സൈന്തിയ : പശ്ചിമ ബംഗാളിലെ ജാര്‍ഖണ്ട് അതിര്‍ത്തിയ്ക്കടുത്തു ബിര്ബം ജില്ലയിലെ സൈന്തിയ സ്റ്റേഷനിനടുത്തു വെച്ച് രണ്ടു തീവണ്ടികള്‍ തമ്മില്‍ കൂട്ടി ഇടിച്ചു വന്‍ അപകടം ഉണ്ടായി. ഇന്ന് പുലര്‍ച്ചെ രണ്ടു മണിയോടടുത്താണ് സംഭവം. കൂച്ബെഹാര്‍ – സിയാല്‍ദ ഉത്തര്ബംഗ എക്സ്പ്രസ് തീവണ്ടിയാണ് സൈന്തിയ സ്റ്റേഷനില്‍ നിന്നും യാത്ര ആരംഭിച്ച ഭഗല്‍പൂര്‍ – റാഞ്ചി വനാഞ്ചല്‍ എക്സ്പ്രസുമായി കൂട്ടിയിടിച്ചത്. അന്‍പതിലേറെ പേര്‍ കൊല്ലപ്പെട്ടതായി കണക്കാക്കുന്നു. വനാഞ്ചല്‍ എക്സ്പ്രസിന്റെ മൂന്നു കോച്ചുകള്‍ പൂര്‍ണ്ണമായി തകര്‍ന്നു തരിപ്പണമായി. ഒരു കൊച്ചിന്റെ മേല്‍ക്കൂര തൊട്ടടുത്തുള്ള മേല്‍പ്പാലത്തിന്റെ മുകളില്‍ വരെ പറന്നു ചെന്നു. ഉത്തരബംഗ എക്സ്പ്രസിന്റെ എഞ്ചിനും അപകടത്തില്‍ തകര്‍ന്നിട്ടുണ്ട്. എഞ്ചിന്‍ ഡ്രൈവര്‍ തന്റെ സീറ്റില്‍ തന്നെ മരിച്ച നിലയില്‍ കാണപ്പെട്ടു. വനാഞ്ചല്‍ എക്സ്പ്രസിന്റെ ഗാര്‍ഡും അപകടത്തില്‍ കൊല്ലപ്പെട്ടു.
പശ്ചിമ ബംഗാള്‍ തീവണ്ടിയപകടം
രാത്രി 08:54നു സൈന്തിയ സ്റ്റേഷനില്‍ നിന്നും തിരിക്കേണ്ട വനാഞ്ചല്‍ എക്സ്പ്രസ് മണിക്കൂറുകള്‍ വൈകി പുലര്‍ച്ചെ 01:54നാണ് പുറപ്പെട്ടത്‌. 01:38നു സൈന്തിയയില്‍ എത്തേണ്ട ഉത്തരബംഗ എക്സ്പ്രസ് ഇരുപതു മിനിട്ടോളം വൈകി എത്തുകയും ചെയ്തതോടെയാണ് അപകടം ഉണ്ടായത്. എന്നാല്‍ സ്റ്റേഷനില്‍ നിര്‍ത്തേണ്ട തീവണ്ടിയുടെ വേഗത ഇത്രയധികമായത് എങ്ങനെ എന്ന സംശയം ബാക്കി നില്‍ക്കുന്നു.
കൂടുതല്‍ വിവരങ്ങള്‍ക്ക് ഈ നമ്പരുകളില്‍ ബന്ധപ്പെടാവുന്നതാണ് : 0651-2461404, 0651-2460488, 0651-26002634, 0651-2600263
- ജെ.എസ്.
