തിരുവനന്തപുരം : ആറ്റിങ്ങല് സമദ് ആശുപത്രിയില് വന്ധ്യതാ ചികിത്സയില് കഴിഞ്ഞിരുന്ന യുവതി മരണമടഞ്ഞത് ചികിത്സയിലെ പിഴവ് മൂലമാണെന്ന് കണ്ടെത്തിയ കേരള സംസ്ഥാന ഉപഭോക്തൃ തര്ക്ക പരിഹാര കമ്മീഷന് യുവതിയുടെ ബന്ധുക്കള്ക്ക് 10 ലക്ഷം രൂപ നഷ്ടപരിഹാരം നല്കാന് വിധിച്ചു.
2002 സെപ്തംബര് 4 നാണ് രക്തം നല്കിയതിലെ അപാകത മൂലം യുവതി മരണമടഞ്ഞത്. ഓഗസ്റ്റ് 1ന് ലാപ്രോസ്കോപ്പി ശസ്ത്രക്രിയക്ക് പ്രവേശിക്കപ്പെട്ട യുവതിയ്ക്ക് രക്തസ്രാവം ഉണ്ടാവുകയും ഇവരെ കിംസ് ആശുപത്രിയിലെ തീവ്ര പരിചരണ വിഭാഗത്തിലേക്ക് അടിയന്തിരമായി മാറ്റുകയും ചെയ്തു. എന്നാല് ഏതാനും ദിവസത്തിനകം യുവതി മരണമടയുകയായിരുന്നു.
ഓ നെഗറ്റിവ് രക്ത ഗ്രൂപ്പ് ഉള്ള യുവതിക്ക് ആശുപത്രിയില് നിന്നും ഗ്രൂപ്പ് മാറി ബി നെഗറ്റിവ് രക്തം നല്കിയതാണ് യുവതി മരിക്കാന് ഇടയായത് എന്ന് ബന്ധുക്കള് പരാതിപ്പെട്ടു. ഇരു ആശുപത്രികളും ചേര്ന്ന് സംഭവം മൂടിവെയ്ക്കാന് ശ്രമിച്ചു എന്നും ബന്ധുക്കള് ആരോപിച്ചു.
സമദ് ആശുപത്രി ആരോപണങ്ങള് നിഷേധിക്കുന്നുണ്ട്. ശസ്ത്രക്രിയക്ക് ശേഷം യുവതിയുടെ നില തൃപ്തികരമായിരുന്നു. രാത്രി 8:30ക്ക് രക്തം നല്കിയ യുവതിക്ക് അര മണിക്കൂറിനുള്ളില് അസ്വസ്ഥത അനുഭവപ്പെടുകയും പുലര്ച്ചെ 1:30ക്ക് യുവതിയെ കിംസ് ആശുപത്രിയിലേക്ക് മാറ്റുകയും ചെയ്തു. എന്നാല് രോഗി ഡിസ്സെമിനേറ്റഡ് ഇന്ട്രാ വാസ്ക്കുലര് കൊയാഗുലേഷന് എന്ന ഒരു സങ്കീര്ണ്ണത മൂലമാണ് മരണമടഞ്ഞത് എന്നും ഇതില് ആശുപത്രിക്ക് എന്തെങ്കിലും ചെയ്യാന് ആവുമായിരുന്നില്ല എന്നും ഇവര് ചൂണ്ടിക്കാട്ടി.
എന്നാല് ആശുപത്രി രേഖകള് പരിശോധിച്ച കമ്മീഷന് രക്തം നല്കിയതിനു ശേഷം റിയാക്ഷന് ഉണ്ടായാല് പാലിക്കേണ്ട പെരുമാറ്റച്ചട്ടം പാലിക്കുന്നതില് ആശുപത്രി അധികൃതര് പരാജയപ്പെട്ടു എന്ന് കണ്ടെത്തി. എതിര് രക്തവാഹിനിയില് നിന്നും രക്തത്തിന്റെ സാമ്പിള് എടുത്ത് പരിശോധിച്ച് റിയാക്ഷന്റെ കാരണം കണ്ടു പിടിക്കാന് ആശുപത്രി ശ്രമിച്ചില്ല. നല്കിയ രക്തത്തിന്റെ ബാക്കി രക്ത ബാങ്കില് തിരികെ നല്കി അന്വേഷിക്കാനും ഇവര് തയ്യാറായില്ല. ആശുപത്രി രേഖകളില് ശീതീകരണിയില് നിന്നും രക്തം എടുത്ത് ആരാണ് എന്നോ രക്തം സൂക്ഷിക്കുന്ന സഞ്ചി മാറി പോയതാണോ എന്നോ മനസ്സിലാക്കാന് സഹായിക്കുന്ന ഒന്നും തന്നെ ഉണ്ടായിരുന്നില്ല എന്നും അധികൃതര് കണ്ടെത്തി.
- ജെ.എസ്.
അനുബന്ധ വാര്ത്തകള്
വായിക്കുക: അപകടം, ആരോഗ്യം, കോടതി, വൈദ്യശാസ്ത്രം
