മോഹന്‍ ലാല്‍ – മേനക ജോഡികളായി അഭിനയിച്ച സിനിമകള്‍ മലയാളത്തില്‍ സൂപ്പര്‍ ഹിറ്റുകള്‍ ആയിരുന്നു. രണ്ടു പതിറ്റാണ്ടുകള്‍ക്കിപ്പുറം പഴയ നായികയുടെ മകള്‍ ലാലിന്റെ നായികയായി എത്തുന്നു. പ്രിയദര്‍ശന്‍ സംവിധാനം ചെയ്യുന്ന ഗീതാഞ്ജലി എന്ന ചിത്രത്തിലാണ് മോഹന്‍ ലാലിന്റെ നായികയായി നടി മേനകയുടേയും നിര്‍മ്മാതാവ് ജി. സുരേഷ് കുമാറിന്റേയും ഇളയ മകള്‍ കീര്‍ത്തി എത്തുന്നത്.
മോഹന്‍ ലാല്‍ അവിസ്മരണീയമാക്കിയ മണിച്ചിത്രത്താഴെന്ന ചിത്രത്തിലെ ഡോ. സണ്ണി എന്ന കഥാപാത്രം പുനരവതരിക്കുകയാണ് ഗീതാഞ്ജലിയിലൂടെ. ഗീത, അഞ്ജലി എന്നീ ടൈറ്റില്‍ കഥാപാത്രങ്ങളില്‍ ഒരാളായാണ് കീര്‍ത്തി അഭിനയിക്കുന്നത്. ചിത്രത്തില്‍ വിദ്യാ ബാലന്‍ മറ്റൊരു നായികയായി എത്തും എന്നും സൂചനയുണ്ട്. പൃഥ്‌വിരാജിനെ നായകനാക്കി സന്തോഷ് ശിവന്‍ സംവിധാനം ചെയ്ത ഉറുമിയില്‍ വിദ്യാ ബാലന്‍ അഭിനയിച്ചിട്ടുണ്ട്.
പ്രിയദര്‍ശന്‍ – മോഹന്‍‌ലാല്‍ കൂട്ടുകെട്ടില്‍ നിരവധി ഹിറ്റ് ചിത്രങ്ങള്‍ ഇറങ്ങിയിട്ടുണ്ട്. എന്നാല്‍ അവസാനം പുറത്തിറങ്ങിയ മരുഭൂമിക്കഥ (അറബിയും ഒട്ടകവും മാധവന്‍ നായരും) എന്ന ചിത്രം പ്രേക്ഷകരെ നിരാശപ്പെടുത്തിയിരുന്നു. പുതിയ ചിത്രം വന്‍ പ്രതീക്ഷയാണ് മോഹന്‍ ലാല്‍ ഫാന്‍സുകാര്‍ക്ക് പകരുന്നത്.
