മുസ്ലിം സ്ത്രീകള്‍ പുരുഷന്മാരോടൊപ്പം ജോലി ചെയ്യുന്നതിന് എതിരെ ദാറുല്‍ ഉലും ദേവബന്ദ് മത വിഭാഗം പുറപ്പെടുവിച്ച ഫത്വക്കെതിരെ തന്റെ അഭിപ്രായം തുറന്നു പറഞ്ഞ കവിയും, എഴുത്തുകാരനും, രാജ്യ സഭാ അംഗവുമായ ജാവേദ്‌ അഖ്തറിന് വധ ഭീഷണി ലഭിച്ചു. ഈ മെയില്‍ സന്ദേശമായും ടെലിഫോണ്‍ വഴിയും തനിക്ക്‌ ഭീഷണി ലഭിച്ചതായി അദ്ദേഹം വെളിപ്പെടുത്തി.
ജാവേദിന് പിന്തുണയുമായി പ്രമുഖ മനുഷ്യാവകാശ സംഘടനയായ സിറ്റിസണ്‍സ് ഫോര്‍ ജസ്റ്റിസ് ആന്‍ഡ്‌ പീസ്‌ രംഗത്തെത്തി യിട്ടുണ്ട്. ജോലി ചെയ്യാനുള്ള സ്വാതന്ത്ര്യം ഏതൊരു വ്യക്തിയുടെയും എന്നത് പോലെ തന്നെ മുസ്ലിം സ്ത്രീയുടെയും മൌലിക അവകാശമാണ് എന്നും, മുസ്ലിം സ്ത്രീകളുടെ അടിസ്ഥാന സ്വാതന്ത്ര്യത്തിനു വേണ്ടി പിന്തിരിപ്പന്‍ ചിന്താഗതി കള്‍ക്കെതിരെ തുറന്നു സംസാരിച്ച ജാവേദിനു തങ്ങള്‍ പൂര്‍ണ്ണമായ പിന്തുണ നല്‍കും എന്നും സി. ജെ. പി. സെക്രട്ടറിയും പ്രമുഖ മനുഷ്യാവകാശ പ്രവര്‍ത്തകയുമായ ടീസ്റ്റ സെതല്‍വാദ്‌ അറിയിച്ചു.
- ജെ.എസ്.
