കാളികാവ് : പോലീസ് സബ് ഇന്സ്പെക്ടറെ വെടി വെച്ച് കൊന്ന കേസിലെ പ്രതി മുജീബിനേയും മൂന്നാം ഭാര്യ ഖയറുന്നീസയേയും ജീവനൊടുക്കിയ നിലയില് മുജീബിന്റെ വീടിന്റെ സമീപത്തെ എസ്റ്റേറ്റില് കണ്ടെത്തി. ഒരു കേസിന്റെ വാറന്റ് നടപ്പാക്കുവാന് ചെന്ന എസ്. ഐ. വിജയ കൃഷണനെയാണ് പ്രതി വെടി വെച്ച് കൊന്നത്.
പോലീസ് മുജീബിനെ പിടികൂടുവാന് വ്യാപകമായ തിരച്ചില് നടത്തി വരികയായിരുന്നു. ഇതിനിടയിലാണ് മുജീബും കുടുംബവും തക്കം പള്ളി എസ്റ്റേറ്റില് ഒളിച്ചിരി ക്കുന്നതായി അറിവു ലഭിച്ചത്. ടാപ്പിങ്ങ് തൊഴിലാളി കളാണ് ഇവരെ കണ്ടത്. ഇവര് തോട്ടമുടമ വഴി വിവരം അറിയിച്ചതിനെ തുടര്ന്ന് പോലീസ് പ്രദേശം വളഞ്ഞു തിരച്ചില് ആരംഭിച്ചു. പോലീസ് പിടിയ്ക്കും എന്ന് ഉറപ്പായപ്പോള് ഭാര്യയെ വെടി വെച്ച് കൊന്ന് മുജീബ് ആത്മഹത്യ ചെയ്തതാകും എന്നാണ് നിഗമനം. ഇവര്ക്കൊപ്പം ഉണ്ടായിരുന്ന കുട്ടികളെ കാട്ടില് നിന്നും കണ്ടെത്തി.
പാലക്കാട്: മലപ്പുറം വ്യാജക്കള്ള് ദുരന്തത്തെ തുടര്ന്ന് സംസ്ഥാനത്തെ പലയിടങ്ങളിലും കള്ളു ഷാപ്പുകള് അടച്ചു. മലപ്പുറം, തൃശ്ശൂര് തുടങ്ങി ചിലയിടങ്ങളില് സര്ക്കാര് നിര്ദ്ദേശ പ്രകാരം അടച്ചതു കൂടാതെ അബ്കാരികള് സ്വന്തം നിലയ്ക്കും ഷാപ്പുകള് അടച്ചിട്ടുണ്ട്. സംസ്ഥാനത്തിന്റെ വിവിധ ഭാഗങ്ങളിലേക്ക് കള്ളെത്തിയിരുന്നത് പാലക്കാട്ടെ ചിറ്റൂര് മേഖലയില് നിന്നും ആയിരുന്നു. അവിടെ ഏകദേശം ആയിരത്തിനടുത്ത് തോട്ടങ്ങളില് നിന്നും ചെത്തുന്ന കള്ളാണ് സംസ്ഥാനത്തിന്റെ ഭൂരിഭാഗം ഷാപ്പുകളിലേക്കും എത്തിയിരുന്നത്. മൂന്നു ലക്ഷത്തോളം ലിറ്റര് കള്ളാണ് ഇവിടെ നിന്നും വിതരണം ചെയ്തിരുന്നത്. എന്നാല് ചിറ്റൂരിലെ കള്ള് അന്യ ജില്ലകളിലേക്ക് കൊണ്ടു പോകുന്നതിനു നിയന്ത്രണം ഏര്പ്പെടുത്തിയതോടെ ഷാപ്പുകളില് കള്ളിനു ദൌര്ലഭ്യം ആയി. അതാതു ഷാപ്പിന്റെ പരിധിയില് ഉള്ള ചെത്തുകാര് അളക്കുന്ന കള്ള് ഒരു മണിക്കൂര് പോലും വില്ക്കുവാന് തികയില്ല. ചിറ്റൂര് കള്ളിന്റെ കൂടെ പിന്ബലത്തില് ആയിരുന്നു ഒട്ടുമിക്ക ഷാപ്പുകളും പ്രവര്ത്തിച്ചിരുന്നത്.
തൃശ്ശൂര്: സ്വരാജ് റൌണ്ടില് ഉണ്ടായ തീപിടിത്തത്തില് വ്യവസായ സ്ഥാപനങ്ങള് കത്തി നശിച്ചു. രണ്ടു നിലകളിലായി വലിയ തോതില് ലെതര് ഉല്പന്നങ്ങളുടെ സ്റ്റോക്കുള്ള ഒരു സ്ഥാപനത്തിനു തീപിടിത്തത്തില് വന് നാശ നഷ്ടമാണ് ഉണ്ടായിട്ടുള്ളത്. ഈ സ്ഥാപനത്തില് നിന്നും പടര്ന്ന തീ തൊട്ടടുത്ത തുണിക്കടയിലേക്കും സ്റ്റുഡിയോയിലേക്കും പടര്ന്നു. 
