മത്തങ്ങാ മെഴുക്കുപുരട്ടി

January 21st, 2012

mathanga-mezhukkupuratti-epathram
മത്തങ്ങാ കൊണ്ട് ഞാന്‍ ഒരേയൊരു ഐറ്റം മാത്രമേ ഇത് വരെ പരീക്ഷിച്ചിട്ടുള്ളൂ.. മത്തങ്ങാ വന്‍പയര്‍ എരിശ്ശേരി..അതും അമ്മായിയമ്മ റെസിപ്പി ആണ്.. എന്റെ സ്വന്തം വീട്ടില്‍ മത്തങ്ങയുടെ ഏര്‍പ്പാട് ഇല്ല. അതിനു മധുരം ആണത്രേ.. ഏതായാലും ദുബായില്‍ ഞങ്ങള്‍ക്ക് ഇടയ്ക്ക് ഇടയ്ക്ക് ഉള്ള ഒരു കറിയാണ് എരിശ്ശേരി. മത്തങ്ങാ എടുത്താല്‍ ഉറപ്പിക്കാം അന്ന് എരിശ്ശേരി ആണ് എന്ന്.. കഴിഞ്ഞ ദിവസം ഓഫീസില്‍ നിന്നും ഫോണ്‍ വിളിച്ചപ്പോള്‍ മമ്മിയോട് ചോദിച്ചു ഇന്ന് എന്താ ലഞ്ചിനു പച്ചക്കറി എന്ന്.. മമ്മി പറയുന്നു ഏതോ പഴയ കറി ഇരിപ്പുണ്ട്, അത് വച്ച് അഡ്ജസ്റ്റ് ചെയ്യണം, അല്ലെങ്കില്‍ പിന്നെ ഇരിക്കുന്നത് മത്തങ്ങാ ആണ്. അതിനാണ് എങ്കില്‍ പയര്‍ വെള്ളത്തില്‍ ഇട്ടിട്ടില്ല താനും.. ആഹാ.. മത്തങ്ങയെ അങ്ങനെ വിട്ടാല്‍ പറ്റില്ലല്ലോ.. പയറിന്റെ കൂട്ടില്ലാതെ ഉണ്ടാക്കാന്‍ പറ്റില്ല എന്ന അഹങ്കാരം ഇന്ന് തീര്‍ക്കാം. ഉടനടി ഒരു റെസിപ്പി അങ്ങ് ഫോണില്‍ കൂടെ ഡിസ്കസ് ചെയ്തു. മത്തങ്ങാ മെഴുക്കുപുരട്ടി.. :-) മത്തങ്ങാ മെഴുക്കുപുരട്ടിയോ ?? ഞാന്‍ ഇത് വരെ കേട്ടിട്ടേ ഇല്ലാ.. മമ്മി കൈ മലത്തുന്നു..:-) ഒന്ന് വച്ച് നോക്ക് മമ്മി.. ഇതിഷ്ടാകും..ഉറപ്പ്‌… എന്റെ ഉറപ്പിന്മേല്‍ മമ്മി അതുണ്ടാക്കി. വൈകുന്നേരം എത്തിയപ്പോള്‍ അതാ കോമ്പ്ലിമെന്റ്സ്.. മെഴുക്കുപുരട്ടി സൂപ്പര്‍..:)

mathanga-mezhukkupuratti-with rice-epathram
ചേരുവകള്‍

മത്തങ്ങാ – അര ഇഞ്ചു നീളത്തില്‍ ചെറിയ കഷ്ണങ്ങള്‍ ആക്കിയത് – 2 കപ്പ്
ചുവന്നുള്ളി – 12 എണ്ണം
വെളുത്തുള്ളി – 6-7 അല്ലി
വറ്റല്‍ മുളക് – 8 എണ്ണം
കറിവേപ്പില – 2 തണ്ട്
വെളിച്ചെണ്ണ – 2-3 ടേബിള്‍സ്പൂണ്‍
ഉപ്പ് – പാകത്തിന്

തയ്യാറാക്കുന്ന വിധം

ചുവന്നുള്ളി, വെളുത്തുള്ളി, വറ്റല്‍ മുളക്, ഒരു തണ്ട് കറിവേപ്പില എന്നിവ ചതച്ചു എടുക്കുക. അരയരുത്. ഒരു നോണ്‍ സ്റ്റിക്ക് പാനില്‍ എണ്ണ ചൂടാക്കി ചതച്ച കൂട്ട് അതിലേക്കു ചേര്‍ത്ത് ഇളക്കുക. നന്നായി വഴന്നു കഴിയുമ്പോള്‍ മത്തങ്ങാ അരിഞ്ഞതും ഉപ്പും ബാക്കിയുള്ള കറിവേപ്പിലയും, ഒരു ടേബിള്‍സ്പൂണ്‍ വെള്ളവും കൂടി ചേര്‍ത്ത് നന്നായി ഇളക്കി, അടച്ചു വച്ച് ചെറുതീയില്‍ വേവിക്കുക. മത്തങ്ങാ വെന്തു കഴിഞ്ഞാല്‍ പാത്രം തുറന്നു വച്ച് ഇടയ്ക്ക് ഇളക്കി കൊടുത്തു 5 മിനുട്ട് കൂടി വരട്ടി എടുക്കുക. മെഴുക്കുപുരട്ടി റെഡി. കഞ്ഞിക്കും ചോറിനും ചപ്പാത്തിക്കും നല്ലതാണ്.

- ലിജി അരുണ്‍

വായിക്കുക: , , , ,

1 അഭിപ്രായം »

മിന്‍സ്ഡ് ബീഫ്‌ ബിരിയാണി

January 19th, 2012

minced beef biriyani-epathram

ബിരിയാണി തിന്നാന്‍ വല്യ ഇഷ്ടമാണ്. എന്നാല്‍ ഉണ്ടാക്കുന്ന കാര്യം ഓര്‍ക്കുമ്പോ തല കറങ്ങും. രാവിലെ മുതല്‍ അടുക്കളയില്‍ കെടന്നു നെട്ടോട്ടം ഓടണം. സവാള അരിയല്‍, ഇറച്ചി വേവിക്കല്‍, ചോറ് തയ്യാറാക്കല്‍, ബേക്കിംഗ്…ഓ… ആകെ കിട്ടുന്ന ഒരു വെള്ളിയാഴ്ച ഓഫ്‌, അടുക്കളയില്‍ തീരും… എന്നാല്‍ ബിരിയാണിയുടെ സ്വാദ് ഓര്‍ക്കുമ്പോള്‍ വയ്ക്കാതിരിക്കാനും പറ്റില്ല.. ഒരാഴ്ചയായി കുറച്ചു മിന്‍സ്ഡ് ബീഫ്‌  ഫ്രീസറില്‍ ഇരിക്കുന്നു. അരുണ്‍ കുറച്ചു ദിവസമായി കാത്തിരിക്കുന്നു, ഞാന്‍ അതിനെ എന്താ ചെയ്യാന്‍ പോകുന്നെ എന്ന് അറിയാന്‍ :-) വെള്ളിയാഴ്ച ആശാന്റെ പിടി വിട്ടു. ”ഈ ബീഫ്‌ എടുത്തു എന്തെങ്കിലും ചെയ്യുന്നുണ്ടോ ഇല്ലയോ?? ഇത് ഇരുന്നു പൂത്തു പോകും”.. ശരി.. ഇന്ന് തന്നെ അതങ്ങു പരീക്ഷിക്കാം.. അരുണിന്റെ ബീഫ്‌ പ്രേമം എനിക്ക് അറിയാവുന്നതാണ്.  അത് കൊണ്ട് അല്ലറ ചില്ലറ പ്രശ്നങ്ങള്‍ ഒന്നും പുള്ളി കണക്കാക്കുകയില്ല. ബീഫ്‌ ഏതു ഫോര്‍മിലും കഴിക്കും.. :-) ഒരു എളുപ്പ ബിരിയാണി പ്ലാന്‍ ചെയ്തു . :-) പ്രഷര്‍ കുക്കറില്‍ ഉണ്ടാക്കാം. എല്ലാം കൂടെ ചേര്‍ത്ത് ഒരു 2-3 വിസില്‍. സംഗതി റെഡി. പ്രതീക്ഷിച്ചത്ര മോശം ആയില്ല. നെയ്യും കശുവണ്ടിയും ഒന്നും ചേര്‍ത്തില്ല. പക്ഷെ നല്ല സ്വാദ്‌ ഉണ്ടായിരുന്നു.

ചേരുവകള്‍

ചെറിയ ബസ്മതി അരി – 1/2 കിലോ ( 2 ഗ്ലാസ്)
ബീഫ്‌ മിന്‍സ് ചെയ്തത്  – കാല്‍ കിലോ
സവാള – 4 വലുത് നേര്‍മ്മയായി അരിഞ്ഞത്
തക്കാളി – 3 വലുത് ചെറിയ കഷ്ണങ്ങള്‍ ആക്കിയത്
പച്ചമുളക് ചതച്ചത്  – 3 എണ്ണം (എരിവ് അനുസരിച്ച് )
ഇഞ്ചി ചതച്ചത്- 1/2 ടേബിള്‍ സ്പൂണ്‍
വെളുത്തുളളി ചതച്ചത് – 1/2 ടേബിള്‍ സ്പൂണ്‍
പുതീനയില – 6 ഇല
മല്ലിയില അരിഞ്ഞത് – 1/2 കപ്പ്‌
നാരങ്ങനീര്- 1 ടീ സ്പൂണ്‍
ഗരം മസാല പൊടി-  1 ടേബിള്‍സ്പൂണ്‍
ചുവന്ന മുളക്പൊടി – 1/2 ടീ സ്പൂണ്‍
മല്ലിപ്പൊടി – 1/2 ടീ സ്പൂണ്‍
കുരുമുളക്പൊടി –  1/2 ടീ സ്പൂണ്‍
മഞ്ഞള്‍പ്പൊടി – 1/2 ടീ സ്പൂണ്‍
തൈര് – 1 ടേബിള്‍സ്പൂണ്‍
ഉപ്പ് – പാകത്തിന്
കറുവപ്പട്ട- 4
ഗ്രാമ്പൂ-4
ഏലയ്ക്കാ-5
തക്കോലം – 2
കുരുമുളക് – ഒരു ടീസ്പൂണ്‍
എണ്ണ / നെയ്യ്‌ – 4 ടേബിള്‍സ്പൂണ്‍

തയ്യാറാക്കുന്ന വിധം

ബീഫ്‌ കഴുകി വൃത്തിയാക്കി വെള്ളം നന്നായി പിഴിഞ്ഞ് കളയുക.
പ്രഷര്‍ കുക്കറില്‍  4 ടേബിള്‍സ്പൂണ്‍ എണ്ണ /നെയ്യ് ഒഴിച്ച് ചൂടാക്കുക. കറുവപ്പട്ട, ഗ്രാമ്പൂ, ഏലയ്ക്കാ, തക്കോലം, കുരുമുളക് എന്നിവ ഇതിലേക്ക് ചേര്‍ത്ത് ഇളക്കുക. ഇത് പൊട്ടി തുടങ്ങുമ്പോള്‍ ചെറുതായി അരിഞ്ഞ ഒരു സവാള ഇതിലെക്കിട്ട് നന്നായി വഴറ്റുക. സാവാള ഒന്ന് വഴന്നു കഴിയുമ്പോള്‍ ഇതിലേക്ക് പച്ചമുളകും ഇഞ്ചിയും വെളുത്തുള്ളിയും ഇട്ട് നന്നായി ഇളക്കുക. ഇത് നല്ല ബ്രൌണ്‍ നിറമാകുമ്പോള്‍ തക്കാളി ചേര്‍ക്കുക. തക്കാളി നന്നായി വാടിയ ശേഷം ഗരംമസാലപ്പൊടി, മുളക്പൊടി, മല്ലിപ്പൊടി, മഞ്ഞള്‍പ്പൊടി, കുരുമുളക്പൊടി എന്നിവയും ചേര്‍ത്ത് വഴറ്റുക. ഇതിലേക്ക് മല്ലിയിലയും പുതിനയില അരിഞ്ഞതും ചേര്‍ത്ത് ഇളക്കുക. ഇത് മൂത്ത് വരുമ്പോള് അതിലേയ്ക്ക് ബീഫ്‌ ചേര്‍ത്ത് നന്നായി ഇളക്കുക. 5 മിനുട്ടിന് ശേഷം കഴുകി വാരിയ അരി ചേര്‍ത്ത് ഇളക്കുക. അരി രണ്ടു മിനിറ്റ് ഇളക്കുക. ആവശ്യത്തിന് ഉപ്പും 3 ഗ്ലാസ്‌ വെള്ളം ഒഴിച്ച് വെയിറ്റ് ഇട്ടു അടച്ച് 3 വിസില്‍ വരുന്നത് വരെ വേവിക്കുക. ആവി പോയിക്കഴിഞ്ഞു കുക്കര്‍ തുറന്നു ഗ്രേവി അധികമായി ഉള്ളത് ചെറുതീയില്‍ കുക്കര്‍ തുറന്നു വച്ച് ഇളക്കി വറ്റിച്ചെടുക്കുക. ഫോര്‍ക്ക് കൊണ്ട് ബിരിയാണി ഒന്ന് ഇളക്കി എടുക്കുക. കുഴയരുത്. ചെറുതായി അരിഞ്ഞ മല്ലിയില വിതറി, അച്ചാര്‍, സലാഡ്‌, പപ്പടം എന്നിവയ്ക്കൊപ്പം വിളമ്പുക.

- ലിജി അരുണ്‍

വായിക്കുക: , ,

അഭിപ്രായം എഴുതുക »

ഷാര്‍ജ ഷെയ്ക്ക്

January 16th, 2012

sharjah shake-epathram
എനിക്ക് മില്‍ക്ക് ഷെയ്ക്കുകള്‍ വല്യ താല്‍പ്പര്യം ഇല്ലാ. ജ്യൂസ്‌ ആണ് ഇഷ്ടം. കഴിഞ്ഞ ദിവസം വിശന്നു വീട്ടില്‍ എത്തിയപ്പോള്‍ അതാ കുറച്ചു ചിക്കു മേടിച്ചത് നന്നായി പഴുത്ത് ഇരിക്കുന്നു. ഫ്രിഡ്ജില്‍ ‘സ്കിംഡ് മില്‍ക്കും’. പഞ്ചസാരയ്ക്ക് പകരം അല്പം തേന്‍ ഒഴിക്കാം. ഒരു ഷെയ്ക്ക് അടിച്ചു നോക്കിയാലോ.. ചിക്കുവിനെ കൂടാതെ ഒരു പഴവും കൂടെ അടിക്കാം.. :) അങ്ങനെ നോടിയിടയ്ക്കുള്ളില്‍ എന്റെ ‘ദുബായ് ഷെയ്ക്ക്’ റെഡി ആയി. വലിയ ഡിമാന്‍ഡ് കാരണം എനിക്ക് അല്പം മാത്രമേ കിട്ടിയുള്ളൂ. എന്തായാലും നല്ല സ്വാദ് ഉണ്ടായിരുന്നു.

ചേരുവകള്‍

ചിക്കു (സപ്പോര്‍ട്ട) നന്നായി പഴുത്തത് – 2 എണ്ണം
ചെറുപഴം നന്നായി പഴുത്തത് – 1 എണ്ണം
പാല്‍ – 2 ഗ്ലാസ്‌
തേന്‍ – 1 ടേബിള്‍സ്പൂണ്‍
വാനില എസ്സെന്‍സ് – കാല്‍ ടീസ്പൂണ്‍

തയ്യാറാക്കുന്ന വിധം

ചിക്കുവും ചെറുപഴവും ചെറുതായി അരിഞ്ഞു മിക്സിയില്‍ അര ഗ്ലാസ് പാല്‍ ചേര്‍ത്ത് അടിക്കുക. ഇതിലേക്ക് തേനും, വാനില എസ്സെന്സും ബാക്കിയുള്ള പാലും ചേര്‍ത്ത് വീണ്ടും അടിക്കുക. മധുരം കൂടുതല്‍ വേണമെങ്കില്‍ അല്പം പഞ്ചസാരയും ചേര്‍ത്ത് അടിക്കാം. നീണ്ട ഗ്ലാസുകളില്‍ ഒഴിച്ച് മുകളില്‍ അല്‍പ്പം തേന്‍ ചുറ്റിച്ച് ഒഴിച്ച് അലങ്കരിച്ചു വിളമ്പുക.

കുറിപ്പ് : വാനില എസ്സെന്സിനു പകരം 1-2 ഏലയ്ക്ക പൊടിച്ചത് ചേര്‍ത്താലും നന്നായിരിക്കും.

- ലിജി അരുണ്‍

വായിക്കുക: , , , , ,

അഭിപ്രായം എഴുതുക »

ചെറുപയര്‍ ദോശ

January 9th, 2012

moong dal dosa-epathram
ഇയ്യിടെയായി വെയിറ്റ്‌ കൂടുന്നുണ്ടോ എന്നൊരു സംശയം. അരിയാഹാരം  കൂടുതല്‍ കഴിക്കുന്നത്‌ കൊണ്ടാണെന്ന് തോന്നുന്നു. :-( ഭക്ഷണം  നിയന്ത്രിക്കുക, അല്ലാതെ എന്ത് ചെയ്യാന്‍. അപ്പൊ ഇനി അങ്ങോട്ട്‌ പോഷക സമൃദ്ധവും, ആരോഗ്യകരവും, പൊണ്ണത്തടി വയ്പ്പിക്കാത്തതും ആയ ഭക്ഷണത്തിനു പ്രാധാന്യം കൊടുക്കണമല്ലോ.. അത് കൊണ്ട് പതിവ് ബ്രേക്ക്ഫാസ്റ്റ്‌ വിഭവങ്ങളായ അപ്പം, പുട്ട്, ഇഡ്ഡലി എന്നീ അരി വിഭവങ്ങള്‍ക്ക് ഒരു തല്ക്കാല റെസ്റ്റ് കൊടുക്കാം. (എത്ര ദിവസം ഉണ്ടാകുമോ ഈ ആവേശം.. :-))

ഇന്നത്തെ ഐറ്റം ചെറുപയര്‍ ദോശയും സാമ്പാറും..തെലുങ്കില്‍ ഇതിനു പേസരട്ട് എന്നാണ് പറയുന്നത്. വളരെയധികം പോഷകമൂല്യമുള്ള ഒരു പയര്‍ വര്‍ഗ്ഗമാണ് ചെറുപയര്‍. ഇതില്‍ അന്നജം, കൊഴുപ്പ് ,നാരുകള്‍, വിറ്റാമിന്‍ എ, വിറ്റാമിന്‍ ബി, കാല്‍സിയം, മഗ്നീഷ്യം, ഫോസ്ഫറസ്, സോഡിയം എന്നി അടങ്ങിയിട്ടുണ്ട്. ചെറുപയര്‍ ദോശ ഉണ്ടാക്കാന്‍ വളരെ എളുപ്പമാണ്. സാധാ ദോശ പോലെ തലേ ദിവസം അരച്ച് വയ്ക്കണ്ട. ഉണ്ടാക്കാന്‍ ഉദ്ദേശിക്കുന്നതിനു 3-4 മണിക്കൂര്‍ മുന്‍പേ ചെറുപയര്‍ പരിപ്പ് വെള്ളത്തില്‍ കുതിര്‍ക്കാന്‍ ഇടണം എന്ന് മാത്രം. ഇത് വരെ ഞാന്‍ ചപ്പാത്തിക്കു ഒരു കറി ആയിട്ടും, ഖിച്ടി ഉണ്ടാക്കുവാനും മാത്രമേ ചെറുപയര്‍ പരിപ്പ് ഉപയോഗിച്ചിട്ടുള്ളൂ. ആദ്യമായാണ്‌ ദോശ പരീക്ഷിച്ചത്. നന്നായിരുന്നു. ഇടയ്ക്ക് ഒരു ചേഞ്ച്‌ നു നല്ലതാണ്. ഒന്ന് ട്രൈ ചെയ്തു നോക്കു.. :-)

ചേരുവകള്‍:

ചെറുപയര്‍ പരിപ്പ്  – 2 ഗ്ലാസ്‌
ചുവന്നുള്ളി – 4 എണ്ണം
പച്ചമുളക് ചെറുതായി അരിഞ്ഞത്  – 1 വലുത്
ഇഞ്ചി ചെറുതായി അരിഞ്ഞത്- അര ഇഞ്ചു കഷ്ണം
കായം – അര ടീസ്പൂണ്‍ (ആവശ്യമെങ്കില്‍ മാത്രം)
ഉപ്പ് – പാകത്തിന്
മല്ലിയില ചെറുതായി അരിഞ്ഞത് – 1/4 കപ്പ്
സവാള ചെറുതായി അരിഞ്ഞത് – ഒരു വലുത്
നല്ലെണ്ണ – പാകത്തിന്

പാകം ചെയ്യുന്ന വിധം:

ചെറുപയര്‍ മൂന്നു നാല് മണിക്കൂര്‍ വെള്ളത്തില്‍ കുതിര്‍ത്ത് ഇടുക. പിന്നീട് വെള്ളം വാര്‍ന്നു കളയുക. ഇത് മിക്സിയില്‍ ഇട്ടു കാല്‍ ഗ്ലാസ്‌ വെള്ളം, ചുവന്നുള്ളി, ഇഞ്ചി, കായം എന്നിവ ചേര്‍ത്ത് നന്നായി അരച്ചെടുക്കണം. സാധാരണ ദോശ ഉണ്ടാക്കുന്ന അയവില്‍ അരച്ചെടുക്കുക. ഇതിലേക്ക്  സവാള, മല്ലിയില, ഉപ്പ് എന്നിവ ചേര്‍ത്ത് നന്നായി യോജിപ്പിക്കുക. ആവശ്യമെങ്കില്‍ അല്പം വെള്ളം ചേര്‍ക്കാം. ദോശക്കല്ലില്‍ എണ്ണ തടവി ദോശ ചുട്ടെടുക്കുക. സാമ്പാര്‍, തേങ്ങാ ചമ്മന്തി, തക്കാളി ചമ്മന്തി എന്നിവയോടുകൂടി ചൂടോടെ കഴിക്കുക.

- ലിജി അരുണ്‍

വായിക്കുക: , , ,

1 അഭിപ്രായം »

ചൂരക്കറി

January 3rd, 2012


tuna-curry-epathram

എന്റെ വീട്ടില്‍ അധികം മേടിക്കാത്ത ഒരു മീനാണ് ചൂര. അതിന്റെ കറുപ്പ് നിറം കാണുമ്പോ മേടിക്കാന്‍ തോന്നാറില്ല. എന്നാല്‍ വളരെ അധികം പോഷക ഗുണമുള്ള ഒരു മീനാണ് ചൂര. വെള്ള ചൂര കിട്ടും, അത് കൊണ്ട് ഈ കറി ഒന്ന് ട്രൈ ചെയ്തു നോക്ക്…

ചെറിയ കഷണങ്ങളാക്കിയ ചൂര അരക്കിലോ
മുളക്‌പൊടി രണ്ട് ടീസ്പൂണ്‍
കാശ്മീരി മുളക്‌പൊടി ഒരു ടീസ്പൂണ്‍
മഞ്ഞള്‍പ്പൊടി കാല്‍ ടീസ്പൂണ്‍
ഇഞ്ചി-വെളുത്തുള്ളി അരിഞ്ഞത് രണ്ട് ടീസ്പൂണ്‍
ചെറിയ ഉള്ളി അരിഞ്ഞത് മൂന്ന് ടീസ്പൂണ്‍
കുടംപുളി രണ്ട്
ഉലുവപ്പൊടി കാല്‍ ടീസ്പൂണ്‍

അരകപ്പ് ഉപ്പുവെള്ളത്തില്‍ കുടംപുളി കുതിര്‍ത്തുവെയ്ക്കുക. മുളക്‌പൊടിയും മഞ്ഞള്‍പ്പൊടിയും കുഴമ്പാക്കുക. ചീനച്ചട്ടിയില്‍ എണ്ണ ചൂടാക്കി കടുക് പൊട്ടിച്ച് ഒരു കതിര്‍പ്പ് കറിവേപ്പിലയിടുക. ഇതിലേക്ക് ഇഞ്ചി-വെളുത്തുള്ളി പേസ്റ്റ് ചേര്‍ത്ത് വഴറ്റുക. അരിഞ്ഞ ചെറിയ ഉള്ളി ചേര്‍ത്ത് ബ്രൗണ്‍ നിറമാവും വരെ വറുക്കുക. മുളക്-മഞ്ഞള്‍ പേസ്റ്റ് ചേര്‍ത്ത് എണ്ണ തെളിയുംവരെ ഇളക്കുക. അരക്കപ്പ് വെള്ളവും കുടംപുളി ജ്യുസും ചേര്‍ക്കണം. ഒരു മിനുട്ട് തിളപ്പിച്ചശേഷം മീന്‍കഷ്ണങ്ങള്‍ ചേര്‍ക്കാം. ശേഷം ഉലുവപ്പൊടി ചേര്‍ത്ത് പത്തുമിനുട്ട് ചെറുതീയില്‍ വേവിക്കണം. ആവശ്യമെങ്കില്‍ അല്‍പ്പം വെള്ളം ചേര്‍ക്കാം. അടുപ്പില്‍ നിന്ന് വാങ്ങുന്നതിന് മുന്‍പ് കറിവേപ്പിലയും വെളിച്ചെണ്ണയും ചേര്‍ക്കുക. കുറച്ച് നേരം അടച്ച് വെച്ചിട്ട് വേണം വാങ്ങാന്‍. മണ്‍ചട്ടിയില്‍ പാകം ചെയ്ത് ഒരു ദിവസം കഴിഞ്ഞ് ഉപയോഗിക്കുമ്പോഴാണ് സ്വാദ്.

റെസിപ്പി അയച്ചു തന്നത് – കെ. പി. കുമാര്‍

- ലിജി അരുണ്‍

വായിക്കുക: ,

അഭിപ്രായം എഴുതുക »

Page 5 of 12« First...34567...10...Last »

« Previous Page« Previous « നെയ്ച്ചോറ്
Next »Next Page » ചെറുപയര്‍ ദോശ »



പ്രഷര്‍കുക്കര്‍ ബിരിയാണി...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine