മുംബൈ ദുരന്തത്തിനു പിന്നില് രാജ്യത്തിനു പുറത്തു നിന്നുള്ളവര് മാത്രമല്ലെന്ന് സൂചനകള്. പിടിയിലായ ഭീകരന് അജ്മലില് നിന്നും അന്വേഷണ സംഘത്തിനു ലഭിച്ച തെളിവുകള് പ്രകാരം ആക്രമണ പരിപാടികള് ആസൂത്രണം ചെയ്യുന്നതിനായി 2007 ജൂണില് രണ്ട് വിദേശികള് ഇന്ത്യയില് എത്തിയിരുന്നു എന്നും അവര്ക്ക് ചില തദ്ദേശവാസികളുടെ സഹായം ലഭിച്ചിരുന്നതായും വ്യക്തമായി. അല് ഖായിദ ബാലിയില് നടത്തിയ ആക്രമണത്തിന്റെ സൂത്ര ധാരനായിരുന്നു മുംബൈ സ്ഫോടനത്തിനും രൂപരേഖ തയ്യാറാക്കിയത്.
കഴിഞ്ഞ ജൂലായില് പാക്കിസ്ഥാനില് നടത്തിയ ചാവേര് പരിശീലന പരിപാടിയില് പങ്കെടുത്ത 40 അംഗ സംഘത്തിലെ 15 ഭീകരരാണത്രേ ആക്രമണം അഴിച്ചു വിട്ടത്. സ്ഫോടന പരമ്പരകള് ആസൂത്രണം ചെയ്യുന്നതിനായി മുംബൈയില് വിവിധ സ്ഥലങ്ങളിലായി താമസിച്ചു വന്ന ഇവര്ക്ക് ദാവൂദ് ഇബ്രാഹിമുമായി ബന്ധമുണ്ടെന്നും വ്യക്തമായി. ഇതെക്കുറിച്ചെല്ലാം ചില മുന്നറിയിപ്പുകള് പല കേന്ദ്രങ്ങളില് നിന്നും ലഭിച്ചിട്ടും കാര്യമായ അന്വേഷണങ്ങള് നടന്നില്ലെന്ന പ്രതിഷേധം പരക്കെ ഉയരുന്നുണ്ട്.
