : അര കിലോ
ഗരം മസാല : ഒരു ടീസ്പൂണ്‍
മഞ്ഞള്‍ പൊടി : ഒരു ടീസ്പൂണ്‍.
മുളക്പൊടി : ഒരു ടേബിള്‍സ്പൂണ്‍
കുരുമുളക് പൊടി : അര ടീസ്പൂണ്‍
സവാള : 2 എണ്ണം (വലുത്)
തക്കാളി : വലുത് ഒരെണ്ണം
പച്ചമുളക് : 2 എണ്ണം നെടുകെ പിളര്‍ന്ന്
ഇഞ്ചി : ചെറിയ കഷ്ണം.
വെളുത്തുള്ളി : 4 അല്ലി.
മല്ലിയില : ചെറുതായി അരിഞ്ഞത് അര കപ്പ്.
ഏലയ്ക്ക:നാല്
ഗ്രാമ്പൂ ;നാല്
കറുവാപട്ട.: ചെറിയ കഷ്ണം
നെയ്യ്‌ : 2 ടേബിള്‍സ്പൂണ്‍
എണ്ണ : 2 ടേബിള്‍സ്പൂണ്‍
അണ്ടിപ്പരിപ്പ് : 5-6 എണ്ണം
ഉപ്പ് :പാകത്തിന്
വെള്ളം :3 ഗ്ലാസ്‌ തിളപ്പിച്ചത്

തയ്യാറാക്കുന്ന വിധം

അരി കഴുകി വാലാന്‍ വയ്ക്കുക. ചിക്കന്‍ വൃത്തിയാക്കി മഞ്ഞള്‍ പൊടി, മുളക്പൊടി, കുരുമുളക് പൊടി എന്നിവ അര ടീസ്പൂണ്‍ വീതവും, മുളക് പോടി ഒരു ടേബിള്‍സ്പൂണും ഉപ്പും ചേര്‍ത്ത് നന്നായി യോജിപ്പിച്ചു വെയ്ക്കുക. ഇത് ഏകദേശം ഒരു മണിക്കൂര്‍ ഇരിക്കട്ടെ.

സവാള, തക്കാളി എന്നിവ നേര്‍മ്മയായി അരിഞ്ഞു എടുക്കുക. ഇഞ്ചി വെളുത്തുള്ളി ചതച്ചു എടുക്കുക. കുറഞ്ഞത് 3.5 ലിറ്റര്‍ ഉള്ള പ്രഷര്‍ കുക്കര്‍ ഗ്യാസില്‍ വച്ച് ചൂടാക്കുക. ഇതിലേക്ക് എണ്ണയും നെയ്യും ഒഴിക്കുക. ഏലയ്ക്ക, ഗ്രാമ്പു, കറുവാപ്പട്ട, എന്നിവ പൊട്ടിക്കുക. ഇതിലേക്ക് സവാളയും പച്ചമുളകും ചേര്‍ത്ത് വഴറ്റുക. അല്‍പ്പം ബ്രൌണ്‍ നിറം ആകുമ്പോള്‍ ഇഞ്ചിയും വെളുത്തുള്ളിയും ചേര്‍ത്ത് വഴറ്റുക. നല്ല ബ്രൌണ്‍ നിറം ആകുമ്പോള്‍ തക്കാളി ചേര്‍ത്ത് ഉടയ്ക്കുക. ഇതിലേക്ക് ബാക്കിയുള്ള മുളക് പൊടി, മഞ്ഞള്‍പ്പൊടി,ഗരംമസാലപ്പൊടി എന്നിവ ചേര്‍ത്ത് നന്നായി വഴറ്റുക. മസാല പുരട്ടി വച്ചിരിക്കുന്ന ചിക്കന്‍ ഇതിലേക്ക് ചേര്‍ത്ത് നന്നായി യോജിപ്പിക്കുക. 5-6 മിനുറ്റ് നന്നായി ഇളക്കി കൊണ്ടിരിക്കുക. ചിക്കന്‍ ഉടയരുത്. ചെറുതായി ഒന്ന് ഫ്രൈ ആയി കിട്ടിയാല്‍ മതി. അടിയില്‍ പിടിക്കാതെ സൂക്ഷിക്കുക. എന്നാല്‍ വെള്ളം ചേര്‍ക്കുകയും അരുത്.

കഴുകി വാരി വച്ചിരിക്കുന്ന അരി ഇതിലേക്ക് ചേര്‍ത്ത് ഇളക്കുക. ആവശ്യത്തിന് ഉപ്പും മല്ലിയിലയും ചേര്‍ത്ത് യോജിപ്പിക്കുക. 3 ഗ്ലാസ്‌ വെള്ളം തിളപ്പിച്ച്‌ നല്ല ചൂടോടു കൂടി ഇതിലേക്ക് ചേര്‍ക്കുക. കുക്കര്‍ അടയ്ക്കുക. ആവി വരുമ്പോള്‍ വിസില്‍ ഇടുക. വെയിറ്റ് ഇട്ടതിനു ശേഷം കൃത്യം 5 മിനുറ്റ് ഇടത്തരം തീയില്‍ പാകം ചെയ്യുക. വിസില്‍ ശ്രദ്ധിക്കേണ്ടതില്ല.  5 മിനുറ്റ് കഴിയുമ്പോള്‍ തീ ഓഫാക്കുക. ആവി പോകുന്നത് വരെ വെയിറ്റ് ചെയ്യുക. അതിനു ശേഷം മാത്രം കുക്കര്‍ തുറക്കുക. തുറക്കുമ്പോള്‍ തന്നെ ഒരു പരന്ന പാത്രത്തിലേക്ക് മാറ്റുക. ഒരു ഫോര്‍ക്ക് കൊണ്ട് ഇളക്കുക. വേണമെങ്കില്‍ സവാള വറുത്തതും കശുവണ്ടിയും കിസ്മിസും ഉപയോഗിച്ച് അലങ്കരിക്കാം. സാലഡ്‌, അച്ചാര്‍, പപ്പടം എന്നിവ ചേര്‍ത്ത് കഴിക്കാം.

- ലിജി അരുണ്‍

വായിക്കുക: , ,

3 അഭിപ്രായങ്ങള്‍ »

മിന്‍സ്ഡ് ബീഫ്‌ ബിരിയാണി

January 19th, 2012

minced beef biriyani-epathram

ബിരിയാണി തിന്നാന്‍ വല്യ ഇഷ്ടമാണ്. എന്നാല്‍ ഉണ്ടാക്കുന്ന കാര്യം ഓര്‍ക്കുമ്പോ തല കറങ്ങും. രാവിലെ മുതല്‍ അടുക്കളയില്‍ കെടന്നു നെട്ടോട്ടം ഓടണം. സവാള അരിയല്‍, ഇറച്ചി വേവിക്കല്‍, ചോറ് തയ്യാറാക്കല്‍, ബേക്കിംഗ്…ഓ… ആകെ കിട്ടുന്ന ഒരു വെള്ളിയാഴ്ച ഓഫ്‌, അടുക്കളയില്‍ തീരും… എന്നാല്‍ ബിരിയാണിയുടെ സ്വാദ് ഓര്‍ക്കുമ്പോള്‍ വയ്ക്കാതിരിക്കാനും പറ്റില്ല.. ഒരാഴ്ചയായി കുറച്ചു മിന്‍സ്ഡ് ബീഫ്‌  ഫ്രീസറില്‍ ഇരിക്കുന്നു. അരുണ്‍ കുറച്ചു ദിവസമായി കാത്തിരിക്കുന്നു, ഞാന്‍ അതിനെ എന്താ ചെയ്യാന്‍ പോകുന്നെ എന്ന് അറിയാന്‍ :-) വെള്ളിയാഴ്ച ആശാന്റെ പിടി വിട്ടു. ”ഈ ബീഫ്‌ എടുത്തു എന്തെങ്കിലും ചെയ്യുന്നുണ്ടോ ഇല്ലയോ?? ഇത് ഇരുന്നു പൂത്തു പോകും”.. ശരി.. ഇന്ന് തന്നെ അതങ്ങു പരീക്ഷിക്കാം.. അരുണിന്റെ ബീഫ്‌ പ്രേമം എനിക്ക് അറിയാവുന്നതാണ്.  അത് കൊണ്ട് അല്ലറ ചില്ലറ പ്രശ്നങ്ങള്‍ ഒന്നും പുള്ളി കണക്കാക്കുകയില്ല. ബീഫ്‌ ഏതു ഫോര്‍മിലും കഴിക്കും.. :-) ഒരു എളുപ്പ ബിരിയാണി പ്ലാന്‍ ചെയ്തു . :-) പ്രഷര്‍ കുക്കറില്‍ ഉണ്ടാക്കാം. എല്ലാം കൂടെ ചേര്‍ത്ത് ഒരു 2-3 വിസില്‍. സംഗതി റെഡി. പ്രതീക്ഷിച്ചത്ര മോശം ആയില്ല. നെയ്യും കശുവണ്ടിയും ഒന്നും ചേര്‍ത്തില്ല. പക്ഷെ നല്ല സ്വാദ്‌ ഉണ്ടായിരുന്നു.

ചേരുവകള്‍

ചെറിയ ബസ്മതി അരി – 1/2 കിലോ ( 2 ഗ്ലാസ്)
ബീഫ്‌ മിന്‍സ് ചെയ്തത്  – കാല്‍ കിലോ
സവാള – 4 വലുത് നേര്‍മ്മയായി അരിഞ്ഞത്
തക്കാളി – 3 വലുത് ചെറിയ കഷ്ണങ്ങള്‍ ആക്കിയത്
പച്ചമുളക് ചതച്ചത്  – 3 എണ്ണം (എരിവ് അനുസരിച്ച് )
ഇഞ്ചി ചതച്ചത്- 1/2 ടേബിള്‍ സ്പൂണ്‍
വെളുത്തുളളി ചതച്ചത് – 1/2 ടേബിള്‍ സ്പൂണ്‍
പുതീനയില – 6 ഇല
മല്ലിയില അരിഞ്ഞത് – 1/2 കപ്പ്‌
നാരങ്ങനീര്- 1 ടീ സ്പൂണ്‍
ഗരം മസാല പൊടി-  1 ടേബിള്‍സ്പൂണ്‍
ചുവന്ന മുളക്പൊടി – 1/2 ടീ സ്പൂണ്‍
മല്ലിപ്പൊടി – 1/2 ടീ സ്പൂണ്‍
കുരുമുളക്പൊടി –  1/2 ടീ സ്പൂണ്‍
മഞ്ഞള്‍പ്പൊടി – 1/2 ടീ സ്പൂണ്‍
തൈര് – 1 ടേബിള്‍സ്പൂണ്‍
ഉപ്പ് – പാകത്തിന്
കറുവപ്പട്ട- 4
ഗ്രാമ്പൂ-4
ഏലയ്ക്കാ-5
തക്കോലം – 2
കുരുമുളക് – ഒരു ടീസ്പൂണ്‍
എണ്ണ / നെയ്യ്‌ – 4 ടേബിള്‍സ്പൂണ്‍

തയ്യാറാക്കുന്ന വിധം

ബീഫ്‌ കഴുകി വൃത്തിയാക്കി വെള്ളം നന്നായി പിഴിഞ്ഞ് കളയുക.
പ്രഷര്‍ കുക്കറില്‍  4 ടേബിള്‍സ്പൂണ്‍ എണ്ണ /നെയ്യ് ഒഴിച്ച് ചൂടാക്കുക. കറുവപ്പട്ട, ഗ്രാമ്പൂ, ഏലയ്ക്കാ, തക്കോലം, കുരുമുളക് എന്നിവ ഇതിലേക്ക് ചേര്‍ത്ത് ഇളക്കുക. ഇത് പൊട്ടി തുടങ്ങുമ്പോള്‍ ചെറുതായി അരിഞ്ഞ ഒരു സവാള ഇതിലെക്കിട്ട് നന്നായി വഴറ്റുക. സാവാള ഒന്ന് വഴന്നു കഴിയുമ്പോള്‍ ഇതിലേക്ക് പച്ചമുളകും ഇഞ്ചിയും വെളുത്തുള്ളിയും ഇട്ട് നന്നായി ഇളക്കുക. ഇത് നല്ല ബ്രൌണ്‍ നിറമാകുമ്പോള്‍ തക്കാളി ചേര്‍ക്കുക. തക്കാളി നന്നായി വാടിയ ശേഷം ഗരംമസാലപ്പൊടി, മുളക്പൊടി, മല്ലിപ്പൊടി, മഞ്ഞള്‍പ്പൊടി, കുരുമുളക്പൊടി എന്നിവയും ചേര്‍ത്ത് വഴറ്റുക. ഇതിലേക്ക് മല്ലിയിലയും പുതിനയില അരിഞ്ഞതും ചേര്‍ത്ത് ഇളക്കുക. ഇത് മൂത്ത് വരുമ്പോള് അതിലേയ്ക്ക് ബീഫ്‌ ചേര്‍ത്ത് നന്നായി ഇളക്കുക. 5 മിനുട്ടിന് ശേഷം കഴുകി വാരിയ അരി ചേര്‍ത്ത് ഇളക്കുക. അരി രണ്ടു മിനിറ്റ് ഇളക്കുക. ആവശ്യത്തിന് ഉപ്പും 3 ഗ്ലാസ്‌ വെള്ളം ഒഴിച്ച് വെയിറ്റ് ഇട്ടു അടച്ച് 3 വിസില്‍ വരുന്നത് വരെ വേവിക്കുക. ആവി പോയിക്കഴിഞ്ഞു കുക്കര്‍ തുറന്നു ഗ്രേവി അധികമായി ഉള്ളത് ചെറുതീയില്‍ കുക്കര്‍ തുറന്നു വച്ച് ഇളക്കി വറ്റിച്ചെടുക്കുക. ഫോര്‍ക്ക് കൊണ്ട് ബിരിയാണി ഒന്ന് ഇളക്കി എടുക്കുക. കുഴയരുത്. ചെറുതായി അരിഞ്ഞ മല്ലിയില വിതറി, അച്ചാര്‍, സലാഡ്‌, പപ്പടം എന്നിവയ്ക്കൊപ്പം വിളമ്പുക.

- ലിജി അരുണ്‍

വായിക്കുക: , ,

അഭിപ്രായം എഴുതുക »

ബീഫ്‌ ബിരിയാണി

December 10th, 2011

beef biriyani-epathram

ഞാന്‍ ഒരു ബീഫ്‌ പ്രേമി അല്ലാ. എന്നാല്‍ ഒരു തികഞ്ഞ ബിരിയാണി പ്രേമിയാണ്… :-) എന്റെ ഭര്‍ത്താവ് അരുണ്‍ ആണെങ്കില്‍ ബീഫ്‌ എന്ന് കേട്ടാല്‍ കമന്നടിച്ചു വീഴും. :-) എനിക്ക് അത്ര പിടുത്തമല്ലാത്തതു കൊണ്ട് പാവം, തന്റെ ബീഫ്‌ മോഹങ്ങള്‍ ഉപേക്ഷിച്ചിരിക്കുകയാണ്.. അപ്പൊ എല്ലാവര്ക്കും സ്വീകാര്യമായ രീതിയില്‍ ബീഫിനെ അവതരിപ്പിക്കേണ്ടത് എന്റെ വലിയ ഒരു ആവശ്യമായി.. ബിരിയാണി ഏതായാലും ശരി, എനിക്ക് വലിയ ഇഷ്ടമാ..  ചിക്കന്‍, മട്ടണ്‍, ഫിഷ്‌, പ്രോണ്‍സ്, എഗ്ഗ് ഒക്കെ ട്രൈ ചെയ്തു വിജയിച്ച ചരിത്രം എനിക്കുണ്ട്. :-) എന്നാല്‍ ബീഫ്‌ ബിരിയാണി മാത്രം ഇതുവരെ പരീക്ഷിച്ചിട്ടില്ല. എന്നാല്‍ രസം ഇതല്ല. എന്റെ സ്വന്തം വീട്ടില്‍ , അതായത് വാഴക്കുളത്ത് ഏതാണ്ട് എല്ലാ ദിവസവും തന്നെ ബീഫ്‌ ഉണ്ടാകാറുണ്ട്. ലോകത്ത് ഏറ്റവും നല്ല ബീഫ്‌ കിട്ടുന്നത് അവിടെയാണ് എന്ന് ഞാന്‍ പൊങ്ങച്ചം പറയാറുണ്ട്. സത്യമാണ് കേട്ടോ. നല്ല മൃദുവായ ബീഫ്‌ ആണ് അവിടെ ലഭിക്കുന്നത്. എന്റെ മമ്മിയുടെ ബീഫ്‌ ഫ്രൈ പ്രസിദ്ധമാണ്. എന്നാല്‍ അന്നൊന്നും ബീഫ്‌ ബിരിയാണി എന്ന ആശയം തലയില്‍ ഉദിചിരുന്നില്ല.. ഇവിടെ ദുബായില്‍ കിട്ടുന്ന ബീഫ്‌ കഴുകി കഴിയുമ്പോള്‍ വെളുത്തിരിക്കും.. ചിലപ്പോ ബോണ്‍ലെസ്സ് ചിക്കന്‍ ആണോ എന്ന് സംശയം തോന്നും,.. വച്ച് കഴിഞ്ഞാല്‍ റബ്ബര്‍ പോലെ ഇരിക്കുകയും ചെയ്യും.. എന്തായാലും ശരി. ബീഫ്‌ ബിരിയാണി ഒന്ന് ട്രൈ ചെയ്തിട്ട് തന്നെ കാര്യം.. നെറ്റിലോക്കെ സെര്‍ച്ച്‌ ചെയ്തു ബീഫ്‌ ബിരിയാണി റെസിപ്പികള്‍ ഒക്കെ ഒന്ന് റെഫര്‍ ചെയ്തു. എന്തൊക്കെ ചെയ്യണം എന്ന് നോക്കി വച്ചു.. ഒരു വെള്ളിയാഴ്ച രാവിലെ പണി തുടങ്ങി..പല പല റെസിപ്പികളില്‍ നിന്നും ഞാന്‍ എന്റേതായ ഒരു വേര്‍ഷന്‍ അങ്ങ് ട്രൈ ചെയ്തു. 2 മണിക്കൂറില്‍ സംഗതി റെഡി.. കഴിച്ചു കഴിഞ്ഞപ്പോള്‍, മറ്റേതു ബിരിയാണിയെക്കാളും ഇത് കിടിലന്‍ ആയിട്ടുണ്ട് എന്ന് അരുണ്‍ന്റെ വക കമന്റും കിട്ടി.. അപ്പൊ ഈ വെള്ളിയാഴ്ചത്തെ ബിരിയാണി, ബീഫ്‌ ബിരിയാണി ആയിക്കോട്ടെ.. അല്ലെ? :-)

ചേരുവകള്‍

ചെറിയ ബസ്മതി അരി – 1 കിലോ ( 4 ഗ്ലാസ്)
ബീഫ്‌  – 1 കിലോ
സവാള – 6 വലുത് നേര്‍മ്മയായി അരിഞ്ഞത്
തക്കാളി – 4 വലുത് ചെറിയ കഷ്ണങ്ങള്‍ ആക്കിയത്
പച്ചമുളക് ചതച്ചത്  – 10 -12 എണ്ണം (എരിവ് അനുസരിച്ച് )
ഇഞ്ചി ചതച്ചത്- 1 ടേബിള്‍ സ്പൂണ്‍
വെളുത്തുളളി ചതച്ചത് – 2 ടേബിള്‍ സ്പൂണ്‍
പുതീനയില – 10 ഇല
മല്ലിയില അരിഞ്ഞത് – ഒരു കപ്പ്‌
നാരങ്ങനീര്- 2 ടീ സ്പൂണ്‍
ഗരം മസാല പൊടി-  3 ടേബിള്‍സ്പൂണ്‍
ചുവന്ന മുളക്പൊടി – 2 ടീ സ്പൂണ്‍
മല്ലിപ്പൊടി – 1 ടീ സ്പൂണ്‍
കുരുമുളക്പൊടി –  1 ടീ സ്പൂണ്‍
മഞ്ഞള്‍പ്പൊടി – അര ടീ സ്പൂണ്‍
തൈര് – 2 ടേബിള്‍സ്പൂണ്‍
ഉപ്പ് – പാകത്തിന്
കറുവപ്പട്ട- 4
ഗ്രാമ്പൂ-4
ഏലയ്ക്കാ-5
തക്കോലം – 2
കുരുമുളക് – ഒരു ടീസ്പൂണ്‍
അണ്ടിപ്പരിപ്പ് – 2 ടേബിള്‍ സ്പൂണ്‍
കിസ്മിസ് – 2 ടേബിള്‍ സ്പൂണ്‍
നെയ്യ്- 5 ടേബിള്‍സ്പൂണ്‍
എണ്ണ – 4 ടേബിള്‍സ്പൂണ്‍

തയ്യാറാക്കുന്ന വിധം

ബീഫ്‌ കഴുകി വൃത്തിയാക്കി ചെറിയ കഷ്ണങ്ങള്‍ ആയി നുറുക്കുക. ഇതിലേക്ക് അര ടേബിള്‍സ്പൂണ്‍ വെളുത്തുള്ളി ചതച്ചത്, ഒരു ടേബിള്‍സ്പൂണ്‍ ഗരം മസാലപൊടി, 2 ടീ സ്പൂണ്‍ ചുവന്ന മുളക്പൊടി, 1 ടീ സ്പൂണ്‍ മല്ലിപ്പൊടി, 1 ടീ സ്പൂണ്‍ കുരുമുളക്പൊടി, അര ടീ സ്പൂണ്‍ മഞ്ഞള്‍പ്പൊടി, 1 ടീ സ്പൂണ്‍ നാരങ്ങനീര്,  ഒരു ടേബിള്‍സ്പൂണ്‍ മല്ലിയില അരിഞ്ഞത്, 2 ടേബിള്‍സ്പൂണ്‍ തൈര്, ഉപ്പ് എന്നിവ ചേര്‍ത്ത് കൈ കൊണ്ട് നന്നായി തിരുമ്മി യോജിപ്പിക്കുക. ഇത് ഒരു മണിക്കൂര്‍ ഇങ്ങനെ വയ്ക്കുക.

ഈ സമയം കൊണ്ട് സാവാള അരിയാം. ഇനി ചോറ് തയ്യാറാക്കാം.
ഒരു പാത്രത്തില് 2 ടേബിള്‍സ്പൂണ്‍ നെയ്യൊഴിച്ച് ചൂടാക്കുക. കറുവപ്പട്ട, ഗ്രാമ്പൂ, ഏലയ്ക്കാ, തക്കോലം, കുരുമുളക് എന്നിവ ഇതിലേക്ക് ചേര്‍ത്ത് ഇളക്കുക. ഇത് പൊട്ടി തുടങ്ങുമ്പോള്‍ ചെറുതായി അരിഞ്ഞ ഒരു സവാള ഇതിലെക്കിട്ട് നന്നായി വഴറ്റുക. ബ്രൌണ്‍ കളര്‍ ആകുന്നതിനു മുന്‍പേ കഴുകി വാരി വച്ചിരിക്കുന്ന അരി ചേര്‍ത്ത് ഇളക്കുക. ഒരു 2 മിനുറ്റ് ചെറുതീയില്‍ അരി വറക്കുക. 8 ഗ്ലാസ്‌ വെള്ളം അളന്നെടുത്തു ഇതിലേക്ക് ഒഴിക്കുക. പാകത്തിന് ഉപ്പും ഒരു ടീസ്പൂണ്‍ നാരങ്ങാ നീരും ചേര്‍ത്ത് ഇളക്കി മൂടി വച്ച് വേവിക്കുക. വെള്ളം വറ്റി അരി പാകത്തിന് വേവാകുമ്പോള്‍ തീ ഓഫ്‌ ചെയ്യുക. ഫോര്‍ക്ക് കൊണ്ട് അരി ഒന്ന് ഇളക്കി എടുക്കുക. കുഴയരുത്. മൂടി വയ്ക്കണ്ട. ചോറ് ഒന്ന് തണുത്താല്‍ കട്ട കെട്ടാതെ ഇരിക്കും.

ഒരു പ്രഷര്‍കുക്കര്‍ ചൂടാക്കി അതിലേക്കു എണ്ണ ഒഴിച്ച് അരിഞ്ഞ് വച്ചിരിക്കുന്ന സവാള ഇട്ടു വഴറ്റുക. സാവാള ഒന്ന് വഴന്നു കഴിയുമ്പോള്‍ ഇതിലേക്ക് പച്ചമുളകും ഇഞ്ചിയും വെളുള്ളിയും ഇട്ട് നന്നായി ഇളക്കുക. ഇത് നല്ല ബ്രൌണ്‍ നിറമാകുമ്പോള്‍ തക്കാളി ചേര്‍ക്കുക. തക്കാളി നന്നായി വാടിയ ശേഷം ഒരു ടേബിള്‍സ്പൂണ്‍ ഗരംമസാലപ്പൊടിയും 2 ടേബിള്‍സ്പൂണ്‍ മല്ലിയിലയും പുതിനയില അരിഞ്ഞതും ചേര്‍ത്ത് ഇളക്കുക. ഇത് മൂത്ത് വരുമ്പോള് അതിലേയ്ക്ക് മസാല പുരട്ടി വച്ചിരിക്കുന്ന ബീഫ്‌ കഷ്ണങ്ങള്‍ ചേര്‍ത്ത് നന്നായി ഇളക്കുക. അര കപ്പ് വെള്ളം ഒഴിച്ച് വെയിറ്റ് ഇട്ടു അടച്ച് വെച്ച് പത്തു മിനുറ്റ് വേവിക്കുക. ആവി പോയിക്കഴിഞ്ഞു കുക്കര്‍ തുറന്നു ഗ്രേവി അധികമായി ഉള്ളത് ചെറുതീയില്‍ കുക്കര്‍ തുറന്നു വച്ച് ഇളക്കി വറ്റിച്ചെടുക്കുക. അതിനു ശേഷം ബാക്കി ഗരം മസാല, നാരങ്ങാ നീര് , ഒരു പിടി മല്ലിയില എന്നിവ ചേര്‍ത്ത് ഇളക്കി വാങ്ങി വയ്ക്കുക.

ബിരിയാണി ബേക് ചെയ്യാനുള്ള പാത്രത്തില്‍ അടിയില്‍ അല്പം നെയ്യൊഴിച്ച് ചുറ്റിച്ചു, 2-3 ലെയറുകള്‍ ആയി ചോറും ബീഫും ഇട്ടു 20 മിനുട്ട് വളരെ ചെറിയ തീയില്‍ ബേക്ക് ചെയ്തു എടുക്കുക. നെയ്യില്‍ വറുത്ത കിസ്മിസും, അണ്ടിപരിപ്പും, സവാളയും ചേര്‍ത്ത് അലങ്കരിക്കുക. അച്ചാര്‍, പപ്പടം, സാലഡ്‌, ചമ്മന്തി എന്നിവ ചേര്‍ത്ത് കഴിക്കുക.

- ലിജി അരുണ്‍

വായിക്കുക: ,

2 അഭിപ്രായങ്ങള്‍ »

സേമിയാ പായസം

November 1st, 2011

semiya payasam-epathram

ഇന്നലെ എന്റെ പിറന്നാള്‍ ആയിരുന്നു. എന്നോട് വൈകിട്ട് അടുക്കളയില്‍ കയറണ്ട, ഞാന്‍ നേരത്തേ വരും, ഡിന്നര്‍ ഉണ്ടാക്കി തരാം എന്നൊക്കെ പറഞ്ഞാണ് എന്റെ ഭര്‍ത്താവ് രാവിലെ ഓഫീസില്‍ പോയത്. അതോര്‍ത്തു രണ്ടു സുഹൃത്തുക്കളെയും ഞാന്‍ ഭക്ഷണത്തിന് വിളിച്ചു. വൈകുന്നേരം ആയപ്പോള്‍ പതിവ് പോലെ വിളിച്ചു പറയുന്നു, ”മോളെ, ഞാന്‍ ലേറ്റ് ആകും, ഡിന്നര്‍ പുറത്തു നിന്നും ആകാം.” :-( ഞാന്‍ ആണെങ്കില്‍ ഹോട്ടല്‍ ഭക്ഷണത്തോട് വല്യ താല്പര്യം ഇല്ലാത്ത ആളാണ്‌. ”വേണ്ട, വേണ്ട ഞാന്‍ ഉണ്ടാക്കികൊള്ളാം” എന്ന് പറഞ്ഞു ഞാന്‍ ഓഫീസില്‍ നിന്നും വീടെത്തി.

ലിഫ്റ്റില്‍ നിന്നും ഇറങ്ങിയപ്പോള്‍ തന്നെ നല്ല ബിരിയാണി മണം. ഹോ, നല്ല ചിക്കന്‍ ബിരിയാണി കഴിച്ചിട്ട് എത്ര ദിവസമായി. ഏതു ഫ്ലാറ്റില്‍ ആണോ ബിരിയാണി ഉണ്ടാക്കിയിരിക്കുന്നത്. ചെന്നിട്ട് ഞാനും ബിരിയാണി ഉണ്ടാക്കിയാലോ? വേണ്ടാ..ആകെ മടുത്താണ് ഓഫീസില്‍ നിന്നും വരുന്നത് . പോരാത്തതിന് ആറു കഴിഞ്ഞു സമയം. ഇനി ബിരിയാണിയും മറ്റും ഉണ്ടാക്കി വരുമ്പോള്‍ പാതിരാത്രി ആവും.. മാത്രവുമല്ല എന്റെ ഹയ  മോള്‍ ഞാന്‍ വരാന്‍ കാത്തിരിക്കുകയാണ്. മമ്മ വന്നുകഴിഞ്ഞാല്‍ ഉടനെ തന്നെ അടുക്കളയില്‍ കയറുന്നത് അവള്‍ക്കു സഹിക്കില്ല. അപ്പൊ ബിരിയാണി മോഹത്തിനെ മുളയിലെ നുള്ളി കളഞ്ഞു. എന്തെങ്കിലും തട്ടിക്കൂട്ട് പരിപാടി നടത്താം.. അതേ രക്ഷയുള്ളൂ. അങ്ങനെ ആലോചിച്ചു നടന്നു ചെന്ന് വാതില്‍ തുറന്നപ്പോള്‍, അതാ ബിരിയാണി മണം എന്റെ അടുക്കളയില്‍ നിന്നും തന്നെയാ. :-) എന്റെ കുഞ്ഞിപ്പെണ്ണിന്റെ കയ്യില്‍ ഒരു കൊച്ചു പാത്രത്തില്‍ പായസവും.. :-) മമ്മി (അമ്മായിയമ്മ )എനിക്ക് വേണ്ടി തലശ്ശേരി ബിരിയാണിയും സേമിയാപായസവും വെച്ചിരിക്കുന്നു. :-) എന്തൊരു സന്തോഷം. ഈ അടുത്ത കാലത്തെങ്ങും ഇത്രെയും ഞാന്‍ സന്തോഷിച്ചിട്ടില്ല..:-) മമ്മിയ്ക്ക് നന്ദി പറഞ്ഞു, പായസം കുടിച്ചപ്പോള്‍ എന്തൊരു സുഖം. പായസത്തിനു നല്ല സ്വാദ്. പിറന്നാളിനു മധുരം കൂടിയ പോലെ :-)ഏതായാലും പായസത്തിന്റെ ചിത്രവും മമ്മിയുടെ അടുത്ത് നിന്നും റെസിപ്പിയും എടുത്തു. ഇത് മമ്മിക്ക് ‘ഡെഡിക്കേറ്റ് ‘ ചെയ്തിരിക്കുന്നു. :-) തലശ്ശേരി ബിരിയാണി റെസിപ്പി ഞാന്‍ നേരത്തെ പോസ്റ്റ്‌ ചെയ്തിട്ടുണ്ട്.

സേമിയാ പായസം എന്ന് പറയുമ്പോള്‍, മടിയന്മാരുടെ പായസം എന്നാണ് എന്റെ ചാച്ചന്‍ കളിയാക്കുക. കാരണം പായസം ഉണ്ടാക്കുകയും വേണം എന്നാല്‍ അധികം കഷ്ട്ടപെടാന്‍ പറ്റുകയും ഇല്ല എന്നുള്ളവരുടെ പായസമാണത്രേ സേമിയ പായസം. വീട്ടില്‍ എപ്പോഴും ചെറുപയര്‍ പരിപ്പ് പായസം ആയിരുന്നു സ്റ്റാര്‍. സേമിയാ പായസം വല്ലപ്പോഴുമേ ഉണ്ടാക്കൂ. എന്നാല്‍ എനിക്ക് ഇഷ്ടപ്പെട്ട പായസങ്ങളില്‍ ഒന്നാണ് ഇത്. എളുപ്പമാണ് ഉണ്ടാക്കാന്‍ എന്ന പ്രാധാന കാരണം കൊണ്ട് തന്നെ. ഉണ്ടാക്കി നോക്കുമ്പോള്‍ മനസിലാകും. ട്രൈ ചെയ്യാം??? :-)

ചേരുവകള്‍

സേമിയ – നൂറു ഗ്രാം
പാല്‍ – അര ലിറ്റര്‍
വെള്ളം – അര കപ്പ്
പഞ്ചസാര – 4 ടേബിള്‍സ്പൂണ്‍ (മില്‍ക്ക് മെയ്ഡ് ഉണ്ടെങ്കില്‍ ഇത്രയും പഞ്ചസാര ചേര്‍ക്കണ്ടതില്ല)
നെയ്യ്‌ – രണ്ടു ടേബിള്‍സ്പൂണ്‍
കശു വണ്ടി – രണ്ടു ടേബിള്‍സ്പൂണ്‍
കിസ് മിസ്‌ – രണ്ടു ടേബിള്‍സ്പൂണ്‍
ഏലയ്ക്ക പൊടിച്ചത് – മൂന്നെണ്ണം

തയാറാക്കുന്ന വിധം

നെയ്യ്‌ ചൂടാക്കി കശുവണ്ടിയും കിസ്സ്‌ മിസ്സും വറുത്തു എടുക്കുക. സേമിയ ഇതേ നെയ്യില്‍ ചെറുതായി വറുത്തെടുക്കുക. അടിയില്‍ പിടിച്ചു കരിയാതിരിക്കാന്‍ പ്രത്യേകം ശ്രദ്ധിക്കുക. ഇതിലേക്ക് വെള്ളം തിളപ്പിച്ച്‌ ഒഴിക്കുക. സെമിയ പകുതി വേവാകുമ്പോള്‍ പാല്‍ ചേര്‍ക്കുക. ഇതിലേക്ക് ആവശ്യത്തിനു പഞ്ചസാരയും ഏലയ്ക്ക പൊടിച്ചതും ചേര്‍ത്ത്‌ ഇളക്കുക. മില്‍ക്ക് മെയ്ഡ് ഉപയോഗിക്കുകയാണെങ്കില്‍ ഈ സമയത്ത് അതും ചേര്‍ക്കാം. പാല്‍ തിളക്കുമ്പോള്‍ തീ കുറച്ചു വയ്ക്കുക. കുറുകി വരുമ്പോള്‍ തീ അണയ്ക്കുക. തണുക്കുമ്പോള്‍ പായസം അല്പം കൂടി കുറുകിയിരിക്കും. അത് കണക്കാക്കി വേണം അടുപ്പില്‍ നിന്നും വാങ്ങാന്‍. വാങ്ങിയ ശേഷം കിസ്മിസും കശുവണ്ടിയും ചേര്‍ത്ത്‌ ഇളക്കിയ ശേഷം ചെറു ചൂടോടെ വിളമ്പാം.

- ലിജി അരുണ്‍

വായിക്കുക: , , ,

1 അഭിപ്രായം »

തലശ്ശേരി ബിരിയാണി

October 18th, 2011

thalasherry biriyani-epathram

ബിരിയാണിയോട് എനിക്കൊരു പ്രത്യേക ഇഷ്ടമുണ്ട്. കാരണം വീട്ടില്‍ ബിരിയാണി എന്നും ‘സ്പെഷ്യല്‍’ ആയിരുന്നു ..വിശേഷാവസരങ്ങളില്‍ മാത്രം വയ്ക്കുന്ന ഒരു വിഭവം. അത് പിറന്നാള്‍ ആവാം, ക്രിസ്തുമസ്സ് ആവാം ഇനി ഇവ ഒന്നുമല്ലെങ്കില്‍ ഒരു ഹര്‍ത്താല്‍ ആയാലും മതി. എല്ലാവരും വീട്ടില്‍ ഉണ്ടാകുമല്ലോ. പലതരം ബിരിയാണി ഞാന്‍ കഴിച്ചിട്ടുണ്ട്. എങ്കിലും കൂട്ടത്തില് ഏറ്റവും എളുപ്പം തയ്യാറാക്കാവുന്നതും, രുചിയുള്ളതും പിന്നെയും പിന്നെയും കഴിക്കാന്‍ തോന്നുന്നതുമായ ബിരിയാണി തലശ്ശേരി ബിരിയാണിയാണ് എന്നാണ് എനിക്ക് തോന്നുന്നത്.  ഈ ബിരിയാണി ഒഴിച്ച്, കണ്ണൂര്‍ ജില്ലയില്‍പ്പെട്ട തലശ്ശേരിയുമായി എനിക്ക് ഒരു ബന്ധവും ഇല്ല.

തലശ്ശേരി ബിരിയാണി ഒന്ന് പരീക്ഷിച്ചു നോക്കു, ഇനി മറ്റൊരു ബിരിയാണിയും നിങ്ങള്ക്ക് ഇഷ്ടമാവില്ല എന്ന് ഞാന്‍ ഉറപ്പു തരാം. ;-)

ചേരുവകള്‍

1. കോഴി ഇറച്ചി- ഒരു കിലോ
2. ബിരിയാണി അരി- 3 കപ്പ്‌
3. നെയ്യ്- 3 ടേബിള്‍ സ്പൂണ്‍
4. വെജിറ്റബിള്‍ ഓയില്‍ – 5 ടേബിള്‍ സ്പൂണ്‍
5. വെളുത്തുള്ളി- 8 വലിയ അല്ലി
6. പച്ചമുളക്- 12 എണ്ണം ( എരിവ് അനുസരിച്ച്)
7. ഇഞ്ചി- 2 ഇഞ്ച് കഷ്ണം
8. തക്കാളി- 3 വലുത്
9. സവാള- 5 വലുത്
10. പുതിനയില- 3 തണ്ട്
11. മല്ലിയില – ഒരു കപ്പ്‌
12. ഗരം മസാല- ഒന്നര ടേബിള്‍ സ്പൂണ്‍
13. കറുവപ്പട്ട- 6
14. ഏലയ്ക്ക- 10
15. തക്കോലം – 3
16. ഗ്രാമ്പൂ- 10 ഗ്രാം
17. കുരുമുളക് – ഒരു ടീസ്പൂണ്‍
18. ചെറുനാരങ്ങ- ഒരെണ്ണം
19. ഉപ്പ്- പാകത്തിന്
20. ഉണക്കമുന്തിരി- 20 ഗ്രാം
21. അണ്ടിപ്പരിപ്പ്- 25 ഗ്രാം

പാകം ചെയ്യുന്ന വിധം

മസാല തയ്യാറാക്കാന്‍: ഒരു നോണ്‍ സ്റ്റിക് പാത്രത്തില്‍ എണ്ണ ഒഴിച്ച് ചുടാക്കിയതിലേക്ക് ചെറുതായി അരിഞ്ഞ 4 സവാള ചേര്‍ത്ത് നന്നായി വഴറ്റുക. അതിനുശേഷം ഇഞ്ചി, പച്ചമുളക്, വെളുത്തുള്ളി എന്നിവ ചതച്ചത് ചേര്‍ത്ത് നന്നായി വഴറ്റുക. ബ്രൌണ്‍ നിറമാകുമ്പോള്‍ കഷ്ണങ്ങളാക്കിയ തക്കാളിയും ചേര്‍ത്തിളക്കുക. തക്കാളി നന്നായി വെന്തുടയുമ്പോള്‍ അതിലേക്ക് മല്ലിയിലയും പുതിനയും ചേര്‍ത്ത് ഇളക്കി കഷ്ണങ്ങളാക്കിയ കോഴിയിറച്ചി, ഉപ്പ്, ഒരു ടേബിള്‍ സ്പൂണ്‍ ഗരം മസാല എന്നിവ ചേര്‍ത്ത് വേവിക്കുക. കോഴിയിറച്ചി മുക്കാലും വെന്തതിനുശേഷം അര ടേബിള്‍സ്പൂണ്‍ ഗരംമസാലപ്പൊടി, നാരങ്ങാനീര് എന്നിവ ചേര്‍ത്ത് ഇളക്കി മാറ്റിവെക്കുക.

റൈസ് തയ്യാറാക്കുന്ന വിധം: പാത്രത്തില്‍ നെയ്യൊഴിച്ച് അതിലേക്ക് കറുവപ്പട്ട, ഏലയ്ക്ക, തക്കോലം, ഗ്രാമ്പൂ, കുരുമുളക്  എന്നിവ ചേര്‍ത്തിളക്കുക. അതിലേക്ക് ഒരു സവാള അരിഞ്ഞതു ചേര്‍ത്ത് വഴറ്റുക. കഴുകി വെള്ളം വാര്‍ന്ന അരി ഇതിലേക്ക് ഇട്ടു ഒന്ന് വറക്കുക. 6 കപ്പ്‌ വെള്ളമൊഴിച്ച് ഉപ്പും ചേര്‍ത്ത് വെള്ളം വറ്റി തീരുന്നത് വരെ വേവിക്കുക. അതിനുശേഷം നേരത്തേ തയ്യാറാക്കിയ മസാലയും റൈസും 2-3 ലയെര്‍ ആയി സെറ്റ്‌ ചെയ്തു അര മണിക്കൂര്‍ ദം ചെയ്‌തെടുക്കുക. നെയ്യില്‍ വറുത്ത അണ്ടിപ്പരിപ്പ്, ഉണക്കമുന്തിരി, സവാള  എന്നിവ മുകളില്‍ വിതറി അലങ്കരിക്കുക.

കുറിപ്പ്  : ഞാന്‍ ബിരിയാണി അരി ജീരകശാല ആണ് ഇതില്‍ ഉപയോഗിച്ചിരിക്കുന്നത്. വെള്ളം വറ്റിച്ച് വേവിക്കുന്നതിനാല്‍ ഇത് കുഴഞ്ഞു പോകാതെ ഇരിക്കും.

- ലിജി അരുണ്‍

വായിക്കുക: , ,

3 അഭിപ്രായങ്ങള്‍ »


« ഞണ്ട് റോസ്റ്റ്‌
ദാല്‍ ഫ്രൈ »



പ്രഷര്‍കുക്കര്‍ ബിരിയാണി...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine