മാര്‍കോണി റേഡിയോ കണ്ടുപിടിച്ച നാളുകള്‍ മുതല്‍ മനുഷ്യന്‍ റേഡിയോ തരംഗങ്ങള്‍ ബഹിരാകാശത്തിലേക്ക് പ്രക്ഷേപിച്ചു കൊണ്ടിരിക്കുന്നു. ഈ തരംഗങ്ങള്‍ നിരന്തരം വികസിച്ചു കൊണ്ടിരിക്കുന്ന ഒരു കുമിളയുടെ ആകാരത്തില്‍ മനുഷ്യരാശിയുടെ സാന്നിദ്ധ്യം പ്രപഞ്ചത്തെ അറിയിച്ചു കൊണ്ടിരിക്കുകയാണ്. ഈ കുമിള ജ്യോതിശാസ്ത്ര പരമായി ഏറെ വലിപ്പമേറിയതാണ്. കണക്കുകള്‍ പ്രകാരം ഇപ്പോള്‍ ഈ കുമിളയ്ക്ക് ഏതാണ്ട് 200 പ്രകാശ വര്‍ഷം വലിപ്പമുണ്ട്. പ്രകാശം ഒരു വര്‍ഷം കൊണ്ട് സഞ്ചരിക്കുന്ന ദൂരമാണ് ഒരു പ്രകാശ വര്‍ഷം. ഇത് കൃത്യമായി 9,460,730,472,580.8 കിലോമീറ്റര്‍ വരും.

ചിത്രത്തില്‍ ക്ലിക്ക്‌ ചെയ്‌താല്‍ വലുതായി കാണാം

എന്നാല്‍ രസം ഇതല്ല. 200 പ്രകാശ വര്ഷം വലിപ്പമുള്ള ഈ കുമിള നമ്മുടെ സൌരയുഥം അടങ്ങിയ ക്ഷീരപഥത്തില്‍ എത്ര ചെറുതാണ് എന്നതാണ് കൌതുകകരം. മുകളിലുള്ള ക്ഷീരപഥത്തിന്റെ ചിത്രത്തില്‍ കാണുന്ന നന്നേ ചെറിയ നീല വൃത്തമാണ് റേഡിയോ തരംഗങ്ങള്‍ എത്തിനില്‍ക്കുന്ന കുമിള. ക്ഷീരപഥം എന്ന് വിളിക്കപ്പെടുന്ന നമ്മുടെ ഗാലക്സി പ്രപഞ്ചത്തില്‍ ഉള്ള അനേക കോടി ഗാലക്സികളില്‍ ഒന്ന് മാത്രമാണ് എന്ന് കൂടി ചിന്തിക്കുമ്പോള്‍ ഈ വിശകലനത്തിന്റെ പ്രസക്തി കൂടുതല്‍ വ്യക്തമാവും. ഒപ്പം, നമ്മള്‍ അയക്കുന്ന റേഡിയോ സിഗ്നലുകള്‍ കണ്ടെത്തി മറ്റേതെങ്കിലും ഗാലക്സിയിലെ ഏതെങ്കിലും ഒരു ഗ്രഹത്തിലെ അന്യഗ്രഹ ജീവികള്‍ നമ്മെ തേടിയെത്തും എന്ന് കരുതി മനുഷ്യന്‍ നടത്തുന്ന പരിശ്രമങ്ങളുടെ നിസ്സാരതയും.

വിന്‍ഡ്‌ഹൂക്‌ : നമീബിയയിലെ വിജനമായ പുല്‍മേട്ടില്‍ ഒരു നിഗൂഢ ഗോളം ആകാശത്തില്‍ നിന്നും പതിച്ചു. 35 സെന്റീമീറ്റര്‍ വ്യാസവും 6 കിലോഗ്രാം തൂക്കവുമുള്ള ഈ ലോഹ ഗോളം നമീബിയന്‍ തലസ്ഥാനമായ വിന്‍ഡ്‌ഹൂക്‌ നഗരത്തില്‍ നിന്നും ഏതാണ്ട് 750 കിലോമീറ്റര്‍ അകലെയുള്ള ഒരു ഗ്രാമത്തിലാണ് പെട്ടെന്ന് ഒരു ദിവസം ആകാശത്തില്‍ നിന്നും താഴെ വീണത്‌. പരിഭ്രാന്തരായ അധികൃതര്‍ വിവരം നാസയും യൂറോപ്യന്‍ ശൂന്യാകാശ ഏജന്‍സിയേയും അറിയിച്ചിട്ടുണ്ട്.

ഏതാനും ദിവസങ്ങള്‍ മുന്‍പ്‌ വലിയ സ്ഫോടന ശബ്ദങ്ങള്‍ കേട്ടിരുന്നതായി ഗ്രാമ വാസികള്‍ പറയുന്നു.

ഈ ഗോളം സ്ഫോടക വസ്തുവല്ല എന്ന് പോലീസ്‌ പറഞ്ഞു. ഇത് പോലെയുള്ള ഗോളങ്ങള്‍ ലോകത്തിന്റെ പല ഭാഗങ്ങളിലും ഇത് പോലെ ആകാശത്തില്‍ നിന്നും പതിച്ചിട്ടുണ്ട് എന്ന് റിപ്പോര്‍ട്ടുകള്‍ സൂചിപ്പിക്കുന്നു.

കാലിഫോര്‍ണിയ : ഭൂമിയ്ക്ക് പുറത്ത് ജീവന്റെ സാന്നിദ്ധ്യം തേടിയുള്ള അന്വേഷണത്തില്‍ ഒരു പുതിയ വഴിത്തിരിവുമായി ശാസ്ത്രജ്ഞര്‍ ഒരു പുതിയ ഗ്രഹം കണ്ടെത്തി. ഭൂമിയില്‍ നിന്നും 600 പ്രകാശ വര്ഷം അകലെയുള്ള ഒരു നക്ഷത്രത്തിനെ വലം വെയ്ക്കുന്ന ഈ ഗ്രഹത്തിന്റെ വലിപ്പവും മറ്റു ഘടകങ്ങളും വിലയിരുത്തുമ്പോള്‍ ഈ ഗ്രഹത്തില്‍ ദ്രാവക രൂപത്തിലുള്ള ജലം ഉണ്ടാവാനുള്ള സാദ്ധ്യത ഏറെയാണ് എന്ന് ശാസ്ത്രജ്ഞര്‍ അനുമാനിക്കുന്നു. ദ്രാവക രൂപത്തിലുള്ള ജലം ജീവന്റെ നിലനില്‍പ്പിന് അവിഭാജ്യമായ ഒരു ഘടകമായാണ് കണക്കാക്കപ്പെടുന്നത്.

നാസയുടെ കെപ്ലര്‍ ദൂരദര്‍ശിനി ഉപയോഗിച്ചാണ് ഈ ഗ്രഹത്തെ കണ്ടെത്തിയത്‌. ഇതിന് ശാസ്ത്രജ്ഞര്‍ കെപ്ലര്‍-22ബി എന്ന് നാമകരണം ചെയ്തു.