വാഷിംഗ്ടണ്‍ : മൂന്നു മാസത്തിനുള്ളില്‍ ഇസ്രായേല്‍ ഇറാന്റെ മേല്‍ ആക്രമണം നടത്താന്‍ സാദ്ധ്യതയുണ്ടെന്ന് അമേരിക്കന്‍ സൈനിക സെക്രട്ടറി ലിയോണ്‍ പനേറ്റ വിശ്വസിക്കുന്നതായി സൂചന. വാഷിംഗ്ടണ്‍ പോസ്റ്റ് പത്രത്തിന്റെ എഡിറ്റോറിയലില്‍ ആണ് ഇത് പ്രത്യക്ഷപ്പെട്ടത്. എന്നാല്‍ ഇത് സംബന്ധിച്ച് കൂടുതല്‍ വിശദീകരിക്കാന്‍ അദ്ദേഹം തയ്യാറായിട്ടില്ല. ബ്രസല്‍സില്‍ നാറ്റോ യോഗത്തില്‍ പങ്കെടുക്കാന്‍ എത്തിയ അദ്ദേഹത്തോട് ഈ കാര്യം മാദ്ധ്യമ പ്രവര്‍ത്തകര്‍ ചോദിച്ചെങ്കിലും വ്യക്തമായ ഒരു മറുപടി പറയാതെ അദ്ദേഹം ഒഴിഞ്ഞു മാറുകയാണ് ചെയ്തത്. ഇസ്രായേലിനു ഇത്തരമൊരു പദ്ധതി ഉണ്ടായിരുന്നു എന്നും ഇത് സംബന്ധിച്ച് തങ്ങളുടെ ആശങ്ക ഇസ്രയേലിനെ അറിയിച്ചു എന്നും മാത്രം അദ്ദേഹം മറുപടി പറഞ്ഞു.
അമേരിക്കന്‍ ചാര സംഘടനയായ സി. ഐ. എ. (CIA – Central Intelligence Agency) യുടെ മുന്‍ മേധാവിയാണ് പനേറ്റ.
- ജെ.എസ്.
