കണ്ണൂര്‍: 1993-ലെ മുംബൈ സ്ഫോടനക്കേസിലെ പ്രതി മനോജ് ലാല്‍ ബുവാരിലാല്‍ എന്ന മുഹമ്മദ് ഏലിയാസ് മുന്ന കണ്ണൂരില്‍ അറസ്റ്റിലായി. മുഹമ്മദ് ഏലിയാസ് കണ്ണൂരില്‍ ഭാര്യവീട്ടില്‍ കഴിയുന്നുണ്ടെന്ന രഹസ്യ വിവരത്തെ തുടര്‍ന്ന് നടത്തിയ സാഹസികമായ നീക്കത്തിലൂടെ ഇന്ന് പുലര്‍ച്ചയോടെ ആണ് അത്താണിക്കുന്നിലെ വീട്ടില്‍ നിന്നും ഇയാളെ പിടികൂടിയത്. ദാവൂദ് ഇബ്രാഹിമിന്റെ അടുത്ത അനുയായിയാണ് ഇയാള് എന്ന് കരുതുന്നു. സ്ഫോടനക്കേസില്‍ 13 വര്‍ഷം ജയിലില്‍ കഴിഞ്ഞ ഇയാള് പുറത്തിറങ്ങി ഒളിവില്‍ പോകുകയായിരുന്നു. 1993 മാര്‍ച്ച് 12 നു മുംബൈ നഗരത്തില്‍ 13 ഇടങ്ങളിലായി നടന്ന സ്ഫോടനത്തില്‍ 257 പേര്‍ മരിക്കുകയും നിരവധി പേര്‍ക്ക് ഗുരുതരമായി പരിക്കേല്‍ക്കുകയുംചെയ്തിരുന്നു.
മനോജ് ലാല്‍ ബുവാരിയെന്ന ഇയാള് നന്നേ ചെറുപ്പത്തിലെ ഇസ്ലാം മതം സ്വീകരിച്ച് മുഹമ്മദ് ഏലിയാസ് ആകുകയായിരുന്നു. കണ്ണൂര്‍ സ്വദേശിനിയായ റസിയയെ 2008-ല്‍ വിവാഹം കഴിച്ചു.
- എസ്. കുമാര്‍
