ന്യൂഡല്ഹി : പാര്ലമെന്റ് അംഗങ്ങളുടെ ശമ്പളം ഗണ്യമായി വര്ദ്ധിപ്പിക്കുന്ന ബില്ലിന് ഇന്ന് അന്തിമ തീരുമാനമാകും. നിലവില് ഒരു പാര്ലമെന്റ് അംഗത്തിന്റെ ശമ്പളം 16000 രൂപയാണ്. ബില് പാസാകുന്നതോടെ ഇത് 50,000 രൂപയാകും. പ്രതിദിന ബത്ത ആയിരം രൂപയില് നിന്ന് രണ്ടായിരം രൂപയായി വര്ദ്ധിക്കും. വിമാന യാത്രാ ബത്ത, ട്രെയിന് യാത്രാ ബത്ത, ടെലിഫോണ് ബത്ത എന്നിവയും വര്ദ്ധിപ്പിക്കണം എന്ന ആവശ്യം ഉന്നയിക്ക പ്പെട്ടിരുന്നുവെങ്കിലും സര്ക്കാര് ഈ ആവശ്യം അനുവദിച്ചില്ല. നിലവിലുള്ള നിരക്കില് തന്നെ ഈ ആനുകൂല്യങ്ങള് തുടരും.
സെക്രട്ടറിമാരുടെ ശമ്പളത്തേക്കാള് ഒരു രൂപ വര്ദ്ധിപ്പിച്ചു 80,001 രൂപയാക്കി എം. പി. മാരുടെ ശമ്പളം വര്ദ്ധിപ്പിക്കണം എന്നായിരുന്നു സമിതിയുടെ നിര്ദ്ദേശം. എന്നാല് ഇത് അംഗീകരിക്കപ്പെട്ടില്ല.
ന്യൂഡല്ഹി : കോമണ്വെല്ത്ത് ഗെയിംസുമായി ബന്ധപ്പെട്ടു ഉയര്ന്നു വന്ന അഴിമതി ആരോപണങ്ങളുടെ പേരില് ഗെയിംസിന്റെ സംഘാടക സമിതി ചെയര്മാന് സുരേഷ് കല്മാഡിക്കെതിരെ സര്ക്കാര് നടപടി എടുക്കാന് നിര്ബന്ധിതമാകും എന്ന് സൂചന. എന്നാല് ഗെയിംസുമായി ബന്ധപ്പെട്ടു അഴിമതി ആരോപണം പരസ്യമായാല് ഉണ്ടാവുന്ന നാണക്കേട് ഒഴിവാക്കാന് ഗെയിംസ് തീരും വരെ കോണ്ഗ്രസ് നേതൃത്വം കാത്തിരിക്കാനാണ് സാധ്യത.
