ബംഗളൂരു: അഭ്യൂഹങ്ങള്‍ക്ക് വിരാമമിട്ട് കര്‍ണാടകത്തിലെ മാണ്ഡ്യ ലോക്‌സഭ മണ്ഡലത്തില്‍ സ്വതന്ത്രസ്ഥാനാര്‍ത്ഥിയായി മത്സരിക്കുമെന്ന് അന്തരിച്ച കോണ്‍ഗ്രസ് എംപി എം.എച്ച്.അംബരീഷിന്റെ ഭാര്യ സുമലതയുടെ പ്രഖ്യാപനം. അംബരീഷിന്റെ പാരമ്പര്യം നിലനിര്‍ത്താനാണ് താന്‍ ജനവിധി തേടുന്നതെന്നും അവര്‍ പറഞ്ഞു. മാണ്ഡ്യയില്‍ കോണ്‍ഗ്രസ് സീറ്റ് നിഷേധിച്ചതിനെത്തുടര്‍ന്നാണ് സ്വതന്ത്രയായി മത്സരിക്കാന്‍ സുമലത തീരുമാനിച്ചത്.

“മാണ്ഡ്യയില്‍ ഞാന്‍ നേരില്‍ക്കണ്ട ജനങ്ങളെല്ലാം അംബരീഷില്‍ അവര്‍ക്കുണ്ടായിരുന്ന വിശ്വാസത്തെക്കുറിച്ച് എന്നോട് പറഞ്ഞു. ആ വിശ്വാസം അവര്‍ക്ക് എന്നോടുമുണ്ട്. അദ്ദേഹത്തിന്റെ ഓര്‍മ്മയും പാരമ്പര്യവും നിലനിര്‍ത്താനാണ് എന്റെയീ പോരാട്ടം. എന്റെ തീരുമാനം ആരെയെങ്കിലും വേദനിപ്പിക്കുന്നുവെങ്കില്‍ ഞാന്‍ ക്ഷമ ചോദിക്കുന്നു.” സുമലത പറഞ്ഞു.

ഗാന്ധിനഗര്‍ : പ്രധാനമന്ത്രി നരേന്ദ്രമോദിക്കെതിരെ ആഞ്ഞടിച്ച്‌ കോണ്‍ഗ്രസ്‌ ജനറല്‍ സെക്രട്ടറി പ്രിയങ്ക ഗാന്ധി വദ്രയുടെ ആദ്യ തെരഞ്ഞെടുപ്പ്‌ പ്രചാരണ യോഗം. തൊഴിലില്ലായ്‌മ, കള്ളപ്പണം, സ്‌ത്രീസുരക്ഷ എന്നീ വിഷയങ്ങള്‍ മുന്‍നിര്‍ത്തിയായിരുന്നു മോദിക്കെതിരായ പ്രിയങ്കയുടെ ആക്രമണം. വോട്ടവകാശം ജനങ്ങളുടെ ആയുധമാണെന്നും പ്രിയങ്ക അഭിപ്രായപ്പെട്ടു.

ഗുജറാത്തില്‍ ജനസങ്കല്‍പ്‌ യാത്രയെ അഭിസംബോധന ചെയ്‌ത്‌ സംസാരിക്കുകയായിരുന്നു പ്രിയങ്ക. തെരഞ്ഞെടുപ്പില്‍ സ്വന്തം പങ്ക്‌ എന്താണ്‌ എന്ന്‌ ഓരോരുത്തരും മനസ്സിലാക്കണം. ജനങ്ങള്‍ അവരുടെ ഭാവിയാണ്‌ ഇതിലൂടെ തീരുമാനിക്കാന്‍ പോകുന്നത്‌. തെരഞ്ഞെടുപ്പ്‌ സമയത്തെ പ്രധാന ചര്‍ച്ചാവിഷയം പുരോഗതിയുമായി ബന്ധപ്പെട്ടതാവണം. രാജ്യത്തെ ഭരണസംവിധാനങ്ങള്‍ ആക്രമിക്കപ്പെട്ടുകൊണ്ടിരിക്കുന്ന സാഹചര്യത്തില്‍ തെരഞ്ഞെടുപ്പിന്‌ സ്വാതന്ത്ര്യസമരത്തോളം തന്നെ പ്രാധാന്യത്തോടെ കാണണമെന്നും അവര്‍ പറഞ്ഞു.