തിരുവനന്തപുരം : സംസ്ഥാനത്തെ ഓട്ടോ റിക്ഷാ, ടാക്സി നിരക്കുകൾ 2027 ജനുവരി മുതൽ വർദ്ധിക്കും.
നിരക്ക് പരിഷ്കരണം ആവശ്യപ്പെട്ട് ഓട്ടോ-ടാക്സി സേവനങ്ങളുടെ 24 മണിക്കൂര്‍ പണി മുടക്ക് നടത്തും എന്നുള്ള ഓട്ടോ-ടാക്സി യൂണിയനുകളുടെ പ്രഖ്യാപന ത്തിനു പിന്നാലെ ഗതാഗത വകുപ്പു മന്ത്രി സി. പി. ജോണ്‍, യൂണിയൻ നേതാക്കളുമായി നടത്തിയ ചര്‍ച്ചയുടെ അടിസ്ഥാനത്തിലാണ് നിരക്ക് വർദ്ധന തീരുമാനം എടുത്തത്. ഇതോടെ ഓട്ടോ-ടാക്സി പണിമുടക്ക് പിന്‍ വലിക്കാന്‍ തീരുമാനിച്ചിട്ടുണ്ട്.
ഓട്ടോ റിക്ഷയുടെ നിരക്ക് നിലവിലെ മിനിമം ചാർജ്ജ് 30 രൂപയിൽ നിന്നും 50 രൂപയാക്കി ഉയർത്തണം ടാക്സിയുടെത് 250 രൂപയില്‍ നിന്നും 300 രൂപയാക്കണം എന്നുമാണ് തൊഴിലാളി യൂണിയനുകളുടെ ആവശ്യം.
എന്നാൽ നിരക്ക് വർദ്ധന പഠിക്കാൻ സർക്കാർ കമ്മിഷനെ നിയോഗിക്കും. അവർ നൽകുന്ന റിപ്പോർട്ടിന്റെ അടിസ്ഥാനത്തിൽ ജനുവരി ഒന്ന് മുതൽ എത്ര രൂപയാണ് വർദ്ധിപ്പിക്കുക എന്ന കാര്യത്തിൽ തീരുമാനം എടുക്കും.
നിരക്ക് വർദ്ധന കൂടാതെ ഓട്ടോറിക്ഷാ, ടാക്സി ഡ്രൈവർമാർക്ക് ഇ. എസ്. ഐ. അനുവദിക്കുക, മഞ്ഞ ബോർഡ് വെക്കാതെ ഓടുന്ന ടൂ വീലർ ടാക്‌സികളെ നിയന്ത്രിക്കുക, ഹോട്ടലുകളിലും മറ്റും ഡ്രൈവർ മാർക്ക് വിശ്രമ മുറി ഒരുക്കുക തുടങ്ങി തൊഴിലാളി യൂണിയനുകൾ മുന്നോട്ടു വെച്ച ആവശ്യങ്ങളും സർക്കാർ അംഗീകരിച്ചു.
