തിരുവനന്തപുരം : മുഖ്യമന്ത്രി പിണറായി വിജയന്റെ പ്രൈവറ്റ് സെക്രട്ടറിയായി സിപിഐഎം സംസ്ഥാന സമിതി അംഗം എം വി ജയരാജനെ നിയമിക്കാന്‍ ധാരണയായതായി റിപ്പോര്‍ട്ട്. ഭരണത്തിന്റെ വേഗത കൂട്ടാനാണ് ഈ പുതിയ തീരുമാനം. നിലവില്‍ ഐ. ടി സെക്രട്ടറി എം .ശിവശങ്കറാണ് പ്രൈവറ്റ് സെക്രട്ടറി സ്ഥാനം കൈകാര്യം ചെയ്യുന്നത്.ലോട്ടറി ക്ഷേമനിധി ചെയര്‍മാനാണ് എം വി ജയരാജന്‍ ഇപ്പോള്‍.

പുതിയ പ്രൈവറ്റ് സെക്രട്ടറിയെ നിയമിക്കുന്നതോടെ ഓഫീസിലെ ഫയല്‍ നീക്കം ഉള്‍പ്പെടെയുള്ള കാര്യങ്ങള്‍ വേഗത്തിലാകുമെന്നാണ് പാര്‍ട്ടിയുടെ പ്രതീക്ഷ. ആഭ്യന്തര അഡീഷണല്‍ ചീഫ് സെക്രട്ടറിയായ നളിനി നെറ്റോ മുഖ്യമന്ത്രിയുടെ സെക്രട്ടറി സ്ഥാനവും വഹിക്കുന്നുണ്ട്.

തിരുവനന്തപുരം : ഭരണപക്ഷത്തിനും പ്രതിപക്ഷത്തിനും പുറത്തുള്ള ചില സംഘടനകള്‍ വികസനപ്രവര്‍ത്തനങ്ങള്‍ക്ക് എതിരുനില്‍ക്കുന്നുണ്ടെന്നും അവരെ ഒരിക്കലും അംഗീകരിക്കില്ലെന്നും മുഖ്യമന്ത്രി പിണറായി വിജയന്‍ നിയമസഭയില്‍ പറഞ്ഞു.

ഭരണപക്ഷവും പ്രതിപക്ഷവും തമ്മിലുള്ള അഭിപ്രായ വ്യത്യാസങ്ങള്‍ സ്വാഭാവികമാണെന്നും എന്നാല്‍ ഇതു മുന്‍നിര്‍ത്തി വികസനപ്രവര്‍ത്തനങ്ങള്‍ക്ക് എതിരു നില്‍ക്കുന്നവരെ വികസനം മുടക്കികളെന്നേ പറയാനാകൂ എന്നും മുഖ്യമന്ത്രി പറഞ്ഞു. ഗവര്‍ണറുടെ നയപ്രഖ്യാപന പ്രസംഗത്തിന്റെ നന്ദി പ്രമേയ ചര്‍ച്ചയ്ക്ക് മറുപടി നല്‍കവേ സംസാരിക്കുകയായിരുന്നു അദ്ദേഹം. ഭരണത്തിനു വേഗത വരും മാസങ്ങളില്‍ കൂടുമെന്നും പ്രതിപക്ഷത്തിന്റെ വിമര്‍ശനത്തിനുള്ള ഉത്തരമായി പിണറായി അറിയിച്ചു.