കൊച്ചി: വീട്ടമ്മയുടെ പേരില്‍ തിരിച്ചറിയല്‍ രേഖകള്‍ ദുരുപയോഗം ചെയ്തു കൊണ്ട് വ്യാജ മൊബൈല്‍ കണക്ഷന്‍ എടുത്ത നാലു പേര്‍ അറസ്റ്റിലായി. മട്ടാഞ്ചേരി സ്വദേശികളായ ഷമീര്‍, ഇസ്മായില്‍, ഷുഹൈബ്, ഷഹീര്‍ എന്നിവരാണ് പോലീസ് പിടിയിലായത്. ഇവര്‍ സ്വകാര്യ മൊബൈല്‍ ഫോണ്‍ കമ്പനിയുടെ ഫീല്‍ഡ് എക്സിക്യുട്ടീവുകളാണ്. ഇളംകുന്നപ്പുഴ സ്വദേശിനിയായ വീട്ടമ്മ സിം കാര്‍ഡ് എടുക്കുവാന്‍ നല്‍കിയ തിരിച്ചറിയല്‍ രേഖകളും ഫോട്ടോയും ദുരുപയോഗം ചെയ്താണ് ഇവര്‍ വ്യാജ കണക്ഷനുകള്‍ എടുത്തത്. കൊച്ചിയിലെ മട്ടാഞ്ചേരി സ്വദേശിനിയായ മറ്റൊരു വീട്ടമ്മയ്ക്ക് ഫോണില്‍ അശ്ലീല എസ്. എം. എസുകള്‍ ലഭിച്ചതിനെ തുടര്‍ന്ന് നടന്ന അന്വേഷണത്തിലാണ് ഇളങ്കുന്നപ്പുഴ സ്വദേശിനിയുടെ പേരില്‍ എടുത്ത മൊബൈല്‍ കണക്ഷനില്‍ എത്തിയത്. എന്നാല്‍ അങ്ങിനെ ഒരു നമ്പര്‍ അവര്‍ ഉപയോഗിക്കുന്നില്ല എന്ന് അറിഞ്ഞതോടെ നടത്തിയ അന്വേഷണത്തിലാണ് സ്വകാര്യ മൊബൈല്‍ ഫോണ്‍ കമ്പനിയുടെ എസ്കിക്യുട്ടീവുകള്‍ കുടുങ്ങിയത്. കൂടുതല്‍ അന്വേഷണം നടന്നു വരികയാണ്.
- എസ്. കുമാര്‍
അനുബന്ധ വാര്‍ത്തകള്‍
വായിക്കുക: കുറ്റകൃത്യം
