2011 ഓടെ ഗള്‍ഫില്‍ സാമ്പത്തിക മാന്ദ്യം പൂര്‍ണമായും അവസാനിക്കുമെന്ന് മലയാളി വ്യവസാ പ്രമുഖനും പ്രവാസി ഭാരതീയ സമ്മാന്‍ ജേതാവുമായ ഡോ. രവി പിള്ള പറഞ്ഞു. ദുബായില്‍ വാര്‍ത്താ ലേഖകരോട് സംസാരിക്കുകയായിരുന്നു അദ്ദേഹം. 2011 ആകുമ്പോള്‍ തൊഴിലാളികളെ തികയാത്ത അവസ്ഥയുണ്ടാകുമെന്നും ഇദ്ദേഹം വ്യക്തമാക്കി.

സൗദി അറേബ്യയില്‍ രവി പിള്ള മാനേജിംഗ് ഡയറക്ടറായ നാസര്‍ ഹാജിരി ഗ്രൂപ്പ് അബുദാബിയിലെ എണ്ണ പ്രകൃതി വാതക മേഖലയിലേക്ക് കൂടി പ്രവര്‍ത്തനം വ്യാപിപ്പിക്കും. 8000 പേര്‍ക്ക് പുതിയ പദ്ധതിയില്‍ തൊഴില്‍ നല്‍കുമെന്നും ഇദ്ദേഹം പറഞ്ഞു. നിലവില്‍ നാസര്‍ ഹാജിരി ഗ്രൂപ്പ് 50,000 പേര്‍ക്ക് തൊഴില്‍ നല്‍കുന്നുണ്ട്. ഇതില്‍ 80 ശതമാനവും മലയാളികളാണ്. അടുത്ത വര്‍ഷം മുതല്‍ മാധ്യമ പ്രവര്‍ത്തകര്‍ക്ക് അവാര്‍ഡുകള്‍ നല്‍കുമെന്നും രവി പിള്ള വ്യക്തമാക്കി.

ഇന്ത്യയില്‍ നിന്നുള്ള നിര്‍മ്മാതാക്കള്‍ പങ്കെടുക്കുന്ന ഇന്ത്യ ഹോം പ്രോപ്പര്‍ട്ടി എക്സ് പോ ദുബായില്‍ ആരംഭിച്ചു. രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള നിര്‍മ്മതാക്കളാണ് ഈ പ്രദര്‍ശനത്തില്‍ പങ്കെടുക്കുന്നത്.

യു.എ.ഇയിലുള്ള ഇന്ത്യക്കാരെ ഉദ്ദേശിച്ചാണ് ഇന്ത്യ ഹോം പ്രോപ്പര്‍ട്ടി എക്സ് പോ എന്ന പേരില്‍ ദുബായില്‍ പ്രദര്‍ശനം സംഘടിപ്പിച്ചിരിക്കുന്നത്. ദുബായ് റാഫിള്‍സ് ഹോട്ടലിലാണ് മേള. വിവിധ നിര്‍മ്മതാക്കളുടെ ഏറ്റവും പുതിയ പദ്ധതികള്‍ പ്രദര്‍ശനത്തിന് എത്തിയിട്ടുണ്ട്.
ഇന്ത്യയില്‍ വസ്തു വാങ്ങുന്നവര്‍ക്ക് ഏറ്റവും നല്ല അവസരമാണ് തങ്ങള്‍ ഒരുക്കിയിരിക്കുന്നതെന്ന് ശോഭാ ഡെവലപ്പേഴ്സ് എക്സികുട്ടീവ് ഡയറക്ടര്‍ ജാക്ക്ബാസ്റ്റിന്‍ ഏഷ്യാനെറ്റ് ന്യൂസിനോട് പറഞ്ഞു.

ഇന്ത്യയുടെ വിവിധ ഭാഗങ്ങളില്‍ നിന്നുള്ള 18 നിര്‍മ്മാതാക്കളാണ് ഈ പ്രോപ്പര്‍ട്ടി എക്സ് പോയില്‍ പങ്കെടുക്കുന്നത്. വിവിധ ലോണ്‍ സൗകര്യങ്ങളും മേളയോട് അനുബന്ധിച്ച് സംഘാടകര്‍ ഏര്‍പ്പെടുത്തിയിട്ടുണ്ട്. അവധി ദിനമായതിനാല്‍ കഴിഞ്ഞ ദിവസങ്ങളില്‍ സന്ദര്‍ശകരടുടെ എണ്ണം കൂടുതലായിരുന്നു.
സിറ്റി ബാങ്ക് സംഘടിപ്പിച്ച ഈ പ്രദര്‍ശനം ഞായറാഴ്ച സമാപിക്കും.

റിയാദ് സിറ്റി ഫ്ളവറില്‍ മൂന്നു മാസം നീണ്ടുനില്‍ക്കുന്ന മെഗാ സെയിലിന്‍റെ ഭാഗമായി നടക്കുന്ന പ്രതിവാര നറുക്കെടുപ്പിന്‍റെ നാലാമത്തെ ആഴ്ചയിലെ നറുക്കെടുപ്പും മൂന്നാമത്തെ ആഴ്ചയിലെ സമ്മാന വിതരണവും നടന്നു.

ദമാമില്‍ നടന്‍ ജഗന്നാഥ വര്‍മ്മയും ഹെലില്‍ ഫ്ളിരിയ ഗ്രൂപ്പ് ഓപ്പറേഷന്‍സ് വിഭാഗം മേധാവി ഫസല്‍ റഹ്മാനം സമ്മാനങ്ങള്‍ വിതരണം ചെയ്തു. പൊതുജനങ്ങളില്‍ നിന്ന് നല്ല പ്രതികരണമാണ് ലഭിക്കുന്നതെന്ന് ഫസല്‍ റഹ്മാന്‍ പറഞ്ഞു.

ജീവിത ശൈലിയില്‍ വന്ന മാറ്റമാണ് വന്ധ്യതയ്ക്ക് മുഖ്യ കാരണമെന്ന് പ്രമുഖ ഇന്‍ഫെര്‍ട്ടിലിറ്റി കണ്‍സള്‍ട്ടന്‍റായ ഡോക്ടര്‍ മുഹമ്മദ് അഷ്റഫ് പറഞ്ഞു. ദോഹയിലെ മെഡ്കെയര്‍ ക്ളിനിക്കുമായി സഹകരിച്ച് ശസ്ത്രക്രിയ സൗകര്യമുള്ള ഇന്‍ഫറെര്‍ട്ടിലിറ്റി ക്ളിനിക്ക് തുടങ്ങുന്നതുമായി ബന്ധപ്പെട്ട് നടത്തിയ വാര്‍ത്താസമ്മേളനത്തിലാണ് അദ്ദേഹം ഇക്കാര്യ പറഞ്ഞത്.

താരതമ്യേന സ്ത്രീ വന്ധ്യതയെക്കാള്‍ പുരുഷ വന്ധ്യതയാണ് ഇപ്പോള്‍ കൂടുതലെന്നും ഇതിനുള്ള ചികിത്സ നാല്‍പതു വയസ്സിനു മു‍ന്‍പു തന്നെ തുടങ്ങുന്നതാണ് ഉചിതമെന്നും അദ്ദേഹം പറഞ്ഞു.