ദുബായ് : പ്രവാസി ബുക്ക്‌ ട്രസ്റ്റിന്റെ രണ്ടാം വാര്‍ഷിക പരിപാടിയോട് അനുബന്ധിച്ച് നടക്കുന്ന സാഹിത്യ സമീക്ഷ പുരസ്കാര ദാനം ഏപ്രില്‍ 8 വെള്ളിയാഴ്ച ദുബായ് കരാമയിലെ വൈഡ്‌ റേഞ്ച് റെസ്റ്റോറന്റില്‍ നടക്കും. വൈകുന്നേരം 4:30ന് ആരംഭിക്കുന്ന പരിപാടി കുരീപ്പുഴ ശ്രീകുമാര്‍ ഉദ്ഘാടനം ചെയ്യും. ബെന്യാമിന്, അര്‍ഷാദ്‌ ബത്തേരി, വിജയന്‍ പാറയില്‍ റഫീഖ്‌ തിരുവള്ളൂര്‍ എന്നിവര്‍ മുഖ്യ അതിഥികള്‍ ആയിരിക്കും.
ആദ്യ പുരസ്കാരത്തിന് അര്‍ഹമായ “ആടു ജീവിതം” രചിച്ച ബെന്യാമിന് കുരീപ്പുഴ ശ്രീകുമാര്‍ പുരസ്കാരം നല്‍കും.
തുടര്‍ന്ന് നടക്കുന്ന സിമ്പോസിയത്തില്‍ “ആടു ജീവിതത്തിലെ കീഴാള പരിപ്രേക്ഷ്യം” എന്ന വിഷയം പ്രവാസി മലയാളി എഴുത്തുകാരില്‍ ശ്രദ്ധേയനായ സംസ്കാര വിമര്‍ശകനും സാഹിത്യ നിരൂപകനുമായ പി. മണികണ്ഠന്‍ അവതരിപ്പിക്കും. ബഷീര്‍ തിക്കോടി, ജ്യോതികുമാര്‍ എന്നിവര്‍ പങ്കെടുക്കും. ഇസ്മയില്‍ മേലടി സിമ്പോസിയം നിയന്ത്രിക്കും.
- pma
