പാലക്കാട് പുതുശ്ശേരിയില്‍ കാട്ടാന കിണറ്റില്‍ വീണു. ഇന്നലെ രാത്രി നാട്ടിലിറങ്ങിയ കാട്ടാനക്കൂട്ടത്തില്‍ നിന്നും ഒരു ആനയാണ്  പുതുശ്ശേരി പൂതക്കുളങ്ങര ക്ഷേത്രത്തിനടുത്തുള്ള കിണത്തില്‍ വീണത്. രാവിലെ ആണ് ആന കിണറ്റില്‍ വീണത്  നാട്ടുകാരുടെ ശ്രദ്ധയില്‍ പെട്ടത്. നാട്ടുകാര്‍ അറിയിച്ചതിനെ തുടര്‍ന്ന് ഫയര്‍ ഫോഴ്സും, പോലീസും സംഭവസ്ഥലത്തെത്തി. ഉയര്‍ന്ന ഉദ്യോഗസ്ഥരും, തൃശ്ശൂരില്‍ നിന്നും എലിഫെന്റ് സ്ക്ല്വാഡും സംഭവ സ്ഥലത്ത് എത്തിയിട്ടുണ്ട്.  ആനയെ മയക്കി ക്രെയിന്‍ ഉപയോഗിച്ച് ഉയര്‍ത്തുവാന്‍ ആണ് ആലോചിക്കുന്നത്. എന്നാല്‍ കാട്ടാനയായതിനാല്‍ മനുഷ്യരോടുള്ള  അതിന്റെ പ്രതികരണം എപ്രകാരം ആയിരിക്കും എന്ന് ഊഹിക്കുവാന്‍ ആകില്ല എന്നതാണ് രക്ഷാപ്രവര്‍ത്തനങ്ങള്‍ക്ക്  ശ്രമിക്കുന്നവര്‍ക്ക് പ്രധാന പ്രതിബന്ധം. ആന കിണറ്റില്‍ വീണതറിഞ്ഞ് ധാരാളം ആളുകള്‍ സ്ഥലത്തേക്ക് എത്തിക്കൊണ്ടിരിക്കുന്നു.

തിരുവനന്തപുരം : തടി പിടിക്കാന്‍ എത്തിയ കൊല്ലം നെടുമങ്കാവ്‌ ശ്രീധര്‍മ്മ ശാസ്ത ക്ഷേത്രം വക മണികണ്ഠന്‍ എന്ന ആന ഇടഞ്ഞു. കല്ലേലി നടുവത്തുമൂഴി റേഞ്ചിലെ തടി പിടിക്കുവാന്‍ കൊണ്ടു വന്നതായിരുന്നു മണികണ്ഠനെ. ചൊവ്വാഴ്ച വൈകീട്ട്‌ പാപ്പന്മാരോട്‌ ഇടഞ്ഞ് അച്ഛന്‍ കോവിലാറിന്റെ തീരത്ത്‌ നിലയുറപ്പിച്ചു. അനുനയിപ്പിക്കുവാന്‍ ചെന്ന പാപ്പന്മാരെ സമീപത്തേക്ക്‌ അടുപ്പിച്ചില്ല. രാത്രി വൈകിയും പാപ്പാന്മാര്‍ പരിശ്രമം തുടര്‍ന്നു.

പിറ്റേന്ന് പഴയ പാപ്പാന്‍ എത്തി ആനയെ അനുനയിപ്പിച്ചെങ്കിലും ജനക്കൂട്ടത്തിന്റെ ആരവം കേട്ട്‌ അവന്‍ വീണ്ടും പിണങ്ങി. ആറു നീന്തി മറുകര എത്തിയ ആനയെ എലിഫെന്റ്‌ സ്ക്വാഡ്‌ എത്തി വടം കൊണ്ട്‌ കുരുക്കിട്ട്‌ പിടിച്ചു. പിന്നീട്‌ സുരക്ഷിത സ്ഥാനത്ത്‌ തളച്ചു.

പുഴയില്‍ കുളിപ്പിക്കുവാന്‍ ഇറക്കിയ ആന വിരണ്ടോടി. പാലക്കാട് കല്‍പാത്തി പുഴയില്‍ കുളിപ്പിക്കുവാന്‍ ഇറക്കിയ മുള്ളത്ത് ഗണപതി എന്ന ആനയാണ് പിണങ്ങിയത്.

ഉച്ച തിരിഞ്ഞ് കുളിപ്പിക്കുവാന്‍ പുഴയില്‍ ഇറക്കിയ കൊമ്പന്‍ പാപ്പനെ അടിച്ചതിനെ തുടര്‍ന്നാണത്രെ ആന വിരണ്ടത്. ആനയുടെ പരാക്രമത്തില്‍ നാലു വീടുകളും, ഒരു പെട്ടിക്കടയും, ചില ഓട്ടോറിക്ഷകളും തകര്‍ക്കപ്പെട്ടു.

ആനയുടെ വിക്രിയകള്‍ കണ്ട് ജനങ്ങള്‍ പരിഭ്രാന്തരായി. ഏറെ നേരത്തെ പരിശ്രമത്തിന്റെ ഫലമായി ആനയെ തളച്ചു. ഇതിനിടയില്‍ പാപ്പാനെതിരെ ഒരു വിഭാഗം ആളുകള്‍ പ്രതിഷേധവുമായി രംഗത്തെത്തി.

കര്‍ണ്ണാടക, കേരളം, തമിഴ്നാട് എന്നീ മൂന്ന് ദക്ഷിണേന്ത്യന്‍ സംസ്ഥാനങ്ങളുടെ, പരസ്പരം ബന്ധപ്പെട്ട് കിടക്കുന്ന വന അതിര്‍ത്തിക്ക് ഉള്ളില്‍ ഉള്ള കാട്ടാനകളുടെ സെന്‍സെസ് എടുക്കുന്നു. ഒറ്റ ദിവസം കൊണ്ട് ഈ പ്രദേശത്തെ ആനകളുടെ എണ്ണം എടുക്കുവാന്‍ ആണ് പരിപാടി. പ്രദേശത്തെ വിവിധ ബ്ലോക്കുകള്‍ ആയി തിരിച്ച് ആണ് കണക്കെടുപ്പ് നടത്തുക. നിലമ്പൂര്‍ സൌത്ത്, നോര്‍ത്ത്, ആനമുടി, പെരിയാര്‍ എന്നിങ്ങനെ ആണ് ബ്ലോക്കുകള്‍ തിരിച്ചിരിക്കുന്നത്.

കേരളത്തില്‍ ആന സെന്‍സെസിന്റെ ചുമതല പെരിയാര്‍ ഫൌണ്ടേഷനാണ്. പ്രത്യേകം പരിശീലനം ലഭിച്ചവര്‍ ഇതിനായി വനത്തില്‍ പോയി നേരിട്ട് കണ്ട് ആനകളുടെ എണ്ണം, ലിംഗം, പ്രായം, കൊമ്പിന്റെ വലിപ്പം എന്നിങ്ങനെ തരം തിരിച്ച് വിശദാംശങ്ങള്‍ ശേഖരിക്കും. 2007-ല്‍ ആണ് കേരളത്തില്‍ അവസാനമായി കാട്ടാനകളുടെ സെന്‍സെസ് നടന്നിട്ടുള്ളത്.

അയിരൂര്‍ സ്വദേശി സൂര്യനാരായണന്റെ ഉടമസ്ഥതയിലുള്ള ചന്ദ്രശേഖരന്‍ എന്ന ആന ഉത്സവം കഴിഞ്ഞു നടത്തി ക്കൊണ്ടു വരവെ തളര്‍ന്നു വീണു മരിച്ചു. കൊല്ലം – തിരുമംഗലം ദേശീയ പാതയ്ക്കരികില്‍ ആണ് വെള്ളിയാഴ്ച ഉച്ചയോടെ ആന ചരിഞ്ഞത്. ആനയെ ലോറിയില്‍ കയറ്റുവാന്‍ ശ്രമിച്ചിരുന്നു. എന്നാല്‍ ആന മടി കാണിക്കുകയും അല്പ സമയം കഴിഞ്ഞ് കുഴഞ്ഞു വീഴുകയും ആണ് ഉണ്ടായത്. രാത്രി വൈകിയാണ് ക്രയിന്‍ ഉപയോഗിച്ച് ആനയുടെ ജഡം മറവു ചെയ്യുവാന്‍ കോണ്ടു പോയത്.