ന്യൂഡല്‍ഹി : ക്യാന്‍സര്‍ രോഗികള്‍ക്ക് ഏറെ ആശ്വാസം പകരുന്ന നടപടിയുമായി കേന്ദ്രം. രാജ്യത്ത് ക്യാന്‍സര്‍ മരുന്നുകളുടെ വില നിയന്ത്രണം നവംബർ 9 മുതൽ പ്രാബല്യത്തില്‍ വന്നു. സർക്കാർ ട്രേഡ് മാർജിനുകൾ 30% വരെ വില കുറക്കും. അമിതമായ വ്യാപാര മാർജിൻ പ്രശ്ന പരിഹാരത്തിനായി 137 നോൺ-ഷെഡ്യൂൾഡ് ക്യാൻസർ വിരുദ്ധ മരുന്നുകളുടെ ലാഭ വിഹിതം എം. ആര്‍. പി. യുടെ 30 ശതമാനത്തില്‍ നിന്നും കൂടരുത് എന്നുള്ള എൻ. പി. പി. എ. (നാഷണൽ ഫാർമസ്യൂട്ടിക്കൽ പ്രൈസിംഗ് അതോറിറ്റി) യുടെ നിർദ്ദേശ പ്രകാരമാണ് വില കുറച്ചത്.

പുതുക്കിയ എം. ആര്‍. പി. രേഖപ്പെടുത്തി മരുന്നുകള്‍ വിപണിയില്‍ എത്തിച്ചു. ജീവന്‍ രക്ഷാ മരുന്നുകളും ചികിത്സകളും സാധാരണക്കാരായ കൂടുതൽ ആളുകളിലേക്ക് എത്തിക്കുക, രോഗികളുടെ സാമ്പത്തിക ഭാരം കുറക്കുക തുടങ്ങിയവ ലക്‌ഷ്യം വെച്ച് കൊണ്ട് നടപ്പിലാക്കുന്ന പദ്ധതി വഴി സര്‍ക്കാര്‍-സ്വകാര്യ ആശുപത്രികളിലും ചില്ലറ മരുന്ന് കട കളിലും ഈ പുതുക്കിയ വിലകള്‍ നടപ്പാക്കൽ നിർബ്ബന്ധമാണ് എന്നും നിർദ്ദേശം നൽകിയിട്ടുണ്ട്.

ചില മരുന്നുകളുടെ വിലയില്‍ 96 ശതമാനം വരെ കുറവു വരുത്തി. വില നിയന്ത്രണ പട്ടികയില്‍ ഉള്‍പ്പെടാത്ത 137 ക്യാൻസർ മരുന്നുകളുടെ ലാഭ വിഹിതം 30 ശതമാനം എന്ന് പരിമിതപ്പെടുത്തി. ബ്രാന്‍ഡഡ്, പേറ്റന്റ് ഉള്ള 543 മരുന്നുകളുടെ വിലയിലും കുറവ് വരുത്തി. അതുവഴി അവയുടെ വിലയില്‍ 20 മുതല്‍ 70 ശതമാനം വരെ കുറവ് വരും.