മൈസൂര്‍: പ്രഭാത സവാരിക്കിടെ കാണാതായ ആര്‍.എസ്.എസ് മുന്‍ സര്‍ സംഘ ചാലക് കെ.എസ്.സുദര്‍ശനെ (81) കണ്ടെത്തി. അദ്ദേഹം സുരക്ഷിതനാണെന്ന് പൊലീസ് വൃത്തങ്ങള്‍ അറിയിച്ചു. മൈസൂരില്‍ സഹോദരന്‍ രമേശിനെ സന്ദര്‍ശിക്കുവാന്‍ എത്തിയ സുദര്‍ശന്‍ രാവിലെ അഞ്ചരയോടെ പ്രഭാത സവാരിക്കിറങ്ങിയതായിരുന്നു. ഏറെ നേരമായിട്ടും അദ്ദേഹത്തെ കാണാതായതോടെ സഹോദരന്‍ പോലീസില്‍ പരാതിപ്പെടുകയായിരുന്നു. തുടര്‍ന്നു നടത്തിയ അന്വേഷണത്തില്‍ ചാമുണ്ഡി ഹില്‍‌സ് ലളിത് മഹല്‍ ഹോട്ടലിന്റെ ഹെലിപ്പാഡ് റോഡിനു സമീപത്തുള്ള കെസെരെ എക്സ്റ്റണ്‍ഷനില്‍ അദ്ദേഹത്തെ കണ്ടെത്തി. ഇതിനിടയില്‍ വഴിതെറ്റി അഞ്ചുകിലോമീറ്ററോളം സഞ്ചരിച്ചിരുന്നു.കെസെരെ എക്സ്റ്റണ്‍ഷനില്‍ അശ്വഥ് എന്ന ആളുടെ വീട്ടില്‍ വെള്ളം ചോദിച്ച് എത്തിയ സുദര്‍ശനെ തിരിച്ചറിഞ്ഞില്ലെങ്കിലും അദ്ദേഹം വീട്ടിനകത്തേക്ക് ക്ഷണിച്ചു പരിചരിച്ചു. പിന്നീട് ചാനലില്‍ വാര്‍ത്ത വന്നത് കണ്ടപ്പോളാണ് തന്റെ വീട്ടില്‍ എത്തിയിരിക്കുന്നത് സുദര്‍ശന്‍ ആണെന്ന് തിരിച്ചറിഞ്ഞത്. തുടര്‍ന്ന് അശ്വഥ് പൊലീസില്‍ വിവരം അറിയിച്ചു. സുദര്‍ശന്‍ മൈസൂരില്‍ സുരക്ഷിതനാണെന്ന് ആര്‍.എസ്.എസ്-ബി.ജെ.പി വൃത്തങ്ങള്‍ അറിയിച്ചു.
- എസ്. കുമാര്‍
അനുബന്ധ വാര്‍ത്തകള്‍
വായിക്കുക: ഇന്ത്യന്‍ രാഷ്ട്രീയ നേതാക്കള്‍, പോലീസ്‌
